Pathian Hi Mi Tak Tak A Ni Em?

Chhân dân tlângpuite:

◼ “Ani chu khawi hmunah pawh a awm vek a. Thli ang mai a ni.”

◼ “Ani chu mi anga sawi theih loh finna emaw, thiltihtheihna thahrui emaw a ni.”

Eng nge Isua’n a sawi?

◼ “Ka Pa inah awmna tam tak a awm.” (Johana 14:2) Isua’n Pathian chu entîr nei in emaw, awmna emaw nei angin a sawi.

◼ “Kei, Pa hnên ata lo chhuaka khawvêla lo kal ka ni; khawvêl kalsana Pa hnêna hâwng leh tûr ka ni.” (Johana 16:28) Isua’n Pathian chu awmna hmun nghet nei Mi tak tak a ni tih a ring.

ISUA’N Pathian chu ruangâm nei lo, chakna thahrui angin a sawi lang ngai lo va. Chu mi nêna in kalh takin, Pathian chu biain, a hnênah a ṭawngṭai zâwk a. Ani chuan Jehova chu ka Pa vâna mi tiin a ko fo va, chu chuan Pathian nêna an inlaichînna ṭha tak chu a târ lang a ni.—Matthaia 6:14, 26, 32.

“Tuman eng lai mahin Pathian an hmu lo,” tih leh “Pathian chu Thlarau a ni,” tih chu a dik ngei mai. (Johana 1:18; 4:24) Mahse, hei hi Pathian chuan taksa leh pianhmang engmah a nei lo tihna a ni lo. Bible chuan: “Mihring lam taksa a awm chuan thlarau lam taksa pawh a awm ang,” tiin a sawi. (1 Korinth 15:44) Chuti a nih chuan, Pathian Jehova chuan thlarau lam taksa a nei em?

Nei e. Isua kaihthawh a nih khân, ani chu “Pathian hmaah kan aia ding tûrin vânah ngei a lût ta zâwk a.” (Hebrai 9:24) Hei hian Pathian chungchângah thu pawimawh tak pahnih min zirtîr a ni. Pakhatnaah chuan, ani chuan chênna hmun a nei a. Pahnihnaah chuan, ani chu hmun tina awm sawifiah theih loh chakna thahrui mai ni lovin, Mi tak tak a ni.

A nih leh, engtin nge Pathianin hmun tina thil awmte chu a thunun theih? Pathian chuan a thlarau thianghlim, a nih lo leh thiltihtheihna chevêl reng chu khawi hmunah pawh a tîr chhuak thei a ni. A fa hnêm tûr leh ṭanpui tûra a kut petu Pa ber angin, Pathian chuan a thlarau thianghlim chu a thiltum hlen nân a pe chhuak a ni.—Sâm 104:30; 139:7.

Pathian chu Mi tak tak a nih avângin mizia a nei a; duhzâwng leh duh lohzâwng, leh rilru veizâwng thlengin a nei a ni. Ani chuan a mite a hmangaih a, a hnathawhah a lâwm a, milem biakna a hua a, suahsualna chuan a rilru a tina bawk tih Bible chuan min hrilh a. (Genesis 6:6; Deuteronomy 16:22; 1 Lalte 10:9; Sâm 104:31) Bible sawi dân chuan Pathian chu Pathian hlim a ni. Kan thinlung zawng zawngin Pathian kan hmangaih thei tih Isua’n a zirtîr pawh hi a mak lo ve!—Marka 12:30.a (w09 2/1)

[Footnote]

[Phêk 5-naa thu lâk chhuah]

A fa hnêna ṭanpuina petu Pa ber angin, Pathian chuan a thlarau thianghlim chu a thiltum hlen nân a pe chhuak