Thurâwn Pêk Dân Tûr

1. Engvângin nge thurâwn kan pêk a ngaih châng a awm? Hrilhfiah rawh.

MI DANGTE hnêna thurâwn pêk nuam i ti em? Mi ṭhenkhat chuan nuam an ti a. Mi ṭhenkhat erawh chuan an hrehin nuam an ti lo thung. Eng pawh chu ni se, mi dangte hnêna thurâwn kan pêk a ngaih châng a awm ṭhîn a ni. Engvângin nge? A chhan chu, Isua’n a hnungzuitu dik takte chu hmangaihna an inlantîr tawn avânga hriat an nih tûr thu a sawi a. (Joh. 13:35) Kan unaute kan hmangaihzia kan lantîr theih dân kawng khat chu an mamawh huna thurâwn pêk hi a ni a. Pathian Thu chuan thinlung taka thurâwn kan pêk hian kan inṭhian ṭhatna kan tinghet tih a sawi a ni.—Thuf. 27:9.

2. Upate’n eng nge an tih theih ngai a, engvângin nge? (“Chawlhkâr Chhûng Inkhâwma Thurâwn Pêk,” tih bâwm chu en bawk rawh.)

² A bîk takin, upate chuan thurâwn ṭangkai tak an pêk theih a ngai a. A chhan chu, Pathian Jehova’n Isua kaltlangin anni chu kohhran enkawl tûra a ruat vâng a ni. (1 Pet. 5:2, 3) Chutianga an tih theih dân kawng khat chu, kohhrana thu an sawi huna Bible ṭanchhan thurâwnte pêkna hmangin a ni a. Berâm huang aṭanga tawlh bo tawhte pawh tiamin, berâm tinte hnêna thurâwn an pêk a ngai bawk a ni. Engtin nge upate leh kan zavai hian thurâwn ṭha kan pêk theih ang?

3. (a) Engtin nge thurâwn petu ṭha nih kan zir theih? (Isaia 9:6; “Thurâwn I Pêk Hunah Isua Entawn Rawh,” tih bâwm chu en bawk rawh.) (b) He thuziakah hian eng nge kan sawiho vang?

³ Thurâwn petu ṭha nih theih dân chu Bible-a mite, a bîk takin Isua entawn tûr siam zirna aṭangin kan hre thei a. A nihnate zînga pakhat chu “Remruattu Maka” a ni. (Isaia 9:6 chhiar rawh.) He thuziakah hian, mi dangte’n thurâwn min dîl hunah leh an beisei loh tak zilhna kan pêk a ngaih huna kan tih theih chu kan sawiho vang a. A hun tak leh a tih dân tûr dik taka thurâwn pêk a pawimawh chhan pawh kan sawiho bawk ang.

MI DANGTE’N THURAWN MIN DIL HUNAH

4-5. Tu emawin thurâwn min dîl hunah, eng zawhna nge kan inzawh hmasak ang? Entîrna pe rawh.

⁴ Tu emawin thurâwn min dîl hunah, eng nge kan tih hmasak ber ang? Chanvo hlu nia ngaiin ṭanpui nghâl kan duh thei a. Mahse, ‘Hemi chungchânga thurâwn pe tûr hian ka tling tâwk em?’ tiin kan inzâwt hmasa tûr a ni a. A châng chuan, kan ṭanpui theih dân kawng ṭha ber chu thurâwn pe lova, chumi chungchânga thurâwn pe tûra tling tu emaw kawhhmuh a ni.

⁵ He dinhmun hi han ngaihtuah chhin teh: I ṭhian hnai tak pakhat chuan natna hlauhawm tak a nei a. A inenkawl dân tûr kawng chi hrang hrang chu zir chianna a neih tawh thu hrilh chein, inenkawlna ṭha ber nia i ngaih chu a zâwt che a. A ṭha ber nia hriat chu nei mah la, chumi natna enkawl tûra thiamna emaw, zirna emaw i nei lo va. Chuvângin, i ṭhian ṭanpui theih dân kawng ṭha ber chu amah enkawl theitu tûr zawnsak a ni.

6. Thurâwn pêk hmain eng nge tih phawt a ṭhat?

⁶ Thurâwn pe tûra tling nia kan inhriat hunah pawh, thurâwn kan pêk hmain hun rei lo te chhûng kan nghâk phawt thei a ni. Engvângin nge? Thufingte 15:28 chuan: “Mi dikte chuan an chhân hmain an ngaihtuah ngun ṭhîn,” tiin a sawi a. (C.L. Re-edited) Thurâwn pêk tûr nei niin inhre ta ila, engtin nge ni ang? Zir bingna, ṭawngṭaina leh, chhût ngunna kan nei phawt thei a. Chutianga kan tih chuan, kan thurâwn pêk chu Jehova duh dân nêna inmil a ni tih kan chiang lehzual thei dâwn a ni. Tûnah, zâwlnei Nathana chungchâng i lo ngaihtuah ang u.

