I Nunah Pathian Kut I Hmu Em?

1, 2. Engtin nge mi ṭhenkhatin Pathian an ngaih?

MI TAM tak chuan an thiltihte chu Pathian tâna awmze nei lo niin an ngai a. Pathianin an chunga thilthlengte chu a ngaihsak tak tak lo niin an hria a ni. Entîr nân, kum 2013 November thlaa thlipui na takin Philippines ram zau tak a nuai chhiat khân khawpui lian tak pakhata bawrhsap chuan: “Pathian chu hmun dangah a awm a ni ngei ang,” tiin a sawi a ni.

² Mi dangte chuan Pathianin an thiltih a hmu lo niin an ngai a. (Isaia 26:10, 11; 3 Johana 11) Tirhkoh Paula hun laia mi ṭhenkhat pawhin chutiang chuan an ngai a ni. Ani chuan an chungchângah: ‘Pathian an hre duh lo,’ tiin a sawi a. An fel lova, an sual a, an duhâmin, an ṭha lo hle a ni.—Rom 1:28, 29.

3. (a) Eng zawhnate nge kan inzawh ang? (b) Bible-ah Pathian “kut” chu eng sawi nâna hman nge a nih ṭhin?

³ Keinin engtin nge kan ngaih ve? Kan thiltih apiang Jehova’n a hmu tih kan hria a. Mahse, min ngaihsak tih kan ring em? Kan nunah a ṭanpuina kut kan hmu em? Bible-ah chuan Pathian “kut,” chu Pathian hman a thiltihtheihna sawi nâna hman a ni ṭhîn a. Chu chu a chhiahhlawhte ṭanpui nân leh a hmêlmate hneh nân a hmang a ni. (Deuteronomy 26:8 chhiar rawh.) Isua chuan mi ṭhenkhatte’n “Pathian an la hmu dâwn” tih a sawi a. (Matthaia 5:8) Chûng mite zîngah chuan kan tel ve em? Engtin nge ‘Pathian kan hmuh’ theih ang? An nuna Pathian kut hmutu leh hmu lotute chanchin Bible-a kan hmuhte chu zirin, rinnain Pathian kut hmu tûra min ṭanpui dân i zir bawk ang u.

PATHIAN KUT AN HMU DUH LO

4. Engvângin nge Israel hmêlmate chuan Pathian kut an hmuh duh loh?

⁴ Hmân lai khân, Pathianin Israel mite a ṭanpui dân chu mi tam takin hmuh leh hriat theihna hun remchâng an nei a. Jehova chuan Aigupta ram aṭanga a mite chhuah zalên nân leh Ram Tiama lal tam takte hneh nân thilmak tih theihna a hmang a ni. (Josua 9:3, 9, 10) Lal dangte chuan Jehova’n a mite a chhanhim dân hriain hmu mah se, “Josua leh Israel-ho chu thu khat vuaa beih rawn tumin an pung khâwm chiam a.” (Josua 9:1, 2) Israel mite an do khân, chûng lalte chuan Pathian kut hmuh theihna hun remchâng an nei a ni. Jehova thiltihtheihna ropui tak avângin, “an hmêlmate chunga phuba an lâk hma loh chuan nî chu a ding ta reng” a ni. (Josua 10:13) Mahse, Jehova chuan Israel mite do tûrin, an hmêlmate thinlung chu a ‘tihkhauhsak a.’ (Josua 11:20) Jehova’n a mite a dosak tih an pawm duh loh avângin Israel hmêlmate chu hnehin an awm ta a ni.

5. Lal suaksual Ahaba chuan eng nge a rin duh loh?

⁵ A hnuah, Lal Ahaba chuan Pathian kut hmuh theihna hun remchâng tam tak a nei a. Elija chuan a hnênah: “Ka thu lo chuan dai emaw, ruah rêng rêng a tla lo vang,” tiin a hrilh a ni. (1 Lalte 17:1) Chu chu Pathian kut avâng chauhva thleng thei a ni a, Ahaba erawh chuan a ring duh lo a ni. A hnuah, Elija chu Jehova hnênah a ṭawngṭai a, ani chuan vân ata mei rawn tîrin a chhâng a. Ahaba’n chu chu a hmu a. Tichuan, Elija chuan Ahaba hnênah Jehova’n khawkheng a tirehin, ruah a sûrtîr dâwn tih a hrilh a ni. (1 Lalte 18:22-45) Ahaba chuan chûng zawng zawng chu a hmu a, Jehova thiltihtheihna a hmuh chu a la ring duh lo cheu a ni. Hêng entîrnate aṭangin eng nge kan zir theih? Kan nunah Pathian kut hmuh kan tum tûr a ni tih kan zir thei a ni.

