Chhiartute Zawhna

Chanchin ṭha hrilhna hna hi eng hunah nge a tâwp ang?

Isua chuan: “He Ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang a, chumi zawhah chuan tâwpna chu a lo thleng ang,” tiin a sawi a. (Mt. 24:14, NWT) He châng leh châng 6 leh 13-naa “tâwpna” tia lehlin Grik thu mal chu teʹlos a ni a. Chu chuan Armageddon indonaa Setana khawvêl tih tâwp a nih hun tûr chu a kâwk a. (Thup. 16:14, 16) Chuvângin, tâwpna thlen hma zawng chu, chanchin ṭha kan hril zawm zêl dâwn tihna a ni. Hei hi hriatthiamna hmasa nên a inang lo.

Tûn hma chuan, Babulon Khaw Ropui tih chhiat a nih a, hrehawm nasa tak a inṭan hunah chuan, chanchin ṭha hrilhna chu a tâwp dâwn niin kan lo hre thiam ṭhîn a. (Thup. 17:3, 5, 15, 16) Jehova’n mite chu chanchin ṭha chhân lêt theihna hun remchâng a pe tawh dâwn lo niin kan lo ngai a ni. (Is. 61:2) Chu bâkah, hrehawm nasa tak thlen hmaa rinawm taka Jehova rawngbâwltute chauhvin chu hun chu an paltlang thei dâwn niin kan ngai bawk a. Chûng mite chu, B.C.E. 607-a Jerusalem tih chhiat a nih hnua dam khawchhuak Juda mite nên kan lo khaikhin a. Anni chu Jehova an biak avâng leh suahsualna an huat avânga dam khawchhuak tûra chhinchiahte an ni. (Ezek. 5:11; 9:4) Mahse, chu khaikhinna chu Matthaia 24:14-a Isua thusawite nên a inmil lo va. Chutah chuan, Armageddon indona hmanga tâwpna a thlen hma zawng, mite’n chanchin ṭha chhân lêt theihna hun remchâng an nei dâwn tih târ lan a ni.

Matthaia 24:14 chungchânga hriatthiamna thar avângin, Thu Puan 16:21-a rial den anga na thuchah chungchâng hrilh lâwkna kan hriatthiamna pawh kan siamrem a ngai a. Thûk lehzuala zir chianna chuan, he Bible châng pahnihte hian inzawmna a nei tih a târ lang a ni. Engtin nge? Mite’n Lalram chanchin an chhân lêt dân aṭangin, a chhânna chu kan hre thei dâwn a ni. Tirhkoh Paula chuan, “chhandam mêkte” tân chu thuchah chu chanchin ṭha, “nunna thlentu rimtui” a nih thu a sawi a. Mahse, Pathian hmêlmate tân, chu chu chanchin ṭha lo, “thihna thlentu rim” a ni. (2 Kor. 2:15, 16, NWT) An ngainat tak he khawvêl hi Setana rorêlna hnuaia awm, suahsualnaa khat a ni tih leh tih boral a ni thuai dâwn tih a târ lan avângin, Lalram chanchin chu an hua a ni.—Joh. 7:7; 1 Joh. 2:17; 5:19.

Thu Puan 16:21-a rial chu “a nasa êm êm” dâwn tih chhinchhiah bawk ang che. Chu chuan, hrehawm nasa tak chhûngin, kan thu hrilhna hna chu a khauh lehzualin, Jehova hming chu tûn hma zawng aia nasaa puan chhuah a ni dâwn tih a târ lang a ni. (Ezek. 39:7) Babulon Khaw Ropui tih chhiat a nih hnuah chuan, mi ṭhenkhat chu thil rimtui takin a hîp ang maiin kan thuchah hîpin an awm ang em? Chu chu thil ni thei a ni a. Jehova Thuhretute’n kum tam tak chhûng sakhaw dik lo tâwpna tûr chu an lo puang tawh tih an hre chhuak, a nih loh leh an hre thar chauh pawh a ni thei.

Chu chu hmân lai Aigupta rama Hri Sâwm a lên hnua thilthleng nên kan khaikhin thei a. Jehova’n ‘Aigupta rama pathian zawng zawngte ro a rêlsak’ hnu khân, Israel mi ni lo “mipui inpawlhsawp tam tak” chuan a mite chu an zui ve a. (Ex. 12:12, 37, 38) Chûng hnam dang mite chuan Hri Sâwm chungchânga Mosia thusawite a lo thleng dik tih an hmuhin Jehova lam an hawi a ni thei.

Babulon Khaw Ropui tih chhiat a nih hnua Jehova lama hawite chuan, chutih huna leia la awm Krista unaute chunga thil ṭha tih theihna hun remchâng an nei dâwn a. (Mt. 25:34-36, 40) Chutih rualin, hriak thih la bângte’n an vân lam lâwmman an dawn hnu Armageddon thlen hma lawkah, berâm anga rorêlsak nih theihna hun remchâng chu a tâwp dâwn a ni.

He hriatthiamna thar hian Jehova hmangaihna leh zahngaihna nasa tak chu chiang takin a târ lang a. Ni e, ‘tu ma boral a duh lo va, mi zawng zawng an sim chu a duh a ni.’—2 Pet. 3:9.