“Nghah Peihna” I Nei Em?

“Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?”​—2 PETER 3:​11, 12.

1, 2. Jehova ni chungchânga “nghah peihna” neih chu eng anga tehkhin theih nge ni?

TLAI chaw eia an sâwm mikhualte lo thlen hun tûr nghâk reng chhûngkaw pakhat chu han mitthla chhin teh. Lo thleng tûra an intiam hun chu a lo thleng ṭêp tawh a. Chhûngkaw nu ber chuan a ei rawngbâwlte chu fîmkhur takin a endik kual a. Pa ber leh naupangte chuan thil engkim a fel nân an ṭanpui hlawm a. An vaiin an phûr êm êm a ni. A ni, an chhûngin mikhualte lo thlen hun tûr chu an nghâk ṭhap a, an chaw siam tuihnai tak ei leh an inkawmkhâwm hlân chu an nghâkhlel hle a ni.

² Kristian kan nih angin, chu mi aia pawimawh zâwk thil engemaw chu kan nghâk reng a ni. Chu chu eng nge ni? Aw, “Pathian ni” chu a ni, kan nghah ṭheuh chu ni! A lo thlen hma loh zawng, zâwlnei Mika ang kan nih a ngai a ni, ani chuan: “Kei chuan Jehova lam ka en ang a; ka chhandamna Pathian chungah nghah peihna ka lantîr ang,” a ti. (Mika 7:​7, NW) Chu chu engmah ti lova nghâk ringawt tihna a ni em? Ni lo ve. Thawh tûr tam tak a awm a ni.

3. 2 Petera 3:​11, 12 sawi dân aṭangin, eng ang rilru put hmang nge Kristiante chuan an neih ngai?

³ Tirhkoh Petera chuan nghah kan neih laia rilru put hmang dik nei tûrin min ṭanpui a. Ani chuan: “Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?,” a ti. (2 Petera 3:​11, 12) He thu a sawiin, Petera chuan mi eng ang nge nih ngai tih chungchângah rinhlelhna a nei lo tih chhinchhiah ang che. Pathian thâwk khum a lehkha thawn pahnihah hian, Kristiante nih dân tûr chu a ziak vek a. Tin, “awm dân thianghlim leh Pathian ngaihsak” zêl tûrin a fuih bawk a ni. Isua’n “khawvêl tâwpna chhinchhiahna” a pêkna chu kum 30 vêl chuang tawh mah se, Kristiante chu an inthlahdah tûr a ni lo. (Matthaia 24:3) Anni chu Jehova ni lo thlen hun tûr chu “beisei leh ṭhahnemngai taka duhin” an awm tûr a ni.

4. ‘Pathian ni lo thlen hun tûr chu beisei leh ṭhahnemngai taka duhnaah’ hian eng thil nge tel?

⁴ Heta ‘ṭhahnemngai taka duh’ tia lehlin Grik thu mal hi, a ngial a nganin “thlen hmatîr” tihna a ni a. Jehova ni chu kan “thlen hmatîr” tak tak thei lo tih chu a chiang a ni. Tihah chuan, Isua Krista’n a Pa hmêlmate chunga rorêl tûra a lo kal tûr “nî leh a hun chu [kan] hre si lo.” (Matthaia 24:36; 25:13) Lehkhabu pakhat sawifiah dân chuan, “thlen hmatîr” tih lo chhuahna bul thiltih sawina ṭawngkam awmzia chu “‘hmanhmawhtîr’ tihna a ni a, ‘thil engemaw tâna ṭhahnemngai tûr, phusa tûr, ngaihsak tûr’ tihna nên a inkûngkaih hnaih hle a ni.” Ni e, Petera chuan a rinpuite chu Jehova nî lo thleng tûr chu ‘ṭhahnemngai taka duh’ tûrin a fuih a ni. Chu chu an rilrua vawng rengna hmangin an ti thei a. (2 Petera 3:​11, 12) “LALPA ni ropui tak leh râpthlâk tak” a hnaih tawh êm avângin, chutiang rilru put hmang chu kan nei ve tûr a ni.​—Joela 2:31.

