I La Hria Em?

Kumin chhûnga chhuak Vênnainsâng thuziakte chu ngun takin i chhiar tawh em? A hnuaia zawhnate hi i chhân theih leh theih loh hriat i tum dâwn nia:

Jehova chawimawi tûrin engin nge min chêttîr?

Jehova chunga zahna thûk tak kan neih avâng leh kan hmangaih tak zet avângin chutiang chuan kan ti a. Mi dangte’n amah an hriat ve kan duh avângin kan chawimawi bawk a ni.—w25.01, p. 3.

Tu emawin min ti lungni lo a nih chuan, engtin nge ngaidam thei lehzual kan nih theih?

Kan rilru awm dânte chu kan ngaihthah mai tûr a ni lo va; chutih rualin, thinrimna leh lungnih lohna peih bona chuan rilru nâa awm reng lo tûrin min ṭanpui thei a ni .—w25.02, p. 15-16.

Engvângin nge zirtîr Marka chu ṭhalai unaupate tâna entawn tûr ṭha a nih?

Marka chuan mi dangte rawngbâwlsak tûra a chanvo chu inhuam takin a pawm a. Dinhmun eng emaw avângin rilru nâ leh lungni lovin awm mah se, a beidawng mai lo. Paula leh Kristian mi puitling dangte nên inlaichînna ṭha a siam a ni.—w25.04, p. 27.

Isua’n, “An hnênah i hming ka hriattîr tawh,” tia a ṭawngṭai khân eng nge a sawi tum? (Joh. 17:26, NWT)

A zirtîrte chuan Pathian hming an hre tawh a. Mahse, Isua’n Pathian thiltum te, thil tih te leh miziate pawh tiamin Jehova chu eng ang Mi nge a ni tih a hriattîr a ni.—w25.05, p. 20-21.

Thuhnuairawlhna kan neih chuan, eng nge kan hriat reng ang?

Thil ṭhenkhat kan hriat loh a awm tih kan pawm a. Entîr nân, tâwpna a lo thlen hun tûr emaw, chutih huna Jehova hma lâk dân tûr emaw chu kan hre lo. A tûka thil thleng tûr leh Jehova’n engtiang khawpin nge min hriat chian tih pawh kan hre hek lo.—w25.06, p. 15-18.

Engin nge kan thuziakte leh vântlâng thusawite chu hlâwkpui tûra min ṭanpui thei?

Hetiang hian kan inzâwt thei a ni: ‘Ngaithlatute leh chhiartute’n an rin theih nân eng fihfiahna nge hman a nih? Mi dang ka zirtîr huna ka hman theih tûr tehkhin thu ṭha a awm em? Hemi chungchâng hi tuin nge ngaihven ang?’ tiin.—w25.07, p. 19.

Davida a cheibâwl dân aṭangin Jehova ngaihdamna chungchâng eng nge kan zir theih?

Davida’n sual lian tak ti mah se, a inlamlêt tak zet khân Jehova’n a ngaidam a. (1 Lal. 9:4, 5) Pathianin tu emaw a ngaihdam hian, a thil lo tih sual tawhte chu a hre reng emaw, a sawi lang leh emaw ngai tawh lo.—w25.08, p. 17.

Bible zirlaiin eng emaw hriat thiam loh a neih chuan eng nge i tih theih?

Bible aṭanga ṭha taka i hrilhfiah hnuah pawh a la hre thiam thei lo a nih chuan, a hnua sawiho leh atân i hnutchhiah thei a ni.—w25.09, p. 24.

Bible chuan sualin “bumna thiltithei tak” a neih thu a sawi a. (Heb. 3:13, NWT) Engtin nge chutiang chu a nih theih?

Sual chuan thil ṭha lo ti tûrin min thlêm thei a. Pathian hmangaihna chungchânga rinhlelhna pawh tiamin, rinhlelhna chi hrang hrang nei tûrin min bum thei bawk a ni.—w25.10, p. 16.

Awmze nei lehzuala ṭawngṭai tûra min ṭanpui theitu thil pathumte chu eng nge ni?

(1) Jehova miziate kan chhût ngun thei a. (2) Kan ngaihdam ngai tu emaw chungchâng ang chi kan harsatna tawh mêkte chu ngaihtuahin kan hrilh thei bawk a. (3) Hun tam tak pein hmanhmawh lovin kan ṭawngṭai thei a ni. Chu chuan kan rilru chhûnga awmte sawi chhuak thei tûrin min ṭanpui ang.—w25.10, p. 19-20.

Engtin nge kum upate chu kan ṭanpui theih?

Kum upate chu kan va tlawhin kan call thei a. Damdawi in kalpui an ngaih hunahte pawh kan kalpui thei a. A nih loh leh, rawngbâwlna kawng hrang hrangahte kan thawhpui thei bawk.—w25.11, p. 6-7.

Kristian inneihna zahawm tak nei tûrin eng thilte nge kan tih ngai?

Bible nêna a inkalh loh phawt chuan, dân thil phût eng pawh chu zâwm la. Inneihna leh inneih lawmna boruak chuan Pathian thlarau hmêlhmang a lantîr tih chian ang che. I inchei dânah a âwm tâwk hriain, Bible thu bul nêna inmil lo thil tih dânte chu hnâwl la. In inneih nî atâna ruahmanna insiam hunah inbiak pawhna ṭha tak nei bawk ang che u.—w25.12, p. 21-24.