Infuih Tawn “Nasa Lehzual Sauh Rawh U”
“Inngaihtuah tawn ang u; . . . , ni chu lo hnai telh telha in hriatin infuih tawn nasa lehzual sauh rawh u.”—HEBRAI 10:24, 25.
1. Engvângin nge tirhkoh Paula’n Hebrai Kristian hmasate chu infuih tawn “nasa lehzual sauh” tûra a fuih?
KUM zabi khatnaah, tirhkoh Paula chuan Hebrai Kristiante hnênah: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tiin a fuih a. (Hebrai 10:24, 25) Unaute chuan infuih tawn nasa lehzual tûra Paula fuih chhan chu mak an ti mai thei a. Kum nga a liam hmain, a chhan pakhat chu hriat a ni ta a ni. Chutih lai chuan, Jerusalem chunga Jehova rorêlna nî chu a hnai tawh tih an hria a. Isua lo sawi tawh angin, khawpui ata an tlân chhuah a ngai tih an hria a. (Luka 21:20-22; Tirhkohte 2:19, 20) Chu Jehova nî chu Rom mite’n Jerusalem an tihchhiat kum C.E. 70 khân a thleng a ni.
2. Engvângin nge tûn laiah infuih tawnna chu kan ngaih pawimawh lehzual ang?
2 Tûn laiah, chutiang dinhmun chu kan tawng a. Jehova nî ‘ropui leh râpthlâk êm êm’ chu a hnai tawh hle a. (Joela 2:11) Zâwlnei Zephania thusawi: “LALPA ni ropui tak chu a hnai e, a hnaiin a thleng thuai dâwn a ni!” tih pawh hi kan hun nên a inkûngkaih bawk. (Zephania 1:14) Chumi avâng chuan, “hmangaih leh thil ṭha tiha inchawk tho tûrin inngaihtuah tawn” tûr kan ni. (Hebrai 10:24) Unaute’n fuihna an mamawh huna kan fuih theihna tûrin anni chu kan ngaihsak lehzual tûr a ni.
TUTE’N NGE FUIHNA MAMAWH?
3. Tirhkoh Paula’n fuihna chungchâng eng nge a sawi? (A thupui chunga milem en rawh.)
3 “Lungkham neih hian mi a tihrehawm a, thu ṭha erawh chuan mi a tilâwm ṭhîn.” (Thufingte 12:25) Kan vai hian fuihna mamawh châng kan nei ṭheuh va. Paula chuan mi dangte fuih tûra mawhphurhna neitute ngei pawhin fuihna an mamawh tih chiang takin a sawi. Rom khuaa a unaute hnênah: “In nghehna tûra thlarau lam thilpêk eng emaw ka pêk theihna tûr che uin hmuh ka châk hle si che u a; chu chu in rinna leh ka rinnain kan inthlamuan tawn theihna tûr, ka tihna a ni,” tiin a ziak a. (Rom 1:11, 12) Chuvângin, tirhkoh Paula ngei pawhin fuihna mamawh châng a nei a ni.—Rom 15:30-32 chhiar rawh.
4, 5. Tûn laiah, tute nge kan fuih theih a, engvângin nge?
4 Tûn laiah, rinawm taka pioneer thawhna ang chi hun bikima Jehova rawngbâwltute chu kan fuih thei a. An zînga tam tak chuan pioneer an thawh theih nân an nuam tihzâwngte chu an bânsan a. Missionary-te, Bethela rawngbâwl te, bial kantu te leh an nupui te, leh RTO-a rawngbâwlte pawh chutiang bawk chu an ni. Anni chuan Jehova rawngbâwlnaah hun tam zâwk hmang tûrin an inpe a. Chuvângin, anni chu kan fuih tûr a ni. Hun bikima rawngbâwl duh mah se, chutianga ti thei tawh lo mi tam tak an awm bawk. Anni pawhin fuihna an dawn hian an hlut hle a ni.
