Engvângin Nge Politics Hian Mite A Ṭhen Darh Nasat Em Em?—Bible-in Eng Nge A Sawi?

Khawvêl pumah mi tam tak chu politics avângin an inṭhen darh nasa hle a. Kum 2022 Pew Research Center chuan, “Ram 19-a ngaih dân lâk khâwmnain political party hrang hrang thlâwptute zîngah puitling za zêla 65% aia tamte chu an inpumkhat thei lo, a nih loh leh thei hlawl lo,” tiin a sawi a ni.

I chênna rama mite chu politics avângin an inṭhen darh zual sauh sauh niin i hria em? Engvângin nge chutianga a nih? A chinfelna a awm em? Bible sawi hi lo chhinchhiah ang che.

Ṭhen darhtîrtu rilru put hmang

Bible-in ‘ni hnuhnûngte’ tia a sawi tûn kan hunah hian mi tam tak chuan inpumkhatna awmtîr thei lotu rilru put hmang an nei ang tih a sawi lâwk a.

• ‘Tin, hei hi hre rawh, ni hnuhnûngahte chuan hun khirh takte a lo awm ang. Mi, mahni inhmangaihtu te, huaikawm bâwl te an ni dâwn si a.’—2 Timothea 3:1-3.

Mi tam tak chuan sawrkâr hlawhtling tûrin theih tâwp an chhuah a; mahse, a hlawhtling thei chuang lo. Thlîr dân dang neite pawhin buainate chinfel chu a harsa lutuk, a nih loh leh a theih loh hulhual tih an hmu a. Chu chuan tûn hma aṭang tawha Bible sawi dikzia a nemnghet a ni.

• “Mi, mi dang chungah pawi khawpin a intilal ṭhîn.”—Thuhriltu 8:9.

Mahse, Bible chuan a chinfelna—tûn lai mite harsatna thlentu buinate nuaibo theitu tûr mipakhat kaihhruai sawrkâr—chu a târ lang a ni.

Min ngaihsaktu hruaitu tling tak

Bible chuan hruaitu tling tak chungchâng a sawi a: ani chu Isua Krista a ni. Isua chuan thiltihtheihna te, thuneihna te, leh mi zawng zawng chunga inpumkhatna leh remna thlentîr duhna a nei a ni.

• “A dam lai chuan mi felte chu an duah hluah hluah ang.”—Sâm 72:7.

• “Hnam tinrêngin a rawng an bâwl ang.”—Sâm 72:11.

Isua chu min ngaihsaktu leh mite ṭanpui duhtu, a bîk takin, dik lo taka cheibâwl tâwkte ṭanpui duhtu a nih avângin hruaitu ṭha ber a ni.

• “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a,pachhiate nunna chu a chhandam ang. An nunna chu hnehchhiahna leh nunrâwnna lak ata a tlan ang.”—Sâm 72:12-14.

Isua kaihhruai vân sawrkâr, Pathian Ram chungchâng chu zir belh rawh. Chu sawrkâr i hlâwkpui theih dân leh i thlâwp theih dân chu hriat tum ang che.

• Pathian Ram Chu Eng Nge Ni? tih video chu en rawh.

• “Pathian Ram—Ei Rûkna Laka Fihlîm Sawrkâr,” tih thuziak chu chhiar rawh.