Nu Leh Pate U—In Fate Chu ‘Chhandamna Hmu Khawpa Fing’ Tûrin Ṭanpui Rawh U

1, 2. Nu leh pa ṭhenkhat chuan an fate’n Jehova hnêna inpumpêk a, baptisma chan an duh hian engvângin nge hlauhthâwnna an neih mai theih?

BIBLE zirlai sang tam tak chu Jehova hnêna inpumpêkin baptisma an chang a. Tam tak chu thutaka seilian ṭhalaite an ni a, nun kawng ṭha ber chu an thlang a ni. (Sâm 1:1-3) Kristian nu leh pa i nih chuan, i fate baptisma chan hun tûr chu i nghâkhlel ngei ang.—3 Johana 4 khaikhin rawh.

² Mahse, hlauhthâwnna i nei mai thei. Ṭhalai ṭhenkhat chuan baptisma an chan hnuah Pathian tehna mila nun chu an tân a ṭhat tak tak leh tak tak loh chungchângah rinhlelhna an nei ṭan tih i hre mai thei. Ṭhenkhat chuan thutak an chhuahsan hial a ni. Chuvângin, i fa chuan Jehova rawngbâwl ṭan mah se, a hnuah thutak a hmangaihna a hloh vang tih i hlauthâwng mai thei. I fa chu kum zabi khatnaa Ephesi khuaa Kristian ṭhenkhatte ang a ni mai thei a. Isua’n chûng mite chungchângah: “I hmangaihna hmasa ber kha i bân tâk avângin,” tiin a sawi. (Thu Puan 2:4) Engtin nge i fa chu Pathian a hmangaihna vawng reng tûr leh ‘chhandamna hmu khawpa ṭhang’ tûra i ṭanpui theih? (1 Petera 2:2) Timothea entawn tûr siam aṭangin kan zîr thei a ni.

“I NAUPAN TET ATA HRE TAWH I NI”

3. (a) Timothea chu engtin nge Kristian a rawn nih a, a thu hriatte chu engtin nge a tih? (b) Timothea thil zîr eng pathum nge Paula’n a târ lan?

³ Tirhkoh Paula’n Lystra khua a tlawh hmasak ber ṭum chu C.E. 47 a ni a. Râwlthar ni âwm tak Timothea chuan Isua zirtîrna chu a hria a. A thu hriatte chu a nunpui a, kum hnih hnuah Paula nên khual an zin ṭan ta a ni. A hnu kum 16 vêlah, Paula chuan Timothea hnênah: “Tu hnêna zir nge i nih leh, Krista Isuaa rinna awm avâng chuan chhandamna hmu khawpa tifing thei che lehkha thianghlimte [Hebrai Bible] chu i naupan têt ata hre tawh i ni tih hriain, i thil zirte chu ring tûra thlêmthlûkin i awm a, i thil hriat chianahte chuan awm reng rawh,” tiin a ziak a ni. (2 Timothea 3:14, 15, NW) Paula’n Timothea hnênah (1) lehkha thianghlimte i hre tawh a, (2) i thil zîrte chu ring tûra thlêmthlûkin i awm a, tih leh (3) Krista Isuaa rinna awm avânga chhandamna hmu khawpa tifing thei che tia a sawite hi chhinchhiah ang che.

4. I fate zirtîr nân eng nge i hman ṭhîn? (A thupui chunga milem en rawh.)

⁴ Kristian nu leh pa i nih angin, i fate chu lehkha thianghlim hriattîr i duh ngei ang, chutah chuan tûn laia Hebrai Bible leh Kristian Grik Bible a tel a. Naupang tê pawhin Bible-a mite leh thilthlengte chanchin chu a zir thei a ni. Jehova inâwpna pâwl chuan nu leh pate’n an fate ṭanpui nâna an hman theih lehkhabu te, brochure te, leh video-te a tichhuak a. Chûng zîngah chuan in ṭawnga hmuh theihte chu eng nge ni? I fate’n Jehova nêna inlaichînna nghet tak an neih theih nân Bible zirtîrte chu an hriat a ngai a ni.

“RING TURA THLEMTHLUKIN I AWM”

5. (a) “Ring tûra thlêmthlûkin i awm” tih awmzia chu eng nge ni? (b) Timothea chu Isua chanchin ṭha ring tûra thlêmthlûkin a awm tih engtin nge kan hriat theih?

