Joba Buin Thurâwn Pêkna Kawngah A Ṭanpui Thei Che

1-2. Joba ṭhian pathum leh Elihua chuan eng dinhmun nge an tawh?

JOBA chanchin chu tlâng kâng ang maiin Khawchhak mite zîngah a darh chak hle a. A hausakna avânga mite hriat hlawh tak Joba chuan a neih engkim chu a chân a ni. A ṭhian pathum Elifaza, Bildada leh, Zofara te’n Joba chunga thil thlengte an hriat chuan amah thlamuan tûrin Uz khaw lam panin an zin ta a. Mahse, Joba dinhmun an va hmuh chuan, mak an ti hle a ni.

² Hei hi han mitthla teh. Joba chuan a thil neih engkim chu a chân a. A berâm rual te, bâwng rual te, sanghâwngsei te leh, sabengtungte chu an thi vek a. A chhiahhlawh a tam zâwkte pawh tih hlum vek an ni a. Joba fate chênna in a chim chuan, an zain an thi ta vek bawk a. Chûng thil zawng zawng a thlen hnuah, amah Joba ngei pawhin nasa takin hrehawm a tuar a. A taksa pum chu pânchhiain a khat vek a ni. Hmun hla tak aṭanga lo kal a ṭhian pathumte an lo thleng a. Vaivuta lungchhe taka lo ṭhu Joba an hmuh chuan engtin nge an awm? Hrehawm tam tak tuar Joba chu ni sarih chhûngin ṭawngkam khat pawhin an be lo. (Job. 2:12, 13) Tichuan, ṭhalai Elihua chu lo thleng vein, an sîrah chuan a rawn ṭhu a. Joba chuan a pian nî chu ânchhe lawhin, thih a duh thu a rawn sawi chhuak ta hlawl a ni. (Job. 3:1-3, 11) Joba chuan ṭanpuina a mamawh tih a chiang hle! Chûng mite thusawi leh an sawi dânte chuan Joba ṭhian an nih tak tak leh tak tak loh bâkah, Joba ṭhatna tûr an ngaihtuah tak zet em tih a târ lang dâwn a ni.

3. Tûnah eng nge kan sawiho vang?

³ Jehova’n Mosia chu Elihua leh Joba ṭhian pathumte thusawi leh thil tihte chu a chhinchhiahtîr a. Elifaza thusawi ṭhenkhat chu thlarau suaksual thununna hnuaia sawi a ni thei a ni. Elihua thusawi erawh Jehova thlarau thâwk khuma sawi a ni thung. (Job. 4:12-16; 33:24, 25) Chuvângin, Joba bu-ah hian thurâwn ṭha ber berte a chuan rualin, thurâwn ṭha lote pawh a tel a. Chuvângin, Joba buin kan ṭhian tu emaw thurâwn pêk a ngaih huna min ṭanpui theih dân kan hre dâwn a ni. A hmasain, Joba ṭhian pathumte entawn tûr ṭha lo siam chu kan ngaihtuahho vang a. A dawtah, Elihua entawn tûr ṭha siam pawh kan sawiho bawk ang. Chu bâkah, Israel mite’n Joba bu an hlâwkpui theih dân tûr leh keini pawhin kan hlâwkpui theih dânte kan hre bawk ang.

JOBA ṬHIAN PATHUMTE THURAWN PEK DAN

4. Engvângin nge Joba ṭhian pathumte chuan an thiltum an hlen loh? (Milem en bawk rawh.)

⁴ Bible chuan Joba ṭhian pathumte’n Joba hrehawm tawrh chungchâng an hriat hnu chuan ‘amah tuarpui tûr leh thlamuan tûrin’ a hnênah an va kal tih a sawi a. (Job. 2:11) Mahse, an tum angin an ti lo a ni. Engvângin nge? A lo berah, a chhan pathum a awm. Pakhatna, dik lo takin thu tâwp an siam nghâl mai a. Entîr nân, Joba chu a thil tih sual avânga hremna tâwk niin an ngai sual a ni.a (Job. 4:7; 11:14) Pahnihna, Joba hnêna chûng mite thurâwn pêk chu ṭangkai lo tak, ngilnei lo tak leh, huatthlalaawm takte a ni a. Entîr nân, an thurâwn pêk chu ṭha tak angin lang mah se, finna thu a pai tak tak lo a ni. (Job. 13:12) Bildada chuan ngilnei lo takin Joba chu ṭawng tam lutuk tiin vawi hnih lai a sawi a. (Job. 8:2; 18:2) Zofara chuan na takin Joba chu “mi lawilo,” tiin a ko ve bawk a ni. (Job. 11:12) Pathumna, Joba an biak khân, an aw kîte chu sân kher lo mah se, an thusawiahte chuan Joba hnuaichhiah zâwng ṭawngkam te, mei nei tak leh, dik lo taka puhnate a tel a ni. (Job. 15:7-11) Chutiang chuan, anni chuan Joba thlamuana a rinna tih ngheh aiin, amah mawhchhiat chu an ngaihven zâwk a ni.

