Fuihna Petu Pathian Jehova Chu Entawn Rawh

1. Adama leh Evi te an hel khân, engtin nge Jehova’n mihringte hnênah fuihna leh beiseina a pêk?

JEHOVA chu fuihna petu Pathian a ni a. Ani chuan mihringte an sual a, an ṭhat famkim loh aṭangin fuihna a pe a ni. Adama leh Evi an hel veleh, ani chuan nakina la piang tûr mihringte tâna fuihna leh beiseina ni tûr hrilh lâwkna min pe a. Chu hrilh lâwkna chu Genesis 3:15-ah kan hmu a, Diabol-Setana leh a thil sual tih zawng zawng tihboral a tiam a ni.—1 Johana 3:8; Thu Puan 12:9.

JEHOVA’N TUN HMAA A CHHIAHHLAWHTE A FUIH

2. Engtin nge Jehova’n Nova a fuih?

² Jehova’n a chhiahhlawh Nova a fuih dân chu han ngaihtuah teh. A hun laia mite chu an nunrâwngin, nungchang bawlhhlawh tak an ni a, Nova leh a chhûngte chauhvin Jehova an bia a. Chuvângin, Nova chu a lunghnual mai thei a ni. (Genesis 6:4, 5, 11; Juda 6) Mahse, Jehova chuan Nova chu Amah chibai bûk reng thei tûr leh thil dik ti reng thei tûrin a mamawh fuina a pe a. (Genesis 6:9) Nova hnênah chu khawvêl suaksual tak chu a tiboral dâwn tih leh a chhûngte nêna an dam khawchhuah theih nâna an tih tûrte a hrilh a ni. (Genesis 6:13-18) Jehova chu Nova fuihtu Pathian a ni.

3. Engtin nge Jehova’n Josua chu a fuih? (A thupui chunga milem en rawh.)

³ A hnuah, Jehova chuan hna lian tak chelh mai tawh tûr a chhiahhlawh Josua chu a fuih a. Josua chuan Pathian mite chu Ram tiamah a hruai lût ang a, chuta awm hmêlhma thiltithei tak takte chu a hneh ang. Josua’n hlauhna tûr chhan tam tak a nei ang tih Jehova’n a hriat avângin Mosia hnênah: “Josua hi thu pe la, fuih ṭha la, tichak rawh; hêng mipuite hi a hruai kai dâwn a, i han hmuh tûr ram chu a luahtîr dâwn a ni,” tiin a hrilh a ni. (Deuteronomy 3:28) Tichuan, Jehova ngeiin Josua chu: “Thu ka pe che a ni lâwm ni? Chak tak leh huai takin awm rawh; hlau suh la, zâm hek suh: LALPA i Pathian chu i kalna apiangan i hnênah a awm zêl dâwn alâwm,” tiin a fuih a ni. (Josua 1:1, 9) Chûng thute avângin Josua chu engtin nge a awm i rin?

4, 5. (a) Engtin nge Jehova’n tûn hmaa a mite chu a fuih? (b) Engtin nge Jehova’n a Fapa chu a fuih?

⁴ Jehova chuan a mite chu a huho pawhin a fuih a. Entîr nân, Judate chu Babulon sala an awm hunah fuihna an mamawh dâwn tih a hriat avângin an hnênah: “Hlau suh u, kei in hnênah ka awm si a; mangang suh u, kei in Pathian ka ni si a: ka tichak ang che u a; a ni, ka ṭanpui ang che u; a ni, ka felna kut ding lamin ka chelh reng ang che u,” tia sawiin hrilh lâwkna phûrawm tak a pe a ni. (Isaia 41:10) A hnuah, Jehova chuan Kristian hmasate chu a fuih a, chutiang bawkin keini pawh min fuih a ni.—2 Korinth 1:3, 4 chhiar rawh.

⁵ Jehova chuan a Fapa pawh a fuih a. Isua’n baptisma a chan hnu chuan vân aṭanga aw: “Hei hi ka Fapa duh tak, ka lawm êm êma chu a ni,” tih chu a hria a. (Matthaia 3:17) Chu thuin Isua leia rawng a bâwl chhûnga a tihchak dân tûr chu i mitthla thei em?

