“Thutak Pathian” Chuan A Thiltum A Ti Hlawhtling Reng Ṭhîn

1. Engvângin nge Setana dâwt thute lakah kan him tih kan chian theih? (Sâm 31:2-5)

SETANA thununna khawvêlah kan awm a. Dâwt thu te, inbumna te leh, inphatsanna te chu a hluar hle a ni. Rinchhan tûr ber pawh hriat a harsa thei a. Sumdâwng mite chuan an elpuite chu an bum a. Fakna pe chhuaktute chuan an thil fak chungchângah a leitute chu thu dik lo an hrilh a. Mi ṭhenkhat chuan an ṭhian hnai takte thusawi pawh an ring ngam lo. Mahse, eng lai pawhin Jehova kan rinchhan thei a ni tih hriat chu a va thlamuanthlâk tak êm! Ani chu “thutak Pathian” a ni a. (Sâm 31:2-5 chhiar rawh.) Thutak chu amaha bet tlat niin, a mize pêng pakhat a ni. Chuvângin, Pathian Jehova thusawi leh thil tih zawng zawng chu a rinchhan tlâk hle.

2. He thuziakah hian eng nge kan sawiho vang?

² He thuziakah hian, kan thinlung zawng zawnga Jehova kan rin tlat theih chhan ṭhenkhat kan sawiho hmasa ang a. Chumi hnuah, thutak Pathianin Diabola khawvêl suaksual tak a tih tâwp dân tûr leh A thiltum ti hlawhtling tûra tûna a thil tih mêkte pawh kan ngaihtuahho bawk ang. Chumi sawihona chuan Jehova Thuhretu huaisen takte ni tûrin min ṭanpui dâwn a ni.

THUTAK PATHIAN KAN RIN TLAT THEIH CHHAN

3. Engvângin nge Jehova chu kan rinchhan pumhlûm theih?

³ Jehova chu Siamtu a nih avângin kan rinchhan thei. Ani chu lei leh vân Siamtu leh nunna zawng zawng Hnâr a ni a. (Gen. 1:1; Sâm 36:9; Thup. 4:11) Kan boruak hîp leh kan tui inte ang chi kan nun theih nâna kan mamawh engkim min pe a ni. Lei leh vâna thil awm zawng zawng hi a thununna hnuaiah a awm a, a awm zawm zêl bawk ang. Chuvângin, finna leh thiltihtheihnaa khat min Siamtu chu kan nunna leh hma lam hun atân kan rinchhan pumhlûm thei a ni.

4. Jehova’n min hmangaih tih engtin nge kan hriat?

⁴ Min hmangaih avângin Jehova chu kan rinchhan thei. Jehova’n nunna thilpêk hlu tak kan neih ve a duh avângin mihringte a siam a. A thiltum chungchângah heti hian a sawi a ni: “Kan anpuiin, keimahni ang takin mihring siam ila,” tiin. (Gen. 1:26) Ani chuan zalên taka duh thlan theihna min pe a. Kan chênna tûr hmun mawi tak pawh min siamsak a. (Sâm 115:16) Chu bâkah, kan nu leh pa hmasa berte chu, chu hmun mawi tak paradis-a chantîr tûra mawhphurhna phûrawm tak a pe bawk. (Gen. 1:28; 2:15) An hlimpui theih nân leilung hausakna zawng zawngte chu a pe a. Ni e, chûng a thiltih zawng zawngte chuan “LALPA ngilneihna [“hmangaihna rinawm,” NWT] chu chatuan ata chatuan thlengin a awm,” tih a finfiah a ni.—Sâm 103:17.

5. (a) Diabola’n mihring chhûngkua nuai bo a tum chung pawhin engtin nge Jehova’n a thu a vawn reng? (b) Pathian thlen famkimtîr thutiam ṭhenkhat chu engte nge ni? (“Pathianin Thutak A Sawi Reng,” tih bâwm chu en rawh.)

⁵ A thusawi anga a tih reng ṭhin avângin Jehova chu kan rinchhan thei. Jehova’n leilung chu “eng mah lovah a siam lo va, mihring awm nân a din zâwk a ni.” (Is. 45:18, 19) Evi leh Adama an hel khân, thi tûra an chung thu rêlsak an ni a. Chuvângin, Pathian thiltum chu hlawhchham ta niin a lang mai thei. Mahse, Jehova chu a thutiam zawng zawng Thlen Famkimtîrtu a ni a. (Is. 46:10, 11) Leilung hi mi fel a hmei a patea ti khat tûra a thiltum chu tih danglamin a awm chuang lo. Chuvângin, Jehova’n Evi leh Adama chu fate neih a phalsak a. Tichuan, Adama thlahte a chhandam theih nân leh chatuan nun beiseina ropui tak an neih theih nân a Fapa neih chhun chu tlanna atân a pe a ni.—Joh. 3:16.

