Naupangte U—Engtin Nge Baptisma Chang Tûra In Inbuatsaih Theih?
“Aw ka Pathian, i duhzâwng tih hi ka lâwmzâwng tak a ni.”—SAM 40:8.
1, 2. (a) Baptisma chan chu rahbi khûnkhân tak a nih chhan hrilhfiah rawh. (b) Mi chuan baptisma a chan hmain eng nge a hriat chian ngai a, engvângin nge?
BAPTISMA chang duh naupang i ni em? I nih chuan, chu chu chawimawina i neih theih azawnga ropui ber a ni a. Thuziak hmasaa târ lan tâk ang khân, baptisma chang tûra thu tlûkna siam chu thil khûnkhân tak a ni. Chu chuan chatuana Jehova rawngbâwl tûr leh a duhzâwng tih chu i nuna thil pawimawh ber nihtîr tûra intiamin, i inpumpêk tawh tih mi dangte a hriattîr a ni. Hetiang taka Pathian hnêna intiamna khûnkhân tak a nih avângin, a âwm tâwka i puitlin a, baptisma chan duhna i neih a, Pathian hnêna inpumpêkna awmzia i hriatthiam hnuah chauh baptisma i chang tûr a ni.
2 Mahse, baptisma chang tûra la inpeih lo niin i inhre mai thei a. A nih loh leh, inpeih tawh niin i inhria a; mahse, i nu leh pate chuan i upat deuh hun leh thiltawn i neih deuh hun chu nghah a la ngai niin an hria pawh a ni thei. Eng nge i tih ang? Lunghnual suh. Baptisma chang thei thuai tûra hma lâk nân chu hun chu hmang zâwk ang che. Chu chu rilrua vawng rengin, hêng thil pathumahte hian thiltum i insiam thei a ni: (1) i rinna, a nih loh leh i thurin, (2) i thiltih leh (3) i lâwmnate hi.
I RINNA
3, 4. Naupangte chuan Timothea hnên aṭangin eng nge an zir theih?
3 Hêng zawhnate i chhân dân tûr hi ngaihtuah rawh: Engvângin nge Pathian a awm tih ka rin? Engvângin nge Bible hi Pathian min pêk a ni tih ka chian? Engvângin nge khawvêl nungchang tehna entawn lo va, Pathian thupêkte ka zawm? tihte hi. Hêng zawhnate hian: “Pathian duhzâwng, a ṭha leh lawm tlâk leh, ṭhat famkim chu in hriatfiah theih nân,” tia tirhkoh Paula fuihna chu zâwm tûrin a ṭanpui thei che a ni. (Rom 12:2) Engvângin nge chutianga i tih ang?
4 Timothea entawn tûr siam chuan a ṭanpui thei che. A nu leh a piin Pathian Thu an zirtîr avângin Pathian Lehkha Thu chu a hre chiang hle a. Mahse, Paula’n Timothea hnênah: “I zir tawh, i pawm ngheh tawh kha chelh tlat rawh,” tiin a hrilh a ni. (2 Timothea 3:14, 15, C.L. Re-edited.) Heta ‘pawm nghet’ tih ṭawngkam hi “thil engemaw chu a dik ngei tih hminna leh chianna” a ni. Chuvângin, Timothea tân thutak chu Pathian Lehkha Thu-ah hmuh theih a ni tih hmin a ngai a. Thutak a pawm chhan chu a nu leh a piin pawm tûra an tih vâng ni lovin, mahnia thutak a fiah hnua hmina a awm vâng a ni.—1 Thessolonika 5:21 chhiar rawh.
5, 6. Engvângin nge i naupan laia ngaihtuahna hman dân zir chu a pawimawh?
5 Nang eng nge i dinhmun? Thutak i hriatna chu a rei tawh pawh a ni thei a. Chutiang a nih chuan, i rin nachhan ngaihtuah chu tum tlat rawh. Chu chuan i rinna a tinghetin, ṭhiante nêksâwrna te, khawvêl ngaihtuahna te, leh mahni rilru veizâwngte avânga thu tlûkna dik lo siam lo tûrin a ṭanpui ang che.
