ṬHALAITE ZAWHNA
Engvângin Nge Ka Ṭawngṭai Ang?
Ngaih dân lâkkhâwmna pakhat chuan America rama ṭhalai zâa 80-te chu an ṭawngṭai ṭhîn a; mahse, chûng zînga a zât ve chauh chu nî tina ṭawngṭai ṭhîn an ni, tiin a târ lang a. An zînga ṭhenkhat chuan heti hian an ngaihtuah ngei ang: ‘Ṭawngṭaina hi rilru nawmna mai nge ni a, chu aia tam zâwk?’ tiin.
Ṭawngṭaina chu eng nge ni?
Ṭawngṭaina chu engkim Siamtu nêna inbiak pawhna a ni a. Chumi awmzia chu han ngaihtuah teh! Jehova chu kawng engkimah mihringte aiin a ropui zâwk a, chutih rualin “ani chuan min hlat lo ṭheuh” a ni. (Tirhkohte 17:27) Chu bâkah, Bible-ah he sâwmna ropui tak hi a chuang a ni: “Pathian hnaih rawh u, tichuan anin a hnaih ang che u,” tih hi.—Jakoba 4:8.
Engtin nge Pathian i hnaih theih ang?
Kawng khat chu ṭawngṭai a ni a—chutiang chuan Pathian i bia a ni.
Kawng dang chu Bible zirna a ni a—chutiang chuan Pathiain a “bia” che a ni.
Chutianga inbiak tawnna—ṭawngṭaina leh Bible zirna—chuan Pathian nêna inṭhianna nghet tak nei tûrin a ṭanpui ang che.
“Jehova biak—Chungnungbera nêna inbiak pawhna—chu mihringte neih theih chanvo ropui ber pakhat a ni.”—Jeremy-a.
“Jehova hnênah ka rilrua awmte ṭawngṭaia ka hrilh hian amah ka hnaih lehzual.”—Miranda-i.
Pathianin a ngaithla em?
Pathian i ring chung pawhin—a hnêna i ṭawngṭai chung pawhin—anin a ngaithla tak tak che tih rin chu a harsa mai thei. Mahse, Bible chuan Jehova chu “ṭawngṭaina Ngaithlatu” tiin a ko va. (Sâm 65:2) I ‘manganna zawng zawng ama chunga nghat vek’ tûrin a sâwm hial che a ni. Engvângin nge? ‘A ngaihsak ṭhin che avângin.’—1 Petera 5:7.
Ngaihtuah tûr: I ṭhian ṭhate biak ziah nân hun i hmang ṭhîn em? Chutiang chuan Pathian pawh i be ziah thei a. A hming Jehova lamin ṭawngṭaiin be ziah ang che. (Sâm 86:5-7; 88:9) A nihna takah chuan, Bible chuan ‘bâng lova ṭawngṭai’ tûrin a sâwm che a ni.—1 Thessalonika 5:17.
“Ṭawngṭaina hi ka Pa vâna mi nêna kan inbiakna a ni a, a hnênah ka thinlunga awm zawng zawng ka phawrh ṭhîn.”—Moises-a.
“Ka nu, a nih loh leh ka ṭhian ṭha tak ka bia ang maiin, Jehova hnênah ka rilrua awmte ka phawrh.”—Karen-i.
Eng chungchângah nge ka ṭawngṭai theih?
Bible chuan: “Engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin a sawi.—Philippi 4:6.
Chu chu i harsatnate ṭawngṭainaah i telh thei tihna a ni em? Ni e! Dik takin, Bible chuan: “I rit phurh chu LALPA chungah nghat la, tichuan anin a tichak ang che,” tiin a sawi a ni.—Sâm 55:22.
Pathian hnêna i ṭawngṭai hunah i harsatnate chauh lo pawh i hrilh tûr a ni tih a chiang hle. Ṭhalai Chantelle-i chuan, “A ṭanpuina ka mawmawh hun chauhvah Jehova bia ka nih chuan, chu chu inṭhian ṭhatna a ni lo vang. Lâwmthu kan sawi hmasa thei a. Lâwmthu sawina tûr tam tak a awm a ni,” tiin a sawi a ni.
Ngaihtuah tûr: I nuna i lâwmna ṭhenkhat chu engte nge ni? Vawiin atân Jehova chunga i lâwmna tûr chhan pathum i ngaihtuah thei em?
“Thil mâwl mang tak, pangpâr mawi tak ngaihhlutna ang chite pawhin Jehova hnêna lâwmthu sawi tûrin min chêttîr thei.”—Anita-i.
“I rilru la tak thil siam, a nih loh leh i rilru khawihtu Bible châng pakhat ngun takin chhût la, chumi avâng chuan Jehova hnênah lâwmthu sawi ang che.”—Brian-a.