‘Awm Dân Thianghlimna’ Nên Nghâk Rawh

5. Engtin nge “Pathian ni” hmuh chu ‘ṭhahnemngai takin kan duh’ tih kan lantîr theih?

⁵ Jehova nia dam khawchhuah chu ‘ṭhahnemngai takin kan duh’ a nih chuan, chu chu kan ‘awm dân thianghlim leh Pathian ngaihsakna’ hmangin kan lantîr ang. “Awm dân thianghlim” tih ṭawngkam chuan Petera fuihna thu: “Fa thuâwihte angin, in hriat loh laia in hmân lai châknate anga awm lovin; a kotu che u a thianghlim angin nangni pawh in chêtzia zawng zawngah lo thianghlim zâwk rawh u; ‘Nangni in thianghlim tûr a ni, kei ka thianghlim si a,’ tih ziak a nih kha,” tih hi min hriat chhuahtîr ngei ang.​—1 Petera 1:​14-16.

6. Thianghlim tûr chuan eng nge kan tih ngai?

⁶ Thianghlim tûr chuan tisa lam, rilru lam, nungchang lam, leh thlarau lamah kan invawngfai tûr a ni a. Jehova hming pu kan nih anga mi mala invawn thianghlimna hmangin “Pathian ni” atân kan inpuahchah em? Chutianga invawn thianghlim chu thil awlsam a ni lo; khawvêl nungchang a tla chhe tawlh tawlh si a. (1 Korinth 7:31; 2 Timothea 3:13) Kan nunchang tehna leh khawvêl mite nungchang chu a inhlat tawlh tawlhin i hria em? A inhlat tawlh tawlh loh chuan, ngaihtuah vat a ngai tihna a ni. Kan nungchang chu khawvêl nungchang aiin sâng zâwk mah se, a tla chhe telh telh a ni thei ang em? Chutiang a nih chuan, Pathian tihlâwm nân kan nungchang siam ṭha tûrin hma kan la tûr a ni.

7, 8. (a) Engtin nge ‘awm dân thianghlima’ awm a pawimawhzia kan hmaih theih? (b) Eng anga insiam ṭhat nge ngai mai thei?

⁷ Internet-a saruak lem hmêlhriattîr ṭanna leh a enna tûr hmun fianrial a remchân êm avângin, tûn hmaa nungchang bawlhhlawhna thil la pawh ngai lote pawhin, “mipat hmeichhiatna lam thil tam tak” an dawn theih tâk thu damdawi lama mi thiam doctor pakhat chuan a sawi. Chutianga Internet site thianghlim lote kan zawng a nih chuan, Bible thupêk: “Thil bawlhhlawh rêng rêng dek suh u,” tih chu kan ngaihthah tihna a ni ngei ang. (Isaia 52:11) “Pathian ni lo thlen hun tûr chu . . . ṭhahnemngai taka duhin” kan awm a ni thei tak zet ang em? Nge, ka rilru chu thu ṭha lovin tibawlhhlawh mah ila, insiam ṭhatna hun a la awm alâwm tia ngaihtuahin, chu mi ni chu kan rilruah kan sawn hla zâwk? He mi chungchângah buaina kan nei a nih chuan, Jehova hnêna ‘thil engmah lo mai mai en lo tûrin kan mit min lâktîr ang che’ tia ngen chu a va hmanhmawhthlâk dâwn êm!​—Sâm 119:37.

⁸ Jehova Thuhretu a pui a pangte zînga a tam zâwkte chuan Pathian nungchang tehna sâng takte chu zâwmin he khawvêla nungchang bawlhhlawh tûra thlêmnate chu an pumpelh a. Kan hun a hmanhmawhthlâkzia leh “Lalpa nî chu rûkru angin a lo thleng ngei ang,” tih Petera vaukhânna thu chu hriain, ‘awm dân thianghlimin’ an awm chho zêl a ni. (2 Petera 3:10) An thiltih chuan “Pathian ni lo thlen hun tûr chu beisei leh ṭhahnemngai taka duhin” an awm tih a târ lang a ni.a

