“Thu Dik Chu Lei La, Hralh Leh Tawh Suh”

1, 2. (a) I nuna thil hlu ber chu eng nge ni? (b) Eng thutakte nge i hlut a, engvângin nge? (A thupui chunga milem en rawh.)

I NUNA thil hlu ber chu eng nge ni? Jehova mite kan nih angin, amah nêna kan inlaichînna chu kan thil neih hlu ber a ni a. Chu chu eng nên mah kan thleng ngai tûr a ni lo. Bible-a thutak chuan Jehova ṭhian min nihtîr theih avângin, chu chu kan hlut tak zet a ni.—Kolossa 1:9-12.

² Jehova chu a Thu, Bible aṭanga thutak hlu takte min zirtîrtu, Zirtîrtu Ropui ber a ni a. A hming pawimawhziate min zirtîr a, a mize duhawm tak takte pawh min hrilh bawk. Kan tâna a Fapa duh tak nunna pe hial khawpin min hmangaih tih min hrilh a ni. Jehova chuan Messia Lalram chungchâng pawh min zirtîr a. Ani chuan hriak thihte tân vâna nung tûr, leh “berâm dang” tân lei Paradis-a nung tûrin nakin hun beiseina min pe a ni. (Johana 10:16) Jehova chuan kan nun dân tûr pawh min zirtîr a. Chûng thutakte chuan min Siamtu hnaih lehzual tûr leh nuna thiltum nei tûra min ṭanpui avângin kan hlut tak zet a ni.

3. Jehova’n thutak kan hmuh theih nân sum min dîl em?

³ Jehova chu Pathian thilphal tak a ni a. Kan tân a Fapa pe phal khawpin a thilpal a ni. Jehova’n tuemawin thutak a zawng tih a hmuh chuan, hmu tûrin a ṭanpui ṭhîn. Ani chuan thutak kan hmuh theih nân sum min dîl ngai lo. Ṭum khat chu, Simona an tih mi pakhat chuan mite hnêna thlarau thianghlim pêk theihna a neih theih nân tirhkoh Petera chu sum pêk a tum a. Mahse, Petera’n a ngaihtuah dân a dik lo tih hrilhfiahin: “I tangka hi i boral rualin boral ve rawh se, Pathian thilpêk tangka suma lei i tum avângin,” tiin a hrilh a ni. (Tirhkohte 8:18-20) A nih leh, ‘thu dik lei’ tih awmzia chu eng nge ni?

‘THU DIK LEI’ TIH AWMZIA CHU ENG NGE NI?

4. He thuziakah hian, thutak chungchâng eng nge kan zir ang?

⁴ Thufingte 23:23 chhiar rawh. Bible-a thutak zir tûr chuan kan thawhrim a ngai a. Chumi nei tûr chuan thil dangte kan chân a ngai ang. Thutak kan zir, a nih loh leh ‘thu dik lei’ hnu chuan, “hralh leh” tawh loh emaw, kalsan ngai tawh loh emaw tûrin kan fîmkhur tûr a ni. A nih leh, engtin nge Bible-a thutak chu kan “lei” ang? A man chu eng zât nge? Chûng zawhnate chhânna chuan thutak ngai hlu lehzual tûr leh kalsan ngai lo tûra tumna nei tlat tûrin min ṭanpui ang a. Jehova hnên aṭanga kan hmuh thutak chu thil dang zawng aia a hlut chhan kan hria ang.

5, 6. (a) Engtin nge thutak chu man pe lova kan lei theih? Hrilhfiah rawh. (b) Engtin nge thutak chu kan hlâwkpui?