7. Zâwlnei Nathana chanchin aṭangin eng nge i zir?

⁷ Lal Davida’n zâwlnei Nathana hnêna Pathian Jehova tâna biak in sak a duh thu a hrilh khân, Nathana chuan sa tûrin thu a lo râwn vat a. Mahse, Pathian râwn hmasa phawt tûr kha a ni. Engvângin nge? Jehova’n Davida chu biak in sa tûra a duh loh vâng a ni a. (1 Chro. 17:1-4) He thilthlengin a târ lan angin, mite’n thurâwn min dîl hunah ‘thusawi chuh loh’ chu a finthlâk a ni.—Jak. 1:19.

8. Thurâwn kan pêk huna kan fîmkhur a ngaih chhan dang chu eng nge ni?

⁸ Tu emaw hnêna thurâwn kan pêk huna kan fîmkhur a ngaih chhan dang hi han ngaihtuah teh: Kan thurâwn pêkin sawhkhâwk ṭha lo a neih chuan, a mawhphur tûr zîngah kan tel ve thei a. Chuvângin, thurâwn kan pêk hmaa ngun taka ngaihtuah hmasak chu a pawimawh tak zet a ni.

BEISEI LOH ZILHNA PEK A NGAIH HUNAH

9. Upate’n zilhna an pêk hmain eng nge an chian hmasak ang? (Galatia 6:1)

⁹ Upate chuan ‘sual kawng zawhtu’ unau tu emaw hnêna zilhna pe tûra hma an lâk a ngaih châng a awm ṭhîn a. (Galatia 6:1 chhiar rawh.) Chu unau chuan a hnua sual pawi tak tihna thlen thei duh thlanna ṭha lo tak a siam a ni thei. Upate thiltum chu chatuan nunna kawng a zawh zêl theih nâna amah ṭanpui a ni. (Jak. 5:19, 20) Chutih rualin, zilhna hlâwkthlâk tak pe thei tûr chuan, chu unauvin sual kawng a zawh ngei tih an chian phawt tûr a ni a. Jehova chuan kan chhia leh ṭha hriatna ṭanchhana thu tlûkna kan siam a phal a ni. (Rom 14:1-4) Mahse, unau tu emawin sual kawng a zawh avânga upate’n hma laa zilhna an pêk a ngai a nih chuan, engtin nge ni ang?

10-12. Tu emaw hnêna a beisei loh tak zilhna a pêk hunah upa chuan eng nge a tih ang? Entîrna pe rawh. (Milem en bawk rawh.)

¹⁰ Upate tân tu emaw hnêna a beisei loh tak zilhna pêk chu thil awlsam a ni lo. Engvângin nge? Tu emawin hre miah lohvin sual kawng a zawh thei tih tirhkoh Paula’n a sawi a. Chuvângin, upate’n tu emaw hnêna zilhna an pêk hmain, a tâna pawm a awlsam theih nâna an tih theihte chu an ti tûr a ni.

¹¹ Tu emaw hnêna a beisei loh tak zilhna pêk chu lei châra thlai chîn tum ang a ni thei a. Lo neitu chuan lei ti nêm tûrin lei a let phawt a; a hnuah, thlai chi chu a tuh a. Tichuan, a rawn ṭo theih nân tui a pe a ni. Chutiang bawkin, upain zilhna a pêk hmain, entîr neiin lei chu a buatsaih phawt tûr a ni a. Entîr nân, zilhna pêkna atâna hun ṭha ber chu a nghâk thei a; tichuan, a unau chu a ngaihsakzia a hrilh thei a ni. Zilhna petu chu hmangaihna nei leh ngilneihna ngah tak nia hriat hlawh a nih chuan, a thurâwn pêkte chu mi dangte tân pawm a awlsam phah lehzual ang.

¹² Inkawmna an neih chhûngin, upa chuan mi zawng zawngin thil an ti sual ṭhîn tih leh zilhna mamawh châng an nei ṭhîn tih sawiin lei chu a ti nêm zawm zêl thei a. (Rom 3:23) Aw dam tak leh zahna thûk tak lantîr chungin, Bible hmangin sual kawng a zawh mêk tih fiah takin a hrilh thei a ni. Tichuan, unauvin thil sual a ti tih a pawm hunah, upa chuan a dinhmun siam ṭha tûra a tih ngaite chu hrilhin “chi a tuh” thei a. A tâwpah, a thiltih ṭhate avânga thinlung taka faka ṭawngṭaipuiin, a chi tuh chu “tui a pe” thei a ni.—Jak. 5:15.

