Khaw Hmun Nghet Tûr Chu Zawng Rawh

1. Kum zabi khatnaa Jerusalem khawpui chungah eng nge thleng?

ISUA Krista chuan a thih hma ni rei lo têah, a hnungzuitute chu hrilh lâwkna a pe a. Chu hrilh lâwkna chu Jerusalem leh biak in tihchhiat a nih khân a vawi khatna atân a thleng famkim a ni. Jerusalem khawpui chu ‘sipaihote’n an hual’ dâwn tih a vaukhân a. (Lk. 21:20, NWT) A hnungzuitute chu chûng sipaite an hmuh veleh tlân chhe nghâl tûrin a hrilh a. Isua thusawite chu thleng famkimin, Rom sipaite chuan Jerusalem chu an rawn hual a ni.—Lk. 21:21, 22.

2. Judai ram leh Jerusalema chêng Hebrai Kristiante chu Paula’n eng nge a hriat nawntîr?

² Rom sipaite’n Jerusalem an hual hma kum rei lo têah, tirhkoh Paula chuan tûna Hebrai bu tia kan hriat tâk lehkhathawn thiltithei tak hi a ziak a. He lehkhathawn hmang hian, Judai ram leh Jerusalema chêng Kristiante chu an hma lawka an tawh tûrte atân fuihna pawimawh takte a pe a ni. An hma lawka an tawh tûr chu eng nge? Jerusalem chu tihchhiat a ni dâwn a ni. Kristiante chuan dam khawchhuah an duh a nih chuan, an inte leh sumdâwnnate chu kalsan an inhuam a ngai a. Chuvângin, Jerusalem khawpui chungchângah Paula chuan: “Hetah hian khaw hmun nghet kan nei si lo va,” tiin a sawi a. Chu bâkah: “Khaw lo la awm tûr chu kan zawng zâwk a ni,” tiin a sawi bawk.—Heb. 13:14.

3. “Khua lungphûmte nei mi” chu eng nge ni a, chu chu engvângin nge kan zawn?

³ Jerusalem leh Judai ram chhuahsan tûra thu tlûkna siamtu Kristiante chuan tihmualphona leh nuihsawhna te an tâwk ngei ang a. Mahse, an thu tlûkna siam chuan an nun a chhanhim a ni. Tûn laiah pawh mihringte chunga rinna kan nghah loh avâng leh, he khawvêla nun nuam leh him kan zawn loh avângin mite chuan min nuihsawh ṭhîn a. A nih leh, engvângin nge chutiang duh thlanna chu kan siam? He khawvêl kalhmang hi tihtâwp a ni dâwn tih kan hria a. “Khua lungphûmte nei mi,” “lo la awm tûr” Pathian Ram chu kan zawng a ni.a (Heb. 11:10; Mt. 6:33) He thuziaka thupui tê tinte hian: (1) Paula fuihnain kum zabi khatnaa Kristiante chu “[khaw] lo la awm tûr” zawng zêl tûra a ṭanpui dân te, (2) an hmaa thil lo thleng tûrte atâna Paula’n a buatsaih dân te leh, (3) a fuihnain tûn laia min ṭanpui theih dânte chu a rawn târ lang ang.

THLAHTHLAM NGAI LOTU TUR CHE CHU RINCHHAN RAWH

4. Engvângin nge Jerusalem chu Kristiante tâna hmun pawimawh tak a nih?

⁴ Jerusalem chu Kristiante tâna hmun pawimawh tak a ni a. C.E. 33 khân kum zabi khatnaa Kristian kohhran chu chuta din niin, governing body innghahna a ni bawk. Chu bâkah, Kristian tam tak chuan chu khawpuiah chuan inte bâkah, thil dangte pawh an nei a. Mahse, Isua chuan a hnungzuitute chu Jerusalem leh Judai ram hial pawh an chhuahsan a la ngai dâwn tih a hrilh a ni.—Mt. 24:16.

5. Engtin nge Paula’n Kristiante chu thil lo thleng tûrte atâna a buatsaih?

⁵ Paula’n Kristiante chu Jerusalem khawpui chungchânga Pathian Jehova thlîr dân ngaihven tûra ṭanpuiin thil lo la thleng tûrte atân a buatsaih a. Pathianin biak in, puithiam ruahmanna leh, Jerusalema hlan hâlral thilhlante chu a pawm tawh lo tih a hriat nawntîr a ni. (Heb. 8:13) Khawpuia chêng mi a tam zâwk chuan Messia chu an hnâwl a. Chu bâkah, Jerusalema biak in chu Jehova biakna thianghlim hmunpui a ni tawh lo va, tihchhiat a ni thuai dâwn a ni.—Lk. 13:34, 35.

