Chhiartute Zawhna Siam

Tihdamna Zawng Zawng Hi Pathian Hnêna Mi A Ni Em?

Pathian Jehova chuan tihdam theihna a nei tih chu rinhlelh rual a ni lo va. Amah chibai bûktute pawh tihdam theihna a pe thei tih a chiang hle bawk. Entîr nân, tirhkohte hun lai khân, tihdam theihna chu thlarau thianghlim thilpêkte zînga pakhat a ni a. Tirhkoh Paula chuan: “Sâwt tlânna tûrin thlarau hriattîrna chu mi tin hnêna pêk ṭheuh a ni. Mi pakhat hnênah thlarauvah chuan finna thu pêk a ni a; . . . mi dang hnênah thlarau hmunkhatah chuan tihdam theihna thilpêkte pêk a ni a; . . . mi dang hnênah thu hrilh theihna pêk a ni a; . . . mi dang hnênah ṭawng hriat lohte hrilhfiah theihna pêk a ni si a,” tiin a ziak a ni.—1 Korinth 12:4-11.

Amaherawhchu, Korinth mite hnêna chu a lehkha thawn vêkah Paula chuan Pathian thlarau thianghlim thilpêkte chu tihbân a la nih tûr thu a ziak bawk a. Ani chuan: “Thu hrilhnate hi awm mah sela tihbân a la ni ang a, ṭawng hriat lohte hi awm mah sela a la bâng ang a, hriatna hi awm mah sela tihbân a la ni ang,” a ti.—1 Korinth 13:8.

Kum zabi khatnaah khân, Isua Krista leh a tirhkohte chuan mite an tidam ṭhîn a. Chutih hun lai, Kristian kohhran a la thar lai chuan mite tihdam theihna pawh tiamin, thlarau thilpêkte chu Pathian ropui nâna tih a ni a, Jehova’n Kristian kohhran ding tîr a pawmzia leh mal a sâwmzia târ lanna a ni bawk. Mahse, Kristian kohhran a din ngheh hnu chuan, Pathian pawm a nihzia hriatna chu thlarau thilpêk ringawt ni tawh lovin, rinna tihchêt rual loh, beiseina nghet, leh hmangaihna dai ngai lo lantîrnaah a innghat tawh zâwk a ni. (Johana 13:35; 1 Korinth 13:13) Chuvângin, C.E. 100 vêlah khân Pathianin a duhsakna finfiahna atâna mite hnêna tihdam theihna a pêk ṭhin chu a tâwp ta a ni.a

Mahse, ‘Enga ti nge mak taka tihdamna chanchin chu ka la hriat fo si?’ i ti mai thei. Entîr nân, chanchinbu pakhat chuan pa pakhat cancer vei chanchin a ziak a. Chu pa chuan a lû-ah te, a kalah te, leh a ruhahte chuan thil chawr (tumor) a nei a. Pathianin a “biak” hma nî thleng chuan, a hma lam hun chu thim hlein a lang a ni. A hnu ni engemaw zât lekah Pathianin a han biak chuan a cancer chu a dam ta vek mai a, tiin a sawi.

Chutiang chanchinte i hriatin: ‘Chanchin dik tak a ni em? Ziaka chhinchhiah ṭhat, damdawi lam aṭanga finfiahna awm a ni em? Dam anga ngaih pawh lo ni se, mak taka tihdamna zawng zawng chu Pathian hnên aṭanga lo kal a ni tih Bible-in a zirtîr em?’ titein inzâwt ang che.

Chûng zawhnate zînga a tâwp ber chhânna chu a pawimawh zual bîk a. Isua chuan a hnung zuitute chu heti hian a vaukhân a: “Zâwlnei dêrte lakah fimkhur rawh u. . . . Chu mi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam takte kan ti ṭhîn lo vem ni, an la ti ang. Chu mi hunah chuan, ‘Nangni thil sual tite u, ka hre ngai lo va che u, ka hnên ata kal bo rawh u,’ tiin anni chu ka la hrilh ang,” tiin.—Matthaia 7:15, 21-23.

Chûng Bible châng aṭang chuan tihdam theihna an tihte chu Pathian hnên aṭang ni lovin, kawng dang aṭang pawhin a lo kal thei tih a chiang hle a. Pathian hminga tihdamna rawngbâwltu nia inchhâlte buma kan awm loh nân, Pathian hriatna dik kan neih a, Pathian min pêk chhût thiam theihna kan hman a, Pathian duhzâwng titute hriat hran theih dân kan zir chu a ngai a ni.—Matthaia 7:16-19; Johana 17:3; Rom 12:1, 2. (w09 5/1)

[Footnote]