6 I naupan lai aṭanga ngaihtuahna hman dân i zir chuan, i ṭhiante’n hêng zawhna: ‘Pathian a awm tih engtin nge i hriat chian? Pathianin min hmangaih a nih chuan, engvângin nge thil ṭha lote a thlen a phal? Engtin nge Pathian chu engtik lai pawha awm a nih theih?’ tih ang chi an zawh hunah i chhâng thei ang. I inbuatsaih chuan, chutiang zawhnate chuan rinhlelhna a neihtîr lo vang che a, Bible zir tûrin a chêttîr zâwk ang che.
7-9. Internet-a, “Bible Zirtîrna Dik Tak Chu Eng Nge Ni?” tih zirna kaihruaitu thuziak inzawm hian i rinna a tihngheh theih dân sawi rawh.
7 Ngun taka mahnia inzîrna chuan zawhnate chhâng tûr te, rinhlelhna paih bo tûr te, leh i rinna tichak tûrtein a ṭanpui ang che. (Tirhkohte 17:11) Chutianga ti tûra min ṭanpui thei thu leh hla chhuah tam tak kan nei a. Mi tam tak chuan The Origin of Life—Five Questions Worth Asking tih brochure leh Is There a Creator Who Cares About You? tih lehkhabute zir chu ṭangkai an ti hle. Ṭhalai tam tak chuan jw. org-a “Bible Zirtîrna Dik Tak Chu Eng Nge Ni?” tih thuziak inzawm chu zir nuam an tiin, an hlâwkpui hle bawk. Chu chu BIBLE TEACHINGS hnuaiah i hmu thei ang. Chu thuziak inzawma zirna kaihruaitu tinte chu Bible thu i rinna tinghet tûra ṭanpuitu tûr atâna siam a ni.
8 Bible zirlai i nih avângin, zirna kaihruaitua awm zawhna ṭhenkhatte chhânna chu i hre tawh mai thei a. Mahse, i chhânnate chu i chiang em? Zirna kaihruaitu chuan Bible châng tam tak ngun taka ngaihtuah tûrin a ṭanpui ang che a, i rin chhan ziak chhuak tûrin a fuih ang che. Chu chuan mi dangte hnêna i rinna hrilhfiah dân tûr hre tûrin a ṭanpui ang che. Internet i hmang thei a nih chuan “Bible Zirtîrna Dik Tak Chu Eng Nge Ni?” tih thuziak inzawm chu i rinna tichak tûrin mahnia inzirna neih nân i hmang thei a ni.
9 Hei hi thutak a ni tih mahniin i fiah tûr a ni a. Chu chuan baptisma chang tûra inbuatsaih tûrin a ṭanpui ang che. Unaunu tleirâwl pakhat chuan: “Baptisma chang tûra thu tlûkna ka siam hmain, Bible ka zir a, tichuan hei hi sakhaw dik a ni tih ka hre ta a. Nî tin mai hian, chu ka rinna chu a nghet zual sauh a ni,” tiin a sawi.
I THILTIH
10. Baptisma chang tawh Kristian pakhatin a rinna mila thil a tih beisei chu engvângin nge thil inâwm tak a nih?
10 Bible chuan: “Rinna chu thiltih nei lovin amah chauhvin a awm chuan thi a ni,” tiin a sawi a. (Jakoba 2:17) Rinna nghet tak i neih chuan, chu chu i thiltih hmangin i târ lang ang. Bible-in ‘awm dân thianghlim leh Pathian ngaihsakna thiltihte’ tia a sawi chu i nei ang.—2 Petera 3:11, 12 chhiar rawh.
11. “Awm dân thianghlim” tih ṭawngkam chu hrilhfiah rawh.
11 “Awm dân thianghlim” tih chu engte nge ni? I thiltihte a thianghlim chuan, i nungchang pawh a thianghlim tihna a ni a. Entîr nân, thlaruk kalta kha han ngaihtuah teh. Thil dik lo engemaw ti tûra thlêm i nih lai hian thil dik leh dik lo chu ngun takin i ngaihtuah em? (Hebrai 5:14) Thlêmna, a nih loh leh ṭhiante nêksâwrnaa i tlâwm loh hun chu i hre chhuak em? School-ah hian mi dangte tân entawn tlâk i ni em? Jehova chungah i rinawm reng em? Nge ni a, an fiam loh nân che i school kalpuite ang nih i tum zâwk? (1 Petera 4:3, 4) Ṭha famkim tumah kan awm lo va. A châng chuan, kum tam tak chhûng Jehova rawng bâwl tawhte pawh an zâm theiin, mi dangte hnêna thu hrilh chu harsa an ti thei a ni. Mahse, Pathian hnêna inpumpêk tawh chuan Jehova Thuhretu nih chu a chhuang ang a, chu chu a awm dân thianghlim hmangin a târ lang a ni.