THUTAK PATHIAN CHUAN A THILTUM A HLEN

6. Eden huana helna a chhuah hnu khân, Jehova’n eng nge a sawi lâwk?

⁶ Pathian laka hel tûra Evi leh Adama fuihtu chu “rûlpui tar, Diabol Setana”a a ni a. (Thup. 12:9; Gen. 3:4,5; Joh. 8:44) A tâwpah ani chu tih boral a nih tûr thu Jehova’n a lo sawi lâwk a ni. (Gen. 3:15) Chumi hun a thlen hmain, mi tam tak chuan Setana hnung zuiin, amah angin thil an ti ang a. Mi ṭhenkhat erawh Jehova chungah an rinawm ang.

7. Diabola hnungzuitute chu tute nge ni a, a tâwpah an chungah eng nge thleng ang?

⁷ Diabol Setana hnungzuitute chu hel hmang vântirhkohte leh mihringte an ni a. Anni chu Pathian thiltum an dodâl avângin Setana thlah zînga mi an rawn ni ta a ni. Mahse, Pathian hun ruat ngeiah, Setana leh a hnungzuitute chu tih boral an ni ang.—Dan. 2:44; Rom 16:20.

8. Kum 1914-ah khân, engtin nge Isua’n hma a lâk? (Milem en bawk rawh.)

⁸ Setana leh a hnungzuitu suaksual takte ti boral tûra Pathian thiltum chu a thleng famkim ngei ang tih ring tlat tûrin eng finfiahna nge kan neih? Kum 1914-ah Isua’n Diabol Setana leh a ramhuaite chu a do ṭan a, anni chu he leiah a paih thla a. (Thup. 12:7-9) Chu indona chu vâna thil thleng ni mah se, he leia awmte chuan a sawhkhâwkte chu chiang takin an tuar a ni. Bible chuan, “Diabola chu a lo chhuk tâk avângin lei leh tuifinriat chunga thil thleng tûr chu a va râpthlâk dâwn êm! Hun tlêm tê chauh a nei tawh tih a inhriat avângin, ani chu a thinur êm êm a ni,” tiin a sawi. (Thup. 12:12) Kum 1914 aṭangin Setana chuan he leilung hi a bitum tlat avângin khawvêl dinhmunte chu a chhe zual sauh sauh va. Ni e, ‘lei chunga thil thlengte chu a râpthlâk tak zet a ni’! Mahse, nakin lawkah, Isua’n “hnehna famkim” a chang ang a, Setana leh a thlâwptu zawng zawngte chu a nuai bo vang. (Thup. 6:2) Isua chuan Jehova hming chu chatuan atân thiam a chantîr ang a. (Sâm 45:4-6) Mi zawng zawngin Jehova chu thutak Pathian a ni tih an hre tawh ang!—Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

THUTAK PATHIANIN THUTAK NGAINATU ZAWNG ZAWNG A HRUAI KHAWM

9. Tûn laiah, Jehova’n tute nge a hruai khâwm?

⁹ Chumi hun a thlen hmain, Jehova chuan “lei leh vâna thil awm zawng zawng Kristaah” a hruai khâwm mêk a. (Eph. 1:10) ‘Vâna thil awmte,’ tih ṭawngkam hian vâna Krista nêna rorêl tûra Jehova thlan hriak thihte a kâwk a. ‘Leia thil awmte,’ tih ṭawngkam hian lei Paradis-a chatuana nung tûrte a kâwk a ni. Jehova betu zawng zawngte chu Setana dâwt thute hai lannaah phûr takin an tel a, rilru ṭha pu mite chu thutak hre tûrin an ṭanpui a ni.

10. Engtin nge Jehova’n mite chu zirtîrna dik lo laka a chhuah zalen? (Thu Puan 14:6, 7)

¹⁰ Jehova chuan khawvêla thleng tawh azawnga thu hrilh rawngbâwlna ropui ber hmangin thutak ngainatu zawng zawng chu a hruai khâwm a. (Thu Puan 14:6, 7 chhiar rawh.) Ani chuan mi dangte chanchin ṭha hrilh tûrin mihringte hmang mah se, vântirhkohte chu Kristian kohhrana thinlung ṭha pu mite hruai khâwmnaah an tel a ni. He thu hrilh rawngbâwlna hian Diabola’n Jehova chungchânga dâwt thu theh darh nâna kum zabi têl a lo hman tawh biakna dik lo lalram, Babulon Khaw Ropui zirtîrna dik lote chu a hai lang a. (Thup. 18:2, 4) Nakin lawkah, sakhaw dik lo zawng zawng chu tih boral phiar an ni ang a, thutak Pathian hmangaihtu zawng zawng chuan Jehova chu a phû ang ngeiin an chawimawi tawh ang.—Thup. 17:16.