6. Engvângin nge Hebrai 13:5, 6-a Paula thusawite chu Kristiante tâna a hun taka hriat nawntîrna a nih?

⁶ Paula’n Hebrai mite hnêna lehkha a thawn lai chuan Jerusalem chu khawpui lûn tak a ni a. Chutih laia Rom mi lehkha ziaktu pakhat chuan Jerusalem chu “khaw chhak lama khawpui hming thang ber,” tiin a ko a ni. Ram hrang hranga chêng Juda mite chu kum tin kût hmang tûrin an han kal ṭhîn a. Chu chuan, khawpui sum leh pai dinhmun chu nasa takin a ṭhan duantîr a ni. Chu dinhmun avâng chuan Kristian ṭhenkhatte pawhin sum tam tak an lâk luh ve theih ngei a rinawm. Chu chu Paula’n: “In rilru putzia chu tangka ngai natna tel lo ni rawh se, in thil neih chhun chungahte chuan lungawi rawh u,” tia a hrilh chhan kha a ni thei a. Tichuan, Pathian Lehkha Thua Jehova ngeiin a sawi thutiam thiltithei tak: “Eng tikah mah ka thlahthlam tawp lo vang chia, kal pawh ka kalsan tawp lo vang che,” tih chu a sawi chhâwng a. (Hebrai 13:5, 6 chhiar rawh; Deut. 31:6; Sâm 118:6) Jerusalem leh Judai rama chêng Kristiante chuan chu thutiam hriat nawntîr leh chu an mamawh dâwn a ni. Engvângin nge? A chhan chu, chu lehkhathawn an dawn aṭanga rei lo têah, an in te, an sumdâwnna te leh, an thil neih a tam zâwkte chu an kalsan a ngai dâwn a. Chu bâkah, hmun tharah nun tharin bul an ṭan a ngai dâwn a ni.

7. Engvângin nge tûnah Jehova kan rinna chu kan tihngheh a ngaih?

⁷ Kan tâna zir tûr: Kan hma lawkah eng nge kan hmachhawn ang? “Hrehawm nasa tak” chu a inṭan ang a, he khawvêl suaksual tak hi tihboral a ni ang. (Mt. 24:21, NWT) Chuvângin, kum zabi khatnaa Kristiante ang bawkin harhvâng tak leh inpeih renga kan awm a ngai a. (Lk. 21:34-36) Hrehawm nasa tak chhûng chuan, Jehova’n a mite chu a thlahthlam ngai lo vang tih ring nghet tlat chungin kan thil neih ṭhenkhat emaw, a vaiin emaw kan kalsan a ngai mai thei a. Hrehawm nasa tak inṭan hma tûnah ngei pawh, tu chungah nge rinna kan nghah tih lantîr theihna hun remchâng kan nei a ni. Heti hian inzâwt ang che: ‘Ka thiltih leh thiltumte chuan hausakna chungah ni lovin, min ngaihsak ang tih min tiamtu Pathian chungah rinna ka nghat tih a târ lang em?’ tiin. (1 Tim. 6:17) Kum zabi khatnaa thilthlengte aṭangin inzir thei mah ila, kan hmaa lo thleng tûr “hrehawm nasa tak” chu, chu aia nasa a ni dâwn a ni. A nih leh, engtin nge hrehawm nasa tak a inṭan hunah kan tih tûrte chu kan hriat theih ang?

HOTUTE THU AWIH RAWH U

8. Isua’n a zirtîrte chu eng kaihhruainate nge a pêk?

⁸ Kristiante chuan Hebrai mite hnêna Paula lehkhathawn an dawn hnu rei lo têah, Rom sipaite’n Jerusalem an hual chu an hmu a. Chu chu, an tlânchhiat a hun tawh tih hriat theihna a ni a. Jerusalem khawpui chu tihchhiat a ni dâwn a ni. (Mt. 24:3; Lk. 21:20, 24) Mahse, khawiah nge an tlânchhiat ang? Isua chuan: “Judai rama awmte chu tlângahte tlânchhia sela,” tiin a sawi a. (Lk. 21:21, NWT) Judai ram chhehvêlah chuan tlâng tam tak a awm a ni. Chuvângin, khawi lam panin nge an kal tâk ang?

