ZIR TUR THUZIAK 30
HLA 97 Nun Innghahna Pathian Thu
Bible Zirtîrna Bulpuite Aṭangin I La Inzir Thei Em?
“Chûng thil chu hriain thutak in hnêna awmah chuan in nghet na a, chûng thil chu hriattîr che u ka inpeih fo vang.”—2 PET. 1:12.
A TUM BER
Bible zirtîrna bulpuite i hriatna chu kum tam tak ni tawh mah se, chûngte aṭanga i thil zir hlu takte i nunpui theih dân hmuh.
1. Thutak i zir ṭan khân Bible zirtîrnate chuan engtin nge i chungah nghawng a neih?
BIBLE zirtîrna bulpuite chuan kan nun a thlâk danglam a. Entîr nân, Pathian hming chu Jehova a ni tih kan hriat khân a ṭhian ni tûrin hma kan la ṭan a. (Is. 42:8) Mitthite dinhmun dik tak kan lo hriat khân, kan hmangaih thi tawhte’n na an tawrh kan hlau tawh lo. (Tirh. 9:10) Chu bâkah, lei hi Paradis-a chantîr tûra Pathian thutiamte kan hriatna aṭangin kan hma lam hun chungchângah lungkhamna kan nei tawh lo va. Kum 70 emaw, 80 emaw chauh ni lovin, chatuanin kan nung dâwn tih rinnghehna kan rawn nei a ni.—Sâm 37:29; 90:10.
2. Engtin nge 2 Petera 1:12, 13 chuan Kristian puitlingte pawhin Bible zirtîrna bulpuite chu an hlâwkpui thei tih a târ lan?
2 Bible zirtîrna bulpuite pawimawhna chu kan theihnghilh ngai tûr a ni lo va. Tirhkoh Petera chuan a lehkhathawn pahnihna chu ‘thutaka nghet’ Kristiante hnênah a thawn a. (2 Petera 1:12, 13 chhiar rawh.) Mahse, kohhran chhûngah chuan zirtîrtu derte leh Pathian ngaihsak lo mite pawh tiamin, thlarau lama dinhmun hlauhawm takte an hmachhawn a ni. (2 Pet. 2:1-3) Petera chuan chûngte do lêt thei tûra a unaute tih chak chu a duh a. Chuvângin, Bible zirtîrna an lo hriat tawhte chu a hriat nawntîr a. Chûng zirtîrnate chuan anni chu a tâwp thlenga rinawm tlat tûrin a ṭanpui dâwn a ni.
3. Kristian zawng zawngte’n Bible zirtîrna bulpuite an chhût ngun zêl a ngaih chhan entîrna pe rawh.
3 Kum tam tak chhûng thutakah lo awm tawh mah ila, Bible zirtîrna bulpuite aṭangin thil tharte kan la zir zêl thei a ni. Entîr nân: Eiin siam thiam tak leh eiin siam dân zir tîr chuan ei rawngbâwl nân bâwlhlo inang an hmang pawh a ni thei a. Mahse, eiin siam thiam tak chuan chûng bâwlhlote hmanga eiin chi hrang hrang siam dân chu a lo zir tawh a. Chutiang bawkin, kum tam tak chhûng Jehova rawng lo bâwl tawhte chuan Bible zir ṭan tîrte aiin Bible zirtîrna bulpuite aṭangin thil tam lehzual an zir thei a ni. Baptisma kan chan lai aiin, tûna kan dinhmun emaw, rawngbâwlnaa kan chanvo chelh emaw chu a danglam tawh ngei ang a. Tûn hmaa kan thu zirte kan ngaihtuah hian, tûn kan dinhmuna kan nunpui theih dân kawng tharte kan hmu thei a ni. Tûnah, Bible zirtîrna bulpui pathumte aṭanga Kristian mi puitlingte zir theih chu i lo enho vang u.