5 Mi dang tute’n nge fuihna la mamawh? Jehova thu an âwih duh vânga “Lalpaa awm mi” chauh nupui, pasala neih duh unaunu leh unaupa tam takte chu kan fuih thei a. (1 Korinth 7:39) Nupuite chu an pasalte’n an hmangaih thu leh an thiltih zawng zawngte chunga an lâwmzia an hrilh hian an phûr hle a ni. (Thufingte 31:28, 31) Tihduhdahnate leh natnate chhel taka tuartu Kristiante pawhin fuihna an mamawh a. (2 Thessalonika 1:3-5) Jehova leh Isua chuan chûng mi rinawm zawng zawngte chu an thlamuan a ni.—2 Thessalonika 2:16, 17 chhiar rawh.
UPATE CHUAN MIN FUIH THEI
6. Isaia 32:1, 2-ah upate chanvo chungchâng eng nge kan hriat?
6 Isaia 32:1, 2 chhiar rawh. Hun harsa taka kan awm avângin kan lungchhiain, kan lunghnual hma thei hle ṭhîn a. Isua Krista chuan min fuih tûrin hriak thih unaupate leh berâm dang zînga mi rinawm “hotute” chu a hmang a ni. Chûng kohhran upate chu kan rinna chunga “lalna” neite ni lovin, kan lâwmna “ṭanpuitu” an ni a. Hlim tak leh rinawm taka awm thei tûra min ṭanpui an duh a ni.—2 Korinth 1:24.
7, 8. Engtin nge upate chuan thusawi leh thiltihin mi dangte an fuih theih?
7 A unaute fuih tum rengtu tirhkoh Paula chu upate chuan an entawn thei a. Ani chuan tihduhdahna tuar Thessalonika khuaa Kristiante hnênah: “Chutiang bawkin kan duhzâwng tak in lo nih tâk avâng khân, kan duh ngawih ngawih che u a, Pathian chanchin ṭha chauh ni lovin, keimahni nun pawh pêk hial che u kan peih kha,” tiin a ziak a ni.—1 Thessalonika 2:8.
8 Upate chu an thusawite aṭangin mite tichaktu an ni thei a. A nih leh, thusawi mai chu a tâwk em? Paula chuan Ephesi khuaa upate chu: “Lalpa Isua thu hre reng chungin mi chak lote in ṭanpui tûr a ni; amah ngeiin, ‘Englo lâk aiin pêkin lukhâwng a nei zâwk,’ a tih kha,” tiin a hrilh a. (Tirhkohte 20:35) Paula chuan a unaute tâna ‘hmanral leh inhmanral vek’ pawh a inhuam a. An tân theih tâwp chhuah a inhuamzia chu a thiltihin a lantîr a ni. (2 Korinth 12:15) Chutiang bawkin, upate chuan thu chauhva sawi lovin, an thiltihin mi dangte chu an fuih tûr a ni a. Chu chuan min ngaihsak tak zet tih a târ lang a ni.—1 Korinth 14:3.
9. Engtin nge upate chuan unaute tichak tûr zâwngin zilhna an pêk theih?
9 Upate’n unaute tichak tûr chuan zilhna an pêk a ngaih châng a awm a. Anni chuan Bible aṭangin unaute tichak tûr zâwnga zilhna pêk dân an zir thei a ni. A thih a, a thawhleh hnua Asia Minor-a awm kohhrante hnêna a thuchahah khân Isua chuan zilhna pêk dân chungchângah entawn tûr ṭha ber a hnutchhiah a ni. Ephesi, Pergamos, leh Thuatira kohhrante chu zilhna khauh tak a pe a. Mahse, zilhna a pêk hmain, an thil tih ṭhatte avângin a fak a ni. (Thu Puan 2:1-5, 12, 13, 18, 19) Isua chuan Laodikei kohhran hnênah: “Ka hmangaih apiangte chu ka zilhhauvin ka thunun ṭhîn; chutichuan ṭhahnem ngai la, sim rawh,” tiin a hrilh a. (Thu Puan 3:19) Upate chuan zilhna an pêk hunah Krista entawn an tum a ni.
