Chhiartute Zawhna

Engvângin nge Isua hmêlmate chu kut sil chungchânga an buai?

Hei hi Isua hmêlmate’n Isua leh a zirtîrte an sawisêlna thil tam tak zînga pakhat mai a ni a. Entîr nân, Mosia Dân chuan tuemaw chu a taksa aṭanga thil bawlhhawlh a chhuah emaw, phâr natna a vei emaw, a nih loh leh mitthi ruang leh ran thi ruang a khawih emaw chuan a bawlhhlawh tih a sawi a. Chu Dân chuan mi chu a thianghlim leh theih dân tûr chungchângah kaihhruaina a pe bawk. Chu chu inthawina, insûk faina leh inbual faina hmanga tih theih a ni.—Leviticus, bung 11-15; Number, bung 19.

Rabbi tia an hriat Juda zirtîrtute chuan chûng dân thuahte chuan an dân siam chawpte an belhchhah a. Lehkhabu pakhat chuan mi chu tihbawlhhlawh a nih dân leh mi dangte a tihbawlhhlawh theih dân chungchângah rabbi-ho chuan dân belhchhahin dân chipchiar tak an zam tih a sawi. Anni chuan eng ang bungbêl leh thilte nge bawlhhlawh thei a, bawlhhlawh thei lo tih chungchângah leh an thianghlim leh theih nâna an tih ngaite chungchângah dânte an zam belh bawk a ni.

Isua hmêlmate chuan a hnênah: “Engati nge i zirtîrte upa thurochhiah ang zêla awm lova, kut bawlhhlawhin chhang an ei ṭhin ni?” tiin an zâwt a. (Marka 7:5) Chûng Pharisaite sawi chu thianghlimna ṭha, chaw ei hmaa kut sil chungchâng hi a ni lo. Anni chuan miin chaw a ei hmain an thurochhiah angin a kut chu tuiin a leih phawt tûr a ni tih dân an zam a. A chunga kan sawi tâk lehkhabu chuan, rabbi-ho chu “tui leih nâna hman tûr bungbêl te, a tui hman tûr te, a leihtu tûr te, leh kut a huh chin tûrte chungchângah an inhnial bawk” tih a sawi belh a ni.

Isua chuan mihring siam hêng dân chuang tlaite hi engtin nge a ngaih? Juda sakhaw hruaitute hnênah heti hian a sawi a ni: “Isaia hian nangni mi vervêkte thu hi a lo hril lâwk dik zet mai. ‘He miteho hian an kain mi chawimawi a, an thinlung erawh chuan mi hlat si a. Engpawh ni sela, an zirtîrnaa mihring thupêkte an zirtîr avângin an mi biak ṭhin hi athlâwn mai a ni,’ tih ziak ang hian. Pathian thupêkte chu thlahthlamin mihring thurochhiah chu in vuan tlat a nih hi,” tiin.—Marka 7:6-8. (ws16.08-E)