Chhiartute Zawhna

Jehova’n nakin lawkah hnamte thinlungah eng ‘ngaihtuahna’ nge a dah ang?

Hrehawm nasa tak inṭan dân tûr chungchângah, Thu Puan 17:16, 17, NWT chuan: “Ki sâwm i hmuh leh sakawlh khân nawhchizuar chu huain an sawisa ang a, saruaka siamin a sa an ei ang a, meiin an hâl ral ang. Pathianin a ngaihtuahnate an hlen chhuah theihna tûrin chu chu an thinlungah a dah si a; ni e, Pathian thute a thlen famkim hma loh zawng an ngaihtuahna thuhmun an hlen chhuah theihna tûrin an lalram chu sakawlh hnênah an pe ang,” tiin a sawi a. Tûn hma chuan, kan thu leh hla chhuahte chuan Jehova’n hnamte thinlunga a dah tûr ‘ngaihtuahna’ chu sakhaw dik lo a tih boral tûr thu a ni tiin a lo sawi ṭhîn a ni.

Amaherawhchu, chu hriatthiamna chu siam danglam a ngai a. Hnamte chuan ‘an lalram chu sakawlh hnêna’ pe tûrin Jehova’n an thinlungah ‘a ngaihtuahna’ a dah dâwn a ni. Chumi thlen famkimna hre thiam tûrin, a hnuaia zawhnate hi i lo ngaihtuahho vang u.

Hrilh lâwknaa târ lante hian tute nge an entîr? “Nawhchizuar” chu “Babulon Khaw Ropui,” tia koh, khawvêl sakhaw dik lo lalram a entîr a ni. “Sakawlh sen lâr” chuan kum 1919-a lo awm ṭan League of Nations, tûna United Nations tia koh remna pâwl a entîr a. (Thup. 17:3-5, NWT) “Ki sâwm” chuan sakawlh thlâwptu mihring sawrkâr zawng zawng a entîr a ni.

Nawhchizuar leh sakawlh sen lârte inlaichînna chu eng nge ni? Chu nawhchizuar chu sakawlh ‘chungah a chuanga,’ a malsâwmna pein, a chungah thuneih a tum a ni.

Nawhchizuar chungah eng nge thleng ang? Amah thlâwptu ki sâwmte rualin sakawlh chuan ‘nawhchizuar chu a hua ang.’ An huatzia lantîrin a hausaknate an chhuhsak ang a, a suahsualnate pawh an hai lansak bawk ang. Anni chuan nawhchizuar chunga Jehova rorêlna angin ani chu an ti boral phiar ang a. (Thup. 17:1; 18:8, NWT) Chu chu sakhaw dik lo tâwpna a ni ang. Mahse, chumi thlen hmain, Jehova’n hnamte chu mihring chanchin tluan chhuaka la thleng ngai lo thil ti tûrin a chêttîr dâwn a ni.

Jehova’n hnamte chu eng ti tûrin nge a chêttîr ang? Ani chuan ki sâwm thinlungah chuan ‘a ngaihtuahna’ a dah ang. Chumi awmzia chu ‘an thiltihtheihna leh thuneihna chu sakawlh [sen lâr] United Nations hnênah an pe’ dâwn tihna a ni. (Thup. 17:13, NWT) Han ngaihtuah teh. Mihring sawrkârte chuan sakawlh hnênah an thiltihtheihna leh thuneihna chu anmahni thuin an pe mai ang em? Pe lo vang! Chutianga an tih theihna tûrin amah Pathian ngeiin a chêttîr dâwn tih hrilh lâwkna chuan a târ lang a ni. (Thuf. 21:1; Isaia 44:28 nên khaikhin rawh.) Chu chu zâwi zâwia thuneihna hlan chhâwnna a ni ang em? Ni lo vang! Vawilehkhata thil thleng thut tûr a ni ang. Chumi hnuah, thuneihna chang thar sakawlh chuan sakhaw dik lo pâwlte chu ti boral hlenin an chunga Jehova rorêlna chu a thlentîr dâwn a ni.

A nih chuan, eng nge kan beisei theih? Sawrkârte’n United Nations chu zâwi zâwiin an thlâwp chho tûr angin kan beisei tûr a ni lo. Kan beisei theih chu hei hi a ni: Vawilehkhatah, Jehova’n hnamte chu sakawlh hnêna an thuneihna pe tûrin a chêttîr dâwn a ni. Chumi a thlen hunah, hrehawm nasa tak chu a inṭan mai dâwn tih kan hria ang. Chu hun a lo thlen hma chuan, khawvêl dinhmunte rei lo têah a inthlâk danglam tawh dâwn avângin, “harhvâng taka awmin i ngaihven reng zâwk ang u!”—1 Thes. 5:6, NWT.