Internet Awm Lohna Hmunah JW Satellite Channel A Thleng

Thla tin hian JW Broadcasting-a thlarau lam program leh video-te awm hun chu kan nghâkhlel thei hle a. Mahse, Africa rama kan unau tam takte chuan Internet-ah chûng programte chu an hmu ve thei lo. Engvângin nge?

Africa ram hmun tam tak chuan Internet a nei lo va. A neih theihna hmunah lah a muangin, a to thei hle. Entîr nân, Madagascar rama bial kantu pakhat chuan ṭum khat chu Internet café-ah thla tina chhuak ṭhîn JW Broadcasting a download a. Dollar 16 lai a sêng a, chu chu mi ṭhenkhatin chawlhkâr khat chhûnga an thawh chhuah aiin a tam!a

Hêng harsatnate tâwk chung hian, Africa rama mi maktaduai têlte chuan Internet hmang lovin, JW Broadcasting chu an ngaithla thei a ni. Engtin nge?

Kum 2017 aṭang khân, sub-Saharan Africa-a awmte tân JW Broadcasting chu satellite-television channel aṭanga pêk chhuah a ni a. He channel hi, ni khatah dârkâr 24, kâr khatah ni 7 chhûng ṭawng 16-in a thlâwna pêk chhuah a ni.

Hetianga ti thei tûr hian, Jehova Thuhretute chuan television broadcast pakhat hnênah satellite hmanga pe chhuak tûrin sum an pe a. An satellite hman chuan sub-Saharan Africa-a ram 35 vêl a huam a ni. An sum pêk chu thla khatah $12,000 chuang a ni a. A châng chuan, channel danga live-a thilthlengte pêk chhuah nân sum pêk belh a ni ṭhîn. Hei vâng hian mi a sâng têlte chuan inkhâwmpuite, leh branch tlawhna nêna inkûngkaih a bîk taka siam program-te an en theih phah a ni.

Thuhretu ni lote pawh telin, mi tam takin JW satellite channel chu an TV-ah an en a. Mahse, kan unaute zînga tam tak chuan satellite channel en tûra mamawh hmanruate leina tûr an nei lo va. Chuvângin, unaute’n JW Broadcasting an en theih nân, Kingdom Hall 3,670 chuangah satellite man thei hmanruate vuah a ni. Kingdom Hall-ah TV, a nih loh leh projector a awmsa a nih chuan, satellite man thei hmanrua chu a hmuna rawn dah man telin $70 vêl a ni a. A awmsa lo a nih erawh chuan hmanraw mamawh lei nân $530 thleng sên a ngai thei a ni.

Kan unaute chu, chu channel avâng chuan an lâwm hle a. Cameroon-a kohhran upa pakhat chuan heti hian a sawi: “Kan chhûngkaw tân thlalêra manna ang mai a ni,” tiin. Nigeria-a unaupa Odebode-a chuan: “He channel hi kan chhûngkuain chawlhkâr khatah vawi thum kan en a. Ka fapate pathum hian chûng hun chu an nghâkhlel thei hle. Hun dangah pawh JW channel en min dîl a ni,” tiin a sawi. Nigeria rama Rose-i pawhin: “JW satellite channel hian en lova ka awm theih loh chanchin thar channel a rawn thlâk chu ka lâwm hle. Chanchin thar ka en hian ka thil hmuhte hi en hrehawm ka ti thei lutuk, ka thisen pawh a sân phah thîn. Mahse, JW Broadcasting chuan min tichakin, min tihahdam hle! Ka channel duh ber a ni. Jehova hnên aṭanga malsâwmna ropui tak a ni,” tiin a sawi ve bawk.

Mozambique rama bial kantu pakhat chuan a biala Kingdom Hall-ahte chuan satellite channel man theihna tûr hmanruate vuah a nih thu a sawi a. Chûng kohhrana unaute chu satellite kaltlanga JW Broadcasting en tûrin a ṭan hma dârkâr khat emaw, a aia tamah emaw an thleng a ni.

Kum 2019-a South Africa, Johannesburg-a international inkhâwmpui-a Governing Body member pakhat thusawi leh thusawi pawimawh dangte chu, chu channel aṭang chuan hmun kuaah pêk chhuah a ni a. South Africa branch-a tualchhûng Broadcasting Department-a thawk Sphumelele-a chuan: “A hma chuan, thusawite chu Internet kaltlangin kan pe chhuak ṭhîn a. Mahse, chutiang tûr chuan internet connection a ṭhat leh data man sum tam tak sên a ngai a. JW satellite channel hi chu a tlâwm zâwk bâkah, a rin tlâk zâwk bâwk a ni,” tiin a sawi.

Khawvêl pum huap rawngbâwlna atâna phal taka in thawhlâwm thawhte avângin kan lâwm hle a, Africa-a kan unau tam takte chuan satellite kaltlangin JW Broadcasting an en theih phah a ni. Kan website donate.jw.org-a thawhlâwm thawh theih dân hrang hrangte hmanga in thawhlâwm thawhte avângin kan lâwm hle.