⁵ Bible-a mite leh thilthleng chungchâng i fate zirtîr chu a tâwk mai lo. Timothea chu “ring tûra thlêmthlûkin” a awm tih hria ang che. Heta Paula hman Grik thu mal awmzia chu “hriat chiantîr,” a nih loh leh “thil engemaw chu a dik a ni tih rin nghettîr,” tihna a ni. Timothea chuan Hebrai Bible chu a “naupan têt ata” a hre tawh a, chu chu naupang tak a la nih lai aṭangin tihna a ni. A hnuah Isua chu Messia a ni tih a ring nghet ta a. Timothea rinna chu a nghet hle a, baptisma a chan hnu chuan Paula nên missionary hna an thawk dûn a ni.

6. Pathian Thu-a rinna nei tûrin i fate chu engtin nge i ṭanpui theih?

⁶ I fate chu Timothea ang bawka ‘ring tûra thlêmthlûka an awm’ nân engtin nge i ṭanpui theih? A hmasa berin, dawhtheihna nei ang che. Rinna nghet tak nei tûr chuan hun pêk a ngai a. Thil engemaw chu i rin avâng maiin i fate pawhin an ring ve nghâl tihna a ni lo. I fate’n Bible-a rinna nei thei tûr chuan ‘engkim an fiah’ a ngai a. (1 Thessalonika 5:21 chhiar rawh) Nu emaw, pa emaw i nih angin, i fate rinna nghet tûrin i ṭanpui thei a, chu chu zawhnate an zawh hunah a ni lehzual a ni. Pa pakhat entawn tûr siam aṭangin kan zir theihte i lo eng ang u.

7, 8. (a) Kristian pa pakhat chuan a fanu a zirtîr hunah engtin nge dawhtheihna a lantîr? (b) Eng hunah nge i fate chunga dawhtheihna neih a ngaih?

⁷ Fanu kum 11 mi nei Thomas-a chuan a fanuin hêng zawhnate a zawh ṭhin thu a sawi: “Jehova hian leia nunna awm tûrin chanchhâwnnate a hmang a ni lo maw?” a nih loh leh “Dinhmun a ṭhat chhoh nân khawtlâng thilah, entîr nân, inthlannaahte engvângin nge kan tel ve loh?” tiin. A châng chuan, a fanu rin tûrte hrilh mai duhna chu a do a ngai a. Thomas-a chuan thutak rintîrtu chu thu pawimawh tak ni kher lovin finfiahna ho tham tête a ni tih a hria a ni.

⁸ Thomas-a chuan a fanu zirtîr tûr chuan dawhtheihna a neih a ngai tih pawh a hria a. Dik tak chuan, Kristian zawng zawngin dawhtheihna kan neih a ngai a ni. (Kolossa 3:12) Thomas-a chuan a fanuin rinna nghet tak nei tûrin hun pea vawi tam tak an tîtî dun a ngai tih a hria a. Bible aṭanga a fanu thu hriatte chu a chhûtpui a ngai a ni. “Kan fanu hian a bîk takin a thu zir pawimawh takte chu a ring tak takin a hre thiam a ni tih hirat chu kan nupain kan duh a. Zawhnate a neih hian ṭha kan ti lutuk. Tlang taka sawi chuan, zawhnate zâwt lova a pawm mai ka hlau zâwk a ni,” tiin a sawi.

9. I fate chu Pathian Thu ring tûrin engtin nge i ṭanpui theih?

⁹ Nu leh pate’n dawhtheihna nei taka an zirtîr chuan a tâwpah an fate’n rinna ‘zuazia te, sezia te, sânzia te, thûkzia te’ chu an hre thiam ang. (Ephesi 3:18) An kum leh an hriatthiam theih dân azirin kan zirtîr thei a. An thu zirte an rin ngheh poh leh, an school kalpuite pawh tiamin, mi dangte hnênah an rinna an sawi chhuak ngam lehzual ang. (1 Petera 3:15) Entîr nân, i fate chuan thih huna thilthlengte hrilhfiah tûrin Bible an hmang thei em? Bible hrilhfiahnate chu an tân awmzia a nei em?a (Footnote enrawh.) Pathian Thu ring tûra i fate i zirtîr hunah dawhtheihna i neih a ngai tih hre reng la, chutianga tih chu manhla tak a ni ang.—Deuteronomy 6:6, 7.