‘Awm Dâna Pathian Ngaihsakna’ Nên Nghâk Rawh

9. Pathian ngaihsakna chuan eng ti tûrin nge min chêttîr ang?

⁹ Jehova ni ṭhahnemngai taka duh tûr chuan ‘awm dâna Pathian ngaihsakna’ pawh a pawimawh êm êm a. ‘Pathian ngaihsaknaah’ chuan a duhzâwng ti tûra min chêttîrtu Pathian zahna pawh a tel a ni. Jehova nêna inzawmna nghet chu Pathian ngaihsakna min neihtîrtu a ni a. Chu chu Pathian duhzâwng a ni, ‘mi zawng zawng chhandama an awm leh thutak an hriat’ chu. (1 Timothea 2:4) Pathianin ‘tuma boral a duh lo va, mi zawng zawng lo sim chu a duh’ a ni. (2 Petera 3:9) Chuti a nih chuan, kan Pathian ngaihsakna chuan mi dangte Jehova chungchâng zir tûr leh amah entawn tûra ṭanpui zual sauh tûrin min tiphusa tûr a ni lâwm ni?​—Ephesi 5:1.

10. Engvângin nge “hausakna bumna” laka kan invên a ngaih?

¹⁰ Pathian Ram kan zawn hmasak chuan kan nun chu awm dâna Pathian ngaihsakna nên a khat tlat ang. (Matthaia 6:33) Pathian ram zawn hmasakah hian khawvêl thil inbûk tâwk taka thlîr pawh a tel a. Isua chuan: “Fîmkhur ula, awhna rêng rêng lakah chuan invêng rawh u; sum ngah hi mihring dam chhan a ni lo ve,” tiin vaukhânna thu a sawi a ni. (Luka 12:15) Tangka sum ngainatna tihbuaia awm chu ngaihruat harsa ti mah ila, “khawvêl lungkhamna leh hausakna bumna chuan” Pathian “thu chu a dîp” thei tih hriat reng a ṭha. (Hawrawp tihâwn chawp; Matthaia 13:22) Ei khawp zawn hmuh chu a harsa mai thei. Chuvângin, khawvêl hmun ṭhenkhata mi tam takte chuan, awlsam zâwka an nun theih nân, chhûngte kalsana ram hausa zâwka kum hnih thum vêl awm hran chu a ngai niin an ngai mai thei. Pathian mi ṭhenkhatte pawhin heti hian an ngaihtuah hlawm a ni. Ram danga an kal avângin, an chhûngte chu nuamsa zâwk leh changkâng zâwkin an dah thei mai thei. Nimahsela, in lama an hmangaihte thlarau lam dinhmun chu engtin nge a lo awm ang? In lama lû nihna ṭha taka kenkawh a nih loh chuan, Jehova nia dam khawchhuah nân thlarau lamah an harhfîm ang em?

11. Engtin nge ram danga hnathawka kal chhuak pa pakhat chuan awm dâna Pathian ngaihsak chu hausakna aiin a pawimawh zâwk tih a târ lan?

¹¹ Philippine ram aṭanga ram danga hnathawka kal chhuak pa pakhat chuan Japan rama Jehova Thuhretute nên Bible an zîr a. Bible-a târ lan chhûngkaw lû mawhphurhnate a han hriat chuan, a chhûngte chu Jehova betu lo ni tûra a ṭanpui a ngai tih a hre ta a. (1 Korinth 11:3) A nupui chuan a rinna chhar thar chu nasa takin a dodâl a, lo kîr leha a chhûngte Bible a zirpui aiin, pawisa thawn reng zâwk tûrin a duh a ni. Nimahsela, hun a tlêm tawh tih a hriatna leh a chhûngte hmakhua a ngaihsakna avângin, in lamah a haw ta a. Dawhthei tak leh hmangaih taka a chhûngte a dâwr avângin malsâwmna a dawng a ni. A hnuah chuan an chhûngkua chu biakna dikah an inpumkhat a, a nupui pawhin hun bikimin rawng a bâwl ta a ni.