⁵ Thil engemaw chu a thlâwnna hmuh theih a nih vâng maiin sênso engmah a awm lo tihna a ni lo. Thufingte 23:33-a “lei” tia lehlin Hebrai thu mal hian “hmu chhuak,” tih awmzia pawh a nei thei a. Chu ṭawngkam pahnih chuan miin a thil ngaihhlut zâwng chu a hmuh theih nân a thawhrim, a nih loh leh thil engemaw a chân a ngai tih a kâwk a ni. Thutak kan lei theih dân hriatthiam nân, dâwr pakhatah balhla a thlawna hmuh theih angin han mitthla teh. Chûng balhlate chu kan dawhkânah amaha lo awm mai tûrin kan beisei thei ang em? Thei lo, dâwra kan va kal a, ina kan hawn a ngai a ni. Chuvângin, chûng balhlate nei tûr chuan sum pêk ngai lo mah se, kan thawhrim a ngai a. Chutiang bawkin, thutak hre tûrin sum pêk ngai lo mah se, thawhrimna leh inpêkna a ngai a ni.

⁶ Isaia 55:1-3 chhiar rawh. Heta Jehova thusawi hian thu dik lei tih awmzia hre thiam tûrin min ṭanpui a. He Bible chângah hian, Jehova’n a thute chu tui, hnutetui, leh uainte nên a khaikhin a ni. Mi tuihâl tak chu tui vawt takin a tiharh sawng sawng angin, thutak chuan min tiharh a. Hnutetuiin nausên chu a tichak angin, Bible-a thutak chuan Jehova nêna kan inlaichînna a tinghet a ni. Jehova chuan a thute chu uain nên a khaikhin bawk. Engvângin nge? Bible chuan uainin mi a tilâwm tih a sawi a. (Sâm 104:15) Chuvângin, Jehova’n ‘uain lei’ tûra min hrilh hian, a kaihhruainate kan nunpui chuan kan hlim ang tih min hriattîr a ni. (Sâm 19:8) Jehova’n thutak kan zir a, kan nunpui huna kan hlâwkpui dân hre thiam tûrin chûng khaikhinnate chu a hmang a ni. Tûnah, thu dik lei theih nâna kan chân mai theih thil pangate kan sawiho vang.

THUTAK LEI TURIN ENG THILTE NGE I CHAN?

7, 8. (a) Engvângin nge thutak zir tûrin hun pêk a ngaih? (b) Zirlai pakhatin eng inpêkna nge a neih a, eng nge a rah chhuah?

⁷ Hun. Lalram thuchah ngaithla tûr te, Bible leh Bible ṭanchhan thu leh hla chhuahte chhiar tûr te, Jehova Thuhretute nên Bible zir tûr te, kan inkhâwmte atâna inbuatsaih tûr te, leh chûng inkhâwma tel tûrte chuan hun pêk a ngai a. Chûng thilte ti tûr chuan, thil pawimawh lo zâwkte tihna atâna kan hun hman chu kan hmang tûr a ni. (Ephesi 5:15, 16 chhiar rawh.) Bible-a thutak bulpuite zir tûrin hun eng zât nge pêk ngai? A mi azirin kan inang lo ngei ang. Jehova finna te, a kawng te, leh a thiltihte chungchâng chu zir zawh tih a awm thei lo. (Rom 11:33) Vênnainsâng tihchhuah hmasa ber chuan thutak chu “pangpâr pakhat” nên a khaikhin a, tichuan: “Thutak pâr pakhat maiin lungawi suh. Chu mia i duh tâwk mai chuan i neih belh tawh lo vang. Lâk belh zêl la, zawn belh zêl rawh,” tiin a sawi a ni. Chuvângin, heti hian kan inzâwt thei a ni, ‘Jehova chungchâng engtianga tam nge ka zir tawh?’ tiin. Chatuana kan nun pawhin, Jehova chanchin kan zir belh zêl dâwn a. Mahse, kan hun neihte chu Pathian chungchâng a tam thei ang bera zir nân kan hman a pawimawh a ni. Chutianga titute entawn tûr siam chu a hnuaiah kan hmu ang.