12. ‘Pathian ngaihsakna thiltihte’ zînga ṭhenkhat chu engte nge ni a, chûng chu engtin nge i thlîr ang?
12 ‘Pathian ngaihsakna thiltihte’ chu eng nge ni? Chutah chuan, inkhâwm leh thu hrilh ang chi kohhrana i thiltihte a tel a. Mahse, mi dangte hmuh loh, mahnia Jehova hnêna ṭawngṭaina leh inzirna i neih ang chite chu a tel a ni. Jehova hnêna inpumpêk tawh chuan, chûng thiltihte chu phurritah a ngai lo vang a. “Aw ka Pathian, i duhzâwng tih hi ka lâwmzâwng tak a ni; a ni, i dân thu chu ka thinlungah a awm reng e,” tia sawitu Davida angin a ngai zâwk ang.—Sâm 40:8.
13, 14. Eng thilin nge ‘Pathian ngaihsakna thiltihte’ ti tûrin ṭanpui thei che a, unau ṭhenkhat chuan engtin nge an hlâwkpui?
13 Thiltumte insiam tûra ṭanpui tûr chein Questions Young People Ask—Answers That Work, tih lehkhabu Volume 2-na phêk 308 leh 309-naah worksheet kan nei a. Worksheet-ah chuan, hetiang zawhnate chhânna hi i ziak chhuak thei a ni: “Eng ang takin nge dîl bîk i neih a, chu chuan Jehova i hmangaihna chu engtin nge a târ lan?” “Mahnia inzirna i neihnaah engte nge i telh?” “I nu leh pate an tel lo chung pawhin rawngbâwlnaah i tel em?” tihte hi. Worksheet-ah chuan i ṭawngṭaina, mahnia i inzirna, leh thu hrilhna chungchânga thiltum i insiam duh engpawh ziah chhuah nân hmun âwl a awm bawk a ni.
14 Baptisma chan tum naupang tam tak chuan he worksheet hi thil ṭangkai tak a ni tih an hria a. Unaunu tleirâwl Tilda-i chuan: “Thiltumte insiam nân worksheet ka hmang a. Chûng thiltumte chu pakhat tê têin ka hlen a, kum khat vêl a han liam chuan baptisma chan ka inpeih ta a ni,” tiin a sawi. Patrick-a pawhin, chutianga hlawhtlinna chu a nei a. Ani chuan, “Ka thiltumte chu ka hre tawh a, chu mi ziah chhuahna chuan hlen chhuak tûrin ṭan min lâktîr lehzual a ni,” tiin a sawi bawk.
I nu leh pate’n Jehova rawng an bâwl loh pawhin, i bâwl zawm zêl ang em? (Paragraph 15-na en rawh)
15. Inpumpêkna chu mi mala thu tlûkna siam tûr a nih chhan hrilhfiah rawh.
15 Worksheet-a awm zawhna pakhat chu: “I nu leh pate leh i ṭhiante’n Jehova rawngbâwl an bânsan pawhin, i bâwl tho ang em?” tih a ni a. Jehova hnêna inpumpêk a, baptisma i chan hian, amah nên mi mal inlaichînna i nei tawh ngei ang a. Chuvângin, Jehova tâna i thiltih chu i nu leh pate, a nih loh leh mi dangte thiltihah a innghat tûr a ni lo. I awm dân thianghlim leh i Pathian ngaihsakna thiltihte chuan thutak i nei tih i rin nghehzia leh Pathian tehnate zawm i duhzia a târ lang ang a. Tichuan, baptisma chang tûrin i tling thuai ang.
I LAWMNA
16, 17. (a) Mi chu Kristian ni tûrin engin nge chêttîr ang? (b) Tlanna avânga lâwmna chu eng anga hrilhfiah theih nge ni?
