A KAWM THU JEHOVA THUHRETUTE CHU TUTE NGE AN NIH?
Jehova Thuhretute Chu Eng Ang Mi Nge An Nih?
Jehova Thuhretute chu sakhaw pâwl dang nêna inzawmna nei lo, khawvêl pum huap pâwl kan ni a. Kan world headquarter chu United States-a awm ni mah se, a tam zâwkte chu ram hrang hrangah kan awm thung. Mi maktaduai riat chuangte chuan ram 230 aia tamah mite Bible kan zirpui a. Chu chu Isua’n: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang,” tia a sawi kan chhân lêtna a ni.—Matthaia 24:14.
Khawi hmunah pawh awm mah ila, dânte chu ṭha taka zâwmin, politics lamah erawh tualdawih kan tum tlat thung. Chu chu Isua’n Kristiante hnêna ‘khawvêla mi ni lo’ tûra min kaihhruaina kan zawm vâng a ni. Chuvâng chuan politics buainaah leh thiltihah kan tel lova, indona pawh kan thlâwp bawk hek lo. (Johana 15:19; 17:16) Dik takin, khawvêl Indopui II-na chhûng khân, Jehova Thuhretute chu an tualdawih avângin lung ina khung te, nghaisak te, leh tihhlumte an tâwk hial a. German bishop lo ni tawh ṭhîn chuan: “Nazi rorêlna hnuaia tualdawih awmchhun angin an insawi thei a ni,” tiin a ziak.
“[Jehova Thuhretute] chuan mize nghet tak an nei a. Hêng mi, mahni hmasialna nei lote hi politics thiltih ropui tak takah kan hmang thei a—mahse chutiang hmunah chuan kan kaltîr thei ngai lo vang. . . . Anni chuan sawrkâr thuneihna chu an hre thiam a; mahse, Pathian Ram chauh chu mihringte harsatna zawng zawng chingfel theitu a ni tih an ring a ni.”—Nová Svoboda chanchinbu, Czech Republic.
Chuti chung chuan, kan inla hrang lo. Isua chuan a hnungzuitute chungchângah: “Nangin anni chu khawvêl ata i lâk chhuah tûra ngên ka ni lo,” tiin a ṭawngṭai a. (Johana 17:15) Chuvângin, vêngchhûnga hnathawhna hmunah te, dâwrah te, leh school-ahte min hmu ṭhîn ngei ang. (wp15-E 09/01)