Jehova Thu Chu A Nung
Jakoba leh Petera-te Lehkha Thawn Aṭanga Thu Pawimawh Hrilhfiahna
VANTLANG KUM CHHIAR 33, Pentikost a liam hnu kum 30 tling ṭêpah, zirtîr Jakoba—Isua unaupa—chuan thlarau lam Israel “hnam sâwm leh hnam hnih” te hnênah lehkha a thawn a. (Jak. 1:1) Lehkha a thawn chhan chu, rinna chak tak nei tûr leh fiahna hmachhawn huna chhel tûra fuih nân a ni. Tin, kohhran chhûnga thil duhawm lote siam ṭha tûrin zilhna thu a pe bawk.
Rom Lalber Neroa’n C.E. 64-a tihduhdahna beihpui a thlâk hma lawk khân, tirhkoh Petera chuan Kristiante hnênah a lehkha thawn hmasa chu a ziak a, anni chu rinnaa nghet tlat tûrin a fuih a ni. A hnu lawka a ziak a lehkha thawn pahnihnaah chuan, Petera chuan a unaute chu Pathian thu ngaihsak tûrin a fuih a, Jehova nî lo thleng tûr chungchângah a vaukhân bawk. Dik takin, Jakoba leh Petera-te lehkha thawnte ngaihsak chu kan hlâwkpui thei a ni.—Heb. 4:12.
PATHIANIN ‘RINNA NEIA DILTUTE’ HNENAH FINNA A PE
Jakoba chuan: “Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a,” tiin a ziak a. ‘Rinna neia dîltute’ hnênah chuan, Jehova chuan fiahnate tuar thei tûra an mamawh finna chu a pe ṭhîn.—Jak. 1:5-8, 12.
Kohhran chhûnga ‘zirtîrtute’ pawhin rinna leh finna an mamawh a. Lei hi “taksa pêng te tak tê” mah ni se, “taksa a pumin a tibawlhhlawh” thei tih a sawi hnuah, Jakoba chuan Pathian nêna inlaichînna tichhe thei khawvêl rilru put hmangte lakah vaukhânna thu a sawi a ni. Tin, thlarau lama dam lote tih tûrte pawh a târ lang bawk.—Jak. 3:1, 5, 6; 5:14, 15.
Bible Chungchânga Zawhnate Chhânna:
2:13—Eng kawngin nge ‘khawngaihna hi rorêlna aia a chungnun zâwk’? Pathian hmaa mahni chanchin sawina chungchângah chuan, Pathianin mi dangte chunga khawngaihna kan lantîr dân chu ngaihtuah telin, a Fapa tlanna inthawina zârah ngaihdamna min pe ang. (Rom 14:12) Chu chu khawngaihna kan mize pui ber nihtîr chhan tûr a tling a ni lâwm ni?
4:5—Jakoba chuan khawi lai Pathian Lehkha Thu nge a lâk chhuah? Jakoba thu ziah chu Bible châng khawi emaw lai aṭanga a lâk chhuah a ni lo. Amaherawhchu, he Pathian thâwk khum thute hi Genesis 6:5; 8:21; Thufingte 21:10; leh Galatia 5:17-a târ lan thute ṭanchhanin a ziak a ni thei ang.
5:20—“Mi sual a kawng bona ata hawi kîrtîrtu” chuan thihna ata tunge a chhandam? Mi sual a kawng zawh thlâktîrtu Kristian chuan inlamlêttu chu thlarau lama thihna ata leh chatuana boralna tûr ata a chhandam a. Tin, mi sual ṭanpuitu chuan chu pa “sual tam tak a khuhsak bawk.”
Kan Zir Tûrte:
1:14, 15. Sual hi châkna ṭha lo aṭanga lo awm a ni a. Chuvângin, châkna ṭha lote chu ngaihtuah ngut ngutin kan chhawmnung tûr a ni lo. Chutih ahnêkin, mi siam ṭha thei thilte “ngaihtuah” zêlin, chûng chuan kan rilru leh kan thinlung kan hnawh khat tûr a ni.—Phil. 4:8.
2:8, 9. ‘Thlei bîk neih’ hi hmangaihna “lal dân” kalh a ni. Chuvângin, Kristian dikte chuan thlei bîk an nei lo.
2:14-26. “Rinna avânga . . . chhandam” kan ni a, Mosia Dân emaw, Kristian dân emawa kan “thiltih avâng a ni lo.” Rinna nei tûr chuan Pathian kan rin thu sawi mai a tâwk lo. (Eph. 2:8, 9; Joh. 3:16) Chu chuan Pathian ngaihsakna thiltihte ti tûrin min chêttîr tûr a ni.
