Jehova Inngaihtlâwmna Entawn Rawh

1. Engvângin nge Jehova inngaihtlâwmna chu chhinchhiah tlâk tak a nih?

TUN laia thuneitute i en hian, i rilruah inngaihtlâwmna mizia a lo lang em? A lan a rinawm loh. Mahse, engkimtithei Pathian Jehova erawh a inngaitlâwm a. (Sâm 113:5-8) Jehova tluka inngaitlâwm tu mah an awm lo va, amahah chuan chapona chhe tê pawh a awm lo a ni. He thuziakah hian Jehova min cheibâwl dân kawng li kan sawiho vang a, chûngte’n a inngaihtlâwmzia an târ lan dân kan hmu ang. Isua’n a Pa inngaihtlâwmna a entawn dân pawh kan sawiho bawk dâwn a ni. Chûngte zir chianna chuan Jehova hnaih lehzual tûr leh a inngaihtlâwmna ṭha lehzuala entawn tûrin min ṭanpui ang.

JEHOVA CHU PAN NUAM TAK A NI

2. Sâm 62:8-na chuan Jehova chungchâng eng nge min hrilh? (A kâwma milem en bawk rawh.)

² A tlângpuiin, mi chapote chu pan nuam an ni lo va. Mahni inngaih pawimawh luatna chuan mi dangte pan hreh tûr zâwng leh pumpelh duh tûr zâwngin thil a tihtîr ṭhîn a ni. Jehova erawh a danglam hle! Kan Pa vâna mi chuan a inngaihtlâwm avângin, amah pana, kan rilru hahna zawng zawngte hrilh tûrin min sâwm a. (Sâm 62:8 chhiar rawh.) Hmangaihna nei tak pain a fate rilru hahna hriat a duh ang hian, Jehova chuan amah betute ṭawngṭaina chu ngaihthlâk a duh tak zet a ni. Dik tak chuan, chûng ṭawngṭaina tam takte chu Bible-ah a chhinchhiahtîr a. Chu chuan mi pan nuam tak a nihzia a târ lang a ni. (Jos. 10:12-14; 1 Sam. 1:10-18) A nih leh, Jehova pan tûra tling lo nia inhriat châng kan nei a nih chuan engtin nge ni ang?

3. Engvângin nge Jehova’n ṭawngṭaia amah pan ziah tûrin a duh che tih i chian theih?

³ Jehova hmangaihna dawn phû lo nia kan inhria a nih pawhin, ṭawngṭaiin amah kan pan thei a. Engvângin nge chutianga kan sawi theih? Fapa tlân bo tehkhin thu-ah, Isua’n Jehova chu a chhûngkuaa lawm hlawh leh phû tawh lo nia inhria inlamlêt a fapa chunga khawngaihna nasa tak lantîrtu pa nên a tehkhin a. Ina a fapa a lo kîr leh chuan, a pa chuan engtin nge a lo dawnsawn? A pa’n a fapa lo haw mêk chu a hmuh veleh, “a tlân a, a kuah a, a fâwp ta ngawih ngawih,” tih Isua’n a sawi a ni. (Lk. 15:17-20, NWT) Jehova chu chutiang ang pa chu a ni a. Mahni inthiam lohna emaw, lungkhamna emaw avânga thinlung lungchhe taka awmte ṭawngṭaina chu a hriat veleh, a inngaihtlâwmna chuan anni chu ṭha taka ngaihthlâksak tûrin a chêttîr a ni. (ṬH. 3:19, 20) Jehova chu lainatna chêttîra a awm avânga, an chunga ngilneihna a neihzia leh a hmangaihzia hriat nawntîr tûra an hnêna rang taka tlân ang a ni. (Is. 57:15) Tûn laiah pawh, engtin nge Jehova chu “kan lama rawn tlân” ang a nih? Kohhran upate, rinnaa awm kan chhûngte leh, kan Kristian unaute kal tlangin chutiang chuan a ti fo va. (Jak. 5:14, 15) Jehova’n amah hnaih tûra min duh avânga chutianga ti chu a ni.