ANNI CHUAN JEHOVA KUT AN HMU

6, 7. Gibeon mite leh Rahabi’n eng nge an hriat?

⁶ Gibeon mite chu an chheh vêl hnamte lakah an danglam hle a. Pathian kut chu an hmu a. Israel mite do ai chuan Gibeon mite chuan anmahni nêna remna siam chu an duh zâwk a ni. Engvângin nge? Jehova leh a thiltih zawng zawng an hriat vâng a nih thu an sawi. (Josua 9:3, 9, 10) Jehova’n Israelte a dosak tih an hriat avângin an fing hle a ni.

⁷ Rahabi pawhin Jehova kut a hmu a. Israel mi a ni lova; mahse, Jehova’n a mite Aigupa aṭanga a chhuahtîr dân chu a hria a. Israel enthlatu pahnih a hnêna an rawn kal khân: “He ram hi LALPAIN a pe tawh che u,” tiin a lo hrilh a ni. Rahabi chuan Jehova’n amah leh a chhûngte a chhanhim thei tih a ring a. A thiltih chu atân a hlauhawm hle tih hre reng mah se, Jehova chungah a rinna a târ lang a ni.—Josua 2:9-13; 4:23, 24.

8. Israel ṭhenkhat chuan engtin nge Pathian kut chu an hriat?

⁸ Lal suaksual Ahaba ang lo takin, Elija ṭawngṭai avânga vân aṭanga mei rawn tla hmutu Israel ṭhenkhat chuan Pathian tih a nihzia an hria a. “LALPA hi a lo ni. Pathian chu,” tiin an au chhuak a ni. (1 Lalte 18:39) Pathian thiltihtheihna an hmu tih an inhrechiang hle a ni.

9. Engtin nge tûn laiah Jehova leh a kut chu kan hmuh theih?

⁹ ‘Pathian hmu,’ a nih loh leh Pathian kut hmu tih awmzia hre thiam tûra min ṭanpuitu entîrna ṭha leh ṭha lote kan ngaihtuah tawh a. Jehova leh a mizia kan han hriat hian, ‘kan thinlung mitin’ a kut chu kan hmu a ni. (Ephesi 1:18) Chu chuan Jehova’n a mite a ṭanpui dân hmutu hmân lai leh tûn laia mi rinawmte entawn duhna nei tûrin min chêttîr a ni. Mahse, tûn laiah Pathianin a mite a ṭanpui tih finfiahna a awm em?

TUN LAIA PATHIAN KUT LAN FIAHNA

10. Tûn laiah Jehova’n a mite a ṭanpui tih finfiahna eng nge kan neih? (A thupui chunga milem en rawh.)

¹⁰ Jehova’n tûn laiah a mite a ṭanpui zawm zêl tih a lan fiahna tam tak kan hmu a. Pathian ṭanpuina dîla an ṭawngṭaina chhânna hmutute thiltawn chu kan hre fo a ni. (Sâm 53:2) Entîr nân, Allan-a chuan Philippines rama thliarkâr tê pakhata thu a hril laiin, nu pakhat amah a hmuh avânga ṭap ta mai chu a tawng a. “Chumi zîng chuan, a Thuhretute’n amah an zawn hmuh theih nân Jehova hnênah chu nu chu a ṭawngṭai,” thu Allan-a chuan a sawi. Chu nu chu a tleirâwl laiin Thuhretute’n Bible an lo zirpui tawh ṭhîn a, mahse pasal a neih hnu chuan thliarkâra an pêm avângin a zir chhunzawm ta lo a ni. Pathianin a ṭawngṭaina a chhân nghâlna chuan a rilru a khawih hle a. Kum khat pawh a tlin hmain, Jehova hnênah a inpumpêk ta a ni.