MI DANGTE FUIHTU TUR CHU UPATE CHAUH AN NI LO
Nu leh pate u, in fate chu mi dangte fuih tûrin in zirtîr em? (Paragraph 10-na en rawh)
10. Engtin nge kan vaia kan intichak tawn theih?
10 Upate chu mi dangte fuihtu tûr awmchhun an ni lo va. Paula chuan Kristian zawng zawngte chu “a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân” tiin a fuih a ni. (Ephesi 4:29) Kan vain mi dangte kan ṭanpui theih nân an mamawhte chu hriat kan tum tûr a ni. Paula chuan Hebrai Kristiante hnênah: “Kut uai thlate chu char rawh u, khûp zawite nên; tin, kebai chu tihpelhsawlh lohva, tihdamin a awm zâwk nân, in kete tân kawng ngîlte siam rawh u,” tiin a ziak a. (Hebrai 12:12, 13) Kum naupang tak pawh ni mah ila, kan vai hian thusawia infuihin, kan intichak tawn thei a ni.
11. Marthe-i chu a lunghnual laiin engin nge ṭanpui?
11 Unau Marthe-i chuan hun rei vak lo chhûng chu lunghnualna a nei a.a (Footnote en rawh.) Ani chuan: “Ni khat chu, chakna nei tûrin ka ṭawngṭai a, chutih lai tak chuan ka mamawh êm êm lainatna leh khawngaihna lantîrtu kum upa lam unaunu ka tawng a. Fiahna ka tawh ang, a thiltawn chu min hrilh a, mal nia inhriatna ka neih tlêm phah sawt a ni,” tiin a sawi a. Chu unaunu chuan a thusawiin Marthe-i a ṭanpui nasazia chu a hre lo mai thei!
12, 13. Philippi 2:1-4-a kan hmuh thurâwn chu engtin nge kan nunpui theih?
12 Paula chuan Philipi khuaa Kristiante hnênah: “Chutichuan Kristaah ṭanpuina rêng rêng te, hmangaih thlamuanna rêng rêng te, thlarau pâwlna rêng rêng te, lainatna leh khawngaihna rêng rêng te a awm chuan, rilru hmunkhata awmin, hmangaihna hmunkhat neiin, inthuruala rilru hmunkhata awmin, ka lâwmna tifamkim rawh u. Elrel leh inngaihhlut avânga engmah ti lovin mi tinin inngaitlâwm takin mahni aiin mi dang ṭha zâwkah ruat ṭheuh rawh se; mahni ta ta mai en lovin, mi dang ta pawh en ṭheuh zâwk rawh u,” tiin a ziak a ni.—Philippi 2:1-4.
13 Kan vai hian inṭanpui tawn dân kan zawng tûr a ni. Kan unaute fuih tûrin “hmangaih thlamuanna,” “thlarau pâwlna,” leh “lainatna leh khawngaihna” te chu kan lantîr thei a ni.
FUIH DAN KAWNG ṬHENKHAT
14. Fuihna kan pêk theih dân kawng khat chu eng nge ni?
14 Tûn hmaa kan ṭanpuite an la rinawm reng tih kan hriat hian kan hlim a. Tirhkoh Johana chuan: “Ka fate thutakah an awm tih ka hriat aliama lâwmna nasa zâwk rêng ka nei lo ve,” tiin a ziak a ni. (3 Johana 4) Pioneer tam takin tûn hmaa thutak hre tûra an ṭanpui tuemaw chuan rinawm takin Jehova rawng a la bâwl reng a, pioneer a thawk hial tih an hmuh hian an hlim tak zet a. Chuvângin, pioneer-te chu an lunghnual a nih chuan, mi dangte an ṭanpuinaa an thil ṭha tih zawng zawngte chu kan hriatnawntîr thei a ni.
