Bible-ah Thlamuanna Thu Ka Hmu Thei Em?
Bible chhânna
Hmu thei e. (Rom 15:4) Dinhmun harsa tak hmachhawna awmte leh rilru lama harsatna neite thlamuanna petu Bible châng ṭhenkhat lo ngaihtuah ta ila.
He thuziakah hian hêngte hi a tel
Harsatna
Sâm 23:4: “A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a.”
A awmzia: Pathian hnêna i ṭawngṭai a, kaihhruaina atâna a Thu, Bible i rinchhan chuan harsatnate chu huaisenna nên i hmachhawn thei ang.
Philippi 4:13: “Mi tichaktuah chuan engkim ka ti thei a ni.”
A awmzia: Pathianin eng harsatna pawh hmachhawn tûrin chakna a pe thei che.
Hmangaih tak thihna
Thuhriltu 9:10: “Thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va.”
A awmzia: Mitthite chuan hrehawm an tuar lo va, min tina thei hek lo. Anni chuan engmah an hre lo.
Tirhkohte 24:15: “Thawhlehna a awm ang.”
A awmzia: Pathianin kan hmangaih thi tawhte chu a kai tho thei.
A lutuka inthiam lohna
Sâm 86:5: “Lalpa [Jehova],a nang chu i ṭha a, ngaihdam i peih a, a kotu apiang che chungah ngilneihna i ngah sî ṭhîn a.”
A awmzia: Pathianin tûn hmaa an thil tihsual avânga inchhîr tak zet a, tihnawn tawh loh tum tlattute chu a ngaidam.
Sâm 103:12: “Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a.”
A awmzia: Pathianin min ngaihdam hian kan sualte chu kan suangtuah phâk bâka hlaah a dah a. Chûngte chu min mawhchhiat nân, a nih loh leh min tihhrehawm nân min hriatnawntîr lo.
Lungngaihna
Sâm 31:7: “Ka manganna hi i hmu si ṭhîn a; ka nunna hi a hrehawm laite pawhin i hre ṭhîn.”
A awmzia: Pathianin i hrehawm tawrh zawng zawng a hre vek a. Mi dangte’n hre lo mah se, i rilru manganna zawng zawng pawh a hria a ni.
Sâm 34:18: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn.”
A awmzia: Pathianin i lungngaih huna ṭanpui che a tiam a. I natna tuar chhuak thei tûrin chakna a pe thei che.
Dam lohna
Sâm 41:3: “LALPAN a chauhna mut hmunah chuan a tichak ang.”
A awmzia: Pathianin chhûngrila thlamuanna pe chein natna khirh tak tuar chhuak thei tûrin a ṭanpui thei che a; chu bâkah, thu tlûkna fing siam tûrin chakna, chhelna, leh finnate a pe tel thei bawk che.
Isaia 33:24: “Chumi khuaa awm chuan, ‘Ka dam lo ve,’ a ti lo vang.”
A awmzia: Pathian chuan mi zawng zawngin hrisêlna ṭha an neih hun tûr a tiam.
Rilru hahna leh manganna
Sâm 94:19, Mizo Common Bible: “Ka mangan êm êm laite chuan min thlamuan a, min tihlim ṭhîn.”
A awmzia: Kan rilru a hah huna Pathian lam kan hawi chuan, ani’n hahdamna nei zel tûrin min ṭanpui thei.
1 Petera 5:7: “Anin a ngaihsak ṭhin che u avângin, in manganna zawng zawng ama chungah nghat vek rawh u.”
A awmzia: Hrehawm kan tawrh hian Pathianin min ngaihsak a. Kan harsatnate a hnênah ṭawngṭaia hrilh tûrin min sâwm.
Indona
Sâm 46:9: “Ani chuan indonate chu kâwlkil thlengin a tireh ṭhîn.”
A awmzia: Pathian Ram chuan indona zawng zawng a nuai reh thuai ang.
Sâm 37:11, 29: “Thuhnuairawlhte erawh chuan ram hi an luah ang a, remna chênin an hmuingîl ang. . . . Mi felte chuan ram hi an luah ang a, a chhûngah hian kumkhuain an awm ang.”
A awmzia: Pathian mite chuan leiah chatuanin remna an chên ang.
Nakin hun lungkhamna
Jeremia 29:11: “Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin.”
A awmzia: Pathianin a mite chu nakin hun ṭha tak an beisei thei tih a tiam.
Thu Puan 21:4: “‘An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka hria.”
A awmzia: Pathianin tûn laia i hmuh leh i tawn ṭhin thil ṭha lo zawng zawngte hi nuaibo a tiam.
a Jehova tih chu Pathian hming bil a ni a. (Sâm 83:18) “Jehova Chu Tu Nge Ni?” tih thuziak chu en rawh.