Thlarau Lam Chaw Pe Chhuaktu Bâwm Te Tak Tê

Jehova Thuhretute chuan digital format-in tûn hma zawng aia nasain thlarau lam chaw an dawng a. Mahse, khawvêl hmun tam taka kan unaute chuan Internet man a to avângin an hmang pha lo va. Mi dangte chu Internet chak lohna hmun, a nih loh leh awm lohna hmunahte an awm a ni.

Chuti chung pawhin, kan unau tam takte chuan digital format-a thu leh hla chhuahte chu an download thei tawh! Engtin nge a nih theih?

JW Box hi Internet chak lohna hmuna awm kohhrante hnêna pêk bâwm te tak tê a ni a. Chutah chuan pâwn aṭanga lei router te, Bethel-a Computer Department siam chhuah software te, leh jw.org-a hmuh theih digital format-a thu leh hla chhuahte leh video-te a tel a ni. Bâwm pakhat hi U.S. $75 vêl a ni.

Kingdom Hall-ah unaute chuan an mobile wifi hmanga JW Box chu pawhin, thu leh hla chhuahte leh video-te an download thei a. Phone hlui tawh leh man tlâwmte pawhin an pawh thei a ni. Mahse, kohhranin Internet a hman theih loh chuan engtin nge JW Box chu a update reng theih ang? Branch chuan JW Box-a hman theih tûr U.S. $4 man vêl USB-ah jw.org-a thil tharte chu thunin a khât tâwkin a thawn ṭhîn a ni.

Engtin nge JW Box chuan kan unaute chu a ṭanpui? Democratic Republic of Congo-a awm pa pakhat, Nathan Adruandra-a chuan heti hian a sawi a ni: “‘Aw Jehova, . . . Ka Ring A Che’ tih leh Lota Nupui Hre Reng Rawh tih lemchan chu hun rei tak ata tawh download ka tum ṭhîn a. Mahse, ka download thei ngai lo, a beidawnthlâk khawp mai. Tûnah chuan ka phone-ah ka download thei tawh a, chu chuan nu leh pa kan nih anga ṭha lehzuala fate zirtîr tûrin min ṭanpui a ni,” tiin.

Nigeria rama JW Box rem khâwm tûra kohhrante ṭanpuitu unaupa chuan: “Unaute chuan JW Box hi Jehova hnên aṭanga thilpêk hlu tak niin an ngai a. Zirtîrna Hmanraw Bâwma thu leh hla chhuahte leh video-te awlsam taka an download theih tawh avângin an phûr hle,” tiin a sawi bawk.

Africa, Pacific Tuipuia Thliarkârte, leh South America-a kan unaute hnênah JW Box 1,700 chuang thawn a ni tawh a, kohhran tam tak hnêna thawn tûra ruahmanna siam mêk a ni bawk. Hêng atân hian khawi lam sum nge kan hman? Khawvêl pum huap thawhlâwmte kan hmang a, a tam zâwk chu donate.jw.org aṭanga kan dawn a ni. Phal taka in pêk thawhlâwmte avângin kan lâwm e.