ISUA’N MI DANGTE A FUIH

6. Engtin nge Isua talent tehkhin thu chuan min tihchak?

⁶ Isua chuan a Pa entawnin mi dangte rinawm tûrin a fuih a. Talent tehkhin thuah chutiang chuan a ti a, a pu chuan bâwih rinawm apiangte chu: “Bawi ṭha leh rinawm, i ti ṭha e; tlêmte chungah i rinawm a, tam tak chungah ka awmtîr ang che; i pu lâwmnaah lût rawh,” tiin a hrilh a. (Matthaia 25:21, 23) Chûng thute chuan a zirtîrte chu rinawm taka Jehova rawngbâwl reng tûrin a tichak a ni!

7. Engtin nge Isua chuan a tirhkohte chu a fuih a, a bîk takin, Petera chu a fuih?

⁷ Tirhkohte chu ropui ber nih inchuhin inhnial fo ṭhîn mah se, Isua chu an chungah a dawhthei reng a. Mi dangte rawngbâwlsaka awm aiin, inngaitlâwm taka mi dangte tâna rawngbâwl zâwk tûrin anni chu a fuih a ni. (Luka 22:24-26) Petera chuan vawi tam tak thil a tisualin, Isua a tilungawi lo va. (Matthaia 16:21-23; 26:31-35, 75) Mahse, Isua chuan Petera chu a hnâwl ngai lo. Chu aiin a fuih a, mi dangte tichak tûrin chanvo a pe hial zâwk a ni.—Johana 21:16.

TUN HMAA FUIHNA

8. Engtin nge Hezekia chuan Juda sipai hotute leh mite chu a fuih?

⁸ Jehova chhiahhlawhte chuan entawn tûr atân Isua entawn tûr siamte an neih hma pawhin mi dangte fuih a ngai tih an hria a. Hezekia hi han ngaihtuah teh. Assuria mite’n Jerusalem an beih dâwn khân, ani chuan sipai hotute leh mite chu fuih tûrin a kokhâwm a, a “thu sawite chu an ring” ta a ni.—2 Chronicles 32:6-8 chhiar rawh.

9. Fuihna pêk chungchângah Joba hnên aṭangin eng nge kan zir theih?

⁹ Joba hnên aṭangin mi dangte fuih dân kan zir thei bawk. Amah ngeiin fuihna a mamawh chung pawhin, fuihna pêk dân mi dangte a zirtîr a ni. Joba chuan amah thlamuan tûra lo kalte hnênah, anmahni thlamuan tumtu a nih chuan an rilru tihrehawm thei thute sawi lovin, tichak theitu thute sawiin a thlamuan ang tih a hrilh a. (Joba 16:1-5) Mahse, a tâwpah, Joba chuan Elihu leh Jehova hnên aṭangin fuihna a dawng a ni.—Joba 33:24, 25; 36:1, 11; 42:7, 10.

10, 11. (a) Engvângin nge Jephtha fanu chuan fuihna a mamawh? (b) Tûn laiah, tute nge kan fuih theih?

¹⁰ Jephtha fanu pawhin fuihna a mamawh a. Rorêltu a pa Jephtha chu Amon mite bei tûrin a kal chhuak a. Hmêlmate hneh tûra Jehova’n a ṭanpui chuan, in a haw huna lo hmuak hmasa bertu chu biak bûkah Jehova rawngbâwl tûrin pêk a tiam a. Israel miten’ hnehna an chang a, Jephtha hmu tûra lo chhuak hmasa bertu chu a fanu neih chhun a ni. Jephtha chu a lung a chhe hle a. Mahse, a thutiam chu a hlen a, a fanu chu a dam chhûnga biak bûka rawngbâwl tûrin a tîr ta a ni.—Rorêltute 11:30-35.