10. I fate i zirtîrnaa thil pawimawh tak pakhat chu eng nge ni?

¹⁰ I entawn tûr siam chu i fate rinna nei tûra i ṭanpuinaah thil pawimawh tak a ni bawk. Fa pathum nei Stephanie-i chuan: “Ka fate chu an naupan têt aṭangin, ‘Jehova a awm thu te, a hmangaihna te, leh a kawng fel ka rinna chhante ka hrilh ngai em? tiin ka inzâwt ṭhîn a. Jehova ka hmangaih tak zet tih ka fate’n an hre chiang em?’ Chutiang a nih loh chuan ka fate thlêmthlu tûrin ka inbeisei thei lo a ni,” tiin a sawi a ni.

“CHHANDAMNA HMU KHAWPA TIFING”

11, 12. Finna chu eng nge ni a, chu chu kum upatnaah a innghat lo tih engtin nge kan hriat theih?

¹¹ Timothea chuan (1) Bible hriatna a nei tih leh (2) a thurin chu a ring nghet tlat tih kan hre tawh a. Mahse, Paula’n lehkha thianghlimin Timothea chu ‘chhandamna hmu khawpin a tifing’ thei a tih hian eng a sawi duhna nge ni?

¹² Insight on the Scriptures, Volume 2-na chuan Bible-a finna a tih hian “hriatna hman thiamna leh buainate hlawhtling taka chinfelna, thil hlauhawmte pumpelhna, thiltum ṭhenkhat tihhlawhtlingna, a nih loh leh chutiang ti tûra mi dangte fuihnate a tel a. Finna chu âtna ep chiah a ni,” tiin a hrilhfiah a ni. Bible chuan: “Naupang thinlungah chuan âtna a bet tlat,” tiin a sawi a. (Thufingte 22:15.) Finna chu âtna ep chiah a nih avângin mi puitlingte chhinchhiahna a ni bawk. Mi chu a kum upat vâng mai ni lovin, Jehova a ṭih a, a thu a âwih vâng zâwkin thlarau lamah a puitling chho a ni.—Sâm 111:10 chhiar rawh.

13. Engtin nge ṭhalaite chuan chhandamna hmu khawpin an fing tih an lantîr theih?

¹³ Thlarau lama engemaw chen puitling tawh ṭhalaite chu an châknate leh an ṭhiante thununna avângin “lehlam lehlama vawrh leh len len” an ni tawh lo va. (Ephesi 4:14) “Chhia leh ṭha fiah tûrin an hriat theihnate chu an sawizawi tawh” zâwk a ni. (Hebrai 5:14) Chuvângin, an nu leh pate’n emaw, mi puitling dangte’n emaw an hmuh loh hunah pawh thu tlûkna fing an siam a. (Philippi 2:12) Chutiang finna chu chhandamna atâna pawimawh tak a ni. (Thufingte 24:14 chhiar rawh.) I fate chu chutiang finna nei chho tûrin engtin nge i ṭanpui theih? I thil ngaihhlutte chu an hriat ngei a pawimawh a. I thusawi leh thiltihte aṭangin, Bible tehna mila nun i tumzia an hmu tûr a ni.—Rom 2:21-23.

14, 15. (a) Baptisma chang duh ṭhalaite chuan eng nge an ngaihtuah ang? (b) Pathian dân zawmna aṭanga lo awm malsâwmnate chhût ngun tûrin i fate chu engtin nge i ṭanpui theih?

¹⁴ Mahse, rinna nei tûra i fate ṭanpui tûr chuan thil dik leh dik lo hrilh mai chu a tâwk lo. Hêng zawhna ang chi: ‘Thil duhawm nia langte chu engvângin nge Bible-in a khap? Bible tehnate chu ka tân a ṭha reng tih engtin nge ka chian theih?’ tihte hi chhût tûrin kan ṭanpui a ngai a ni.—Isaia 48:17, 18.

¹⁵ I fate’n baptisma chan an duh a nih chuan baptisma channain a kengtel mawhphûrhnate chu ngun taka ngaihtuah tûrin ṭanpui ang che. Chûng mawhphûrhnate chu engtin nge an ngaih? Eng nge a hlâwkna? Harsatnate chu eng nge ni? Engvângin nge harsatnate aia hlâwknate a tam zâwk? (Marka 10:29, 30) Chûngte chu baptisma chan hmaa ngun taka ngaihtuah tûr thil pawimawh tak a ni. I fate chu thuâwihna avânga malsâwmnate leh thuâwih lohna avânga rahchhuah ṭha lote chhût ngun tûrin ṭanpui rawh. Tichuan, Bible tehnate zawm chu an tân a ṭha reng tih an ring lehzual ngei ang.—Deuteronomy 30:19, 20.

