“I Thutakah Ka Awm Ang”

1-3. (a) Engtin nge Bible thutak chu kan thlîr? Entîrna pe rawh. (A thupui chunga milem en rawh.) (b) He thuziakah hian eng nge kan sawiho vang?

TUN laia mi tam tak tân chuan dâwra thil lei a, a hnua pêk kîr leh chu thil pângngai tak a ni a. Online aṭanga thil leitute chuan chutianga pêk kîr chu an chîng lehzual a ni. An thil leite chu an rin ang hua an duh leh loh vâng emaw, a chhe lai a lo awm vâng emaw pawh a ni thei. Chuvângin, a dang nêna thleng emaw, pawisa lâk lêt leh emaw chu an tum ṭhîn a ni.

² Bible thutak chungchângah chutiang chuan kan ti hauh lo vang. Thutak kan “lei” tawh chuan kan “hralh leh” duh tawh lo, a awmzia chu thutak kan hriat tawh chuan kan kalsan duh tawh lo a ni. (Thufingte 23:23 chhiar rawh; 1 Timothea 2:4) Thuziak hmasaa kan sawiho tawh angin, hun tam tak pein thutak kan zir a. Chu bâkah, sum tak tak kan lâk luh theihna tûr hnate kan chân pawh a ni thei. Mi dangte nêna kan inlaichînna siamrem ngai ṭhenkhatte siamremin, kan ngaihtuah dân leh thiltih dânte kan thlâk a, a nih loh leh Jehova tilâwm lo hnam dânte leh thiltihte chu kan bânsan a ngai pawh a ni thei. Mahse, kan thil chân engpawh chu thutak kan hriat avânga malsâwmna kan dawnte aiin a hlu lo zâwk tih kan chiang a ni.

³ Isua chuan tuikeplung ṭha tak zawngtu sumdâwng mi pakhat tehkhin thu a sawi a. Chu pa chuan tuikeplung man to tak a hmuh chuan a lei theih nân a neih zawng zawng chu a hralh nghâl a ni. Chu tuikeplung chuan Pathian Ram chungchânga thutak chu a entîr a. Chutiang chuan, Isua’n thutak zawngtu tâna chu thutak a hlut dân tûr chu a târ lang a ni. (Matthaia 13:45, 46) Pathian Ram chungchânga thutak leh Bible-a thutak dang hlu tak takte kan hriat tirh chuan, chûngte chu kan neih theih nân thil engkim chân kan inhuam a. Thutak chu kan hlut zawm zêl a nih chuan, kan thlah leh ngai tawh lo vang. Mahse, lungchhiatthlâk takin, Pathian mite zînga ṭhenkhat chuan thutak chu hlut tawh lovin, an kalsan a ni. Chutianga tih chu kan duh ngai lo vang! ‘Thutaka awm reng’ tûr chuan Bible thurâwnte kan zui a ngai a. (3 Johana 2-4 chhiar rawh.) Chu chu kan nunah thutak kan dah hmasa ber tih kan nun dânin kan lantîr tihna a ni. A nih leh, miin thutak chu engvângin nge a “hralh leh,” a nih loh leh a thlah theih a, chu chu engtin nge a nih theih? Chu chu kan ti ngai lo ang tih engtin nge kan chian theih? ‘Thutaka awm reng’ kan tum tlatna chu engtin nge kan tihngheh theih?

ENGVANGIN NGE ṬHENKHATIN THUTAK AN “HRALH LEH” A, ENGTIN NGE AN HRALH?