11, 12. (a) Engtin nge Jehova chuan a chhiahhlawhte a ṭanpui? (b) Jehova’n unaunu pakhat a ṭanpui dân hrilhfiah rawh.

¹¹ Mi tam tak chuan tûn hmaa thil chîn ṭha lo an neih zialzûk te, damdawi hman khaw loh te, a nih loh leh saruak lem leh thuziak ente bânsanin a ṭanpuina kut chu an hmu a ni. Mi ṭhenkhat chuan mahniin bânsan tum mah se, an theih loh thu an sawi a. Mahse, Jehova ṭanpuina an dîl tâkah chuan a ‘thiltihtheihna nasa tak’ a pe a, a tâwpah chuan an thil chîn ṭha lo chu an bânsan thei ta a ni.—2 Korinth 4:7; Sâm 37:23, 24.

¹² Jehova chuan a chhiahhlawhte chu mi mal harsatna an neihte tuar chhuak tûrin a ṭanpui bawk a. Chu chu Amy-i chungah a thleng a ni. Ani chu Pacific Ocean-a thliarkâr tê pakhatah Kingdom Hall leh missionary in saknaa ṭanpui tûra ruat a ni a. Hnam zia a inang lo va, electric leh tui a awm lo zing hle a, an kawngte chu tuiin a chîm a, a chhûngte a ngaih bâkah, hotel pindan zîm takah a awm bawk a ni. Ni khat chu a thawhpui unaunu pakhat a vîn a. Chu chuan a rilru a tihrehawm hle a. A pindan thim taka a kîr leh chuan ṭanpuina dîlin Jehova hnênah a ṭawngṭai a ni. Tichuan, electric a awm leh chuan Vênnainsâng-a Gilead graduation chungchâng thuziak chu a chhiar a. Chu thuziakah chuan a tawrh ngai dinhmun angte chu sawi a ni a. Ani chuan: “Chumi zân chuan Jehova’n min bia ang maiin ka inhria a. Chu chuan ka rawngbâwlna chhunzawm tûrin min chêttîr a ni,” tiin a sawi.—Sâm 44:25, 26; Isaia 41:10, 13.

13. Jehova’n a mite chu thu hril tûra dikna an neih humhimnaah a ṭanpui tih engin nge târ lang?

¹³ Jehova chuan a mite chu chanchin ṭha humhim tûr leh dân ang taka thu hril thei tûrin a ṭanpui bawk a. (Philippi 1:7) Entîr nân, sawrkâr ṭhenkhatin kan thu hrilh rawngbâwlna tihtâwp an tum hunah, inhumhim nân court-ah kan khing a. Kum 2000 aṭang khân khawvêl hmun hrang hranga high-court-a thu buai kan neihte zîngah a lo berah pawh 268 kan hneh tawh a, chûng zînga 24 chu European Court of Human Rights-ah a ni. Chu chuan Pathian kut chu tumahin an dang thei lo tih a tichiang hle!—Isaia 54:17; Isaia 59:1 chhiar rawh.

14. Pathian chu a mite zîngah a awm tih finfiahna dang eng nge kan neih?

¹⁴ Pathian ṭanpuina kut lanna dang leh chu khawvêl puma thu hrilh rawngbâwlna hi a ni. (Matthaia 24:14; Tirhkohte 1:8) Hnam tina mi Jehova chhiahhlawhte zînga inlungrualna awm pawh hi Jehova ṭanpuina avâng chauhva thleng thei a ni. He inlungrualna hi a va danglam bîk êm! Jehova be lotute pawhin: “Pathian in zîngah a awm tak zet,” tiin an pawm hial a ni. (1 Korinth 14:25) Pathian chu a mite zîngah a awm tih finfiahna tam tak kan nei a. (Isaia 66:14 chhiar rawh.) A mi malin engtin nge i ngaih ve? I nunah Jehova ṭanpuina kut i hmu em?

I NUNAH JEHOVA KUT I HMU EM?