4. Engtin nge Isua’n pan nuam tak a nihzia a lantîr?

⁴ Isua’n a Pa a entawn. A Pa ang bawkin, Isua chu a inngaitlâwm a. Chuvângin, leia a awm lai khân, mite chuan pan nuam an ti a ni. Ngaihngam takin zawhnate an zâwt a. (Mk. 4:10, 11) Chuvângin, thil eng emaw chungchânga an ngaih dânte Isua’n a zawh hunah pawh, an rilrua awm ang ang an hrilh ngam a ni. (Mt. 16:13-16) Thil an tih sual hunah pawh, Isua chu ngilnei tak, zahngai tak leh dawhthei tak a ni tih an hriat avângin, pan an hreh lo. (Mt. 17:24-27) Isua’n a Pa chu ṭha taka a entawn avângin, a zirtîrte chuan Jehova chu an rawn hre chiang lehzual a. (Joh. 14:9) An hun laia râwng tak, chapo tak leh, nêlawm lo tak sakhaw hruaitute ang lo takin, Jehova chu inngaitlâwm tak leh pan nuam tak a ni tih an hria a ni.

5. Engtin nge inngaihtlâwmna chuan mi dangte tâna pan nuam lehzual min nihtîr theih?

⁵ Engtin nge Jehova kan entawn theih? Inngaihtlâwmna lantîrna hmangin, mi dangte tâna pan nuam lehzual kan ni thei a. Inngaihtlâwmna chuan thîkna, chapona leh, ngaihdam duh lohna ang chi mize ngainatawm loh takte lakah min vêng ang a. Chu aiin, mite hîp thei tak ngilneihna, dawhtheihna leh, ngaihdam peihna ang chi miziate nei tûrin min ṭanpui dâwn a ni. (Kol. 3:12-14) A bîk takin, kohhran upate chu mi dangte tâna pan nuam nih an tum tûr a ni a. Chutiang ni thei tûr chuan, mi dangte hmuh theiha an awm a ngai a ni. Chumi awmzia chu kohhran inkhâwmte chu ṭûl lo taka zoom ang chi videoconference hmanga tel aiin, hmaichhan ngeia tel an tum tûr a ni. An dinhmun azirin, in tin rawngbâwlnaah pawh unaute nên thawhho an tum bawk tûr a ni a. Chutianga an ti a nih chuan, a ṭûl hunah unaute’n pan nuam an ti dâwn a ni.

JEHOVA CHUAN A AWM TAWK A HRIA

6-7. Jehova chu a chhiahhlawhte ngenna anga a insiamrem dân entîrna pe rawh.

⁶ Mi chapote chuan mi dangte an cheibâwl dânah a âwm tâwk an hre lo va. Mahse, Jehova erawh tu dang zawng aiin kawng engkimah chungnung zâwk mah se, a inngaihtlâwm avângin, a âwm tâwk hre tak leh insiamrem thei tak a ni. Mosia farnu, Miriami a cheibâwl dân hi han ngaihtuah teh. Arona nên Jehova aiawhtu Mosia chungah an phunnawi a. Chu chu Jehova chunga zah lohna lantîrna ang a ni. Chuvângin, Jehova chuan Miriami chunga a thinrim êm avângin, ani chu phâr natna a veitîr a. Mahse, Arona leh Mosia te’n ti dam tûra an ngensak chuan, Pathianin engtin nge a chhân lêt? A thu tlûkna lo siam tawh chu chapo takin a vuan nghet bur lo va. A inngaihtlâwm avângin, a rilru thlâkin Miriami chu a ti dam ta a ni.—Num. 12:1-15.

⁷ Jehova chuan Lal Hezekia a cheibâwl dânah pawh inngaihtlâwmna a lantîr a. A zâwlnei hmangin, ani chu a thi dâwn tih a hriattîr a ni. Mahse, Hezekia’n a natna ti dam tûra mittui tla chunga a ngen chuan, a chungah khawngaihna lantîrin kum 15 chhûng a nunna a pawh seisak a. (2 Lal. 20:1, 5, 6) Chutiang chuan, inngaihtlâwmna chuan Jehova chu khawngaihna lantîr tûr leh insiamrem tûrin a chêttîr a ni.