JEHOVA CHU SIAMTU A NI
4. Jehova chu Siamtu a ni tih hriatna chuan engtin nge min nghawng?
4 “Engkim dintu chu Pathian a ni.” (Heb. 3:4, C.L. Re-edited) Kan awmna khawvêl leh a chhûnga awm nungchate hi Siamtu finnaa khat leh engkim ti thei kutchhuak a ni tih kan hria a. A siam kan nih avângin, min hre chiangin min ngaihsak a. Kan tâna ṭha ber tûr a hre bawk. He thutak mâwlmang tak, Jehova chu Siamtu a ni tih hriatna chuan nun awmze nei tak leh thiltum nghet tak min neihtîrin, nasa takin kan chungah nghawng a nei a ni.
5. Eng thutakin nge inngaihtlâwmna nei tûra min ṭanpui thei? (Isaia 45:9-12)
5 Jehova chu Siamtu a ni tih hriatna chuan inngaihtlâwmna nei tûrin min ṭanpui thei a. Joba’n amah leh mi dangte chungchâng a lutuka a ngaihven khân, Jehova’n Siamtu engkim ti thei a nihzia a hriat nawntîr a ni. (Job. 38:1-4) Chu chuan, Pathian kawngte chu mihring kawngte aia a chungnun zâwkzia hmu thiam tûrin a ṭanpui a. A hnuah, chumi nêna inmilin zâwlnei Isaia chuan: “Hlum chuan a vawtu hnênah, ‘Eng nge i siam ni?’ a ti dâwn em ni?” tiin a ziak a ni.—Isaia 45:9-12 chhiar rawh.
6. Eng hunahte nge min Siamtu a nih anga Jehova chungnunna chu kan chhût ngun ang? (Milem en bawk rawh.)
6 Kristian chuan tawnhriatte a neih zêl rualin, Jehova leh a Thua kaihhruainate zawn aiin, a ngaihdânte chu a lutukin a rinchhan ṭan thei a. (Job. 37:23, 24) Amah Siamtu tluk rual loh finna leh ropuina chungchâng ngun taka ngaihtuahna chuan ani chu engtin nge a ṭanpui theih? (Is. 40:22; 55:8, 9) Chu thutak bulpui chuan inngaihtlâwmna nei reng tûr leh a ngaih dânte chu inbûk tâwk taka thlîr thiam tûrin a ṭanpui dâwn a ni.
Kan mi mal ngaih dânte chunga thlîr dân inbûk tâwk nei tûrin engin nge min ṭanpui thei? (Paragraph 6-na en rawh)d
7. Rahela-i’n kaihhruaina thar pawm thei tûrin eng nge a tih?
7 Slovenia rama awm Rahela-i chu a Siamtu chungchâng ngaihtuahna chuan inawpna pâwla kaihhruaina thlâk danglamte mila insiamrem tûrin a ṭanpui a. Ani chuan: “Hmahruaitu unaute thu tlûkna siam pawm harsa tih châng ka nei ṭhîn a. Entîr nân, 2023 Governing Body Hnên Aṭanga Chanchin Thar #8 ka en hnu pawhin, khabe hmul nei unaupa thusawi ka ngaihthlâk hmasak ber ṭum chuan ngaimawhna ka nei a. Chuvângin, Jehova hnênah chu inthlâk danglamna mila insiamrem thei tûra min ṭanpui tûrin ka ṭawngṭai a ni,” tiin a sawi. Rahela-i chuan Jehova chu lei leh vân Siamtu a nih angin, kawng dika a inawpna pâwl kaihruai tûrin theihna a nei tih a hre thiam a ni. Hriatthiamna thar emaw, kaihhruaina thar emaw zînga pawm harsa tih i neih chuan, engvângin nge min Siamtu finna leh thiltihtheihna chungnunzia chu inngaitlâwm taka i chhût ngun loh vang?—Rom 11:33-36.