4. Engvângin nge Isua hun laia mi ṭhenkhat chu thutaka an awm reng loh?

⁴ Isua hun laia thutak pawm hmasatu mi ṭhenkhat chu thutakah an awm reng lo va. Entîr nân, Isua’n thilmak tia mipui tam tak a hrai hnuah, chûng mipuite chuan Galili Tuipui râl lehlam thlengin an zui a. Chutah chuan, Isua’n an thin tiṭhâwng tak he thu hi a sawi a ni: “Mihring Fapa tisa in ei a, a thisen in in bawk loh chuan, nangmahniin nunna nei hek lo che u,” tiin. Isua sawi tum chu zawh fiah ahnêkin, anni chuan: “Hei hi thu khirh tak a ni, tu nge dawngsawng thei ang?” an ti a. Tichuan, “a zirtîrte zînga tam tak an kal bo va, amah an pâwl leh ta lo va.”—Johana 6:53-66.

5, 6. (a) Engvângin nge tûn laia mi ṭhenkhat chu thutak ata an tawlh bo? (b) Engtin nge mi chu thutak aṭanga a tawlh bo theih?

⁵ Tûn laia mi ṭhenkhat pawhin thutak an kalsan chu a lungchhiatthlâk hle. Engvângin nge? Ṭhenkhat chu Bible châng hriatthiamna siam ṭhat a nih emaw, hriat hlawh tak unaupa thusawi leh thiltih emaw avângin an tlu a. Mi dangte chuan tuemawin Bible ṭanchhana thununna a pêk chu an duh lova, a nih loh leh kohhrana tuemaw nên inrem lohna nasa tak an nei a ni. Mi dang lehte chuan kalpêngte leh kan chanchin dik lo taka sawitute zirtîrna dik lo chu an zui a. Chûngte chu mi ṭhenkhatin duh rêng vânga Jehova leh a kohhran an kalsan chhan ṭhenkhat a ni. (Hebrai 3:12-14) Anni chuan Petera angin, Isua rinchhan se chuan a va ṭha dâwn tak êm! Isua thusawi avânga mipui zînga ṭhenkhat an lungnih loh khân, Isua’n a tirhkohte chu kal bo ve an duh leh duh loh a zâwt a. Petera chuan: “Lalpa, tu hnênah nge kan kal ang? Nangin chatuana nunna thu i nei alâwm,” tiin a chhâng a ni.—Johana 6:67-69.

⁶ Mi dang lehte chu thutak aṭanga zawi zawia tawlh bo tih inhre lovin, chutiang chuan an lo awm reng a. Zawi zawia thutak kalsantu chu lui kam aṭanga tawlh hla hret hret lawng ang a ni. Bible chuan chutianga kan “tawlh bo hlauh” loh nâna fîmkhur tûrin min vaukhân a. (Hebrai 2:1) A tlângpui thuin, thutak aṭanga tawlh botu chuan chutianga tih chu a tum lo. Mahse, ani chuan Jehova nêna an inṭhian ṭhatna a tinghet lova, a tâwpah a hloh ta a ni. Chutiang chu kan chungah thleng ngai lo tûrin engtin nge kan tih theih?

THUTAK KAN HRALH LEH NGAI LO VANG TIH ENGTIN NGE KAN CHIAN THEIH?

7. Thutak hralh leh ngai tawh lo tûrin engin nge min ṭanpui ang?

⁷ Thutaka awm reng tûr chuan, Jehova sawi zawng zawng chu kan pawmin, kan zâwm tûr a ni a. Kan nunah thutak chu dah pawimawh berin, kan thiltih apiangah Bible thu bulte kan zui tûr a ni. Lal Davida chuan Jehova hnêna a ṭawngṭainaah: “I thutakah ka awm ang,” tiin a tiam a. (Sâm 86:11) Davida chuan thutaka awm a tum tlat a, keini pawh chutiang chuan kan ti ve tûr a ni. Chutianga kan tih loh chuan, thutak avânga kan chân tâk thilte chu kan ngaihtuah ṭan leh thei a, a ṭhen chu neih leh kan duh thei a ni. Mahse, Bible thutak ṭhenkhat pawmin, a dangte kan hnâwl thei lo. “Thutak zawng zawng,” chu kan pawm tûr a ni. (Johana 16:13) Thuziak hmasaah khân, thutak kan hriat a, kan nunpui theih nâna kan chân tâk thil pangate kan sawiho tawh a. Tûnah, kan kalsan tâk chûng thilte lamah kan kîr leh tawh lo tih kan chian theih dân kan en ang.—Matthaia 6:19.

