Kum Upate U—Kohhran Tân In Hlu Tak Zet

Nang pawh kum upatna avângin i chak tawh lo hle thei a. Kum tam tak chhûng rinawm takin Jehova rawng lo bâwl tawh mah la, tûnah chuan i tih theihte a tlêm tawh avângin mahni induh khawp lohnate i nei thei a ni. Entîr nân, tûna i thil tih mêkte leh tûn hmaa i lo tih tawhte chu khaikhin châng i nei thei a. Chutiang a nih chuan, chûng ngaihtuahna chu engtin nge i hneh theih ang?

I LAKA JEHOVA BEISEI CHU

Heti hian inzâwt rawh, ‘Jehova’n ka lakah eng nge a beisei?’ Deuteronomy 6:5-a thu: “LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tûr a ni,” tih thu hian thlamuanna a pe thei che a ni.

Chu Bible chângin a sawi angin, Jehova chuan i thinlung, rilru leh, chakna zawng zawnga a rawngbâwl tûrin a beisei che a. Chu chuan mi dangte nêna inkhaikhin lo tûrin, a nih loh leh tûn hma leh tûna i thil tih theihte khaikhin lo tûrin a ṭanpui thei che a ni.

Hei hi han ngaihtuah teh: I tleirâwl lai khân Jehova hnênah eng nge i pêk? Jehova mi a tam zâwkte chuan an neih ṭha ber an pe tiin an sawi ngei ang. Nang pawh, chutih hun laia i dinhmun azira i neih ṭha ber chu i pe a ni. Tûna i dinhmun tawn mêkah hian Jehova chu eng nge i pêk theih? I dinhmun tawn azirin tûna i tih theih, i neih ṭha ber i pêk ngei a rinawm. Chutianga thil i thlîr a nih chuan, tûn hmaa Jehova i pêk ang tho chu tûnah pawh i pe mêk tih i hria ang. I neih ṭha ber i lo pêk ṭhin ang bawkin, tûnah pawh i neih ṭha ber i pe mêk a ni.

MI DANGTE CHU NASA TAKIN I ṬANPUI THEI

Thil dang pakhat leh chu hei hi a ni: I kum upatna chu chak lohna anga thlîr lovin, hun remchâng ṭha angin thlîr tum zâwk ang che. Dik tak chuan, i kum upatna avângin, i tleirâwl laia i tih theih loh thil ṭhenkhat chu tûnah i ti thei a. Entîr nân, hêng a hnuaia târ lante hi a ni:

I thiltawnte chu mi dangte hrilh rawh. Bible-a chhinchhiah hêng thute hi han ngaihtuah teh:

Lal Davida: “Naupang ka lo ni tawh a, tûnah tar ka lo ni ta a, nimahsela, mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo.”—Sâm 37:25.

Josua: “Tin, ngai teh u, tûnah hian leilung zawng zawng dân angin ka kal ve dâwn ta a ni: LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve.”—Jos. 23:14.

Nang pawhin chutiang chuan i lo sawi ve tawh pawh a ni thei a. Davida leh Josua te chuan an mi mal thiltawnte aṭanga sawi an ni a. Chûng Jehova chhiahhlawh rinawmte chuan kum sâwmbi têl chhûnga an thil hmuh leh hriatte an sawi chhuah avângin, chûngte chuan hlutna a nei tak meuh a ni.

Kum rei tak chhûng Jehova rawng lo bâwl tawh i nih chuan, chutianga rawngbâwl a manhlazia chu i thiltawn aṭangin i sawi thei ngei ang. Jehova’n a mite mal a sâwm dân i hmuh lai kha i la hre chhuak thei em? I hre chhuak thei a nih chuan, mi dangte hnênah hrilh hreh suh! Chu chuan chakna a pe che ang bawk khân, anni pawh a ti chak thei a ni. Chutiang chuan mi dangte’n Jehova rawngbâwlnaa i thiltawnte an hriat hunah, anmahni ti chaktu i ni thei dâwn a ni.—Rom 1:11, 12.

Mi dangte tih chak theih dân kawng dang leh chu i dinhmun azira hmaichhan ngeia inkhâwma tel hi a ni. Chu chu nangmah leh i Kristian unuate’n an hlâwkpui thei a. A chunga kan sawi tâk Connie-i chuan heti hian a sawi: “Inkhâwma tel ziahna hian lunghnualna lakah min vêng a. Kingdom Hall-a unaute hmangaihna ka dawn avângin, engtin nge ka lunghnual theih teh lul ang? Unaute chu thilpêk tlêm azâwng pein, an chunga ka lâwmzia lantîr ka duh a. Chuvângin, ka unaute ruala thlarau lam thil tihahte tel chhunzawm zêl ka tum tlat a ni,” tiin.

