Tlangvâl pakhatin Kingdom Hall-a inkhâwm tûrte a thlîr

ṬHALAITE ZAWHNA

Engvângin Nge Kingdom Hall-ah Kan Inkhâwm?

Jehova Thuhretute chu chawlhkâr tin vawi hnih, Kingdom Hall tia koh an biakna hmunah an inkhâwm ṭhîn a. Chutah chuan eng thil nge thleng a, chuta tel chu engtin nge i hlâwkpui theih?

Kingdom Hall-ah eng nge thleng ṭhîn?

Kingdom Hall chu Bible zirtîrna ṭangkai tak zirna hmun a ni a. Chu inkhâwma telna chuan . . .

Pathian chungchâng thutak hre tûrin a ṭanpui thei che.
tûn laia thilthlengte thlen chhan hre thiam tûrin a ṭanpui thei che.
mi ṭha zâwk ni tûrin a ṭanpui thei che.
ṭhian ṭha berte chhar tûrin a ṭanpui thei che.

I lo hre tawh em? Jehova Thuhretute inkhâwmna hmun chu Pathian Ram chungchâng sawihona hmun ber a nih avângin Kingdom Hall tia koh a ni.—Matthaia 6:9, 10; 24:14; Luka 4:43.

Engvângin nge i inkhâwm ang?

I thu hriatte chuan a ṭanpui ang che. Jehova Thuhretute inkhâwmnaa Bible thu bul sawihote chuan “finna nei” tûrin a ṭanpui ang che. (Thufingte 4:5) Chumi awmzia chu, Bible chuan i nuna thu tlûkna ṭhate siam tûrin a ṭanpui thei che tihna a ni. Nuna zawhna pawimawh tak tak chhânna a pe thei bawk che a, chutah chuan hêngte hi a tel a ni:

A hnuaia thupuite hi kan chawlhkâr tâwp inkhâwma thusawi thupui ṭhenkhat mai a ni:

Engvângin Nge Bible I Inkaihhruaitîr Ang?
Mangan Nîah Khawi Aṭangin Nge Ṭanpuina I Hmuh Theih Ang?
Pathian Ramin Tûna Min Tihsakte Chu.

“Ka school kalpui pakhat a rawn inkhâwm a. Kan chhûngkaw bulah a ṭhu a, kan lehkhabu kan entîr ve a. Inkhâwm bânah, zawhna leh chhânna huna mi dangte chhânna pêkin a rilru a khawih thu min hrilh a ni. Chu bâkah, an biak inah chuan kan neih ang zir tûr thu leh hlate an neih ve loh thu a sawi bawk.”—Brenda-i.

I lo hre tawh em? Kingdom Hall-ah luh man a awm lo va, thawhlâwm khawn a awm lo bawk.

Mi dangte nêna inkawmna chuan a tichak ang che. Bible chuan Kristiante an inkhâwm a ngaih chhan pakhat chu “infuih tawn” tûrin a ni tih a sawi a. (Hebrai 10:24, 25) Mahni hmasialna khawvêlah hian, Pathian leh mi dang ngaihsak zâwktute nêna inkhâwmho chu a hahdamthlâk hle.

“Ni lênga hnathawh hnu chuan ka chau thei hle a; mahse, Kingdom Hall-a unaute ka hmuh hian ka hahdam huai ṭhîn a. Inkhâwm bâna ka haw chuan ka hlimin, a tûk atân chakna ka nei lêt leh ṭhîn a ni.”—Elisa-a.

I lo hre tawh em? Khawvêl pumah Jehova Thuhretute kohhran 1,20,000 chuang a awm a, hmun 60,000 chuangah an inkhâwm a ni. Inkhâwma tel an pun chhoh zêl avângin kum tin chawh rualin Kingdom Hall 1,500 vêl sak belh a ni.a

I ṭhiante sawi chu

“High school ka kal laiin, ka school kalpui pakhat hi a rawn inkhâwm ve zeuh zeuh ṭhîn a, a pui a pangte’n Bible an zirho a hmuh chuan ṭha a ti hle a ni. Tûn hnaiah ka hnathawhna pu chu a rawn inkhâwm a, Bible kan hman nasatzia a hmuh chuan mak a ti hle. Inkhâwm a ngaihhlutzia ka hmuhna chuan, keipawh ngaihhlutna min neihtîr lehzual a ni!”—Jessica-i.

“Inkhâwmte chuan nî tina ka lungkhamna neihte min chhâwk a. Nun lungawithlâk neih theih dân te, mi ṭha zâwk nih theih dân te, leh thil dang tam tak min zirtîr a ni. Kingdom Hall ka chhuahsan hian chak zâwk leh hahdam sawtin ka inhre ṭhîn.”—Timothy-a.

“Inkhâwm tûra ka sâwm pa pakhat chuan inkhâwm bânah tihian a sawi: ‘In rinna a dik lo tih finfiah tuma rawn inkhâwm ka ni a. Mahse, ka rinna a dik lohzia ka hmu chhuak!’ tiin. Jehova Thuhretute hawihhâwmnain a hneh hle bawk. Ani chuan: ‘Nangniho hi ka vawi khat hmuhna chauh mah ni ula, kum tam tak inhre tawh ang maiin min cheibâwl a ni!’ ” tiin a sawi a ni.—Jacob-a.

“‘Inkhâwm bân veleh ka hâw nghâl ang,’ tiin ka ngaihtuah thîn a. Mahse, inkhâwm chhûngin chu ka ngaihtuahna chu a reh daih a. Inkhâwm bâna unaute ka biak hian, a tîra ka ngaihtuahna chu ka rilruah pawh a awm tawh lo. Inkhâwm hi awm lo se chuan, tûna ka neih ṭhian ṭha tak takte hi ka nei lo vang.”—Madison-i.

a Inkhâwmna hmun hriat nân, “Jehova Thuhretute Kohhran Inkhâwm” tih phêkah kal la, “Inkhâwmna Hmun Hnai Ber Zawnna,” tihah lût ang che.