9. Engvângin nge Kristiante chuan an tlânna hmun tûr chu an ngaihtuah mai theih? (Map en bawk rawh.)

⁹ Kristiante tlânchhiat theihna tûr tlâng ṭhenkhat chu lo ngaihtuah ta ila. Entîr nân, Samari rama tlângte, Galili rama tlângte, Hermon Tlâng leh Lebanon tlângte bâkah, Jordan lui râla tlângte a awm a ni. (Map en rawh.) Chûng tlângramtea awm khaw ṭhenkhat chu hmun him nia ngaih theih a ni a. Entir nân, Gamla khua chu tlâng sâng taka awm niin kal pawh a har hle a. Juda mi ṭhenkhat chuan, chu chu râl tlânna atâna hmun him niin an ngai a ni. Mahse, Gamla khua chu Judate leh Rom mite inbeihna hmuna lo changin, a khaw mi tam takin nunna an chân a ni.b

10-11. (a) Engtin nge Jehova chuan Kristiante chu kaihhruaina a lo pêk mai theih? (Hebrai 13:7, 17) (b) Engtin nge hotute thu âwih chu Kristiante’n an hlâwkpui? (Milem en bawk rawh.)

¹⁰ Pathian Jehova chuan kohhrana hotute hmangin Kristiante chu a kaihruai niin a lang a. A hnuah, chanchin zir mi Eusebius-a chuan: “Jerusalem kohhrana mite chuan Pathian ruat mipate hmangin kaihhruaina an dawng a. Indona a thlen hmaa khawpui chu chhuahsana Pella tia koh Perea khuaa kal tûra . . . thu pêk an ni,” tiin a ziak a ni. Pella chu Kristiante tâna tlânchhiatna tûr hmun ṭha tak niin a lang a. Jerusalem aṭanga hla vak lova a awm avângin pan a awlsam a ni. Chu chu Jentailte awmna khua a ni a. Juda zalenna sualtute leh Rom mite inbeihnain a tibuai ve lo a ni.—Map en rawh.

¹¹ Tlângtea tlânchhia Kristiante chuan kohhrana “hotute thu âwih” tûra Paula fuihna chu an nunpui a. (Hebrai 13:7, 17 chhiar rawh.) Chuvângin, Pathian mite chu an dam khawchhuak a. Thilthleng chanchin chuan “khua lungphûmte nei mi”—Pathian Ram—nghâktute chu Pathianin a thlahthlam lo tih a nem nghet a ni.—Heb. 11:10.

12-13. Engtin nge Jehova’n hun khirh tak tak chhûngin a mite chu a lo kaihhruai tawh?

¹² Kan tâna zir tûr: Jehova chuan a mite hnêna kaihhruaina chiang tak pe tûrin hotute chu a hmang a. Bible-ah hian Pathianin hun khirh tak tak chhûnga a mite kaihruai tûra berâmpute a ruat dân entîrna tam tak a chuang a. (Deut. 31:23; Sâm 77:20) Tûn laiah pawh, hotute chu Pathianin a la hmang chhunzawm zêl tih nemnghehna chiang takte kan hmu a ni.

¹³ Entîr nân, COVID-19 hripui a lên khân “hotute” chuan kan mamawh kaihhruainate min pe a. Upate chuan unaute thlarau lam mamawh an pêk theih dân tûr kaihhruainate an dawng a ni. Hripui a lên hnu rei vak lovah, Internet, TV leh, radio hmangin ṭawng 500 chuangin inkhâwmpui chhinchhiah tlâk tak kan hmang a. Chutiang chu tûn hmain a la awm ngai lo. Thlarau lam chaw pawh khaihlak lovin kan dawng a. Chuvângin, kan inpumkhatna chu kan vawng tlat thei a ni. Hma lam hunah eng harsatna pawh tâwk dâwn mah ila, thu tlûkna fing takte siam tûrin Pathianin hotute chu a kaihruai chhunzawm zêl ang tih kan ring nghet tlat thei a ni. Jehova rinchhan leh a kaihhruaina pêkte zawm bâkah, eng mize dangte’n nge khawvêl pum sawi nghîngtu tûr hrehawm nasa tak atâna inbuatsaih tûr leh chumi hun chhûnga thu tlûkna fing takte siam tûra min ṭanpui ang?

