Engvângin Nge Jehova Thuhretute Chu Hnam Chawimawina Hun Serh Hmannaa An Tel Loh?

Jehova Thuhretute chuan sawrkâr thuneitute leh an ram chhinchhiahnate chu a zah hle a. Mi tin hian ram tâna rinawmna thutiam te, flag chibai bûk te, leh ram hla sakte chungchângah zalên taka duh thlan theihna an nei tih kan pawm a ni.

Mahse, Jehova Thuhretute chuan Bible zirtîrna nên a inmil lo nia kan hriat avângin, chutiang hun serh hmannaah chuan kan tel lo va. An duh thlanna kan zahsak ang bawka kan rinna min zahsaktute chungah kan lâwm hle a ni.

He thuziakah hian

• Ṭanchhan tûr eng Bible thu bulte nge awm?

• Dânin chutiang hunserh hmannaa tel tûra min phût a nih chuan engtin nge ni ang?

• Jehova Thuhretute chu khawtlâng thilah emaw, politics thilah emaw an inhnamhnawih em?

Ṭanchhan tûr eng Bible thu bulte nge awm?

A hnuaia târ lan Bible thu bul pawimawh tak pahnih hian kan duh thlanna siamah nghawng a nei a ni:

• Pathian chauhvin kan biak a phu. Bible chuan: “Lalpa i Pathian chibai bûk la, ama rawng chauh bâwl rawh,” tiin a sawi a. (Luka 4:8) Ram tâna rinawmna thutiamahte leh ram hlaahte hian thil dang zawng aia ram hmangaih tûra intiamna thute a tel fo ṭhîn. Chuvângin, Jehova Thuhretute chuan Bible zirtîrna nên a inkalh nia an hriat avângin, chutiang hun serh hmannaah chuan an tel lo a ni.

  Jehova Thuhretute chuan flag chibai bûk hi Bible-in a khap milem biakna chi khat angin an ngai a. (1 Korinth 10:14) Hmân lai chanchin zir mi ṭhenkhat chuan ram flag-te hi sakhaw chhinchhiahna a nih tih an hria a. An zînga pakhat Carlton J. H. Hayes-a chuan, “Hnam tâna rinawmna chhinchhiahna pawimawh ber leh sakhaw chhinchhiahna langsâr ber chu flag hi a ni,” tiin a ziak a ni.a Kristian hmasate chungchângah chanchin ziak mi Daniel P. Mannix-a chuan: “Kristiante chuan . . . [Rom] vênghimtu nia ngaih thlaraute hnêna inthawi chu an hnâwl a—chu chu tûn laia flag chibai bûk hnâwlna nên a inang a ni,” tiin a sawi.b

  Jehova Thuhretute chuan flag chibai bûk lo mah se, zah lo taka cheibâwlin kan pawhthlêr emaw, hâl emaw ngai lo va, ram chhinchhiahna dangte chungah pawh zah lohna kan lantîr ngai hek lo.

• Pathian hmaah mi zawng zawng hi ang khat vek kan ni. (Tirhkohte 10:34, 35) Bible chuan Pathianin “thlahtu pakhat aṭangin hnam tin a din,” tiin a sawi. (Tirhkohte 17:26, C.L. Re-edited) Chuvângin, Jehova Thuhretute chuan hnam pakhat emaw, ram pakhat emaw a dangte aia chungnung zâwk anga cheibâwl chu thil dik a ni lo tih kan ring tlat a. An ṭo bul leh an awmna hmun chu eng pawh ni se, mi zawng zawng chungah zahna kan lantîr a ni.—1 Petera 2:17.

Dânin chutiang hunserh hmannaa tel tûra min phût a nih chuan engtin nge ni ang?

Jehova Thuhretute chuan sawrkâr thuneitute chu an dodâl lo. Sawrkâr thuneitute chu “Pathian ruat,” a nih loh leh a remtih avânga rorêl an ni tih kan ring a. (Rom 13:1-7) Chu bâkah, Kristiante chuan sawrkâr thuneitute thu an zâwm tûr a ni tih kan ring tlat bawk.—Luka 20:25.

A nih leh, sawrkâr dân siamte leh Pathian dânte chu inkalh ta se, engtin nge ni ang? Dinhmun ṭhenkhatah chuan, dânte chu siamrem tûrin sawrkâr thuneitute hnênah dîlna theh luh theih a ni a.c Thlâk daglam theih a nih loh hunah pawh, Jehova Thuhretute chuan sawrkâr thuneitute chunga zahna lantîr tho siin, “mihring thu aiin Pathian thu [an] zâwm” tlat zâwk a ni.—Tirhkohte 5:29.

Jehova Thuhretute chu khawtlâng thilah emaw, politics thilah emaw an inhnamhnawih em?

Hnamhnawih lo. Jehova Thuhretute chuan khawtlâng thilah inhmanhnawihna an nei lo va, politics-ah pawh ṭan lam an nei hek lo. Ram tâna rinawmna thutiam te, flag chibai bûk te, leh ram hla sakte kan tih duh loh chhan chu politics thiltiha kan inhnamhnawih vâng a ni lo va. Chu aiin, chûng hun serh hmanna nêna inkûngkaih Bible ṭanchhan kan rinna mila nun kan tum vâng zâwk a ni.