Chhiartute Zawhna

Thufingte 30:18, 19 ziaktu chuan “mipain nula a panna kawngte” chu ‘a mak lutuk’ tiin a sawi a. Chu chu engtiang kawngin nge a dik?

Mi thiamte pawh tiamin, mi tam tak chuan he thu awmzia hi hriatthiam harsa an ti a. Thufingte 30:18, 29-ah chuan: “Thil pathum ka tâna mak lutuk a awm a, e, thil pali a ni ka hriat loh chu. Boruaka mupui kawng, lung chunga rûl kawng, tuifinriata lawng kawng, mipain nula a panna kawngte,” tiin kan chhiar a ni.

Tûn hma chuan “mipain nula a panna kawngte,” tih ṭawngkam hi thil ṭha lo lam sawina niin kan ngai a ni. Engvângin nge? Châng dangte chuan “a tâwk e,” tia sawi ngai lo thil ṭha lote chu a târ lang a. (Thuf. 30:15, 16) Châng 20-na chuan thil sual engmah ti lo anga inchhâl “hmeichhe uire hmang” chungchâng a sawi bawk a ni. Chuvângin, boruaka mupui, lung chunga rûl leh, tuifinriata lawng ang maiin mipa chuan mi dangte hriat miah lohvin thil ṭha lo a ti niin he châng hi kan hre thiam a. Chumi ṭanchhan chuan, “mipain nula a panna kawngte” tih ṭawngkam hian thil ṭha lo—mipa vervêk tak chuan hmeichhia chu bumin nungchang bawlhhlawhnaa inhnamhnawih tûrin a thlêm niin kan lo ngai a ni.

Mahse, hêng Bible chângte hi a êng zâwnga thlîrna tûr chhan kan nei a. A ziaktu hian a tâna mak lutuk thilte chungchâng a sawi mai a ni.

A tîra Hebrai thuziakte’n he châng hian thil ṭha lam a kawh thu a nem nghet a. Theological Lexicon of the Old Testament tih lehkhabu sawi dân chuan, Thufingte 30:18-a “ka tâna mak lutuk” tia lehlin Hebrai thu mal hian “tu emawin ṭha chungchuang, thil theih loh leh, ropui lutuk anga a ngaih thilthleng eng emaw a kâwk” a ni.

United States, Harvard University-a Professor Crawford H. Toy-a pawhin he Bible châng hian thil ṭha lo lam a kawh loh thu leh, a ziaktuin a thil hmuhte chu mak a tih thu a târ lanna mai a ni tih a sawi.

Chuvângin, Thufingte 30:18, 19-a thute chuan kan hriatthiam phâk bâka mak lutuk thilte chungchâng a târ lang tih kan hre thei a. Bible ziaktu angin, boruaka mupui a thlawh dân te, lung chunga rûl a tleng dân te, tuipuia lawng lian tak a kal theih dân te leh, tlangvâl leh nula an inhmangaiha hlim taka nun an hman dun theih dânte chuan keini pawh mak ti takin min awmtîr ve a ni.