PATHIANIN HREHAWM TAWRHNA AWM A PHAL CHHAN
8. Pathianin hrehawm tawrhna awm a phal chhan hriatna chu engtin nge kan hlâwkpui?
8 Engvângin nge Pathianin hrehawm tawrhna awm a phal? A chhânna hre lo mi ṭhenkhat chu Pathian chungah an thinur a, mi dangte chuan Pathian a awm lo niin thutâwp an siam a ni. (Thuf. 19:3) Nang erawh chuan hrehawm tawrhna awmtîrtu chu Jehova ni lovin, kan rochun sual leh ṭhat famkim lohna a ni tih i hre tawh a. Chu bâkah, mihringte chunga a dawhtheihna chuan mi maktaduai têlte chu amah rawn hre tûr leh chatuan atâna hrehawm tawrhna a tih tâwp dân tûr hre tûrin hun remchâng a pe tih i hre tawh bawk. (2 Pet. 3:9, 15) Chûng thutakte chuan thlamuanna a neihtîr chein, Pathian a hnaihtîr lehzual che a ni.
9. Jehova’n hrehawm tawrhna awmtîr a phal chhan chu eng dinhmunahte nge kan ngaihtuah ang?
9 Jehova’n hrehawm tawrhna a tih tâwp hun kan nghah rualin dawhtheihna kan neih a ngai a. Chutih rualin, keimahni emaw, kan hmangaih tak tu emawin buaina, rorêl dik lohna, a nih loh leh thihna an tawh hian Pathian chu hma la vat lo nia ngaiin kan lungni lo thei a ni. (Hab. 1:2, 3) Chutiang hunah chuan, Pathianin mi felte hrehawm tawrh a phal chhan ngaihtuahna chuan min ṭanpui thei a.a (Sâm 34:19) Chatuan atâna hrehawm tawrhna ti tâwp tûra a thiltum chu kan ngaihtuah thei bawk.
10. Engtin nge Anne-i chuan a nu a boral hnuah thlamuanna a neih?
10 Hrehawm tawrhna chungchânga thutak hriatna chuan chhelna nei tûrin min ṭanpui thei a. Indian Ocean-a, Mayotte thliarkâra awm Anne-i chuan: “Kum rei lo te kal taa ka nu a boral khân, ka sûn hle a. Mahse, Jehova chu hrehawm tawrhnate chunga mawhphurtu a ni lo tih ka inhriat nawntîr reng ṭhîn. Ani chuan hrehawm tawrhna zawng zawng tih tâwpa kan hmangaih takte kaihthawh leh chu a châk tak zet a. Chûng thutakte chuan ka rin phâk bâkin rilru thlamuanna min pe ṭhîn a ni,” tiin a sawi.
11. Engtin nge Pathianin hrehawm tawrhna awm a phal chhan hriatna chuan thu hril zawm zêl tûra min ṭanpui theih?
11 Pathianin hrehawm tawrhna awm a phal chhan hriatna chuan thu hril zawm zêl tûrin min chêttîr a. Petera chuan Jehova dawhtheihnain inlamlêtte chungah chhandamna a thlen ang tih a sawi hnuah: “Awm dân thianghlim leh Pathian ngaihsak kawngah chuan mi eng ang nge in nih tûr le?” tiin a ziak a ni. (2 Pet. 3:11) Chûng “Pathian ngaihsak kawngah” chuan thu hrilh rawngbâwlna a tel a. Kan Pa angin mite chu kan hmangaih a. Felnaa khat Pathian khawvêl thara an awm chu kan duh a ni. Jehova chuan dawhtheihna lantîrin i awmna hmuna mite chu amah biak theihna hun remchâng a pe a. Pathian hnathawhpui niha tâwpna lo thlen hmaa amah hre tûra mi a tam thei ang berte ṭanpui chu chanvo hlu a va ni êm!—1 Kor. 3:9.
“NI HNUHNUNGAHTE” KAN AWM
12. “Ni hnuhnûngahte” kan awm tih hriatna chu engtin nge kan hlâwkpui?
