Vântirhkoh Rinawmte Chu Entawn Rawh

1-2. (a) Eng kawngin nge vântirhkohte laka kan danglam? (b) Eng kawngin nge vântirhkohte nên kan inan?

JEHOVA’N thutaka a hîp che khân, vântirhkoh rinawm maktaduai tam tak telna, hnam chi hrang hrang leh hmangaihna ngah tak amah betu chhûngkaw zîngah a sâwm che a. (Dan. 7:9, 10) Mahse, vântirhkohte chungchâng kan ngaihtuah hian, kan inan lohnate chu kan hre chhuak mai thei. Entîr nân, anni chu siam kan nih hma daih aṭangin an awm tawh a. (Job. 38:4, 7) Keini aiin thil an tithei zâwk a. Thianghlimna leh dikna kawngah pawh mihring ṭha famkim lote aiin nasa takin an chungnung zâwk a ni.—Lk. 9:26.

² Chutih rualin, vântirhkohte nên inanna tam tak kan nei a. Entîr nân, vântirhkohte ang bawkin, Jehova mize ṭha tak takte chu kan entawn thei a ni. Anmahni angin zalên taka duh thlan theihna bâkah, hming bil te, mize hrang hrang te leh, mawhphurhna chi hrang hrangte kan nei bawk a. Chu bâkah, anmahni angin min Siamtu kaihhruaina kan mamawh bawk a ni.—1 Pet. 1:12.

3. Vântirhkoh rinawmte hnên aṭangin eng nge kan zir theih?

³ Vântirhkohte nên kawng tam taka inanna kan neih avângin, an entawn tûr ṭha siamte chuan min tichakin, thil pawimawh tam tak min zirtîr thei a. He thuziakah hian, vântirhkoh rinawmte inngaihtlâwmna kan entawn theih dân bâkah, mihring an hmangaihna te, an chhelna te leh, kohhran vawng thianghlim tûra ṭan an lâk dânte chu kan sawiho vang.

VANTIRHKOHTE CHU AN INNGAITLAWM

4. (a) Engtin nge vântirhkohte’n inngaihtlâwmna an lantîr? (b) Engvângin nge an inngaihtlâwm? (Sâm 89:7)

⁴ Vântirhkoh rinawmte chu an inngaitlâwm a. Tawn hriat ngah thiltithei tak leh fing tak ni mah se, Jehova kaihhruaina pêkte chu an zâwm a ni. (Sâm 103:20) An chanvote an thawhnaah an thiltihte chu chhuanpuiin, an thiltihtheihna chu an chapopui ngai lo va. An hming chu hriat ni dâwn lo mah se, hlim takin Pathian duh zâwng an ti a ni.a (Gen. 32:24, 29; 2 Lal. 19:35) Jehova dawn tûr chawimawina chu dawn an tum lo. Engvângin nge vântirhkohte chu an inngaihtlâwm êm êm? Jehova an hmangaih a, amah zahna thûk tak an neih vâng a ni.—Sâm 89:7 chhiar rawh.

5. Engtin nge vântirhkoh pakhat chuan tirhkoh Johana rilru put hmang a siam ṭhat khân inngaihtlâwmna a lantîr? (Milem en bawk rawh.)

⁵ Vântirhkohte inngaihtlâwm dân târ langtu thilthleng pakhat lo ngaihtuah ta ila. C.E. 96 bâwr vêlah, a hming târ lan loh vântirhkoh pakhatin tirhkoh Johana chu inlârna ropui tak a hmuhtîr a. (Thup. 1:1) Chu inlârna a hmuh chuan Johana chu engtin nge a awm? Vântirhkoh chu chibai bûk mai a tum a ni. Mahse, chu vântirhkoh rinawm tak chuan ani chu dang vatin: “Heti chuan ti suh khai; kei chu nangmah leh i unau, Isua hriattîrna thu pawmte bâwihpui ka ni alâwm; Pathian chibai bûk zâwk rawh,” tiin a hrilh a ni. (Thup. 19:10) Chhân lêtna inngaitlâwm tak a va ni êm! Ani chuan ropuina leh chawimawina dawn a beisei lo va. Johana chu Pathian Jehova be tûr zâwkin a hrilh vat a ni. Chutih rualin, a lakah a indah sâng lo. Hun rei tak chhûng Jehova rawng lo bâwl tawhin, Johana aiin thiltithei zâwk mah se, inngaitlâwm takin ani chu a bâwihpui angin a cheibâwl a ni. Johana rilru put hmang chu siam ṭhat tum mah se, ṭawngkam vîn tak a hmang lo. Chu aiin, ngilnei takin a hrilh zâwk a. Johana chuan mak a tih êm avânga amah chibai bûk tum a ni thei tih a hre thiam a ni.

