A KAWM THU JEHOVA THUHRETUTE CHU TUTE NGE AN NIH?
Jehova Thuhretute Chuan Eng Nge An Rin?
Jehova Thuhretute chuan “Pathian Lehkha Thu zawng zawng hi Pathian thâwk khuma pêk a ni a, . . . a sâwt bawk,” tih kan ring a. (2 Timothea 3:16) Bible hi Siamtu chanchin zir nân leh awmze nei taka nun nâna min kaihruaitu ṭangkai tak angin kan hmang a ni.
Bible chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a sawi. (Sâm 83:18) Chuvângin, Pathian Jehova chauh chibai kan bûk a, a thuhretute kan nih angin mite hnênah a hming kan hriattîr a ni.—Isaia 43:10-12.
Kristian kan nih angin, Isua chu “Pathian Fapa,”a leia lo kala Messia lo ni ta a ni tih kan pawm a. (Johana 1:34, 41; 4:25, 26) A thih hnuah Isua chu vânah kaihthawhin a awm a. (1 Korinth 15:3, 4) A hnuah Pathian Rama Lalber a ni ta a ni. (Thu Puan 11:15) Chu Lalram chu sawrkâr dik tak, leia Paradis thlentîrtu tûr a ni. (Daniela 2:44) Bible chuan: “Thuhuairawlhte erawh chuan ram hi an luah ang a: remna chênin an hmuingîl ang,” tiin a sawi.—Sâm 37:11, 29.
“Bible an chhiar hian, Pathianin anni chu a bia niin an ring a. Nuna harsatna an tawh apiangin Pathian Thuah a chinfelna an zawng ṭhîn . . . An tân chuan Pathian Thu chu a nung tak zet a ni.”—Katholic sakhaw hruaitu Benjamin Cherayath, Münsterländische Volkszeitung chanchinbu, Germany
Jehova Thuhretute chuan Bible thu bulte chu tûn thleng pawh hian mite’n an hlawkpui thei tih an ring a. (Isaia 48:17, 18) Chuvângin, Bible thu bulte chu kan zâwm tlat a ni. Entîr nân, Bible chuan kan rilru leh taksa tibawlhhlawh thei thiltihte pumpelh tûra min vaukhân avângin zial kan zu lo va, damdawi kan hmang khaw lo hek lo. (2 Korinth 7:1) Bible-in a bîk taka a dem zu ruihna, mipat hmeichhiatna hman khawlohna, leh rûkrûkna ang chite chu kan pumpelh bawk a ni.—1 Korinth 6:9-11. (wp15-E 09/01)
a Isua chu Jehova’n a siam hmasak ber leh amah ngeiina a siam awmchhun a nih avângin, Bible chuan “Pathian Fapa mal” niin a sawi bawk.—Johana 3:18; Kolossa 1:13-15.