Pathian Chu Hmun Tinah A Awm Em?
Bible chhânna
Pathian chuan engkim a hmu thei a, a duhna hmun apiangah thil a tithei a ni. (Thufingte 15:3; Hebrai 4:13) Mahse, Bible chuan Pathian chu hmun tina awm ang leh thil engkima awm angin a zirtîr lo. Chu aiin, ani chu thlarau mi a ni a, awmna hmun bîk nei a ni tih a târ lang zâwk a ni.
Pathian pianhmang: Pathian chu thlarau mi a ni a. (Johana 4:24) Mihringte tân hmuh theih a ni lo. (Johana 1:18) Bible-a chhinchhiah inlârnaa Pathian hmuh a nih apiangin, ani chu awmna hmun bîk nei nia sawi a ni fo va. Hmun tina awm anga sawi a ni ngai lo.—Isaia 6:1, 2; Thu Puan 4:2, 3, 8.
Pathian awmna hmun: Bible sawi dânin Pathian chuan ‘chênna hmun vân’ a nei a. (1 Lalte 8:30) A awmzia chu Pathian chu he lei khawiah mah a awm lo tihna a ni. Bible chuan thlarau thil siam vântirhkohte chu “LALPA hmaa an inlan” ṭhin thu a sawi a, chu chuan Pathianin awmna hmun bîk a nei tih a târ lang a ni.—Joba 1:6.
Pathian chu hmun tina a awm loh chuan, a mi mal takin min ngaihsak thei tak tak ang em?
Thei e. Pathian chuan mi mal tinte hi a ngaihsak a. Vânah awm mah se, leia awm tih tak zeta amah tihlâwm duhtute chu a hriain, an tân thil a ti ṭhîn a ni. (1 Lalte 8:39; 2 Chronicles 16:9) Jehova’n thinlung dik tak pua amah betute a ngaihsakzia a târ lan dân chu ngaihtuah rawh:
I ṭawngṭai hunah: Jehova’n i ṭawngṭaina chu chawp leh chilhin a hre nghâl a ni.—2 Chronicles 18:31.
I lunghnual hunah: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn.”—Sâm 34:18.
Kaihhruaina i mamawh hunah: Jehova chuan a Thu, Bible hmangin “i kalna tûr kawng” a entîr ang che.—Sâm 32:8.
Pathian chu hmun tinah a awm tih chungchânga ngaih dân dik lo
Ngaih dân dik lo: Pathian chu thil siam engkimah a awm vek.
Thu dik: Pathian chu leiah leh tisa khawvêl hmun dang khawiah mah a awm lo. (1 Lalte 8:27) Arsite leh thil siam dangte’n “Pathian ropuizia chu a hriattîr,” tih chu a dik ngei mai. (Sâm 19:1) Mahse, lemziak thiam chu a lem ziakah a awm ngai lo ang bawkin, Pathian pawh a thil siamah a awm lo. Chutichung pawhin, lemziak chuan a ziaktu chungchâng min hriattîr thei a. Chutiang bawkin, hmuh theih khawvêl hian a Siamtu thiltihtheihna te, finna te, leh hmangaihnate ang chi ‘hmuh theih loh a miziate’ min hriattîr thei a ni.—Rom 1:20.
Ngaih dân dik lo: Pathian tân engkim hre tûr leh thiltithei ber ni tûrin hmun tina a awm a ngai.
Thu dik: Pathian thlarau thianghlim, a nih loh leh a chakna chu hnathawktu Pathian thiltihtheihna a ni a. Pathian chuan a thlarau thianghlim hmangin râl khat aṭangin khawi hmunah leh eng hunah pawh thil engkim a hre theiin, a tithei bawk a ni.—Sâm 139:7.
Ngaih dân dik lo: Sâm 139:8 hian: “Vânah han lâwn ila, chutah chuan i awm si a: Seol-ah mutna siam ila, ngai teh, chutah chuan i awm bawk si a,” tia a sawi avângin Pathian chu hmun tinah a awm tih a zirtîr.
Thu dik: He Bible châng hi Pathian awmna hmun chungchâng sawina a ni lo. Pathian tân thil min tihsak phâk lohna hmun a awm lo tih hla thu hmanga min zirtîrna mai a ni.