Nun Awmzia Chu Eng Nge Ni?

Bible chhânna

Nun awmze chungchânga zawhna hi, Engvângin nge kan lo awm? Ka nunin thiltum a nei em? tih ang chi kawng tam taka zawh a ni thei a. Bible chuan kan nunin a tum chu Pathian nêna inṭhianna neih a ni tih a târ lang a. Hêng thutak bulpui ṭhenkhat chungchâng Bible-in a târ lante hi lo ngaihtuah ta ila.

• Pathian chu min Siamtu a ni. Bible chuan: “Min siamtu chu [Pathian] chu a ni a, ama ta kan ni,” tiin a sawi.—Sâm 100:3; Thu Puan 4:10, 11.

• Pathian chuan keini pawh tiamin a thil siam zawng zawngte tân thiltum a nei.—Isaia 45:18.

• Pathian chuan “thlarau lam mamawh nei nia inhriatna” neiin min siam a, chutah chuan nun awmzia hriat châkna pawh a tel a ni. (Matthaia 5:3, New World Translation) Ani chuan chu kan châkna chu min phuhrûksak a duh bawk.—Sâm 145:16.

• Pathian nêna inṭhianna nei chhovin kan thlarau lam mamawh kan phuhru a. Mi ṭhenkhatin Pathian ṭhian nih chu thil theih loh angin ngai mah se, Bible chuan: “Pathian hnaih rawh u, tichuan anin a hnaih ang che u,” tiin min fuih a ni.—Jakoba 4:8; 2:23.

• Pathian ṭhian ni tûr chuan kan tâna a thiltumte nêna inmila kan nun a ngai a. Bible-in chu thiltum chu Thuhriltu 12:13-ah: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin a sawi.

• Pathianin hrehawm tawrhna a nuai bo va, amah betu a ṭhiante hnêna chatuan nunna a pêk hunah kan tâna a tîra a thiltum chu a kimin kan chên thei tawh ang.—Sâm 37:10, 11.