8. Isua’n a âwm tâwk a hria tih eng entîrnate’n nge târ lang? (Marka 3:1-6)

⁸ Isua’n a Pa a entawn. Isua chuan leia a awm lai khân, thil tih âwm a nih apiangin, mi dangte chungah ṭhatna lantîr a hreh lo va. Entîr nân, amah dodâltu mi luhlul takte khapna kârah pawh, Sabbath nîah mite chu a ti dam a ni. (Marka 3:1-6 chhiar rawh.) Isua chuan Kristian kohhran lû a nih angin, a âwm tâwk hriatna a lantîr chhunzawm zêl a. Entîr nân, kohhrana mi ṭhenkhatte’n thil sual an tih hunah, an chungah dawhtheihna lantîrin, insiam ṭhat theihna hun remchâng tam tak a pe a ni.—Thup. 2:2-5.

9. Engtin nge a âwm tâwk hriatna chu kan neiha kan lantîr theih? (Milem en bawk rawh.)

⁹ Engtin nge Jehova kan entawn theih? A âwm tâwka ngaihtuah dân leh thil tih dân chu Jehova hnên aṭangin kan zir tûr a ni. (Jak. 3:17) Jehova entawntu nu leh pate chuan an fate chu an tih theih ai bâk ti tûrin an beisei lo va. Genesis 33:12-14-a kan hmuh angin, Jakoba chuan chutiang chiah chuan a ti a ni. Inngaitlâwm leh a âwm tâwk hria nu leh pate chuan an fate âwm lo taka khaikhin chu an pumpelh tûr a ni a. Kohhran upate pawhin a âwm tâwk hriatna an neih a ngai a ni. Chutianga an tih theih dân kawng khat chu Bible thu bulte a kalh lo a nih phawt chuan, upa a tam zâwkte thu tlûkna siam chu an ṭâwmpui thei a ni. (1 Tim. 3:2, 3) Chu bâkah, thil kan thlîr dânte chu a inang lo a nih pawhin, mi dangte thlîr dân chu hriatthiam kan tum ṭheuh thei a. (Rom 14:1) Ni e, kohhrana mi tinte chuan ‘a âwm tâwk an hriatzia mi zawng zawngin an hriat’ theih nân theih tâwp an chhuah tûr a ni.—Phil. 4:5, NWT.

JEHOVA CHU A DAWHTHEI

10. Jehova’n eng kawngtein nge dawhtheihna a lantîr?

¹⁰ Mi chapote chuan mi dangte nghah an peih lo ṭhîn tih i lo hre tawh mai thei a. An chapo avângin dawhtheihna an nei lo a ni. Dawhtheihna bul ber Jehova nên an va inang lo tak êm! Entîr nân, Jehova chuan Nova hun lai khân, mi suaksualte ti boral tûrin kum 120 chhûng a nghah tûr thu a sawi a. (Gen. 6:3) Chuvângin, Nova’n a fate enkawl sei len nân leh a chhûngte nêna lawng tuk nân hun a neih phah a ni. A hnuah, Jehova aiawhtu vântirhkoh pakhatin Sodom leh Gomorra tih chhiat tûr chungchânga Abrahama zawhnate chu dawhthei takin a ngaihthlâksak a. He dinhmunah hian, mi chapo chuan, “Hetiang hian min zâwt ngam a maw!” tiin a chhâng lêt mai thei a. Mahse, chu vântirhkoh chuan Jehova entawnin Abrahama chungah dawhtheihna a lantîr a ni.—Gen. 18:20-33.