6. Engtin nge vântirhkohte inngaihtlâwmna chu kan entawn theih?

⁶ Engtin nge vântirhkohte inngaihtlâwmna chu kan entawn theih? Keini pawhin kan chanvo dawnte chu kan uanpui lo vang a, kan thil hlen chhuahte chu kan chapopui hek lo vang. (1 Kor. 4:7) Chu bâkah, Jehova rawng kan bâwlna a rei tawh vâng emaw, kan chanvo hlu dawn avâng emawin mi dangte aia sâng zâwkah kan indah lo bawk ang. Mawhphurhna kan dawn tam poh leh mi dangte aia tê zâwk angin kan inthlîr lehzual tûr a ni a. (Lk. 9:48) Vântîrhkohte ang bawkin, mi dangte aia pawimawh zâwk anga inngai lovin, an rawngbâwlsak kan duh zâwk a ni.

7. Engtin nge tu emaw chu siam ṭhat emaw, zilh emaw a ngaih hunah inngaihtlâwmna kan lantîr theih?

⁷ Kan Kristian unau tu emaw, a nih loh leh kan fa tu emaw chu kan siam ṭhat emaw, kan zilh emaw a ngaih hian inngaihtlâwmna kan lantîr thei bawk a. Zilhna chu khauh taka pêk a ngai thei a. Mahse, ngilnei taka Johana siam ṭhatu vântirkoh angin, lunghnualna thlen si lovin, zilhna khauh tak kan pe thei a ni. Mi dangte aia sâng zâwka kan inruat loh chuan, mi dangte chu zah tak leh khawngaihna nei takin Bible ṭanchhan zilhna kan pe thei dâwn a ni.—Kol. 4:6.

VANTIRHKOHTE CHUAN MIHRINGTE AN HMANGAIH

8. (a) Luka 15:10-a sawi angin, engtin nge vântirhkohte’n mihringte an hmangaihzia an lantîr? (b) Engtin nge vântirhkohte’n thu hrilh rawngbâwlnaah an ṭanpui? (A kâwma milem en bawk rawh.)

⁸ Vântirhkohte chu mihringte laka inla hrang lovin, an chungah hmangaihna an lantîr a. Mi sual pakhat a inlamlêt hunah—Jehova berâm bo a rawn kîr leh hunah emaw, tu emawin a nun kawng thlâk danglama, thutak a pawm hunah emaw—anni chu an lâwm hle a ni. (Luka 15:10 chhiar rawh.) Chu bâkah, vântirhkohte chuan Lalram thu hrilh rawngbâwlnaah phûr takin an ṭanpui bawk. (Thup. 14:6) Anmahni ngeiin mite hnênah thu hril lo mah se, Jehova chungchâng zir duh tu emaw kan zawn hmuh theih nân min kaihruai thei a. Chutih rualin, tu emaw nêna kan intawn apiangin vântirhkohte’n min kaihruai tih chiang takin kan sawi thei lo. A chhan chu, Jehova’n mite ṭanpui tûr leh a chhiahhlawhte kaihruai tûrin—a thlarau thianghlim hmanga kaihhruaina ang chi—kawng dangte chu a hmang thei a ni. (Tirh. 16:6, 7) Mahse, a vântirhkohte chu nasa takin a hmang tho va. Chuvângin, chanchin ṭha kan hrilh hunah vântirhkohte’n min ṭanpui ang tih kan ring nghet tlat thei a ni.—“An Ṭawngṭainate Chu Chhân A Ni,” tih bâwm chu en rawh.