15. Engvângin nge kan nunah Pathian ṭanpuina kut hmuh loh châng kan neih theih?

¹⁵ Kan nunah Pathian kut hmuh loh châng kan nei mai thei a ni. Engvângin nge? Buaina tam tak kan neih hian, tûn hmaa Jehova’n vawi tam tak min lo ṭanpui tawhnate chu kan theihnghilh thei a. Chu chu Elija chungah pawh a thleng a ni. Huaisen hle mah se, Lalnu Jezebeli’n thah a tum khân a hlau va. Jehova’n a lo ṭanpui tawh dân chu a theihnghilh lawk a ni. Bible chuan Elija’n thih a duh thu a sawi a. (1 Lalte 19:1-4) Khawi aṭangin nge ṭanpuina leh huaisenna a hmuh ang? Jehova lam a hawi a ngai a ni.—1 Lalte 19:14-18.

16. Buaina kan neih hunah engtin nge Pathian kan hmuh theih ang?

¹⁶ Joba chuan a lungngaihna ringawt a ngaihtuah avângin a dinhmun chu Jehova hmuh dân angin a hmu lo. (Joba 42:3-6) Kan buainate avângin Pathian hmuh harsa tih châng kan nei ve thei a. Pathianin kan tâna a thiltihte hmu tûrin engin nge min ṭanpui thei? Kan buainate chungchânga Bible sawi chu kan chhût ngun tûr a ni. Tichuan, Jehova chu kan tân a tak zualin: “Benga hriatna mai zawngin ka hre tawh chia, mahse, tûnah zawng ka hmu ta che,” tiin kan sawi ve thei ang.

17, 18. (a) Engtin nge i nunah Jehova kut chu i hmuh theih? (b) Tûn laia Pathian min ṭanpui dân târ langtu thiltawn sawi rawh.

¹⁷ Engtin nge i nunah Jehova kut chu i hmuh theih? Entîrna panga i lo ngaihtuah ang u. A hmasain, thutak hmu tûrin Jehova’n a ṭanpui che niin i hre thei a. A pahnihnaah, Kristian inkhâwmnaah kalin, thusawi i ngaithla a, “Ka mamawh tak a va ni êm!” tia i sawi chu i hre chhuak mai thei bawk. A pathumnaah, i ṭawngṭainate zînga pakhat Jehova’n a chhân dân i hmu mai thei bawk. A palinaah, Jehova tân tam lehzuala thiltih i duh thei a, chu thiltum hlen tûra a ṭanpui dân che pawh i hmu thei a ni. A panganaah, i hnathawh chuan Jehova rawng i bâwlna hun a lâk pên avângin i bânsan a, tichuan: “Engtikah mah . . . ka kalsan tawp lo vang che,” tih Pathian thutiam a thlen famkimna i hmu pawh a ni thei. (Hebrai 13:5) Jehova nên inlaichînna nghet tak kan neih hian, kan nunah a kut chu awlsam takin kan hmu thei a ni.

¹⁸ Kenya rama awm, unaunu Sarah-i chuan: “A thu zir hlut vak lotu, ka Bible zirpui chungchângah ka ṭawngṭai a. Zirpui zawm tûr a nih leh nih loh Jehova ka zâwt a. ‘Amen,’ tia ka sawi zawh chiah chuan ka phone a rawn ri a. Bible zirlai chuan a rawn inkhâwm duh thu min rawn hrilh hi a lo ni reng mai! Mak ka va ti êm!” tiin a sawi. Kan tâna Pathian thiltihte kan en chuan, a ṭanpuina kut chu kan hmu ang. Asia-a awm unaunu Rhonna-i chuan kan nuna Jehova min ṭanpui dân hmu thiam tûrin hun a ngaih deuh thu a sawi a. “I hmuh thiam tawh chuan, min ngaihsakzia i hmu chhuak zêl ang!” tiin a sawi belh a ni.

19. Pathian hmu tûrin eng thil dang nge kan tih ngai?

¹⁹ Isua chuan ‘Pathian hmutute’ chu an ‘thinlung a thianghlim’ tûr a ni tih a sawi. (Matthaia 5:8) Chumi awmzia chu eng nge ni? Kan ngaihtuahna kan tithianghlim rengin, thil dik lo rêng rêng kan bânsan tûr a ni. (2 Korinth 4:2 chhiar rawh.) He thuziakah hian Pathian hmu tûr chuan, amah nêna inlaichînna kan tihngheh a ngai tih kan zir a. A dawta thuziakah chuan rinnain kan nuna Jehova kut chiang taka hmu tûra min ṭanpui dân sawiho a ni ang. (ws15-E 10/15)