11. Petera thawn hnih 3:9-a târ lan angin, engvângin nge Jehova’n tûn laiah pawh dawhtheihna a lantîr?

¹¹ Jehova chuan inngaitlâwm takin tûn laiah pawh kan chungah dawhtheihna a lantîr a. Tâwpna thlentîr tûra a hun ruat chu a nghâk fan fan a ni. Engvângin nge ani chu a dawhtheih? “Tu ma boral duh lo va, mi zawng zawng an sim a duh avângin” a ni. (2 Petera 3:9 chhiar rawh.) Jehova dawhtheihna chu a lo thlâwn mai a ni em? Ni lo ve! Mi rilru ṭha pu maktaduai tam tak chu a lamah hîpin an awm tawh a. Mi maktaduai dang tam tak pawh hîp an nih belh zêl kan beisei a ni. Amaherawhchu, Jehova dawhtheihna chuan chin tâwk a nei a. Mite chu hmangaih mah se, an duh ang anga an awm chu a phal reng lo vang. Suahsualnate chu chatuana a awm chhunzawm a phal dâwn lo a ni.—Hab. 2:3.

12. Engtin nge Isua’n Jehova dawhtheihna a entawn?

¹² Isua’n a Pa a entawn. Isua chuan kum sâng tam tak chhûng Jehova dawhtheihna chu a lo entawn tawh a. Ani chuan Setana’n Jehova leh mi rinawmte a sawichhe lai chu a hmu reng ṭhîn a ni. (Gen. 3:4, 5; Job. 1:11; Thup. 12:10) Chu bâkah, mite hrehawm tawrhna nasa tak pawh a hmu bawk a. ‘Diabola hnathawhte tih boral’ a châk dân tûrzia chu han mitthla teh! (1 Joh. 3:8, NWT) Diabola hnathawhte ti boral vek tûra Jehova phalna nghâk fan fan tûrin engin nge Isua chu ṭanpui? Ṭanpuitu pakhat chu, tâwpna thlen hun tûr chungchânga thu tlûkna siamtu chu Jehova a ni tih inngaitlâwm taka a pawm vâng a ni.—Tirh. 1:7.

13. Engtin nge Isua’n a tirhkohte chungah dawhtheihna a lantîr a, engvângin nge?

¹³ Leia a awm lai pawh khân, Isua chuan a tirhkohte chungah dawhtheihna a lantîr a. Entîr nân, a tirhkohte’n tu nge ropui ber tia an inhnial fo khân, an chungah a beidawng mai lo. Chu aiin, dawhtheihna a lantîr zawm zêl a. (Lk. 9:46; 22:24-27) Nakinah, a ṭûl angin an la inthlâk danglam ang tih a ring tlat a ni. A nih leh, thil i ti sual nawn fo tawh ṭhîn em? Chutiang a nih chuan, inngaitlâwm tak leh dawhthei tak, tûna rorêl mêk, Lal i nei chu i lâwm hle a ni lâwm ni?

14. Engtin nge dawhtheihna kan neih chhoh theih?

¹⁴ Engtin nge Jehova kan entawn theih? “Krista rilru” kan neih chhoh hian Jehova anga ngaihtuah leh thil tih chu a awlsam lehzual a. (1 Kor. 2:16, NWT) A nih leh, engtin nge Krista rilru chu kan hriatthiam lehzual theih ang? Chanchin Ṭha Ziakte chhiar tih loh chu kawng dang a awm hran lo. Chûng kan thu chhiarte’n Isua ngaihtuah dân a târ lante chu hun pea kan chhût ngun a ngai a. Chu bâkah, Isua anga ingaihtlâwmna leh dawhtheihna nei tûrin Jehova hnênah ṭanpuina kan dîl a ngai bawk a ni. Krista rilru kan neih chhoh chuan, mahni leh mi dangte chunga dawhtheihna nasa lehzual lantîrin Pathian ang kan ni lehzual thei ang.—Mt. 18:26-30, 35.

