Sakhua Zawng Zawng A Inang Vek Em? Pathian Hnênah Min Hruai Thleng Vek Ang Em?
Bible Chhânna
Sakhua zawng zawng a inang vek lo. Bible-ah hian Pathian tilâwm lotu sakhaw tam tak a chuang a. Chûngte chu a chhan bulpui pahniha ṭhen theih a ni.
A chhan bulpui 1-na: Pathian dik lote biakna
Bible-in pathian dik lote biak chu “engmah lo,” “tlâktlai lo,” leh “hlâwkna nei lo,” tiin a târ lang a. (Jeremia 10:3-5; 16:19, 20) Pathian Jehovaa chuan hmân lai Israelte hnênah: “Keimah lo chu, Pathian dang rêng rêng i nei tûr a ni lo,” tiin thu a pe a ni. (Exodus 20:3, 23; 23:24) Israel mite’n pathian dangte an biak khân, “LALPA thin chu a alh” a ni.—Numbers 25:3; Leviticus 20:2; Rorêltute 2:13, 14.
Chûng “pathian hming pute” biakna chungchânga Pathian rilru put hmang chu a la ngai reng a. (1 Korinth 8:5, 6; Galatia 4:8) Amah chibai bûk duhtute chu sakhaw dik lo vuantute zînga tel lo tûra thu pein, heti hian a hrilh a ni: “An zîng ata lo chhuak ula, a hrangin awm rawh u,” tiin. (2 Korinth 6:14-17) Sakhua zawng zawngte hi inang vekin, mite chu Pathian hnênah hruai thleng vek ta se, engvângin nge Pathianin chutiang thu chu a pêk tehlul ang?
A chhan bulpui 2-na: A pawm loh zâwnga Pathian dik biakna
A chângin Israel mite chuan pathian dik lote hnên aṭanga lo kal thurin leh thiltihte hmangin Pathian an bia a; mahse, Jehova’n chutianga biakna dik lo nêna chawhpawlha amah biak tum chu a hnâwl a ni. (Exodus 32:8; Deuteronomy 12:2-4) Isua chuan a hun laia sakhaw hruaitute chu Pathian an biak dân avângin a dem a; anni chuan sakhaw mi tak angin inlantîr mah se, vervêk takin ‘dân thu pawimawh zâwk—felna te, khawngaihna te, rinawmna te chu—an ngaihthah’ a ni.—Matthaia 23:23.
Tûn laiah pawh thutaka innghat sakhaw pakhat chauhvin mite chu Pathian hnênah a hruai thleng a ni. He thutak hi Bible-ah kan hmu thei a. (Johana 4:24; 17:17; 2 Timothea 3:16, 17) A nihna takah chuan, Bible thu nêna inkalha zirtîrtu sakhuate chuan mite chu Pathian an hlattîr zâwk a ni. Mite chuan—Trinity, thlarau thi thei lo, chatuan hremnate pawh tiamin—zirtîrna tam takte chu Bible zirtîrna emaw an ti a. Chûng zirtîrna chawilârtu biakna chuan Pathian thil phûtte chu sakhaw thurochhiah nêna a thlâk avângin a “a thlâwn,” a nih loh leh a ṭangkai lo a ni.—Marka 7:7, 8.
Pathian chuan sakhaw hruaitu vervêk takte chu a ten a. (Tita 1:16) Sakhuana chuan dân leh dûn leh sakhaw lam thilahte chauh ni lovin, mite nunah nghawng ṭha neiin Pathian nêna inhnaih lehzual tûrin a ṭanpui tûr a ni. Entîr nân, Bible chuan: “Tu pawh sakhaw ngaihsak nia inringa a lei vêng ṭha si lo va, mahni thinlung inbum zâwk chu, chu mi sakhaw biak dân chu eng mah a ni lo ve. Kan Pathian leh Pa mithmuha sakhaw biak dân thianghlim leh sual tel lo chu hei hi a ni, fahrah leh hmeithaite an hrehawm laia kan leh khawvêl bawlhhlawh kai lova insiam ṭhin hi,” tiin a sawi a ni. (Jakoba 1:26, 27) King James Version chuan he biakna thianghlim sawi nân hian “sakhaw thianghlim” vervêkna tel lo tih ṭawngkam a hmang a ni.