UNAU INHMANGAIHNA LEH KHUALCHHAWN THIAMNA LANTIR RAWH

14. Hebrai 13:1-3-a sawi angin, Kristiante chuan Juda kalhmang tâwpna a hnaih zêl rualin eng miziate nge an lantîr ngai?

¹⁴ Hrehawm nasa tak a lo thlen hunah tûn hma zawng aia nasain hmangaihna inlantîr tawn kan mamawh dâwn a. Chutih hunah chuan, Jerusalem leh Judai rama chêng Kristiante chu kan entawn a ngai dâwn a ni. Anni chuan hmangaihna an inlantîr tawn reng a. (Heb. 10:32-34) Mahse, Juda kalhmang a tâwp hma kumahte khân, Kristiante chuan tûn hma aia nasain “unau inhmangaihna” inlantîr tawnin ‘mikhualte chunga hmangaih an chhuah’ a ngai a.c (Hebrai 13:1-3 chhiar rawh.) Hrehawm nasa tak chhûng chuan chutianga kan tih ve chu a ngai dâwn a ni.

15. Engvângin nge Hebrai Kristiante chuan an tlânchhiat hnuah unau inhmangaihna leh khualchhâwn thiamna an lantîr a ngaih?

¹⁵ Rom sipaite’n Jerusalem an hual hnua an inhnûkdâwk leh thut khân, Kristiante chu an thil neih tam tak hnutchhiaha an tlânchhiat a ngai a. (Mt. 24:17, 18) Tlângram lam pana an zinnaah leh hmun thara an inbengbelnaah chuan an inṭanpui tawn a ngai a ni. “Tlâkchham” tam tak an nei ngei ang a. Chu chuan, Kristiante chu unau inhmangaihna dik tak lantîr tûr leh an thil neihte insem a, inṭanpui tawna khualchhâwn thiamna lantîr theihna hun remchâng a pe dâwn a ni.—Tit. 3:14.

16. Engtin nge kan ṭanpuina mamawhtu kan unaute chunga hmangaihna kan lantîr theih? (Milem en bawk rawh.)

¹⁶ Kan tâna zir tûr: Hmangaihna chuan kan unaute mamawh huna ṭanpuina pe tûrin min chêttîr a. Pathian mi tam tak chuan tûn hnaia indona leh leilung chhiatna thlengte avânga ṭanpui ngaia awm an unaute thlarau lam leh tisa lam mamawhte chu phal takin an pe a ni. Indona avânga a in chhuahsantu Ukraine rama unaunu pakhat chuan: “Kan unaute kal tlangin Jehova kaihhruaina leh ṭanpuina kan dawng a. Anni chuan Ukraine, Hungary leh, tûnah Germany-ah pawh ṭha taka min lo lâwmin min ṭanpui a ni,” tiin a sawi. An unaute chunga khualchhâwn thiamna lantîra an mamawhte ngaihsaktu unaute chu Jehova kuta hmanrua ang an ni.—Thuf. 19:17; 2 Kor. 1:3, 4.

17. Engvângin nge tûn aṭanga unau inhmangaihna leh khualchhâwn thiamna lantîr kan zir a pawimawh?

¹⁷ Chutiang ṭanpuina chu nakin hunah tûn aia nasaa mamawh a la ni dâwn tih chu rinhlelh rual a ni lo va. (Hab. 3:16-18) Jehova chuan chutih huna nasa taka kan la mamawh tûr mizia, unau inhmangaihna leh khualchhâwn thiamnate chu tûn aṭanga nei chho turin min zirtîr a ni.

KAN HMAA LO THLENG TUR CHU

18. Engtin nge kum zabi khatnaa Hebrai Kristiante chu kan entawn theih?

¹⁸ Thilthleng chanchinin a târ lan angin, tlânga tlânchhia Kristiante chuan Jerusalem tihchhiatna chu an pumpelh thei a. Khawpui chu chhuahsan mah se, anni chu Jehova’n a thlahthlam ngai lo. An hnên aṭangin eng nge kan zir theih? Kan hmaa thil thlen dân tur chu chiang takin kan hre lo va. Mahse, inhuam taka thuawihna lantîr tûrin Isua’n min vaukhân a ni. (Lk. 12:40) Hebrai mite hnêna Paula fuihna lehkhathawn chu kan nei a, chu chu kum zabi khatnaa a ṭangkai ang bawkin, tûn laiah pawh a ṭangkai a ni. Chu bâkah, Jehova ngeiin min thlahthlam, a nih loh leh min kalsan ngai loh tûr thu a tiamna chu kan nei bawk a. (Heb. 13:5, 6) Chuvângin, lungphûm ṭha tak nei khawpui—Pathian Ram—chu ṭhahnemngai taka zawng chhunzawm zêlin, chumiin a thlen tûr chatuan malsâwmnate chu i chên ang u.—Mt. 25:34.