5. Joba ṭhiante thurâwn pêkin eng rah nge a chhuah?

⁵ Joba ṭhiante thurâwn pêkin rah ṭha a chhuah lo chu a mak hran lo ve. An thusawite chuan Joba chu a ti hrehawm hle a. (Job. 19:2) Joba’n a hming ṭhatna hum ngai nia a inngai pawh chu i hriatthiampui ngei ang. Chu chuan a ngaihtuahna a ti buaiin, âtthlâk tak takin thu a sawitîr pah hial a. (Job. 6:3, 26) Joba ṭhiante chuan Jehova ngaihtuah anga an ngaihtuah loh mai bâkah, Joba chu khawngaihna nei takin an cheibâwl hek lo. Chuvângin, anni chu tum loh takin Setana kuta hmanruate an lo ni ta a ni. (Job. 2:4, 6) Engtin nge chûng thute chu tûn hmaa mite leh tûn laia keini pawhin kan hlâwkpui theih?

6. Israel rama upate chuan Joba ṭhian pathumte entawn tûr ṭha lo siam aṭangin eng nge an zir theih?

⁶ Israel mite’n an hlâwkpui theih dân tûr. Jehova’n Israel mite chu hnam anga a din hnuah, anni chu a tehna fel mila rorêlsak tûrin mipa puitling tak, upate a ruat a. (Deut. 1:15-18; 27:1) Chûng mipate chuan thurâwn an pêk hma leh ro an rêl hmain, Jehova kaihhruainate chu ngun taka an ngaihthlâk a ngai a ni. (2 Chro. 19:6) Thil engkim hre vek anga inngai lovin, zawhnate an zawh a ngai bawk a. (Deut. 19:18) Chûng thurâwn petute chuan an hnêna ṭanpuina rawn dîltute na taka lo biak chu an pumpelh tûr a ni. Engvângin nge? Thinrimna lantîrna chuan mite chu an thinlunga awmte sawichhuah a tih harsat theih dâwn vâng a ni. (Ex. 22:22-24) Joba chanchin aṭangin Israel rama upate chuan zir tûr ṭha tak tak an hmu ngei ang.

7. Israel upate bâkah, tute’n nge thurâwn pe thei a, engtin nge Joba chanchin chu an hlâwkpui theih ang? (Thufingte 27:9)

⁷ Mi puitlingte chauh chu Israel rama thurâwn pe thei awm chhun an ni lo va. Israel mi zawng zawng—a pui a pang, a hmei a pate—chuan a biakna tih hmasâwn ngai tu emaw, a nih loh leh a nungchang siam ṭhat ngai tu emaw hnênah thurâwn an pe thei a ni. (Sâm 141:5) Chutiang thurâwn ṭha pêk chu ṭhian dik tak chhinchhiahna a ni a. (Thufingte 27:9 chhiar rawh.) Joba ṭhian pathumte entawn tûr ṭha lo siam aṭangin, thurâwn pêk huna sawi loh tûr leh tih loh tûr chungchângah Israel mite’n zir tûr an nei ngei ang.

8. Mi dangte thurâwn kan pêk hunah eng nge kan pumpelh ngai? (Milem en bawk rawh.)

⁸ Kan hlâwkpui theih dân. Kristiante kan nih angin, fiahna tâwk mêk kan unaute chu ṭanpui kan duh a. Mahse, chutianga ti thei tûr chuan, Joba ṭhian pathumte tih ang chu kan tih ve loh a ngai a ni. A hmasain, thurâwn kan pêk hmain, thu tâwp siam kan pumpelh a, thil thlen dân dik tak kan hriat a ngai a. A dawtah, kan thurâwn pêkte chu Elifaza anga kan mi mal thiltawn rinchhân tlâk loh takte ṭanchhan ni lovin, Pathian Thu ṭanchhan a ni tûr a ni. (Job. 4:8; 5:3, 27) Pathumnaah chuan, ṭawngkam na tak leh ngilnei lo takte kan pumpelh a ngai bawk a ni. Dik tak chuan, Elifaza leh a ṭhiante thusawi ṭhenkhat chu a dikin, an thusawi pakhat pawh tirhkoh Paula’n thlarauva thâwk khumin a ziak chhâwng hial a. (Joba 5:13; 1 Korinth 3:19 nên khaikhin rawh.) Amaherawhchu, an thusawi tam zâwkte chuan Pathian chu dik lo taka puhin Joba rilru an ti na a; chuvângin, Jehova’n an thusawite chu thu dik lo angin a ngai a ni. (Job. 42:7, 8) Thurâwn ṭha chuan Jehova chu a âwm tâwk hre lo leh, a chhiahhlawhte chu hmangaih tlâk loh angin mite a ngaihtîr ngai lo. Tûnah, Elihua entawn tûr siam aṭanga kan zir theihte i lo sawiho vang u.