BAPTISMA CHANG TAWH ṬHALAIIN A RINNA CHUNGCHANGA BUAINA A NEIH HUNAH

16. Nu leh pate chuan baptisma chang tawh an fate rinna a chak lo ṭan chuan eng nge an tih ang?

¹⁶ I fain baptisma a chan hnua thutak rinhlelhna a neih thu a sawi ṭan a nih chuan eng nge i tih theih? Entîr nân, i fapa emaw, i fanu emaw chuan khawvêl thilte chu a ngaina ṭan pawh a ni mai thei a. A nih loh leh, Bible thu bulte zawm chu nung kawng ṭha ber a ni tih a ringhlel ṭan pawh a ni thei bawk. (Sâm 73:1-3, 12, 13) I chhân lêt dân chuan Jehova rawng a bâwl chhunzawm dâwn leh dâwn loh chungchângah nghawng a nei thei a ni. I fate chu an la naupang viau emaw, tleirâwl an ni ṭan emaw pawh ni se, he mi chungchângah inhnial loh tum rawh. Chu aiin, i hmangaih a, ṭanpui i duh tih hriat chiantîr tum zâwk ang che.

17, 18. Ṭhalaite’n rinhlelhna an neih chuan engtin nge nu leh pate’n an ṭanpui theih?

¹⁷ Baptisma chang tawh ṭhalai pakhat chu Jehova hnênah a inpumpêk a. Chu chu thil dang zawng aiin amah a hmangaihin a rawngbâwl tûra thu a tiamna a ni. (Marka 12:30 chhiar rawh.) Jehova’n chu inpumpêkna chu a ngai pawimawh hle a, keini pawhin kan ngai pawimawh ve tûr a ni. (Thuhriltu 5:4, 5) Chu chu i fate hriatnawntîr ang che. Jehova inawpna pâwlin nu leh pate tâna a tihchhuah thu leh hlate chu chhiarin zir hmasa la. Tichuan, i fate hnênah Jehova hnêna an inpumpêka baptisma chang tûra thu tlûkna an siam chu thil pawimawh tak a nihzia leh chu chuan malsâwmna tam tak a thlen theihzia chu a hun takah ngilnei takin hrilh ang che.

¹⁸ Entîr nân, Questions Young People Ask—Answers That Work, Volume 1, phêk hnung lama “Questions Parents Ask,” tih thubelhnaah rawtna ṭha takte i hmu thei a. Chutah chuan nu leh pate chu an fate’n thutak hnâwl anga ngai nghâl mai lo tûr leh an buaina dik tak hre tûrin a fuih a ni. Ṭhiante nêksâwrna emaw, mal nia inhriatna vâng emaw a ni thei a. A nih loh leh, ṭhalai dangte chu amah aia Jehova rawngbâwlnaa tel tam zâwkah a ngai pawh a ni mai thei. Chûngte chu i fate’n i rinna an ṭâwmpui lo tihna a nih kher lo tiin thubelhna chuan a hrilhfiah a ni. A thiltawn harsatna ṭhenkhatte vâng a ni tlângpui zâwk ṭhîn a. Chuvângin, thubelhna chuan nu leh pate chu thutak ringhleltu fate an ṭanpui theih dân chungchânga rawtnate a pe a ni.

19. Engtin nge nu leh pate chuan an fate chu “chhandamna hmu khawpa tifing” tûra an ṭanpui theih?

¹⁹ Nu leh pa i nih angin, i fate chu “Lalpa thununnaah leh zilhnaah,” ṭhang chho tûrin mawhphûrhna leh chanvo pawimawih tak i nei a. (Ephesi 6:4) Kan hriat tawh angin, i fate chu Bible thute i zirtîr ang a, an thu zirte ring nghet tûrin i ṭanpui tûr tihna a ni. An rinna a ngheh chuan Jehova hnêna inpumpêk a, theih tâwp chhuaha a rawngbâwl tûrin a chêttîr ang. Jehova Thu, a thlarau thinghlim, leh i thawhrimnate chuan i fate chu “chhandamna hmu khawpa tifing” tûrin ṭanpui rawh se.