12. Engvângin nge thlarau lam thil chu kan nunah kan dah hmasak ang?

¹² Kan dinhmun chu in kâng chhûnga mite nêna khaikhin theih a ni ang. Kan bungraw neihte chhan chhuah tuma tlu chhe mai tawh tûr in kâng chhûnga belebuta tlân kual chu a finthlâk ang em? Chu mi ai chuan, nunna chhanchhuah​—kan nunna leh kan chhûngte nunna leh in luahtu mi dangte nunna chhanchhuah chu a pawimawh hle zâwk lo vang maw? Awle, he khawvêl suaksual hian tlûk chhiat lam a pan chak êm êm a, mite nunna chu a derthâwng a ni. Hei hi hre thiamin, thlarau lam thil kan dah pawimawh hmasa ngei tûr a ni a, nun chhanhimna Lalram thuhrilhna hna chu ṭhahnemngai takin kan thawk bawk tûr a ni.​—1 Timothea 4:16.

“Bawlhhlawh Kai Lo” Kan Nih A Ngai

13. Jehova ni a lo thlen hunah eng ang dinhmuna awm nge kan duh ang?

¹³ Nghah peihna lantîr a pawimawhzia sawi uarin, Petera chuan: “Duh takte u, chutiang thilte chu in beisei avângin bawlhhlawh kai lo leh sawisêlbovin, thlamuang taka in awm [Pathianin] a hmuh theih nân che u, taihmâk chhuah rawh u,” a ti. (2 Petera 3:14) Awm dân thianghlim leh Pathian ngaihsaka awm tûra a fuih bâkah, Petera chuan a tâwpa Jehova mithmuha Isua thisen hlua silfaia kan awm a pawimawhzia a sawi uar a. (Thu Puan 7:​9, 14) Chutiang ni thei tûr chuan, miin Isua tlanna inthawina a rin a ngai a, Jehova hnêna inpumpêka baptisma chang a chhiahhlawh a nih a ngai bawk a ni.

14. “Bawlhhlawh kai lo” tihah hian eng nge tel?

¹⁴ Petera chuan Pathianin ‘bawlhhlawh kai lova’ min hmuh nâna theih tâwp chhuah tûrin min fuih a. Kan kawr, Kristian nungchang leh mizia chu khawvêl bawlhhlawh kai lovin kan dah em? Kan kawra bawlhhlawh kai kan hmuh hian, paih chhuah nghâl vat kan tum ṭhîn. Kan kawr duh ber a nih leh hlek phei chuan, kan tihfainaah kan fîmkhur zual a ni. Kan Kristian kawrah kan mizia emaw, nungchang emawa tlin lohna a awm avânga bawlhhlawh a kai hian, chutiang bawkin kan tifai em?

15. (a) Engvângin nge Israel mite chuan an puan hmâwrah a fêm an siam a ngaih? (b) Engvângin nge tûn lai huna Jehova chhiahhlawhte chu an danglam a, an lansarh bîk?

¹⁵ Israel mite chuan ‘an puan hmâwrah a fêm an siam’ tûr an ni a, ‘a hmâwr tin fêmah a dum pâwl an dah tûr’ a ni. Engvâng nge? Jehova thupêkte an hriat a, an zawm a, an Pathian tâna an “thianghlim theih nân” a ni. (Number 15:​38-40) Tûn lai huna Jehova chhiahhlawhte kan nih a, Pathian dân leh thu bulte kan zawm avângin khawvêl mite lakah kan danglam a, kan langsâr vah mai a ni. Entîr nân, nungchang bawlhhlawh kan pumpelh a, thisen thianghlimna kan zah a, milem biakna chi tinrêngte chu kan pumpelh a ni. (Tirhkohte 15:​28, 29) Bawlhhlawh kai lova awm tlat kan tum avângin mi tam takte zah kan kai bawk.​—Jakoba 1:27.

