Bible-in Tattoo Chungchâng Eng Nge A Sawi?
Bible chhânna
Bible chuan tattoo chungchâng hi Leviticus 19:28-ah, Mizo King James Bible: “Pangtia reh thei lova ziah rân te i siam tûr a ni hek lo,” tiin vawi khat chauh a târ lang a. He thupêk hi Pathianin Israel hnamte hnêna a pêk a ni a, an chhehvêl hnam, an hming, a nih loh leh an pathiante hming an taksaa ziak râng ṭhînte laka tihhran nân a ni. (Deuteronomy 14:2) Israelte hnêna Dân pêkin Kristiante chu phuar tawh lo mah se, he dân phêna awm thu bul hian ngun taka ngaihtuah a phû a ni.
Kristianin tattoo a chhu, a nih loh leh a taksa a ziak râng tûr a ni em?
A hnuaia Bible chângte hian hemi chungchâng chhût ngun tûrin a ṭanpui thei che:
“Hmeichheho pawh . . . inchawih tâwkin inchei sela.” (1 Timothea 2:9) Chu thu bul chu mipa leh hmeichhiate tân a ni ve ve a. Mi dangte rilru chu kan zahsak tûr a ni a, ṭûl lo takin an rilru lâk kan tum tûr a ni lo.
Ṭhenkhat chuan an nihna, a nih loh leh an zalênna târ lan duh vâng te, mi dangte chuan an taksa tidanglam tûra dikna an neihzia târ lan an duh vângtein tattoo an chhu a. Mahse, Bible chuan Kristiante chu: “Inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u,” tiin a fuih a ni. (Rom 12:1) Tattoo inchhut tumna i nei a nih chuan i “ngaihruat thiamna, NW” hmangin ngun takin chhût ang che. Thil chîn thar zui i duh vâng emaw, pâwl pakhat mi leh sa nih i duh vâng emawa tattoo chhu i nih chuan, i rilru a inthlâk hnuah pawh i tattoo chu a reh ve thei tawh lo tih hre reng ang che. I rilru put hmang bihchianna chuan thu tlûkna fing siam tûrin a ṭanpui thei che.—Thufingte 4:7.
“Mi taima ngaihtuahna chuan neihnunna lam chauh a pan a, mi thatchhia erawh chuan tlâkchhamna lam chauh a pan a ni.” (Thufingte 21:5) Tattoo chhu tûra thu tlûkna chu chawp leh chilha siam a ni ṭhîn a; mahse, chu chuan mi dangte nêna inlaichînna leh hnathawhnaah nghawng thui tak a nei thei. Chu bâkah, tattoo tihreh leh man chu a a to mai bâkah, a na duh hle bawk. Zir bingna leh tattoo tihreh hna thawkte chuan tattoo nei tam takte’n a hnuah tihreh an duh leh thu an sawi tih a târ lang a ni.