Ka Nu leh Pate Inṭhen Ta Se, Engtin Nge Ni Ang?

Ṭhalaite rilru hahna thlentu lian tak pakhat chu an nu leh pate inṭhenna hi a ni a. Engtin nge lungngaihna chu i hmachhawn theih ang?

He thuziakah hian

• Thil pathum i tih loh tûrte

• Thil pathum i tih theihte

• I ṭhiante sawi chu

Thil pathum i tih loh tûrte

1. Mahni indem

“Ṭum khat chu, ka nuin amah leh ka pa inkâra buainate chu ka pian tirh aṭanga inṭan a nih thu min hrilh a; chuvângin, ka nu leh pate inṭhen chhan chu keimah avâng niin ka ngai.”—Diana-i.

Hei hi hre reng rawh: I nu leh pate inṭhen chhan chu nangmah vâng a ni lo. An inṭhen chhan chu an pahnih inkâra buaina awm vâng a ni. An buaina chu i thlentîr a ni lova, i chinfelsak thei lo bawk. Nupa kâr buaina chinfel chu an mawhphurhna a ni.

2. Thinrimna pai rengna

“Ka pa chu ka nu chungah a rinawm loh avângin ka thin a rim hle a. Amah rin leh chu harsa ka ti hle.”—Rianna-i.

Hei hi hre reng rawh: I nu leh pate inkâra thilthleng avângin i thinrimin, i hrilhhai pawh a ni thei a. Mahse, thinrimna pai reng chu a ṭha lo. Taksa lam leh rilru lamah chhiatna a thlen thei che a ni. Chuvângin, thinrimna pai reng chu tûr eituin mi dang chunga nghawng a neih a beisei ang hi a ni tih a ni ṭhîn.a

3. Inneihna hlimawm nei thei lo tûra in ngaihna

“Ka pa thiltih ang chu ka ti ve ang tih ka hlau hle a. Pasal ka neih a, fate ka neih chuan, ka nu leh pate ang bawka inṭhenna thlentu thil ka tih ve ka hlau a ni.”—Jessica-i.

Hei hi hre reng rawh: I nu leh pate inneihna a hlawhchham vâng maiin, in inneihna chu a hlawhchham ve dâwn tihna a ni lo. A nihna takah chuan, i nu leh pate thiltawn aṭangin zir tûr pawimawh takte i zir thei a. Entîr nân, i mize duh zâwngte chu i kawppui tûrin a neih leh neih loh i hre thei lehzual ang. I nu leh pate inṭhenna chuan nupui emaw, pasal emaw ṭha lehzual ni tûra neih ngai miziate nei chho tûrin a ṭanpui thei bawk che.

Thil pathum i tih theihte

1. Inbiakpawhna nei rawh. A thim zâwnga thil ngaihtuah a, sawi chhuak lotu chu zu leh ruihhlo hman sualna ang chi, mahni chhiatna an inthlen duh ṭhîn. Chutiang kawng zawh ai chuan, a hnuaia thilte hi tichhin ang che:

I nu leh pate be rawh. I nu leh pate’n an buainaa hnuh luh che an tum a nih chuan, chu chuan a nghawng dân che chu khauh tak leh zaidam tak chung siin hrilhfiah ang che. Hmaichhana biak harsa i tih chuan, an hnênah lehkha ziakin i hrilh thei ang.

Ṭhian rin tlâk tak be rawh. I thu sawi ṭha taka ngaithlatu tu emaw neih chu a ṭangkai hle thei a. Bible chuan “ṭhian chuan englai pawhin a hmangaih reng a, mangan nî atâna unauva piang a ni,” tiin a sawi.—Thufingte 17:17.

Siamtu chu be pawh rawh. “Ṭawngṭaina ngaithlatu,” Pathian Jehova chuan i thu sawi a lo ngaihthlâksak reng ang che. (Sâm 65:2) Bible chuan ‘anin a ngaihsak ṭhin che avângin, i manganna zawng zawng ama chungah i nghat vek’ thei tih a sawi.—1 Petera 5:7.

• I nu leh i pa tu zâwk nge hahdam tak leh pangngai taka i biak theih?

• Tu i ṭhian rin tlâk takin (rualpui, a nih loh leh puitling) nge tuar chhuak tûra ṭanpui thei ang che?

• Eng harsatna chungchâng bîkahte nge i ṭawngṭai theih ang?

2. Inthlâk danglamna milin insiamrem rawh

I nu leh pa inṭhenna avângin in thara awm te, school thara kal te, sum leh pai dinhmun inthlâk danglam mila awm te leh, ṭhian thar nei tûra insiamrem hial pawh a ngai thei a . Hriatthiamawm takin, chu chuan a tithinrimin, i rilru a tihah thei che a, i nun chu a chhe lamin a inthlâk thleng thawk angin i ngai thei a ni. Inthlâk thlengna mila insiamrem tûrin engin nge ṭanpui thei che? Dinhmun tharte mila i insiamrem theih dân tûr chu ngaihtuah tum tlat rawh.

• I nu leh pa inṭhenna avângin eng inthlâk danglamna lian tak nge i siam ngai?

• Insiamrem tûrin engtin nge hma i lâk theih?

3. I chakna laite chu hre rawh

Nu leh pa inṭhenna chuan lungkhamna nasa tak a neihtîr theih che rualin, i chakna laite pawh hre tûrin a ṭanpui thei che a. Chu chuan mize ṭha dang pawh nei tûrin a ṭanpui hial thei che a ni. Kum 13 a nih laia a nu leh pate inṭhen Jeremy-a chuan: “Ka nu leh pate inṭhenna avângin mawhphurhna tam zâwk ka lâk a lo ngai ta a. Fapa upa zâwk ka nih avângin, ka nu leh ka nau chu nasa lehzuala ka ṭanpui a ngai a ni,” tiin a sawi.

• I nu leh pate dinhmun avângin, eng mize ṭhate nge nei nia i inhriat?

• Eng miziate nge neih chhoh i duh?