JEHOVA’N MI INNGAITLAWMTE A CHAWIMAWI

15. Jehova’n mi inngaitlâwmte a ngaihlu tih târ langtu entîrna ṭhenkhat pe rawh. (Sâm 138:6)

¹⁵ Sâm 138:6 chhiar rawh. Mi inngaitlâwmte tân lei leh vâna Chungnungber Jehova hriat hlawh nih chu chawimawina a va ni tak êm! Kum zabi tam tak chhûnga Jehova’n a chawimawi mi inngaitlâwmte chanchin hi han ngaihtuah teh. An zînga ṭhenkhat chu i hre chhuak nghâl mai lo pawh a ni thei a; mahse, Bible-ah chhinchhiah an ni. Jehova’n Mosia chu thlahtute hun laia nung, nau awmtu Debori hming chu Bible-ah a chhinchhiahtîr a. Ani chuan Isaaka leh Jakoba te inah kum 125 chhûng vêl rinawm takin rawng a bâwl a ni. Chu hmeichhe rinawm chanchin chu tam tak hriat nih lo mah se, Jehova’n a tâna mi duhawm tak a nihzia Bible-ah a târ lantîr a ni. (Gen. 24:59; 35:8) Kum zabi têl a liam hnuah, Jehova’n berâm vêngtu mipa naupang Davida chu Israel lal ni tûrin a thlang bawk a. (2 Sam. 22:1, 36) Isua a pian hnu lawkah pawh, vântirhkohte chu berâm vêngtute hnênah tîrin, chûng berâm vêngtute chu Bethlehem khuaah Messia a piang tih hre hmasa bertu nih theihna chanvo hlu pein a chawimawi a. (Lk. 2:8-11) Chu bâkah, Josefa leh Mari te’n biak ina Isua an hruai khân, Jehova’n kum upa Simeona leh Anni chu a Fapa hmuh theihna chanvo hlu pein a chawimawi bawk a ni. (Lk. 2:25-30, 36-38) Chutiang chuan, “LALPA chu chungnung tak a ni nâ a, mi tlâwmte chu a ngaihsak ṭhîn”!

16. Engtin nge Isua’n mi dangte a cheibâwl dânah a Pa a entawn?

¹⁶ Isua’n a Pa a entawn. A Pa angin, Isua pawhin mi inngaitlâwmte chu a chawimawi a. ‘Lehkha thiam lo leh mi pângngai maite’ chu Pathian Ram chungchâng thutak a zirtîr a ni. (Tirh. 4:13, NWT; Mt. 11:25) Dam lote chu Isua’n a tih dam mai bâkah, anni chu hmangaih leh zah nia inhriatna nei tûrin a cheibâwl bawk a. (Lk. 5:13) A thih hma zânah pawh, Isua chuan chhiahhlawh angin a tirhkohte kê a silsak bawk a. (Joh. 13:5) Vâna a lâwn hmain, a hnungzuitu inngaitlâwm zawng zawngte chu mihringte neih theih azawnga hna pawimawh ber—mi dangte chatuana nunna nei tûra ṭanpui theihna chanvo hlu chu pein a chawimawi a ni.—Mt. 28:19, 20.

17. Engtin nge mi dangte kan chawimawi theih? (Milem en bawk rawh.)

¹⁷ Engtin nge Jehova kan entawn theih? Keini pawhin, mite ṭobul, vun rawng leh zirna chu eng pawh ni se, ngaithla duhtu zawng zawngte hnêna chanchin ṭha hrilin anni chu kan chawimawi a. Kan theihna leh chanvo dawnte chu eng pawh ni se, kan unaute chu keimahni aia chungnung zâwka ngaiin kan chawimawi a ni. (Phil. 2:3) Chûng kan sawi tâkte leh kawng dangtea inngaitlâwm taka inchawimawi tawnna kawnga ‘hma kan hruai’ hian Jehova a lâwm hle!—Rom 12:10, NWT; Zep. 3:12.

18. Engvângin nge Jehova inngaihtlâwmna chu entawn i duh?

¹⁸ Hmangaihna ngah tak kan Pa vâna mi entawn kan tum tlat chuan pan nuam tak, a âwm tâwk hre tak leh dawhthei tak kan ni lehzual ang a. Jehova angin, mi dangte kan chawimawi thei bawk ang. Inngaitlâwm tak kan Pathian hnaih lehzual tûra kan ṭan lâkna chuan a mit hmuhah mi hlu lehzual min nihtîr ṭheuh rawh se!—Is. 43:4.