8. Engtin nge Kristian pakhat chu a hun hman dânin thutak ata a tawlh botîr theih? Entîrna pe rawh.

⁸ Hun. Thutak aṭangin kan tawlh bo lo tih tichiang tûr chuan, kan hun neihte fing takin kan hmang tûr a ni. Kan fîmkhur loh chuan, intihhlimna te, mahni tui zâwng te, Internet leh TV en nânte hun kan hmang tam lutuk thei a. Chûng thiltihte chu sual lo mah se, inzirnaah leh rawngbâwlnaa kan hman hun hlu takte chu, chûng thil tihna atân kan hmang palh thei a ni. Chutiang chu Emma-i chungah a thleng a.a (Footnote en rawh.) A naupan lai aṭangin, sakawrte chu a ngainain, a hun neih apiangin a chuang ṭhîn a. A thil tui zâwng tih nâna hun a hman tam lutuk avângin a inthiam lo ṭan a, tichuan, nuna a thil dah hmasakte chu a thlâk danglam ta a ni. Emma-i chu rodeob (thiamna tihlanna) hmuna sakawr chuang ṭhîn Cory Wells-i thiltawn aṭangin a inzîr a. (Footnote en rawh.) Tûnah, Emma-i chuan Jehova rawngbâwlnaah hun tam lehzual a hmang a, a rawngbâwlpui a chhûngte leh ṭhiante tân hun tam zâwk a pe thei ta a ni. Pathian nêna inhnaih lehzualin a inhria a, fing takin a hun a hmang tih a hriat avângin a hlim bawk.

9. Engtin nge khawvêl lam thilte chu kan tân thil pawimawh tak a lo nih theih?

⁹ Khawvêl lam thilte. Thutaka awm reng tûr chuan khawvêl lam thilte chu kan tân thil pawimawh lutuk kan nihtîr thei lo. Thutak kan hriat chuan, Jehova rawngbâwl chu khawvêl lam thilte aiin a pawimawh tih kan hria a, thutak avângin chûng thil engpawh chu chân kan inhuam a ni. Mahse, hunte a liam zêl rualin, mite chuan electronic hmanraw chhuak thar ber berte chu leiin, sumin a lei theih thil dangte an nei tih kan hmu mai thei a. Chûngte chu chân niin kan inngai ṭan thei a ni. Tichuan, kan thil neihah kan lungawi tawh lova, Jehova rawngbâwlna aiin khawvêl lam thilte chu kan ngaihven ṭan ta a. Chu chuan Dema chunga thilthleng chu min hriatchhuahtîr a ni. Ani chuan “tûn lai khawvêl hi” a ngainat êm avângin tirhkoh Paula nêna thawh dun theihna chanvo chu a kalsan ta a. (2 Timothea 4:10) Dema chuan Pathian rawngbâwlna aiin khawvêl lam thilte chu a ngaina zâwk a ni ngei ang. A nih loh leh, Paula nêna rawngbâwl tûrin engmah chân a duh tawh lo pawh a ni thei bawk. Kan tâna zir tûr chu eng nge ni? Tûn hmain, khawvêl lam thilte chu kan lo ngaina pawh a ni thei. Kan fîmkhur loh chuan, chu kan ngainatna chu a lo ṭhang chho leh thei a, thutak kan ngainatna hloh khawp hialin kan thinlungah a khat thei a ni.

