Mi Maktaduai Têlte’n An Hlâwkpui Remote Translation Office-te

Hunbi kima ṭawng lehlinna team-a tel zaa 60 chuangte chuan, branch office-ah ni lovin, remote translation office (RTO)-ah hna an thawk a. He ruahmanna hi engvângin nge a ṭangkai? Ṭawng letlingtute chuan RTO-a ṭha taka hna thawk thei tûrin eng hmanruate nge an mamawh? Ṭawng letlingtu team awmna hmun chuan an ṭawng lehlin ṭhat zâwngah eng nghawng nge a neih?

RTO chuan ṭawng letlingtute chu an ṭawng hmang tam takte awmna hmunah a awmtîr thei a. Low German ṭawng letlingtu Karin-i chuan: “RTO chu Mexico ram, Chihuahua state, Cuauhtémoc khawpuia kan insawn avângin Low German ṭawng chu kan ṭawng lehlinpuite nêna inbiak nân leh rawngbâwlnaa kan hman bâkah, thil kan lei hunah pawh kan hmang a. Kan ṭawng hmangte hual vêlin kan awm a ni. Hun rei tak chhûng kan hriat tawh loh ṭawng kauchheh mawi tak tak kan hria a, mite hman fo thu malte pawh kan hriat belh zêl a ni,” tiin a sawi.

Ghana rama Frafra ṭawng lehlinna team-a thawk James-a chuan branch-a Bethel chhûngkuate a ngaih châng a awm tih a sawi a. Mahse, heti hian a sawi belh a ni: “RTO-a thawh chu nuam ka ti a. Tualchhûng ṭawng hmannaa thu hrilh leh mite’n chanchin ṭha an chhân lêt dân hmuhna hian ka thinlung a khawih hle,” tiin.

Engtin nge kan unaute chuan RTO awmna tûr hmun chungchângah thu tlûkna an siam? U.S.A. New York, Warwick Worldwide Design/Construction Department-a thawk Joseph-a chuan heti hian a sawi, “Harsatna kan tawh pakhat chu, hmun ṭhenkhatah chuan electric, leh tui ṭha innghahna tlâk a awm lo va; ṭawng lehlin tûr thute dawng thei tûra mamawh Internet ṭha a awm lo bawk. Chuvângin, RTO hmun tûr ngaihtuah a nih hian ṭawng lehlin tûr hmanna hmun pakhat aia tam ngaihtuah a ni ṭhîn,” tiin.

A tlângpui thuin, a rang ber leh a man tlâwm ber chu ṭawng letlingtute awm theihna tûr Assembly Hall te, Kingdom Hall te, a nih loh leh missionary in, ṭawng lettute’n an pan theih tûr RTO atâna hman hi a ni a. Chutianga hman theih tûr in a awm lo a nih chuan, unaute chuan ṭawng letlingtute chên theihna leh hnathawh theihna tûr apartment-te lei tûrin phalna an dawng thei a. Ṭawng letlingtu team mamawhna a inthlâk a nih chuan, chûng inte chu awlsam takin a zawrh leh theih a, chumi sum chu mamawh zualnaah a hman theih a ni.

Hnathawk Zawm Zêl Tûra Thuamna

Kum 2020 rawngbâwl kum chhûng khân, RTO-tea hna chhunzawm zêl a nih theih nân dollar (U.S.) maktaduai 13 sên a ni a. Kan RTO-a team-te chuan computer te, software ṭha bîk te, awthunna tûr hmanruate, Internet te, leh hmanraw bulpuite an mamawh a. Entîr nân, a tlângpuiin mi pakhat hman tûr computer pakhat bunfel nân $750 (U.S.) vêl sên a ni. Computer-te chu sumdâwnna atana hman software leh ṭawng lettute hnathawha ṭanpuitu leh awlsam taka an ṭawng leh tûr an hmuh theihna tûr program Watchtower Translation System (WTS) hmanga thuam a ni.

Ṭawng lettute chuan office-a aw an thun theih nân awthunna hmanruate an dawng bawk a. COVID-19 hripui a lên ṭan khân hêng hmanruate hi a ṭangkai hle, a chhan chu ṭawng lettu tam takin awthunna hmanruate chu an inah an hâwn a, an ṭawng lehlinsa thuziakte leh video-te chu an thun zawm thei a ni.

Tualchhûnga tlâwmngaia inpete chuan thu leh hla lehlinsate chu an ennawnsak bâkah, RTO inte thawm ṭhatsakin an ṭanpui ṭhîn a. South Africa, Cape Town khawpuia Afrikaans RTO-a rawngbâwl, Cirstin-a chuan, “Thuchhuahtu tam takte leh regular pioneer-te chuan heta hna thawk tûr hian an thiamnate hman theihna hun remchâng an nei a ni,” tiin a sawi.

Tlâwmngaia inpete chuan chu chanvo chu an ngaihlu hle a. Chutianga ṭanpui ṭhîntu unaunu pakhat chuan RTO-a hnathawh chu “boruak thiang tak hîp” ang mai niin a sawi. Tualchhûng unau ṭhenkhat chuan awthunnaah an aw an thawh bawk a. Mexico ram, Veracruz state-a Totonac ṭawng letlingtu Juana-i chuan heti hian a sawi ve bawk: “Tûnah chuan kan ṭawng hmangte awmna khua kan hnaih tawh zâwk a, chuvângin audio leh video-te tâna awthuntu tûr unau tam zâwk awlsam takin kan nei thei tawh a ni,” tiin.

A nih, RTO-te chuan ṭawng lehlin ṭha zâwk ni tûrin an ṭanpui em? Chhiartu maktaduai têlte’n a ṭanpui thu an sawi. Democratic Republic of Congo-a Kongo team-a thawk Cédric-a chuan heti hian a sawi: “Kan unau ṭhenkhat chuan ‘Kongo Vênnainsâng,’ kan lehlin dân chu mi tam takte hman Kongo ṭawng hman tlânglâwn ang a nih loh avângin min lo phone ṭhîn a. Mahse, tûnah chuan kan thu leh hla chhuahte chu nî tina mite hman ṭhin, tûn lai Kongo anga leh a ni tawh tih an sawi,” tiin.

South Africa-a Xhosa team-a thawk Andile-a pawhin chutiang chhân lêtna ang tho chu a dawng a. Ani chuan, “Mi tam takin ṭawng lehlinah inthlâk danglamna awma an hriat thu min hrilh a ni. Vênnainsâng Sâp Ṭawnga chhiar ṭhîn naupangte pawhin tûnah chuan Xhosa ṭawngin an chhiar tawh a. A bîk takin, pângngai taka lehlin a nih avângin New World Translation siam ṭhat chu an duh lehzual a ni,” tiin a sawi.

RTO dinna, thawm ṭhatna, leh chuta thawkte tâna sênso zawng zawng chu khawvêl pum huap rawngbâwlna atâna thawhlâwm aṭanga hman a ni a, chutah chuan donate.jw.org aṭanga thawhte pawh a tel a ni.