3:13-17. “Chung lam aṭanga finna lo chhuak” chu “khawvêl leh taksa châkna leh ramhuaia mi” finna aiin a chungnung zâwk fê! Pathian finna chu ‘ro phûm rûk angin kan zawng’ reng tûr a ni.—Thuf. 2:1-5.
3:18. Lalram chanchin ṭha chu ‘remna siamtute tân remnaa tuh’ a ni. Mi chapo, inhau hmang, a nih loh leh buaina siamtu nih aiin remna siamtu nih zâwk chu a pawimawh hle.
‘RING NGHET TAKIN AWM RAWH’
Petera chuan a unaute chu an “beiseina nung” vâna an rochan tûr chu a hriatnawntîr a. “Nangni zawng chi thlan, lal puithiamho, hnam thianghlim, Pathian mite ngei in ni si a,” tiin a hrilh a ni. Intukluhna chungchânga zilhna thu a pêk hnuah, mi zawng zawngte chu: “Rilru hmun khatin awm ula, inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u,” tiin a fuih a ni.—1 Pet. 1:3, 4; 2:9; 3:8.
Juda kal hmang ‘tâwpna a hnaih tawh’ avângin, Petera chuan unaute chu ‘ṭawngṭai leh rilru fel tak pua fîmkhur’ tûrin a zilh a. Heti hian a hrilh a ni: “Ngaihven ula, fimkhur rawh u . . . Ring nghet taka awmin amah [Setana] chu do rawh u,” tiin.—1 Pet. 4:7; 5:8, 9.
Bible Chungchânga Zawhnate Chhânna:
3:20-22—Engtin nge baptisma channain min chhandam? Baptisma hi chhandamna zawngtute tâna tihmâkmawh a ni a. Amaherawhchu, baptisma channa ringawt chuan min chhandam lo. Chhandamna chu, a nihna takah chuan ‘Isua Krista thawhlehna avânga’ neih theih a ni. Baptisma changtu tûr chuan chhandamna kan neih theih chhan chu tlanna inthawina atâna Isua a thih a, a thawhleh bawk a; tin, “Pathian ding lamah” awmin, mi nung leh mitthite chungah thu neihna a neih vâng a ni tih a ring tlat tûr a ni. Chutiang rinnaa innghat baptisma chu ‘mi pariat tuia chhandama an awmna’ nên a intluk a ni.
4:6—“Chanchin ṭha hrilh” a nihna “mitthite” chu tute nge ni? Anni chu an ‘bawhchhiat leh an sual te avânga thi,’ a nih loh leh chanchin ṭha an hriat hmaa thlarau lama thite an ni. (Eph. 2:1) Mahse, chanchin ṭha an rin hnuah chuan, thlarau lamah an lo ‘nung’ ṭan ta a ni.
Kan Zir Tûrte:
1:7. Kan rinna chu hlu tak ni tûr chuan fiah hnu, a nih loh leh ṭha taka fiah tawh a ni tûr a ni a. Chutiang rinna chak tak chuan ‘nunna a humhim’ tak zet a ni. (Heb. 10:39) Kan rinna fiahna chu kan hnung tawlhsan tûr a ni lo.
1:10-12. Vântirhkohte chuan hriak thih Kristian kohhran chungchânga hmân laia Pathian zâwlneite’n an ziah thlarau lam thu rilte bih chu an duh a. Amaherawhchu, Jehova’n kohhran a dâwr ṭan aṭang chauhvin hêng thilte hi a lo chiang ṭan a ni. (Eph. 3:10, 11) Vântirhkohte thil tih dân ang chu zuiin, “Pathian thu ril” te bih chu kan tum tlat tûr a ni lâwm ni?—1 Kor. 2:10.
2:21. Kan Entawn Tûr, Isua Krista, chu entawnin, Jehova lal chungnunna chawisân nân thih thlenga hrehawm tawrh pawh kan inhuam tûr a ni.
5:6, 7. Kan manganna Jehova chunga kan nghah hian, ani chuan nak tûka thilthleng tûr ngaihtuaha nasa taka lungkham aia kan nuna biakna dik dah pawimawh zêl tûrin min ṭanpui a ni.—Mt. 6:33, 34.
