Dik Lo Taka Cheibâwla Awm Hmeichhiate Tâna Ṭanpuina
“KHAWVELA hmeichhia maktaduai têlte chuan mipat hmeichhiatna lamah khawih chhiat an tâwk a. Chûng zînga mi chu i ni em? I himna chu Pathian tâna a pawimawh chhan leh dik lo taka hmeichhiate cheibâwlna a tih tâwp dân tûrte chu hriat tum ang che.”
A chunga thu hi kan website jw.org-a “Hmeichhiate Himna—Bible Thlîr Dân,” tih thuziak inṭan dân a ni a. Chu thuziak tâwpah chuan PDF-a download theihna link pakhat a awm a; chu chu print chhuaha, phêk li nei tract anga hman theih a ni. United States-a chêng unaunu Stacy-i chuan, “Chu thuziak print chhuah sate chu kengin, unaunu pakhat nên kan kohhran rawngbâwlna biala awm hmeichhiate enkawlna hmun pakhat chu kan va tlawh a ni,” tiin a sawi.
Chuta hnathawk pakhat chuan hmeichhiate hnêna a sem tûr copy dangte pawh min dîl a. Copy 40 dang leh jw.org contact card 30 kan sem theih phah a ni. A hnuah, administrator chuan chuta chêngte chu Bible zirna neih a duhsak thu a sawi bawk.
Stacy-i leh unaunu dang pahnihte chuan chutiang ang hmun dangah kalin, copy nga an sem theih bâkah, copy dangte pawh dîl belh an ni. Hnathawktu pakhat chuan, “He tract hi heta hmeichhiate hian an hlâwkpui ngei ang. Hei hi kan mamawh tak a ni,” tiin a lo sawi a. A hnuah, hmeichhiate chu Bible zirna neih dân en tûrin an rawn kal khâwm a; an zînga pahnihte chuan chawlhkâr tâwpa Kingdom Hall-a rawn inkhâwm an duh thu an sawi a ni.
Stacy-i chuan: “Mite’n he thuziak an duhzia kan hmu chu mak kan ti hle a. Print chhuaka kan han thleh hian, hêng mite hnêna Lalram thuchah hrilh nâna hmanraw mi hîp thei tak a ni. Mite min lo lawm dân chuan kan rilru a khawih hle a. Hêng mite hnêna chanchin ṭha thlen tûra kan thawhrimna Jehova’n mal a sâwm tih kan hmuhna chuan min ti phûr hle a ni,” tiin a sawi.