ṬHALAITE ZAWHNA
Engvângin Nge Ka Nu leh Pate Hian Hun Nuam Tak Ka Hman An Phal Loh?
I ṭhiante chuan chawlhkâr chhûnga neih tûr party-a lo tel ve tûrin an sâwm che a. I kal theih dâwn leh dâwn loh i nu leh pate i han dîl chuan “kal lo vang,” an ti tawp mai a. Chu chu mak i ti hran lo. Phalna i dîl hnuhnûng ber ṭum pawh khân chutiang tho chuan an chhâng che a ni.
He thuziakah hian
Engvângin nge ka nu leh pate hian an phal loh reng ni?
I nu leh pate’n i thil dîl apiang an phal lo ṭhîn a nih chuan, hun nuam tak i hman an duh lo niin i ngai mai thei a.
Tleirâwl Marie-i’n phone a dawn hmasat ber ṭumin chutiang chuan a ngai a. Ani chuan: “Ka pa chuan App ka download tûr te, ka mi biak tûr te, eng chen nge ka biak tûrte thlengin min khuahkhirh a. Chutih rualin, ka ṭhiante erawhin an duh apiang an ti thei!”
Ngaithuah tûr: Marie-i pa chuan a fanu chu hun nuam tak hmantîr a phal lo tihna a ni em? Eng thil dangte nge a pa chuan a hlauhthâwn mai theih?
Tlân chak theih zâtah phal chin siamna chuan eng emaw chen i zalênna a dang ang; mahse, chu chuan thil hlauhawm thleng thei lakah a vênghim ang che; chutiang bawkin nu leh pate siam dânte pawh a ni
Hei hi tihtum chhin rawh: Nu leh pa dinhmunah han awm chhin la; tichuan, i fa chuan tûn mai khân phone call a dawng a. Eng hlauhthâwnna nge i neih mai theih? I fa i vênhim i duh avângin eng dânte nge i siam mai theih? I fa chuan hun nuam tak hman i phal lo anga a puh che a nih chuan eng nge i sawi ang?
“Ka pa chuan, ‘I nu leh pa rilru awm dân tûr chu han mitthla chhin teh,’ tiin a sawi ṭhîn.” Chu chuan an dân siamte hlutna mai ni lo vin, chutianga an siam chhante hre thiam tûrin min ṭanpui a. Fate lo nei ta ila, ka pain ka laka a phût ang chiah hi ka fate laka ka beisei ngei ang.”—Tanya-i.
Engtin nge ka nu leh pate hnên aṭang hian an phalna ka hmuh theih ang?
“I ân chiam chiam avângin thil a fel chuang lo vang—chu chuan nang leh i nu leh pate chu a tihrehawm mai mai ang. I ân chiam chiam ṭhin chuan, i nu leh pate’n la puitling lo leh zalênna pêk belh chi loh niin an thlîr ang che.”—Richard-a.
“Dân siam a nih hian chhan ṭha a awm fo ṭhîn a. Ka nu leh pa hian hun nuam tak ka hman an khap bur a ni lo; dik taka hun ka hman min duhsak mai zâwk a ni—harsatna min thlen lo tûr hun hman dân chu.”—Ivy-i.
Bible thu bul: “Mi â chuan a thinur thu zawng zawng a sawi chhuak a, mi fing erawh chuan an thup a, an ngawihpui ṭhîn.”—Thufingte 29:11.
“Ka phone hman dân chungchânga an dân siamte chu ka bawh pelh hret hret a. Zân tlaiah ka ṭhiante hnênah message ka thawn ru ṭhîn a, a nih loh leh download an phal loh App-te chu ka download a. A tâwpah, ka pa chuan ka thiltihte chu a hre ta a, min rin tawh loh avângin nasa lehzualin ka chungah khuahkhirhna a siam ta a ni. Chuvângin, khuahkhirhnate bawh pelh tum chu thil ṭha a ni hauh lo.”—Marie-i.
“Dawhthei rawh. I nu leh pa tân an dân siamte siamrem leh tûr chuan hun pêk deuh a ngai thei a; mahse, an dân siamte i zâwm tih an hmuh chuan, zalênna tam zâwk an pe duh ngei ang che.”—Melinda-i.
Bible thu bul: “Engkimah in nu leh in pate thu zâwm rawh u.”—Kolossa 3:20.
“Thil intihluihtîrna chuan i nun chu a tinuam chuang lo vang.”—Natalie-i.
“Nu leh pate chuan ngaihtuahna fel tak nei tûrin min duh a. Chuvângin, ka nu leh pate ka biak hian, an hnêna pangchang chunga ngen aiin, thil nih dân dik tak sawi ka tum zâwk ṭhîn. Chutianga ka tih chhuan, ka hlawhtling zâwk fo ṭhîn bawk.”—Joseph-a.
Bible thu bul: “I nu leh i pa chawimawi rawh.”—Ephesi 6:2.