12 ‘Ni hnuhnûnga’ mite awm dân tûr chu Bible-in dik takin a sawi lâwk a. (2 Tim. 3:1-5) Chu hrilh lâwkna thlen famkim dân hmu tûrin hla tak kan en a ngai lo. Mite nungchangin chhiat lam a pan zêl tih kan hmuh hian, Pathian Thu rin tlâkzia chu tûn hma zawng aiin kan hre chiang lehzual a ni.—2 Tim. 3:13-15.
13. Luka 12:15-21-a Isua tehkhin thu ṭanchhanin, eng nge kan inzawh theih?
13 Ni hnuhnûngahte kan awm tih hriatna chuan hmanhmawhna rilru min neihtîr a. Luka 12:15-21-a Isua tehkhin thu sawi aṭanga hmanhmawhna chungchâng kan zir theih hi lo chhinchhiah ang che. (Chhiar rawh.) Engvângin nge mi hausa chu “mi â” tia koh a nih? A hausak vâng ni lovin, a ngaih pawimawh zâwng a dik loh vâng a ni. ‘Mahni tân ro khâwl khâwm mah se, Pathian lamah a hausa lo.’ A tân thil a hmanhmawhthlâk chhan chu eng nge ni? Pathianin a hnênah: “Zâninah hian i nunna an lâksak dâwn che,” tiin a sawi a ni. Tûn laiah pawh, khawvêl tâwpna kan hnaih zêl avângin heti hian kan inzâwt tûr a ni: ‘Ka thiltumte chuan hmanhmawhna rilru ka nei tih a târ lang em? Ka fate chu eng ang thiltum nei tûrin nge ka ṭanpui? Ka hun, ka tha leh, ka thil neihte chu mahni tâna ro khâwl khâwm tûrin nge, vâna ro khâwl khâwm tûr zâwka ka hman ber?’ tiin.
14. Miki-i thiltawnin a târ lan angin, engvângin nge ni hnuhnûngah kan awm tih Bible-a finfiahnate chhût ngun chu a finthlâk?
14 Ni hnuhnûngah kan awm tih finfiahnate chhût ngunna chuan kan nun chu a ṭha thei ang bera hmang tûrin min ṭanpui a. Chutiang chu unaunu Miki-i’n a tawng a ni. Ani chuan: “School ka zawh chuan, ramsa chanchin zirna lam kaihhnawih hna neih ka châk êm êm a. Regular pioneer thawha mamawh zualna hmuna rawngbâwl chu ka tum bawk. Ka ṭhian thlarau lama puitling takte chuan ka duh ang hna thawk chunga ka thlarau lam thiltumte hlen chu thil theih a nih leh nih loh ngun taka ngaihtuah tûrin thu min râwn a. He kalhmang hi a tâwp thuai dâwn tih leh khawvêl tharah chuan chatuanin ramsate chanchin ka zir thei dâwn tih min hriat nawntîr a ni. Chuvângin, hun tam tak pêk ngai lo tûr thiamna dang chu ka zir ta a. Chu chuan regular pioneer thawk paha mahnia inchâwm thei tûr leh a hnua mamawh zualna hmun, Ecuador-a insawn thei tûrin min ṭanpui a ni,” tiin a sawi. Tûnah chuan, a pasal nên Ecuador-ah bial kan hna an thawk mêk a ni.