ELIHUA’N JOBA THURAWN A PEK DAN

9. A ṭhiante’n thu an sawi zawh hnua Joba’n ṭanpuina a mamawh chhan leh, Jehova’n chu a mamawh ṭanpuina a pêk dân hrilhfiah rawh.

⁹ Joba leh a ṭhiante an inhnial zawh meuh chuan, boruak chu a rit ta hle a. An thusawite chu Bible bung 28 meuha tam a ni a; an thusawi a tam zâwkte chu thinurna leh lungnih lohna ṭawngkam hlîr a ni. Joba’n rilru hahdamna a hmu lo chu a va hriatthiamawm tak êm! Thlamuanna leh thurâwn ṭha a la mamawh cheu a ni. Jehova’n engtin nge a ṭanpui? Elihua hmangin thurâwn a pe a ni. Engvângin nge Elihua chu a tîr aṭanga a ṭawng chhuah loh? ‘Ka naupang a, nangni in upa a. Chuvâng chuan ka tîm a ni,’ tiin a sawi. (Job. 32:6, 7) Elihua chuan, mi tam takte angin, he thu dik: Kum upate chuan an kum upatna avângin, ṭhalaite’n an neih loh finna leh thiltawn ṭhate an nei tih chu a hria a ni. Mahse, Joba leh a ṭhiante thusawi dawhthei taka a ngaihthlâk hnu chuan, a awm mai mai thei ta lo va. Chuvângin, “Kum tam hi an fing chuang lo va, upate’n thu dik an hre thiam chuang lo,” tiin a sawi. (Job. 32:9) Elihua chuan eng thil dangte nge a sawi belh a, engtin nge a sawi?

10. Elihua’n Joba thurâwn a pêk hmain eng nge a tih? (Joba 33:6, 7)

¹⁰ Elihua chuan Joba thurâwn a pêk hmain boruak zâng tak a siam hmasa a ni. Engtin nge? A hmasain, a rilru awm dânte a thunun phawt a. Chumi kan hriat chhan chu Bible-in Elihua chu a tîra a thinrim thu a sawi vâng a ni. (Job. 32:2-5) Chutih rualin, thinrimin Joba bei zâwngin vawi khat pawh a ṭawng chhuak lo. Chu aiin, inngaihtlâwmna lantîrin, Joba chu ṭhian ṭha tak angin a be zâwk a ni. Entîr nân, Joba hnênah, “Ngai teh, Pathian lam thu-ah chuan nangmah ang bawk ka ni,” tiin a sawi a. (Joba 33:6, 7 chhiar rawh.) A hnuah, Elihua chuan Joba thusawite chu ṭha takin a ngaihthlâksak a ni tih lantîrin, thurâwn a pêk hmain, Joba thusawite zînga thu pawimawh zualte chu a sawi nawn a. (Job. 32:11; 33:8-11) Thurâwn dang a pêk hunahte pawh chutiang chuan a ti a ni.—Job. 34:5, 6, 9; 35:1-4.

11. Engtin nge Elihua’n Joba thurâwn a pêk? (Joba 33:1)

¹¹ Elihua chuan Joba thurâwn a pêk khân, amah zahna lantîr zâwngin thu a sawi a. Entîr nân, ani chuan Joba hming a lam a; mahse, Joba ṭhian pathumte khân chu chu an ti ve lo niin a lang. (Joba 33:1 chhiar rawh.) Joba leh a ṭhiante an inhnial laia thusawi a châk ve zia chu hre rengin, Joba thurâwn a pêk khân hriatthiamna nei takin ani chu a rilrua awmte sawi chhuah theihna hun remchâng a pe a. (Job. 32:4; 33:32) Joba chhût dân ṭhenkhatte chu a dik lo tih tlang taka a vaukhân rualin, Jehova finna, thiltihtheihna, dikna leh, hmangaihna rinawmte chu ngilnei takin a hriat nawntîr a ni. (Job. 36:18, 21-26; 37:23, 24) Elihua thurâwn pêk ṭha tak chuan Joba chu Jehova pêk thurâwn dangte pawh ngaithla tûrin a ṭanpui tih a chiang hle. (Job. 38:1-3) Engtin nge Elihua entawn tûr siam chu tûn hmaa mite leh tûn laia keini pawhin kan hlâwkpui theih?