⁸ Mariko-i,a (Footnote en rawh) chu school kal tûrin Japan ram aṭangin United States, New York Khawpuiah a insawn a. Ni khat chu, pioneer unaunuin a inah chanchin ṭha a va hrilh a. Mariko-i chuan sakaw vawn a lo nei tawh a; mahse, unaunu chuan Bible a zirpui ṭan a. A thil zir chu ṭha a tih êm avângin chawlhkâr khata vawi hnih zir tûrin a ngên a ni. Mariko-i chu school kal lai leh hunbi neia hna thawk a nih vângin a buai thei hle a; mahse, kohhran inkhâwmahte a tel ṭan a. Thutak tam lehzuala a zir theih nân intihhlimna atân hun a hmang tlêm hret hret a. Chutianga a inpêkna avângin, Jehova a hnaih lehzual a, kum khat a tlin hmain baptisma a chang a. Thla ruk a liam hnu, kum 2006-ah pioneer a thawk a, tûn thlengin a la thawk zawm zêl a ni.

9, 10. (a) Engtin nge thutak kan zirnain khawvêl lam thil kan thlîr dân a thlâk danglam? (b) Hmeichhe tleirâwl pakhatin eng thilte nge a kalsan a, chu chu engtin nge a ngaih?

⁹ Khawvêl lam thilte. Thutak zir tûr chuan, he khawvêlah hian sum tam tak hmuhna hna ṭha emaw, eizawnna hlawhtling tak emaw kan chân a ngai mai thei a. Entîr nân, Petera leh Andria chu sangha mantu an ni a; mahse, Isua’n a zirtîr ni tûra a sâwm khân an sangha man hna chu an kalsan a ni. (Matthaia 4:18-20) Thutak i zir chuan i hna i kalsan a ngai tihna a ni kher lo. Mi chuan hna a thawh a, a chhûngkua a châwm a ngai a ni. (1 Timothea 5:8) Mahse, thutak i zir chuan khawvêl lam thilte i thlîr dân chu a inthlâk danglam a. Nuna thil pawimawh ber chu i hria a. Isua chuan: ‘Leiah hian, in tân rote khâwl khâwm suh u,’ tiin a sawi a ni. “Vânah, . . . in tân rote khâwlkhâwm zâwk rawh u,” tiin min fuih bawk a. (Matthaia 6:19, 20) Chu chu tleirâwl Maria-i tih chiah chu a ni.

¹⁰ Maria-i chuan a naupan lai aṭang tawhin golf vuak chu nuam a ti hle a. High school a thlen chuan, chu infiamna chu a thiam chho telh telh a ni. University-a scholarship hmu khâwp hialin a thiam a. Maria-i thiltum chu professional golf khel thiam nih leh sum tam tak lâk luh hi a ni. Mahse, Bible a zir ṭan chuan a thu zirte chu a ngainain, a nunpui ṭan ta a. Ani chuan, “Ka rilru put hmang leh nun dânte chu Bible tehnate mila ka siam ṭhat poh leh ka hlim lehzual a ni,” tiin a sawi. Jehova nêna an inlaichînna leh infiamna chu a ruala tihkawp a harsatzia a hre ta a. (Matthaia 6:24) Chuvângin, thil ṭha zâwk a hmuh theih nân a thiltum professional golf khel thiam nih chu a bânsan ta a ni. Tûnah, pioneer a thawk a, “nun hlim awm ber leh awmze nei ber,” a nei ta tih a sawi.

11. Thutak kan zir hian, mi dangte nêna kan inlaichînna chu engtin nge a awm mai theih?

¹¹ Mi dangte nêna inlaichînna. Bible aṭanga kan thil zirte kan nunpui ṭan hian, ṭhiante leh chhûngte nêna kan inlaichînnate chu a danglam thei a. Isua’n: “Anni chu thutakin tithianghlim rawh, i thu chu thutak a ni,” tia a hnungzuitute tâna a ṭawngṭai khân, chutianga a nih chhan hre thiam tûrin min ṭanpui a ni. (Johana 17:17;) “Tithianghlim” tih chuan “dah hrang,” tih awmzia pawh a nei thei a. Kan nunah thutak kan nunpui ṭan hian, khawvêl mi a tam zâwkte’n an zui loh Bible tehnate mila kan nun avângin, an lak ata dah hran kan ni. Kan ṭhiante leh chhûngkhat lainate nên inlaichînna ṭha neih tum mah ila, mi ṭhenkhat chuan tûn hmaa min ngainat angin min ngaina tawh lo mai theiin, kan rinna thar avângin min dodâl hial pawh a ni thei. Chu chu mak kan ti lo. Isua chuan: “Mi a hmêlmate chu ama chhûngte zînga mi ngei an ni ang,” a ti a. (Matthaia 10:36) Mahse, ani chuan thutak avânga thil tam tak kan chân a nih pawhin, a aia tam kan hmu leh ang tih min tiam a ni!—Marka 10:28-30 chhiar rawh.