15. Engtin nge mite chuan chanchin ṭha chu an la chhân lêt mai theih? Entîrna pe rawh. (Milem en bawk rawh.)
15 Mite’n chanchin ṭha chu an ngaihven lo a nih pawhin kan lunghnual mai tûr a ni lo. An inthlâk danglam thei a ni. Isua unaupa Jakoba hi han ngaihtuah teh. Isua puitlin chhoh dân, Messia a rawn nih dân leh, mi dang ang lo taka a zirtîr dân te chu a hmu a ni. Mahse, kum tam tak chhûng chu Isua hnung a zui lo va. A thawhleh hnuah chauh, a hnungzuitu ṭhahnemngai tak a rawn ni ta a ni.b (Joh. 7:5; Gal. 2:9) Ngaihvenna la lantîr lo i chhûngte, a nih loh leh Lalram thuchah la pawm lotute hnêna beidawng lova thu hrilhnain thil a tih theihzia chu theihnghilh ngai suh. Hun hnuhnûnga kan awm avângin, thu hrilh chu a hmanhmawhthlâk tih hre reng ang che. Hrehawm nasa tak a inṭan hnuah pawh, tûna i thu hrilhte chuan an chungah nghawng a nei thei a ni.c
Engin nge Thuhretu ni lo kan chhûngte chunga beidawng lo tûra min ṭanpui thei? (Paragraph 15-na en rawh)e
JEHOVA HRIAT NAWNTIRNATE CHUNGAH LAWMNA NEI RENG RAWH
16. Jehova hriat nawntîrnate chu engtin nge i lo hlâwkpui tawh? (“Mi Dangte Ṭanpui Nân Hmang Rawh,” tih bâwm chu en bawk rawh.)
16 Thlarau lam chaw kan dawn ṭhenkhat chu Bible thutak bulpui la hre ngai lote tâna buatsaih a ni a. Entîr nân, chawlhkâr tina vântlâng thusawi te, jw.org-a thuziak leh video ṭhenkhat te leh, vântlâng tâna buatsaih magazine-te chu Thuhretu ni lote tân a bîk taka tih chhuah a ni. Mahse, chûngte chu kan hlâwkpui thei tho va. Jehova kan hmangaihna ti pung tûr te, a Thu kan rinna ti nghet tûr te leh, mi dangte hnêna thutak bulpuite thiam lehzuala zirtîr tûrtein min ṭanpui a ni.—Sâm 19:7.
17. Eng dinhmunahte nge Bible zirtîrna bulpuite chu i ngaihtuah lêt theih?
17 Jehova Thuhretute kan nih angin, Bible thutak kan hriatthiam dân siamrem a nih hian kan phûr thei hle a. Mahse, a tîr aṭanga thutaka min hîptu Bible zirtîrna bulpuite kan ngaihhlutna chu a kiam chuang lo. Jehova inawpna pâwl kaihhruaina aia mahni ngaih dân zui duhna kan nei a nih chuan, inawpna pâwl chu Siamtu engkim ti thei leh finnaa khatin a kaihruai tih chu inngaitlâwm takin kan hre chhuak leh thei a. Keimahni emaw, kan hmangaih tak tu emawin harsatna a tâwk a nih chuan, dawhtheihna lantîrin Jehova’n hrehawm tawrhna awmtîr a phal chhan chu kan ngaihtuah thei a ni. Kan hun leh kan thil neihte hman dân tûr chungchânga thu tlûkna kan siam dâwn hunah, ni hnuhnûnga kan awm tawh avânga hun a hmanhmawhthlâkzia kan ngaihtuah leh thei a. Jehova hriat nawntîrnate chuan finna min pein, rinawm taka a rawngbâwl tûrin min ṭanpui zawm zêl rawh se.
HLA 95 Eng Chu A Eng Zual
a Vênnainsâng June 1, 2007 chhuak p. 12-16-a “Rei Lo Tê Hnua Hrehawm Tawrhna Zawng Zawng A Tâwp Chhan Tûr,” tih thuziak chu en rawh.
c Vênnainsâng May, 2024 chhuak p. 8-13-a “Nakin Huna Jehova Rorêl Dân Tûr Chungchângah Eng Nge Kan Hriat?” tih thuziak chu en rawh.
d MILEM HRILHFIAHNA: Kohhran upa pakhat thurâwn pêk chu upa dangte’n an thlâwp lo. A hnuah, vâna arsite chungchâng a chhût ngunna chuan a ngaih dânte chu inbûk tâwk taka thlîr thiam tûrin a ṭanpui.
e MILEM HRILHFIAHNA: Thuhretu chuan ni hnuhnûngah kan awm tih finfiahna chungchâng zir chianna a nei a. Chu chuan phone hmanga a unaunu hnêna thu hril tûrin a chêttîr.