16 Ni khat chu, Mosia Dân hre bel tak pakhatin Isua hnênah: “Eng thupêk hi nge ropui ber?” tiin a zâwt a. Isua chuan: “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,” tiin a chhâng a ni. (Matthaia 22:35-37) Isua chuan, miin baptisma a chan chhan leh Kristian a nih chhan chu Jehova a hmangaih vâng a ni tûr a ni tih a hrilhfiah a ni. Jehova i hmangaihna i tihngheh theih dân kawng ṭha berte zînga pakhat chu mihringte hnêna Pathian thilpêk ropui ber, tlanna chungchâng ngaihtuah hi a ni. (2 Korinth 5:14, 15; 1 Johana 4:9, 19 chhiar rawh.) Chutianga i ngaihtuah chuan, chu thilpêk ropui tak avânga i lâwmzia târ lan duhna i lo nei ang.
17 Tlanna avânga i lâwmzia chu hetianga hrilhfiah theih a ni: Tuiah i tla a, tuemawin a chhanchhuak che angin han mitthla teh. Inah haw nal nalin, i inhrûk hul hnuah, i tâna a thiltih chu i theihnghilh mai ang em? Theihnghilh mai lo vang! Nangmah chhanchhuaktu che chungah chuan i lâwm reng ngei ang! Chutiang bawkin, tlanna avângin Jehova leh Isua chungah kan lâwm hle tûr a ni a. An tân nun kan bâ a ni! Sual leh thihna ata min chhanchhuak si a. Tûnah lei Paradis-a chatuan nun beiseina kan nei thei hi min hmangaih vâng a lo ni!
18, 19. (a) Engvângin nge Jehova ta nih chu i hlauh loh vang? (b) Engtin nge Jehova rawngbâwlna chuan i nun a tihṭhat zâwk?
18 I tâna Jehova thiltihte avângin i lâwm em? I lâwm a nih chuan inpumpêk a, baptisma chan chu i tih tûr dik tak a ni. I inpumpêkna chu chatuana a duhzâwng ti tûra Pathian hnêna intiamna a ni a. Chutiang intiamna neih chu i hlau tûr a ni em? Ni lo! Jehova chuan i tâna thil ṭha ber tûr chu a duhsak che a, a duhzâwng titute chu lâwmman a pe ang. (Hebrai 11:6) Pathian hnêna inpumpêk a, baptisma i chan hian, i nun chuan chhiat lam aiin, ṭhat lam a pan zâwk ang! A tleirâwl hmaa baptisma chang, tûna kum 24 mi unaupa chuan, “Lo upa zâwk ta ila chuan hriatthiamna thûk zâwk ka nei pawh a ni mahna; mahse, Jehova hnêna inpumpêk tûra mahnia thu tlûkna ka siamna chuan khawvêl thil ûmna lak ata min vênghim a ni,” tiin a sawi.
19 Jehova chuan i tâna thil ṭha ber tûr chu a duhsak che a. Mahse, Setana chuan mahni hma a sialin, a ngaihsak lo che a ni. Amah i zui chuan thil ṭha engmah a pe lo vang che. Engtin nge a neih loh pui chu a pêk theih tehrêng ang che? Chanchin ṭha a nei lo va, beisei tûr engmah a nei si lo. A neih tûr nakin hun ṭha lo chauh a pe thei ang che!—Thu Puan 20:10.
20. Naupang chuan inpumpêk a, baptisma chang chho thei tûrin eng nge a tih theih? (“Hma I Sâwn Theih Nâna Ṭanpuitu,” tih bâwm chu en bawk rawh.)
20 Jehova hnêna inpumpêk tûra i thu tlûkna siam chu, thu tlûkna i siam tûrte zînga ṭha ber a ni a. Chu thu tlûkna siam tûr chuan i inpeih tawh em? I inpeih tawh chuan, chu thutiam siam chu hlau suh. Mahse, la inpeih lo nia i inhriat chuan, hmasâwn chhoh zêl nân he thuziaka rawtnate hi hmang ang che. Paula chuan Philippi khuaa unaute chu hmasâwn chho zêl tûrin a hrilh a. (Philippi 3:16) Chu thurâwn chu i zâwm a nih chuan, Jehova hnêna inpumpêk a, baptisma chan chu i duh thuai ang. (ws16.03-E)