12. Juda hnam pakhatin thutak hmu tûrin eng nge a chân?

¹² Juda hnam Aaron-a chuan Pathian hming lam chu thil dik lo niin a ngai ṭhîn a. Mahse, Pathian chungchâng thutak chu hriat a duh ta a. Ni khat chu, Thuhretu pakhatin Pathian hming, Hebrai hawrawp pali-ah vowel a belh chuan “Jehova” tia lam theih a nih dân a hmuh a ni. Aaron-a chuan chu chu mak a tih êm avângin, rabiho hnêna hrilh tûrin an biak inah a va kal a! Ani chuan Pathian hming chungchânga thutak an hriat chuan an lâwm a ring a; mahse, an lo lâwm hauh lo. Lâwm ahnêkin, chîl an chhâk khum a, biak in ata an ûm chhuak a. A chhûngte pawhin an dodâl a. Mahse, chûng thilte chu Jehova chanchin zir belh loh phah nân a hmang lo. Aaron-a chu Jehova Thuhretu pakhat a rawn ni a, a dam chhûngin rinawm takin Jehova rawng a bâwl a. Keini pawh thutak kan zir chuan mi dangte nêna kan inlaichînna a danglam thei tih kan beisei thei a ni.

13, 14. Thutak kan zir hian kan ngaihtuah dân leh thiltih dânah eng inthlâk danglamna nge kan siam ngai? Entîrna pe rawh.

¹³ Ngaihtuahna thianghlim lo leh thiltihte. Thutak kan zir a, Bible tehnate mila kan nun ṭan hian, kan ngaihtuah dân leh kan thiltih dânah insiamrem kan inhuam tûr a ni. Tirhkoh Petera chuan: “Fa tihâwihte angin inhriat loh laia in hmân lai châknate anga awm lovin,” tiin a ziak a. Tichuan: “In chêtzia zawng zawngah lo thianghlim zâwk rawh u,” tiin a ziah belh bawk. (1 Petera 1:14, 15) Hmân lai Korinth khuaa mi tam tak chu nungchang bawlhhlawh tak an ni a. Chuta awmte chuan Jehova mithmuha an thianghlim nân inthlâk danglamna lian takte an siam a ngai a ni. (1 Korinth 6:9-11) Tûn laiah pawh, mi tam tak chuan thutak an zir chuan chutiang inthlâk danglamnate chu an siam a. Petera’n chumi chungchâng chu hetiang hian a ziak a ni: “Jentailte duhzâwng tih nân leh hurnaah te, taksa châknaah te, uain hehnaah te, zu hmun hlimnaah te, zu inhonaah te, milem biakna tenawm takah te awm nân tûn hma kha a tâwk tawh ang,” tiin.—1 Petera 4:3.