9. Engtin nge vântirhkohte’n mihringte an hmangaihna chu kan entawn theih?

⁹ Engtin nge vântirhkohte’n mihringte an hmangaihna chu kan entawn theih? Kohhranah tu emaw lâk luh leh a ni tih kan hriat hunah vântirhkohte ang bawkin kan lâwm thei a. A lo kîr leh avânga kan lâwmzia leh amah kan hmangaihzia chu kan hrilh thei a ni. (Lk. 15:4-7; 2 Kor. 2:6-8) Vântirhkohte entawnin thu hrilh rawngbâwlnaah theih tâwp chhuahin kan tel thei bawk. (Thur. 11:6) Chu bâkah, vântirhkohte’n chanchin ṭha hrilhnaa min ṭanpui ang bawkin, kan unaute chu an rawngbâwlnaah kan ṭanpui thei a. Entîr nân, tawn hriat nei tlêm zâwk thuchhuahtu tu emaw chu rawngbâwlnaa thawhpui tûrin ruahmanna kan siam thei ang em? Kum upa, a nih loh leh hrisêlna ṭha lo tu emaw chu rawngbâwlnaa a tel theih nân kan ṭanpui thei ang em?

10. Unaunu Sara-i thiltawn aṭangin eng nge kan zir theih?

¹⁰ Kan dinhmun avângin rawngbâwlnaah kan tel tam thei lo a nih chuan, engtin nge ni ang? Thu hrilh rawngbâwlnaah vântirhkohte thawhpui theih dân kawngte kan la zawng thei a. India rama Unaunu Sara-ib thiltawn hi lo ngaihtuah ta ila. Kum 20 chhûng vêl pioneer a thawh hnuah khum betin a nâ a. Chuvângin, rilru hahna nasa tak a nei a ni. Mahse, kohhrana unaute ṭanpuina duhawm tak leh Bible chhiar ziahna hmangin thilte chu a êng zâwngin a rawn thlîr chho leh a. Chutih rualin, a dinhmun thar mila a rawngbâwlna a siamrem erawh a ngai a ni. Lehkha ziak tûr pawha a ṭhut theih loh avângin, telephone hmang chauhvin thu a hril thei a. Chuvângin, a tlawhkîrte chu a phone ṭhîn a; tichuan, anni chuan Bible zir duh âwm mi dangte chu an kawhhmuh ṭhîn a ni. Eng nge a rah chhuah? Thla rei lo te chhûngin, Unaunu Sara-i chuan a zirpui theih aia tam Bible zirpui 70 a nei ta a! Chuvângin, a zirpui ṭhenkhat chu kohhrana mi dangte hnênah a pe a. Tûnah chuan, zirlai tam tak chu inkhâwmnaahte an tel tawh a ni. Vântirhkohte chu Unaunu Sara-i anga thu hrilh rawngbâwlnaa theih tâwp chhuaha tel unaute nêna an thawhho avângin an va lâwm dâwn tak êm!

VANTIRHKOHTE CHUAN CHHELNA AN LANTIR

11. Engtin nge vântirhkoh rinawmte chuan chhelna nasa tak an lantîr?

¹¹ Vântirhkoh rinawmte chu chhelna kawnga entawn tûr ṭha tak an ni a. Anni chuan rorêl dik lohna leh suahsualna chu kum sâng tam tak chhûng an lo tuar tawh a ni. Tûn hmaa an rawngbâwlpui Setana leh vântirhkoh dang tam tak Pathian Jehova laka an hel chu an hmu a. (Gen. 3:1; 6:1, 2; Jud. 6) Bible chuan ramhuai thiltithei tak dodâlna tâwktu vântirhkoh rinawm pakhat chungchâng a târ lang a ni. (Dan. 10:13) Chu bâkah, mihring chanchin tluan chhuakah, vântirhkohte chuan mi tlêm tê chauhvin biakna dik an pawm tih an hmu bawk a. Chuti chung pawhin, chûng vântirhkoh rinawmte chuan hlim tak leh ṭhahnemngai takin Jehova rawng chu an bâwl chhunzawm zêl a. Pathianin a hun takah rorêl dik lohna zawng zawng a chingfel ang tih an hria a ni.

12. Engin nge chhelna nei tûra min ṭanpui thei?

¹² Engtin nge vântirhkohte chhelna chu kan entawn theih? Vântirhkohte angin, rorêl dik lohna emaw, dodâlna emaw kan hmachhawn thei a. Mahse, anmahni angin Pathianin a hun takah suahsualna zawng zawng a tiboral ang tih kan hria a ni. Chuvângin, vântirhkoh rinawmte ang bawkin, ‘thil ṭha tih kan ning lo’. (Gal. 6:9) Chu bâkah, Pathianin tuar chhuak thei tûra ṭanpui min tiam a. (1 Kor. 10:13) Chuvângin, dawhtheihna leh hlimna min neihtîrtu a thlarau thianghlim dîlin Pathian Jehova hnênah kan ṭawngtai thei a ni. (Gal. 5:22; Kol. 1:11) Dodâlna i tâwk a nih chuan engtin nge ni ang? Hlau lovin Jehova rinchhan tlat rawh. Ani chuan a ṭanpui chein, a tichak reng ang che.—Heb. 13:6.