‘JEHOVA NI CHU A LO THLENG ANG’
Petera chuan: “Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn a ni,” tiin a ziak a. Thu hrilh lâwkte ngaihsakna chuan “zirtîrtu derte” leh chhiatna thlen thei mi dangte lakah min vêng thei a ni.—2 Pet. 1:21; 2:1-3.
Petera chuan: “Ni hnuhnûngahte chuan nuihsantute chu . . . an lo kal ang,” tiin a vaukhân a. Mahse, “Lalpa nî chu rûkru angin a lo thleng ngei ang.” Petera chuan a lehkha thawn ziah chu ‘Pathian ni a lo thlen hun tûr beisei leh ṭhahnemngai taka duhtute’ hnêna thurâwn ṭha tak pein a titâwp a ni.—2 Pet. 3:3, 10-12.
Bible Chungchânga Zawhnate Chhânna:
1:19—Tunge “vârparh arsi” chu ni a, eng hunah nge a lo chhuah a; tin, a lo chhuak tih engtin nge kan hriat? “Vârparh arsi” chu Lalram thiltihtheihna nei Isua Krista hi a ni. (Thup. 22:16) Kum 1914 khân, Isua chu Messia Lal angin thil siam zawng zawng hmaah a lo ding chhuak a, chu chuan ni thar lo thleng tûr chu a hril a ni. Hmêl danglamna inlârna chuan Isua ropuina leh Lalram thiltihtheihna a entîr lâwk a, chu chuan Pathian hrilh lâwk thu a rin tlâkzia a târ lang chiang hle. Chu hrilh lâwk thu ngaihsakna chuan kan thinlung a tiêng a, chutiang chuan Vârparh Arsi a lo chhuak tawh tih kan hre thei a ni.
3:17—Petera’n ‘thu hriat lâwk’ tia a sawi khân eng a tihna nge ni? Petera sawi chu amah leh thlarauva thâwk khum Bible ziaktu dangte hnêna pêk nakina thilthleng tûrte hriat lâwkna a ni. Hei hi engkim hriatna a nih loh avângin, chu mi nei Kristian hmasate chuan nakina thilthleng tûr chu chipchiar takin an hriat phah lo. Anni chuan thil lo thleng mai theite riruang chauh an hria a ni.
Kan Zir Tûrte:
1:2, 5-7. Taihmâk rêng rêng chhuaha mize ṭha rinna te, chhelna te, Pathian ngaihsakna te neih tumna chuan ‘Pathian leh kan Lalpa Isua hriatna’ a tihpun bâkah, chu hriatna kawngah “thatchhe lo leh rah lo lovin [min] siam” thei a ni.—2 Pet. 1:8.
1:12-15. ‘Thutaka nghet’ tlat tûr chuan, kohhran inkhâwm te, mi mala Bible zirna neih te, leh Bible chhiarna te aṭanga kan dawn hriattîrna kan mamawh reng a ni.
2:2. Kan nungchangin Jehova leh a inawpna pâwl sawi chhiatna a thlen loh nân kan fîmkhur tûr a ni.—Rom 2:24.
2:4-9. Tûn hmaa a lo tih tawhte ngaihtuahin, Jehova chuan “amah ngaihsaktute chu thlêmna ata chhan chhuah dân leh fel lote chu rorêl ni atân chuan hrem chunga khêk dan a hria” tih kan ring tlat thei a ni.
2:10-13. “Ropuinate” tia koh Kristian upate’n thil tihsual châng nei mah se, anmahni kan sawichhe tûr a ni lo.—Heb. 13:7, 17.
3:2-4, 11, 12. “Zâwlnei thianghlimte thusawi lâwk leh . . . Lalpa leh Chhandamtu thupêk” ngaihsakna chuan Jehova ni a hnaih tawhzia rilrua vawng reng tûrin min ṭanpui ang.
3:11-14. ‘Jehova ni lo thlen hun tûr beisei leh ṭhahnemngai taka duhtute’ kan nih angin, (1) “awm dân thianghlim,” tisa lam, rilru lam, nungchang lam, leh thlarau lama thianghlim tak; (2) ‘Pathian ngaihsakna’ târ langtu thiltih, Lalram thu hrilhna leh zirtîr siamna ang chi thiltih ngah tak; (3) kan nungchang leh mizia chu “bawlhhlawh kai lo,” khawvêlin a tihbawlhhlawh loh; (4) ‘sawisêlbo,’ thil engkim rilru ṭha tak pua tih; leh (5) ‘thlamuang taka awm,’ a nih loh leh Pathian, kan Kristian unaute, leh mi dangte nêna inrem tak kan ni tûr a ni. (w08 11/15)