A KAWM THU
Jehova Thuhretute Chu Tute Nge An Nih?
“Mike-a chu kum tam tak ka lo hriat tawh Jehova Thuhretute zînga mi a ni a. Mahse, a sakhaw vawn chu mak ka ti ṭhîn hle. Tu nge Jehova? Engvângin nge Thuhretute chuan ni serh bîkte an hman loh? Mike-a chu pâwl hlauhawm takah a inhnamhnawih a ni thei ang em?”—Becky-i, California, U.S.A.
“Kan ṭhenawmte’n Jehova Thuhretute nêna Bible an han zir chuan tihian ka ngaihtuah a; ‘Jehova Thuhretute, tih awmzia chu eng nge ni? Sakhaw hming atân chuan a mak hle mai!’ tiin.”—Zenon-a, Ontario, Canada.
“Biak ina kan inkhâwm loh avângin Jehova Thuhretute chuan min rawn tlawh niin ka nupui nên chuan kan hria a. Kohhran pâwl lian zâwka kan zawn hmuh loh chu Jehova Thuhretute ang pâwl tê leh mak takah chuan hmuh kan inring chuang lo a ni.”—Kent-a, Washington, U.S.A.
“Tute nge an nih a, eng nge an thurin tih pawh ka lo hre ngai lo.”—Cecilie-i, Esbjerg, Denmark.
Thuhretute’n in tinah leh vântlâng hmuna thu an hril lai te, Bible ṭanchhan thu leh hla chhuah an sem lai te, leh a thlâwna Bible zirpui tûra mi an sâwm lai te chu i hmu tawh mai thei a. An zînga tuemaw ber hnên aṭangin he magazine hi i dawng tawh pawh a ni thei bawk. Chuti chung pawhin Jehova Thuhretute hi tute nge an nih chiah, tih i ngaihtuah mai thei a ni. Thusawi kan târ lan tâkte zînga a engemaw ber chu i ṭâwmpui ve ngei a rinawm.
Chutiang zawhnate leh ngaihtuahnate i neih chuan khawiah nge a chhânna i hmuh theih ang? Jehova Thuhretute thurin te, an rawngbâwlna leh an inkhâwmna hmun sum leh paia chhawmdâwl a nih dân te, leh inah leh vântlâng hmuna an biak chhan che chu engtin nge i hriat theih ang?
Atîra kan sawi tâk Cecilie-i chuan: “Jehova Thuhretute chanchin chu Internet-ah ka chhiar nasa hle a. Mite tîtî leh pawngpaw sawi chhiatnate chu ka hria a. Chuvângin, Jehova Thuhretute chungchângah ngaih dân dik lo ka nei ta a ni,” tiin a sawi a. Mahse, a hnuah chuan Jehova Thuhretute chu a bia a, a zawhnate chhânna lungawithlâk tak chu a hmu ta a ni.
Jehova Thuhretute chungchânga i zawhnate chhânna dik tak hmuh chu i duh em? A hre chiang bertu—he magazine tichhuaktu Jehova Thuhretute chu pan tûrin kan fuih a che. (Thufingte 14:15) A dawta thuziakte chuan kan nihna, kan thurin, leh kan hnathawhte hre thiam tûrin a ṭanpui che kan beisei a ni. (wp15-E 09/01)