¹⁴ Devynn-a leh Jasmine-i te chuan kum tam tak chhûng zu ngawl an vei a. Devynn-a chu sum lût chhuak enkawl thiam tak (bookkeeper) ni mah se, zu a in avângin hna nghet a nei thei lo va. Jasmine-i pawh mi thinchhe tak leh nunrâwng tak nia mite hriat hlawh tak a ni. Ni khat chu, zu a inlaiin, Thuhretu missionary pahnih nên kawngah an intâwk a. Anni chuan Bible zirpui tûrin an hrilh a. Mahse, a kâr leha an va kal chuan, Jasmine-i leh Devynn-a te chu zu an lo rui a. Anni chuan missionary-te chu an ina an lo kal tak tak an ring lo va. Ṭum dangah missionary-te an va kal leh chuan dinhmun chu a danglam ta. Jasmine-i leh Devynn-a te chuan phûr takin Bible thutak an zir ṭan a, an thu zirte chu an nunpui nghâl a ni. Thla thum pawh a liam hmain, zuin chu bânsanin, a hnuah dân angin an innei ta a. An khuaa mi tam takin Jasmine-i leh Devynn-a te inthlâk danglamna an hmuh avângin Bible an zir ṭan a ni.

15. Thutak avânga kan siam ngai inthlâk danglamna zînga harsa ber pakhat chu eng nge ni thei a, engvângin nge?

¹⁵ Pathian tilâwm lo hnam dânte leh thiltihte. Inthlâk danglamna kan siam zînga harsa ber pakhat chu Jehova tilâwm lo hnam dân leh thiltihte bânsan hi a ni. Mi ṭhenkhatin chûng thilte chungchânga Jehova ngaih dân an hriat hnuah pawh bânsan harsa an la ti cheu va. An chhûng te, an hnathawhpui te, leh an ṭhiante chhân lêt dân tûr chu an hlauthâwng a ni. Mite chuan chhûngkhat thi tate chawimawina ang chi hnam dân ṭhenkhatte chu an ngai pawimawh hle tih an hria a. (Deuteronomy 14:1) A nih leh, inthlâk danglamna siam ngaite ti tûrin engin nge min ṭanpui thei? Ephesi khuaa Kristian hmasate ang, thutak an hriat avânga inthlâk danglamna siamtu tûn hmaa entawn tûr ṭhate hnên aṭangin kan zir thei a ni.

16. Ephesi khuaa mi ṭhenkhatin eng thilte nge an chân?

¹⁶ Hmân lai Ephesi khuaah chuan, thlarau zâwlna dawithiamna thiltih chu a hluar hle a. Chutiang thil ti ṭhîntute Kristian an rawn nih chuan eng nge an tih? Bible chuan heti hian a sawi a: “Dawihmang tam tak pawhin an lehkhabute an rawn la khâwm a, mi zawng zawng mit hmuhah an hâl ta a, tin, a man an chhût a, chêng sîngnga niin an hria. Chuti kauva nasa chuan Lalpa thu chu a darh a, a hneh ta zêl a,” tiin. (Tirhkohte 19:19, 20) Chûng Kristian mi rinawmte chuan an lehkhabu man to tak takte chu chân an huam a, chu mi avâng chuan Jehova’n mal a sâwm a ni.

17. (a) Thutak avânga kan chân mai theih thil ṭhenkhat chu eng nge ni? (b) A dawta thuziakah eng zawhnate nge kan chhân ang?

¹⁷ Thutak i zir avângin eng thilte nge i chân tawh? Kan vai hian kan hun neihte kan chân a. Kan zînga ṭhenkhat chuan mi hausa nih theihnate an chân a. Mi dangte nêna kan inlaichînna ṭhenkhat pawh a danglam thei a ni. Kan zînga mi tam tak chuan kan ngaihtuah dân leh thiltih dânte chu kan siamrem a, tichuan Jehova lawm loh hnam dânte leh thiltihte chu kan hnâwl a ni. Mahse, Bible thutak chu kan thil chân engpawh aiin a hlu zâwk daih tih kan ring tlat a. Bible thutak chuan kan nuna thil hlu ber Jehova nêna inlaichînna hnai tak min neihtîr thei a ni. Thutak avânga kan neih chûng malsâwmna zawng zawng kan ngaihtuah hian, miin chu thutak a “hralh leh” chu hriatthiam har tak a ni. Engtin nge chutiang thil chu a thlen theih? Chutiang thil sual pawi tak tih chu engtin nge kan pumpelh theih? A dawta thuziakah chûng zawhnate chu chhân a ni ang.