15. Rinawm taka rawngbâwltute tichak tûrin eng nge kan tih theih?
15 Bial kantute leh an nupuite chuan kohhran an tlawh hnuah lâwm thusawina card an dawn hian an chak phah sawt tih an sawi a. Rinawm taka Jehova rawngbâwltu upate, missionary-te, pioneer-te, leh Bethela rawngbâwlte pawh chutiang bawk chu an ni. An chunga lâwmna kan lantîrna chuan kan rin ai daihin a tichak thei a ni.
KAN VAIA TIHCHAKA KAN AWM THEIH DAN
16. Eng thil hotêin nge mi chu tichak thei?
16 Mite chu anmahni i hmuh dân i hrilh hreh a nih chuan engtin nge ni ang? Dik tak chuan, mi dangte fuih chu thil harsa lutuk a ni lo. I nui hmêl hmuh tum rawh. An nuih lêt ve loh che chuan, harsatna engemaw an nei a ni thei a, tuemaw hnêna an sawi chhuah a ngai a ni mai thei. An thusawite ngaithlain i thlamuan thei a ni.—Jakoba 1:19.
17. Ṭhalai unaupa chu engin nge tichak?
17 Ṭhalai unaupa Henri-a chu a chhûngkhat hnaite’n Jehova an hawisan avângin a lungchhe hle a. Chûng zînga pakhat chu upa ni tawh ṭhîn a pa a ni. Bial kantuin Henri-a a hlim lo tih a hriat chuan coffee in tûrin hmun pakhatah a hruai a. Henri-a’n a rilrua awmte a sawi chhuah chuan ngun takin a ngaihthlâksak a. Henri-a chuan a chhûngte thutaka lo kîr leh tûra a ṭanpui theih dân awm chhun chu rinawm taka a awm tlat hi a ni tih a hria a. Sâm 46, Zephania 3:17, leh Marka 10:29, 30-a thute chhiarin thlamuanna a hmu bawk a ni.
Kan vaiin kan intichakin, kan infuih tawn thei (Paragraph 18-na en rawh)
18. (a) Lal Solomona chuan fuihna chungchângah eng nge a ziah? (b) Tirhkoh Paula thurâwn pêk chu eng nge ni?
18 Marthe-i leh Henri-a te thiltawn aṭangin eng nge kan zir theih? Kan vai hian thlamuan leh fuih ngai kan unaute chu kan ṭanpui ṭheuh thei a ni. Lal Solomona chuan: “A hun taka chhânna dik hriat hi a va lâwmawm êm! Hlim hmêlin mi a tilâwm a, chanchin lâwmawmin mi a tiharh,” tiin a ziak a. (Thufingte 15:23, 30.) Beidawng leh lungngaia awm tuemaw chu i hre chhuak thei em? Vênnainsâng, a nih loh leh kan website-a thu pakhat tal chhiarsak ang chi thil engemaw i tihsak thei lo vang maw? Chu bâkah, Paula pawhin Lalram Hla sakhonain rilru thlamaunna min pe thei tih a zirtîr a. Ani chuan: “Fakna hla te, Pathian hla te, thlarau lam hla tea inzirtîrin inzilh tawn ula, thinlungah khawngaihna neiin Pathian chu hla saksak rawh u,” tiin a ziak a ni.—Kolossa 3:16; Tirhkohte 16:25.
19. Engvângin nge fuihna chu a pawimawh zual deuh deuh a, eng nge kan tih ang?
19 Jehova nî kan hnaih tawlh tawlh avângin, kan infuih tawn nasat lehzual a pawimawh a. (Hebrai 10:25) Paula’n: “Infuih tawnin, intisâwt tawn ṭheuh rawh u, in tih rêng ṭhîn ang hian,” tia min fuih anga kan tih chuan kan hlim ngei ang—1 Thessalonika 5:11.
a Hmingte chu thlâk a ni.