10. Eng thununna nge kan do ngai?

¹⁰ Mi dangte nêna kan inlaichînna. Thutaka awm reng tûr chuan, Jehova rawngbâwl lotute thununin kan awm tûr a ni lo. Thutak kan hriat chuan, Thuhretu ni lo kan ṭhiante leh chhûngkuaa mite nêna kan inlaichînna chu a danglam thei a. Ṭhenkhatin kan rinna thar chu an zah mai theih rualin, mi dangte erawh chuan an dodâl thei a ni. (1 Petera 4:4) Ni e, kan chhûngkuate nêna inrem taka awm leh an chunga ngilneihna lantîr chu kan tum tlat a. Mahse, anmahni tihlâwm nân Jehova tehnate chu kan hnâwl thei lo. Korinth thawn khat 15:33-a kan hmuh angin, kan ṭhian ṭhate chu Jehova hmangaihtute an ni tûr a ni.

11. Ngaihtuahna thianghlim lo leh thiltihte chu engtin nge kan pumpelh theih?

¹¹ Ngaihtuahna thianghlim lo leh thiltihte. Thutaka awm reng tûr chuan, Jehova mithmuhah kan thianghlim a, kan fai a ngai a. (Isaia 35:8; 1 Petera 1:14-16 chhiar rawh.) Thutak kan hriat chuan, Bible tehnate kan zawm theih nân kan nunah inthlâk danglamnate kan siam a. Mi ṭhenkhat chuan inthlâk danglamna lian tham tak an siam a ni. Mahse, kan nun thianghlim tak chu nungchang bawlhhlawhnaa thlâk ngai lo tûrin kan fîmkhur a la ngai reng a. Nungchang bawlhhlawhna lam thil ti tûra thlêmna chu do tûrin engin nge min ṭanpui ang? Kan thianghlim theih nâna Jehova min pêk hi han ngaihtuah teh. A Fapa duh tak, Isua Krista nun hlu tak chu min pe a ni! (1 Petera 1:18, 19) Jehova mithmuha thianghlim reng tûr chuan Isua tlanna inthawina hlutzia kan hre reng tûr a ni.

12, 13. (a) Ni serh bîkte chu engvângin nge Jehova thlîr dân anga kan thlîr a ngaih? (b) A hnuaiah eng thute nge kan sawiho vang?

¹² Pathian tilâwm lo hnam dânte leh thiltihte. Chhûngkuaa mite, hnathawhpui te, school kalpuite chuan an kût ni hmannaah min teltîr an tum mai thei a. Jehova tilâwm lo hnam dânte leh an ni serh bîka tel tûra nêksawrnate do tûrin engin nge min ṭanpui thei? Jehova’n chûng ni serh bîkte a lawm loh chhante ngaihtuahin kan rilru kan tithianghlim reng tûr a ni. Kan thu leh hla chhuahte hmanga zir bingna neiin, chûng ni serh bîkte lo inṭan dânte chu kan inhriatnawntîr tûr a ni. Chûng ni serh bîkte chu Bible ṭanchhana kan hman loh chhante kan chhût ngun chuan, “Lalpa lâwm zâwng” kawngah kan awm reng tih kan chiang thei ang. (Ephesi 5:8-10) Jehova leh a Thu kan rinchhan tlat chuan mi dangte min ngaih dân tûr chu kan hlau lo vang.—Thufingte 29:25.

¹³ Chatuana thutaka awm reng tûrin kan inbeisei a. Thutaka awm tlat tûrin engin nge min ṭanpui thei? Kan tih theih thil pathumte chu a hnuaiah kan hmu ang.

THUTAKA AWM TUM TLAT RAWH

14. (a) Bible zirna neih chhun zawm zêlnain thutak kalsan lo tûra kan tum tlatnaah engtin nge min ṭanpui theih? (b) Engvângin nge finna te, zirtîrna te, leh hriatthiamnate chu kan mamawh?