13. Engtin nge upate’n an zilhna pêkte chu a lo dawngsawngtuin a hre thiam tih an chian theih?

¹³ A châng chuan, zilhna petu thusawite leh a dawngsawngtu lo hriatthiam dân chu a inang lo thei a ni. Chutiang chu thleng lo tûrin upate’n eng nge an tih theih? An thusawi tum ber chu a hria tih chian tûrin zawhnate chu fing thiam tak leh zah thiam takin an zâwt thei a. (Thur. 12:11) A chhânnate chuan zilhna petu chu a thusawite a hre thiam tih chian tûrin a ṭanpui dâwn a ni.

A HUN TAK LEH A TIH DAN TUR DIK TAKA THURAWN PEK

14. Kan thinrim laiin thurâwn kan pe tûr a ni em? Hrilhfiah rawh.

¹⁴ Ṭha famkim lo kan nih avângin, kan thiltihte leh thusawite hmangin mi dangte chu kan ti lungni lo palh thei a. (Kol. 3:13) Pathian Thu chuan intih thinur châng kan nei thei tih a sawi a. (Eph. 4:26) Mahse, thinrim laia thurâwn pêk chu kan pumpelh tûr a ni. Engvângin nge? “Mihring thinurnain Pathian felna chu a siam” loh vâng a ni. (Jak. 1:20) Thinrim laia thurâwn kan pêk chuan dinhmun chu kan ti chhe lehzual thei a. Chu chu, min ti thinrimtu hnênah kan rilru awm dânte kan hrilh thei lo tihna erawh a ni lo. Mahse, kan inbendaih thlenga kan nghah chuan ṭha lehzualin kan inbe pawh thei dâwn a ni. Joba zilhtu mi rinawm Elihua entawn tûr siam hi lo chhinchhiah ang che.

15. Elihua entawn tûr siam aṭangin eng nge kan zir? (Milem en bawk rawh.)

¹⁵ Joba’n thlamuantu derte puhna laka a inhum dân chu Elihua’n ni tam tak chhûng a lo ngaithla a. Joba chu a khawngaih hle a. Mahse, a lutuka mahni a inngaihvena Pathian Jehova chungchâng dik lo taka a sawi chuan, Joba chungah a thinrim ta êm êm a ni. Chuti chung chuan, a thusawi hun chu nghâkin, zaidam tak leh zahna thûk tak lantîrin Joba chu a zilh a. (Job. 32:2; 33:1-7) Elihua entawn tûr siam chuan thutak pawimawh tak min zirtîr a ni: Thurâwn chu zahna leh hmangaihna lantîra a hun tak leh a nih dân tûr taka pêk chu a ṭha ber tih hi.—Thuf. 3:1, 7.

THURAWN CHU PEIN PAWM ZEL RAWH

16. Sâm 32:8 aṭangin eng nge kan zir?

¹⁶ He thuziak ṭanchhan Bible châng chuan ‘Jehova’n a mita en reng chungin rem min ruatsak’ a ni tih a sawi a. (Sâm 32:8 chhiar rawh.) Chu chuan Jehova’n min ṭanpui zawm zêl tih a târ lang a ni. Thurâwnte min pêk bâkah, zâwm tûrin min ṭanpui bawk a. Chu chu kan tâna entawn tûr ṭha a va ni tehlul êm! Mi dangte hnêna thurâwn pêk theihna chanvo hlu kan neih hunah, kan mita en reng chunga hlawhtling tûra an mamawh ṭanpuina eng pawh pein, Jehova i entawn ṭheuh vang u.

17. Upate’n mi mal taka hlâwkpui tûr Bible ṭanchhan thurâwnte an pêk hian, eng an nihzia nge an lantîr? Hrilhfiah rawh. (Isaia 32:1, 2)

¹⁷ Tûn hma zawng aiin, thurâwn ṭhate pêk leh pawm chu kan mamawh lehzual a. (2 Tim. 3:1) Mi mal taka hlâwkpui tûr Bible ṭanchhan thurâwnte petu upate chu “thlalêra lui luang ang” an ni. (Isaia 32:1, 2 chhiar rawh.) Kan hriat duhte hre mah se, hriat kan mamawh tak min hrilhtu ṭhiante chu “tangkaraw bâwma rangkachak apple ang” maia hlu an ni. (Thuf. 25:11) Thurâwn ṭhate pe tûr leh pawm tûra kan mamawh finna chu neih chhunzawm zêl i tum ṭheuh vang u.