¹¹ Chu chu Jephtha tân thil harsa tak a nih chuan, a fanu tân a harsa lehzual ngei ang. Mahse, a pa thutiam anga tih chu a duh a. (Rorêltute 11:36, 37) Chu chu a tih chuan pasal a nei ngai lo vang a, fa a nei lo vang. Chhûngkaw inthlahchhâwnna chu a tâwp dâwn a, thlamuanna leh fuihna nasa tak a mamawh ngei ang. Bible chuan: “Chutichuan Israel-hote zîngah chuan Israela fanuten Gilead mi Jephtha fanu chu kum tin ni li sûn dânah an lo nei ta a,” tiin a sawi. (Rorêltute 11:39, 40) Jephtha fanu chuan tam lehzuala Jehova rawngbâwl thei tûra nupui pasal nei lo tûn laia Kristiante chu min hriat chhuahtîr a ni. Anni chu kan fakin kan fuih thei ang em?—1 Korinth 7:32-35.

TIRHKOHTE CHUAN AN UNAUTE AN FUIH

12, 13. Engtin nge Petera’n ‘a unaute a tihngheh’?

¹² Isua’n a thih hma zân khân, tirhkoh Petera chu: “Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin; nimahsela i rin a bo loh nân ka ṭawngṭaisak che a ni; i hawi kîr leh hunah nangin i unaute tinghet ang che,” tiin a hrilh a.—Luka 22:31, 32.

¹³ Petera chu Kristian kohhran hmasaa hruaitute zînga pakhat a ni a. (Galatia 2:9) Pentecost nî-ah leh a hnua huaisen taka a thiltihte chuan a unaute chu a tichak a ni. Kum tam tak chhûng rawng a bâwl hnu chuan unaute hnênah: “Nangmahni fuih leh, chu chu Pathian khawngaihna tak tak a ni tih hriattîrin tawi têin in hnênah ka ziak a ni; chûngah chuan ding nghet rawh u,” tiin a ziak a. (1 Petera 5:12) Petera lehkha thawn chuan a hun laia Kristiante chu a tichak a ni. Chûng lehkha thawnte chuan thleng famkim tûr Jehova thutiamte kan nghah laiin keini pawh min tichak a ni.—2 Petera 3:13.

14, 15. Tirhkoh Johana ziak Bible-a lehkhabute chuan engtin nge min fuih?

¹⁴ Tirhkoh Johana pawh Kristian kohhran hmasaa hruaitu zînga mi a ni a. Isua rawngbâwlna chungchâng Chanchin Ṭha ziak ngaihnawm tak chu a ziak a ni. A Chanchin Ṭha ziak chuan Kristiante chu kum tam tak chhûng a lo tichak tawh a, tûn laiah pawh min la tichak reng a ni. Entîr nân, a zirtîr dik takte hriat hran theihna chu hmangaihna a ni tia Isua sawi chu Johana ziakah chauh kan chhiar a ni.—Johana 13:34, 35 chhiar rawh.

¹⁵ Johana ziak lehkha thawn pathumah pawh thutak hlu takte a tel a. Thil kan tihsual avânga kan lunghnual hunah, Isua tlanna inthawinain “kan sual zawng zawng min tlenfaisak ṭhîn a ni,” tih kan chhiar hian kan rilru a hahdam a ni. (1 Johana 1:7) Chu bâkah, inthiam lohna kan neih reng chuan, “Pathian chu kan rilru aiin a ropui zâwk” tih kan chhiar hian kan thla a muang a. (1 Johana 3:20) “Pathian chu hmangaihna a ni” tia Bible ziaktu awm chhun chu Johana a ni. (1 Johana 4:8, 16) A lehkha thawn pahnihna leh pathumna chuan ‘thutaka awm’ reng Kristiante chu a fak a ni.—2 Johana 4; 3 Johana 3, 4.

16, 17. Engtin nge tirhkoh Paula’n Kristian hmasate chu a fuih?

¹⁶ Tirhkoh Paula chu a unaute hnêna fuihna petu entawn tûr ṭha tak a ni a. Isua thih hnu rei vak lovah, tirhkoh tam zâwkte chu governing body awmna hmun Jerusalemah an awm a. (Tirhkohte 8:14; 15:2) Judai rama chêng Kristiante chuan Pathian ring tawhte hnênah Krista chahchin an hrilh a. Mahse, thlarau thianghlim chuan Paula chu Grik mite, Rom mite, leh pathian tam tak bia mi dangte hnêna thu hril tûrin a tîr a ni.—Galatia 2:7-9; 1 Timothea 2:7.