11. Engtin nge Jehova betu dikte chu kan thliar hran theih?

¹¹ Thutak ngainatute chu khawtlâng nihna, sum leh pai dinhmun, hnam dân leh ram hrang hrangte aṭanga kal khâwm an ni a. (Thup. 7:9, 10) “Chanchin ṭha” an hriat chuan thutak rim chu hre thiamin, Jehova mite zîngah lâwm takin an rawn tel a ni. (Mk. 13:10) Hunte a liam zêl rualin, Pathian pawm zâwnga amah betute leh be lotute danglamna chu a lang fiah telh telh a. Zâwlnei Malakia chuan heti hian a sawi lâwk a ni: “Mi fel leh mi suaksual, Pathian rawngbâwltu leh bâwl lotu chu inthliar thei tawh ang,” tiin. (Mal. 3:18) An nungchang leh an thu hrilh rawngbâwlna hmangin Jehova chhiahhlawhte chuan thutak Pathian an bia tih an lantîr a ni.

12. Engtin nge thu hrilh rawngbâwlnain Jehova thiltum a tih hlawhtlintîr?

¹² “Ram chanchin ṭha” hrilhna hmangin, Isua thupêk kan zâwm a, chutih rualin, hrilh lâwkna kan thlen famkimtîr bawk. (Mt. 24:14; 28:18-20) He hna avâng hian, khawvêl hmun hrang hranga mite chu chatuana thutak Pathian be tûra beiseina neiin, Krista zirtîrte an rawn ni a. Jehova thiltum tih hlawhtlinnaa kan tel thei hi chanvo ropui a va ni tak êm!

RINNGHEHNA NEN HMA LAM THLIR RAWH

13. Setana bitum bîkte chu tute nge ni a, engvângin nge?

¹³ Diabol Setana chu a khawvêl tih chhiat a nih hma “hun tlêm tê chauh a nei tawh” tih a hriat avângin a thinur hle a ni. (Thup. 12:12, 13) Ani chuan leia Pathian Lalram aiawhtute, “Pathian thupêkte zâwm a, Isua chungchâng hriattîrtute” chu a bitum a. (Thup. 12:17; 14:12) Anmahni leh an hna thawh thlâwptu zawng zawngte pawh Setana bitumte an ni.

14. Setana’n Jehova mite a beih hunah eng thil nge thleng ang? ( milem en rawh.)

¹⁴ Babulon Khaw Ropui tih chhiat a nih hnuah, Setana lam ṭangte chuan Pathian mite chu theih tâwp chhuahin an bei ang a. Chu beihna chu Armageddon indonain a rawn zui ang. (Thup. 16:13, 14, 16) Isua leh a vân lam sipaite chuan Jehova betute chu an chhan chhuak ang a, Setana khawvêla la bâng zawng zawng chu an ti chhe vek ang. (Thup. 19:19-21) Mi bum hmang te, mi suaksual te leh, vervêk taka thil titu zawng zawngte chu an awm tawh lo vang a. (Thup. 21:8) Thutak leh felna Pathian chu thiam chantîrin a awm tawh ang.

15. Engvângin nge hma lam hun chu rinnghehna nêna kan thlîr theih? (Isaia 65:16, 17) (Milem en bawk rawh.)

¹⁵ Tûn laia kan khawvêl hi tûn hma zawng aiin inrem lohnain a khat a. Mahse, Jehova mite erawh a ṭanpuinain kan inlungrual tlat a ni. Jehova’n thutak ngainatu zawng zawng chu a chhûngkuaah a hruai khâwm mêk a. Jehova chu a mite leh an hna thawh malsâwm thei lo tûrin eng mahin a dang thei lo. (Isaia 65:16, 17 chhiar rawh.) Hma lam hun chu rin nghehna nên kan thlîr tlat a. Rom 8:38, 39-a kan hmuh tirhkoh Paula thute chuan “Thihna te, nunna te, vântirhkoh te, thuneihna te, thil awm mêk te, thil lo la awm tûr te, thiltihtheihna te, sânna te, thûkna te, thil siam dang rêng rêngte pawhin kan Lalpa Krista Isuaa awm Pathian hmangaihna ata chu min ṭhen thei lo vang,” tiin chiang takin min hrilh a ni.

16. Engvângin nge Jehova chu thinlung zawng zawnga i rinchhan?

¹⁶ Thutak Pathian Jehova rinna tûr chhan tam tak kan nei a. Ani chu min Siamtu a ni a, min hmangaih tak zet a. Chu bâkah, khawvêl hmun hrang hranga mite chu amah be tûrin a hruai khâwm mêk a ni. (Is. 60:22; Zak. 8:23) Jehova chuan eng lai pawhin a thutiamte a hlen ṭhîn tih leh khawvêl pumpuia Setana bumna leh dâwt thute chu a ti tâwp thuai ang tih kan hria a. Chuvângin, keini pawh Davida angin: “LALPA Pathian . . . chu fakin awm rawh se, amah chauh hian thil mak a ti ṭhîn. A hming ropui tak hi kumkhuain fakin awm bawk sela; lei pum pui pawh hi a ropuinaa tihkhahin awm rawh se,” tiin kan ṭawngṭai a ni.—Sâm 72:18, 19.