JEHOVA’N RINAWM TAKA I RAWNGBAWLNA CHU A NGAIHLU

Bible-ah hian an dinhmun tawn avânga an duh anga rawng an bâwl theih tawh loh hunah pawh Jehova hmangaihna dawngtu mi tam takte chanchin a chuang a. Isua pian laia nung dam Israel mi pakhat, kum upa Simeona chanchin hi han ngaihtuah teh. Biak ina a kal apiangin, ṭhalai mipate’n hna pawimawh tak tak an thawk chu a hmuh ṭhin a rinawm a ni. A nih leh, amah Simeona chungchâng chu eng nge ni ve? Mihring thlîr dân aṭang chuan, a upat avângin Jehova mithmuhah hlutna nei tawh lo angin a inngai pawh a ni thei a. Mahse, Jehova thlîr dân chu a danglam a ni. Ani chuan Simeona chu “mi fel tak leh Pathian ngaihsak tak” nia thlîrin, nausên Isua hmuh theihna chanvo hlu pein mal a sâwm a ni. Chu Messia lo la awm tûr chungchânga hrilh lâwkna puang chhuak tûrin a hmang bawk a. (Lk. 2:25-35) Chutiang chuan, Jehova’n Simeona kum upatna ni lovin, a rinna nghet tak chu a hmuhsak a, “a chungah thlarau thianghlim a awm bawk” a ni.

Nang pawh i tih theihte a tlêm tawh hle a nih pawhin, rinawm taka a rawng i bâwlna chu Jehova’n a ngaihlu tih i chiang ve thei a ni. A mithmuhah chuan, “miin a neih loh pui ni lovin, a neih ang zêla a pêk chu pawm tlâk a ni.”—2 Kor. 8:12, NWT.

Chu chu i rilrua vawng rengin, i tih theihte chu ngaihven tum ang che. Entîr nân, tam tak i ti thei lo a nih pawhin, rawngbâwl dân kawng dangte chu ngaihtuah la. Phone call tawi tê neih emaw, card tawi tê ziah emaw hmangin mi dangte chu i ṭanpui thei ang em? A bîkin, kum tam tak chhûng Jehova rawng lo bâwl tawhte hnên aṭanga hmangaihna thil tih tê tham tê dawnna chuan Kristian unaute chungah nghawng nasa tak a nei thei a ni.

Ṭhenkhat chu tûn hma angin an chak tawh lo va. “A Nun Chhanhim Nân A Ni,” tih bâwma East Africa-a thiltawn pakhat chu chhiar ang che.

Kum tam tak chhûng i lo rinawm tawhna chuan mi dangte a ti chak thei tih hre reng ang che. Chhelna kawnga entawn tûr ṭha tak i ni a; ‘Mi thianghlimte rawng i lo bâwl tawhnate leh i la bâwl zêlna hmanga, i hnathawh leh a hming chunga hmangaihna i lantîr chu theihnghilh tûrin Pathian chu mi fel lo a ni si lo,’ tih chu i chiang thei a ni.—Heb. 6:10, NWT.

MI DANGTE TANPUIIN I THEIH TAWPIN BUAI RAWH

Zir chianna chuan ṭhahnemngai taka mi dangte ṭanpui ṭhîn kum upa tam takte chuan hrisêlna ṭha zâwk leh ngaihtuahna fîm zâwk an neiin, an dam rei zâwk thu a târ lang a.

Ni e, thil ṭha tihna chuan kum upatna nghawng ṭha lo zawng zawng chu a ti bo dâwn lo ngei mai. Pathian Lalram chauhvin kum upatna leh thihna thlentu ber Adama hnên aṭanga kan rochun sual chu a ti bo dâwn a ni.—Rom 5:12.

Chutih rualin, Jehova hre tûra mi dangte i ṭanpuina pawh tiamin, Jehova rawng i bâwlna chuan i beiseina a ti nghet lehzualin, i hrisêlna pawhin i hlâwkpui ang. Kum upate u, Jehova chuan a rawng in bâwlna chu a ngaihluin, rinna kawnga in entawn tûr siam chu kohhrana unaute pawhin an ngaihlu tak zet tih khawngaihin hria ang che u.