¹⁴ A hmasain, Bible zirna nei chhun zawm zêl la, i thil zirte chu ngun takin ngaihtuah ang che. Chutianga i tih theih nân hun duan ṭha tak nei rawh. Inzirna i neih tam poh leh, thutak i ngainatna chu a pung lehzual ang a, kalsan i tum leh tawh ngai lo vang. Thufingte 23:23-na chuan: ‘thu dik lei’ tûr leh “finna te, zirtîrna te, hriat thiamnate,” lei tûrin min hrilh a. Bible thutak hriat mai chu a tâwk lo. Kan thu hriatte chu kan nunpui a ngai a. Hriatthiamna kan neih chuan, kan thil zirte chu, kan lo hriat sa tawhte nên kan thlunzawm ang. Finna chuan kan thu hriatte mila thil ti tûrin min chêttîr a. Thutak chuan inthlâk danglam kan ngaihna laite min hrilhin, zirtîrna min pêk chângte a awm a. Rangkachak aia duhawm zâwk Bible aṭanga chûng zirtîrna kan dawnte chu kan chhâng lêt nghâl tûr a ni.—Thufingte 8:10.

15. Engtin nge thutak chuan kâwnghrên anga min vênhim?

¹⁵ Pahnihna, i nî tin nunah thutak nunpui tum tlat rawh. Bible chuan thutak chu sipai kâwnghrên nên a khaikhin a. (Ephesi 6:14) Bible hun lai chuan kâwnghrên chu nghet taka hrên a nih chhûngin indonaah sipai chu a ṭanpuiin, a vênghim a ni. A ngheh loh chuan, a ṭanpui lo vang. Engtin nge thutak chuan kâwnghrên anga min vênhim? Englai pawha Bible thutak kan vawn tlat chuan ngaihtuahna ṭha lo lakah min vênghim ang a, thu tlûkna ṭha siam tûrin min ṭanpui bawk ang. Buaina khirh tak emaw, thil sual ti tûra thlêm kan nih emaw hunah Bible thutak chuan thil dik tih tum tlat tûrin min ṭanpui thei a. Sipai chu kâwnghrên hrêng lovin indonaah a kal ngai lo ang bawkin, keini pawh thutak kan kalsan ngai lo vang. Bible thutak chu kan nun kawng tinrêngah nunpui kan tum tlat a ni. Sipai chuan a kâwnghrênah ngûnhnâm pawh a pai bawk. Chutiang thil kan tih theih dân i lo en ang u.

16. Mi dangte thutak zirtîrnain thutaka awm reng tûrin engtin nge min ṭanpui?

¹⁶ Pathumna, i theih ang tâwkin Bible thutak chu mi dangte zirtîr rawh. Bible hi ngûnhnâm nêna khaikhin a ni a. Râl do thiam tak sipai chuan a ngûnhnâm nghet taka a pai angin, Pathian Thu chu nghet takin kan pai tlat tûr a ni. (Ephesi 6:17) Kan za hian, “thutak chu fel taka hmang” a, zirtîrtu thiam lehzual kan ni ṭheuh thei a. (2 Timothea 2:15) Mi dangte zirtîrnaah Bible kan hman hian, thutak thu kan hriain, kan ngaina lehzual a. Tichuan, thutaka awm reng kan tum tlat a ni.

17. Engvângin nge thutak chu i tân a hlut?

¹⁷ Thutak chu Jehova hnên aṭanga thilpêk hlu tak a ni a. Chu chuan vâna kan Pa nên inlaichînna ṭha min neihtîr thei a ni. Chu chu kan neih theih azawnga thil hlu ber a ni a. Jehova chuan thil tam tak min zirtîr tawh a; mahse, hei hi a ṭanna chauh a la ni! Ani chuan chatuana min zirtîr tûrin a intiam a. Chuvângin, tuikeplung ṭha tak i hlut ang bawkin, thutak chu hlut ang che. “Thu dik chu lei la, hralh leh tawh suh.” Tichuan, Davida angin, Jehova hnênah: “I thutakah ka awm ang,” tih thutiam chu i vawng reng thei ang.—Sâm 86:11.