¹⁷ Paula chu tûn laia Turkey an tih ram bâkah, Girk leh Italy ramahte a zin a. Chûng hmuna awm Juda mi ni lote hnênah thu a hril a, Kristian kohhrante a din a ni. Kristian ni tharte tân nun chu a awlsam lo va. An rama mite chuan an tihduhdah avângin fuihna an mamawh a. (1 Thessalonika 2:14) C.E. 50 vêlah, Paula chuan Thessalonika khuaa kohhran thar hnênah fuihna lehkha a ziak a ni. Ani chuan: “In thiltihzia te, hmangaih avânga in thawh rimzia te, . . . in chhelzia te kha theihnghilh lova hre rengin, ka ṭawngṭainaahte chuan in hming lamin, nangmahni zawng zawng avângin Pathian hnênah lâwmthu kan hril fo ṭhîn a ni,” tiin a sawi a. (1 Thessalonika 1:2, 3) Intichak tawn tûra a ngên bâkah, “infuih tawnin, intisâwt tawn ṭheuh” tûrin a ziak a ni.—1 Thessalonika 5:11.

GOVERNING BODY-IN FUIHNA A PE

18. Engtin nge kum zabi khatnaa governing body-in Philipa chu a tihchak?

¹⁸ Kum zabi khatnaah, Jehova chuan kohhran hruaitute pawh tiamin, Kristian zawng zawngte fuih tûrin governing body chu a hmang a. Philipa’n Samari mite hnêna Krista chanchin a hrilh khân, governing body chuan an thlâwp a ni. An zînga mi pahnih Petera leh Johana chu Kristian ni tharte thlarau thianghlim dawng tûra ṭawngṭaisak tûrin an tîr a. (Tirhkohte 8:5, 14-17) Philipa leh chûng unau mi tharte chuan governing body hnên aṭanga thlâwpna an hmuh avângin an phûr hle a ni!

19. Kristian hmasate chuan governing body hnên aṭanga lehkha thawn an chhiar chuan engtin nge an awm?

¹⁹ A hnuah, governing body chuan thu tlûkna pawimawh tak a siam a ngai a. Chu chu Judate’n Mosia Dân anga serh an tan angin Juda mi ni lo Kristiante’n an tan ve a ngai em? tih a ni a. (Tirhkohte 15:1, 2) Governing body chuan thlarau thianghlim dawng tûrin an ṭawngṭai a, Bible aṭanga an chhût ngun hnu chuan serh tan a ngai tawh lo tih thu tlûkna an siam a ni. Tichuan, thu tlûkna an siamte hrilhfiahna chu lehkhaah an ziak a, chu chu kohhrante hnêna pe chhâwng tûrin unaute an tîr a. Kristiante chuan chu lehkha thawn chu an chhiar a, “thlamuanna thu avâng chuan an lo lâwm ta hle,” a ni.—Tirhkohte 15:27-32.

20. (a) Engtin nge tûn laiah Governing Body chuan kan vaiin min fuih? (b) A dawta thuziakah eng zawhnate nge kan sawiho vang?

²⁰ Tûn laia Jehova Thuhretute Governing Body chuan Bethela awm te, hun bikima rawngbâwl te, leh ka za vaiin fuihna min pe a. Kum zabi khatnaa unuate ang bawkin, chûng fuihna thu avâng chuan kan lâwm hle a ni! Chu bâkah, thutak kalsantute fuih tûrin, Governing Body chuan kum 2015 khân Jehova Hnênah Kir Leh Ang Che tih brochure chu a tichhuak a. Mahse, kohhrana upate chauhvin mi dangte an fuih dâwn nge ni a, chu chu kan vaia tih tûr a ni zâwk? Chu zawhna chu a dawta thuziakah kan sawiho vang.