12. Engtin nge Jehova’n a mite ṭanpui tûrin zâwlneite a hman a, engtin nge Elihua entawn tûr ṭha siam chu Israel mite’n an hlâwkpui theih ang?

¹² Israel mite’n an hlâwkpui theih dân tûr. Israel mite chanchin tluan chhuakah, Jehova’n a mite hnêna a thiltumte hriattîr tûrin zâwlneite a ruat a. Entîr nân, Rorêltute hun lai khân, Debori chuan Israel hnam tân thlarau lam kaihhruainate pein, Samuela pawh a naupan têt aṭangin Jehova aiawha thusawitu angin rawng a bâwl a ni. (Ro. 4:4-7; 5:7; 1 Sam. 3:19, 20) A hnuah, lalte hun laiin, a mite thlarau lama ti chak tûr leh biakna dik aṭanga kalpêngte siam ṭha tûrin zâwlnei tam tak a hmang chhunzawm a. (2 Sam. 12:1-4; Tirh. 3:24) Joba bu-a chhinchhiah Elihua entawn tûr siam chuan mi rinawm a hmei a pate chu mi dangte thurâwn an pêk huna an thusawi tûrte leh sawi dân tûrte hre thiam tûrin a ṭanpui ngei a rinawm.

13. Engtin nge tûn laia Kristiante’n an unaute an tih chak theih?

¹³ Kan hlâwkpui theih dân. Kristiante kan nih angin, keini pawhin a Thu, Bible-a kan zirte puang chhuakin, mite hnênah Pathian duh zâwng kan hriattîr a. Chutianga kan tih dân kawng dang leh chu kan unaute ti chak leh fuih tûra thu ṭhate sawina hmangin a ni. (1 Kor. 14:3) Unaute chu an lungnih loh hunah emaw, an sawi loh tûr thilte an sawi hunah emaw pawh ni se, upate chuan englai pawhin, anni chu ngilnei leh hmangaihna nei takin an be reng tûr a ni.—1 Thes. 5:14; Job. 6:3.

14-15. Upate’n thurâwn pêkna kawnga Elihua an entawn theih dân entîrna pe rawh.

¹⁴ He dinhmun hi han ngaihtuah teh. Upa pakhat chuan kohhrana unaunu pakhatin lunghnualna a nei tih a hria a. Unaupa dang pakhat nên amah tih chak tumin an va tlawh a. Unaunu chuan inkhâwmte kalin, rawngbâwlnaahte tel mah se, hlimna a neih loh thu sawiin a rilru hrehawm dânte chu a lo hrilh a ni. Engtin nge hmahruaitu unaupa chuan a chhân lêt ang?

¹⁵ A hmasain, unaunu rilru awm dânte chu hriatthiam a tum dâwn a ni. Chutianga ti thei tûr chuan, a thusawite chu dawhthei taka a ngaihthlâksak a ngai dâwn a. Unaunu chuan Pathian hmangaihna phû lo niin a inhria a ni thei a. “Nuna lungkhamnate’n” a rilru a ti beidawng pawh a ni thei a ni. (Lk. 21:34, NWT) Pahnihnaah, chutianga a dinhmunte hriatthiam a tum hnuah, unaupa chuan unaunu chu a thil tih ṭhatte avângin fak a tum bawk ang. Entîr nân, lunghnual chung pawha inkhâwmte kala, rawngbâwlnaahte a tel avângin a fak thei a. Pathumnaah, lunghnualna neihtîrtu pawh tiamin, a dinhmunte a hriatthiam hunah, Pathianin a hmangaih tih ringnghet tûrin Bible hmangin a fuih thei a ni.—Gal. 2:20.

JOBA BU CHU HLAWKPUI ZAWM ZEL RAWH

16. Engtin nge Joba bu chu kan hlâwkpui zawm zêl theih?

¹⁶ Joba bu zir chianna chu kan va hlâwkpui tak êm! Thuziak hmasaa kan hriat tawh angin, thlarauva thâwk khuma ziah Joba chanchin chuan Pathianin hrehawm tawrhnate awm a phal chhan mai bâkah, chhel taka kan tawrh theih dân pawh min zirtîr a ni. He thuziaka kan sawiho tawh angin, kan zavai hian Joba ṭhian pathumte entawn tûr ṭha lo siam ni lova, Elihua entawn tûr ṭha siam zuina hmangin ṭha taka thurâwn pêk dân kan zir thei bawk a ni. Nakina mi dangte thurâwn i pêk hmain, engvângin nge Joba bu aṭanga i thil zirte chu i ennawn loh vang? Joba bu i chhiar zawhna a rei leh tawh a nih chuan, chhiar nawn leh chu thiltumah nei ang che. Ziah a nih lai ang bawk khân, tûnah pawh i hlâwkpui thei tih i hmu ngei ang.