VANTIRHKOHTE CHUAN KOHHRAN VAWN THIANGHLIMNAAH AN ṬANPUI

13. Vântirhkohte chuan ni hnuhnûng chhûngin eng chanvo danglam tak nge an dawn? (Matthaia 13:47-49)

¹³ Ni hnuhnûng chhûng hian, Jehova chuan vântirhkohte hnênah chanvo danglam tak a pe a. (Matthaia 13:47-49 chhiar rawh.) Thu hrilh rawngbâwlna chuan mi maktaduai têlte chu chanchin ṭha ngaihven tûrin a hîp a ni. Chûng zînga mi ṭhenkhatin Kristian dik ni tûra hma an lâk laiin, mi dangte chuan chutianga hma lâk duhna chu an nei lo. Vântirhkohte chu ‘mi fel zîng ata mi sualte thliar hrang’ tûra mawhphurhna pêk an ni a. Chumi awmzia chu kohhran thianghlimna humhim tûra chanvo pêk an ni. Chutih rualin, chhan eng emaw avânga kan zînga rawngbâwl tawh lote chu an rawn kîr leh thei tawh lo tihna a ni lo va; kohhranah buaina a awm ngai lo vang tihna lah a ni hek lo. Mahse, chûng vântirhkohte chu kohhran vawng thianghlim tûrin an thawk rim hle ang tih kan chiang thei a ni.

14-15. Vântirhkohte’n thlarau lam leh nungchang lama kohhran thianghlimna an ngaihven dân chu engtin nge kan entawn theih? (Milem en bawk rawh.)

¹⁴ Engtin nge vântirhkohte’n kohhran thianghlimna an ngaihven dân chu kan entawn theih? Kohhran chhûnga nungchang lam leh thlarau lam thianghlimna vawng tûra theih tâwp chhuahna hmangin a ni. Chutianga ti tûr chuan ṭhian ṭha thlang tûr leh a ṭha lo zâwnga min thunun thei eng pawh hnâwl tûrin kan thinlung kan vênghim tlat thei a. (Sâm 101:3) Kan Kristian unaute chu Jehova chunga rinawm tlat tûrin kan ṭanpui thei bawk a ni. Entîr nân, unau tu emawin sual pawi tak a ti tih kan hriat chuan engtin nge ni ang? Amah kan hmangaih avângin kohhran upate hnêna hrilh tûrin kan fuih ang a. A hrilh duh lo a nih chuan, chumi chungchâng chu keimahni’n upate kan hrilh ang. Thlarau lama chak lo kan unau tu pawhin rang taka ṭanpuina a dawn chu kan duh tak zet!—Jak. 5:14, 15.

¹⁵ Lungchhiatthlâk takin, sual pawi tak titu ṭhenkhat chu kohhran aṭanga chhuahtîr an ngai a. Chutiang dinhmunah chuan, anni chu kan “kâwm” tûr a ni lo.c (1 Kor. 5:9-13, NWT) He ruahmanna hian kohhran chu thianghlim taka a awm theih nân a ṭanpui a. Chu bâkah, kohhran aṭanga chhuahtîrte kawm lohna hmangin an chungah hmangaihna kan lantîr a ni. Jehova thu âwih a, anmahni kan kawm lohna chuan Jehova hnêna kîr leh a pawimawhzia hre chhuak tûrin a ṭanpui thei a. An rawn kîr leh chuan Pathian Jehova leh a vântirhkohte ang bawkin kan lâwm hle a ni.—Lk. 15:7.

16. Eng kawngtein nge vântirhkohte chu entawn kan tum tlat ang?

¹⁶ Jehova’n vântirhkohte chungchâng zir tûr leh anmahni thawhpui tûra hun remchâng min pe hi chawimawina ropui tak a va ni êm! An mize ṭha tak tak: an inngaihtlâwmna te, mihring an hmangaihna te, an chhelna te leh, nungchang lam leh thlarau lama kohhran thianghlimna an ngaihven dânte chu i entawn ṭheuh vang u. Vântirhkoh rinawmte kan entawn a nih chuan, Pathian Jehova betu chhûngkaw zîngah chatuanin kan tel thei dâwn a ni.