‘Sawisêlbo’ Kan Nih A Ngai

16. Mahni leh mahni ‘sawisêlbova’ insiamnaah eng nge tel?

¹⁶ Petera chuan Pathianin “sawisêlbovin” kan awm tih a hmu tûr a ni tih a sawi bawk. Chu chu engtin nge a theih? Bawlhhlawh chu a tlângpui thuin hrûkfai theih emaw, sûkfai theih emaw a ni a; mahse, sawisêl tûr awmna emaw, hmêlhemna emaw chu hrûkfai theih leh sûkfai theih a ni lo. Hmêlhemna chuan a chhûngrilah engemaw dik lo a awm a ni tih a târ lang a ni. Tirhkoh Paula chuan Philippi khuaa a Kristianpuite chu: “Chhuan bengtla lo leh tihmawhte zînga sual nei lo leh nuntlang, Pathian fa sawisêlbote in nih theihna tûrin phunnawina leh inhnialnate awm lovin engkim ti rawh u, chûngho zîngah chuan nunna thu hlânin khawvêlah hian tiêngtu angin in lang ṭhîn,” tiin a fuih a ni. (Philippi 2:​14-16) Chu fuihna thu kan zawm chuan, phunnawina leh inhnialna kan pumpelh ang a, rilru thianghlimin Pathian rawng kan bâwl ang. “He ram chanchin ṭha” kan hrilh hian, Jehova leh ṭhenawmte hmangaihnaa chêttîrin kan awm ang. (Matthaia 22:​35-40; 24:14) Chu bâkah, mi hnâwlpuite hian mahni hun leh tha leh zung pea mi dangte Pathian chanchin leh a Thu, Bible kan zirtîr chhan hre lo mah se, chanchin ṭha chu kan hril zêl ang.

17. Kristian kohhrana rawngbâwlna chanvo hlu kan chan hian, min turtu ber chu eng nge kan nihtîr ang?

¹⁷ Pathianin ‘sawisêlbova’ min hmuh kan duh avângin, kan thiltih apiangah min turtu ber chu kan endik tûr a ni. Mahni hmasialna avânga khawvêl thiltih, hausak emaw, thuneihna emaw ang chite ûm chu kan kalsan tawh a. Kristian kohhrana rawngbâwlna chanvo hlu kan chang a nih pawhin, min turtu ber chu thianghlim reng sela, Jehova leh mi dangte hmangaihnaa chêttîrin i awm reng ang u. ‘Kohhran hotua ṭang’ thlarau lama mi puitlingte’n lâwm tak leh inngaitlâwm taka Jehova leh an rinpuite rawng an bâwlsak hmuh chu a hahdamthlâk hle a ni. (1 Timothea 3:1; 2 Korinth 1:24) Dik takin, upa nihtlingte chuan “Pathian pâwlho awm chu . . . châk chung zâwkin, hlêpna bawlhhlawh duh vâng ni hek lovin, rilrua duh tak zâwkin, [Pathian] chante chungah intilal hek lovin, pâwlho entawnan insiam zâwkin” an ho a ni.​—1 Petera 5:​1-4.

“Thlamuang Taka” Kan Awm A Ngai

18. Eng miziate hmang hian nge Jehova Thuhretute chuan hriat an hlawh?

¹⁸ A tâwpah chuan Petera chuan Pathianin “thlamuang taka” kan awm lai a hmu tûr a ni tih a sawi a. Thlamuang taka awm tûr chuan, Jehova leh kan ṭhenawmte nêna kan inrem a ngai a ni. Petera chuan “inhmangaih tawn uar” leh kan Kristianpuite nêna inrem a pawimawhzia a sawi uar a. (1 Petera 2:17; 3:​10, 11; 4:8; 2 Petera 1:​5-7) Kan inremna vawng reng tûr chuan, kan inhmangaih tawn tûr a ni. (Johana 13:​34, 35; Ephesi 4:​1, 2) Kan inhmangaihna leh inremna chu a bîk takin khawvêl pum huap inkhâwmpui neihnaah hian a lang zual ṭhîn. Kum 1999, Costa Rica rama inkhâwmpui pakhatah chuan, ram dang aṭanga palai lo thlengte hmuaktu tualchhûng Thuhretute’n a dâwr an hliah palh avângin, thlawhna ṭum hmuna thil zuar pa pakhat chu a lâwm lo hle a. Nimahsela, a ni hnih nîah chuan, tualchhûng Thuhretute’n an palai lo thlengte chu a mi malin hre hlawm lo mah se, phûr taka an lo hmuahnaa hmangaihna leh inremna awm chu a lo hmu a. A tâwp nîah chuan, thil zuartupa pawhin a hmuahpui ve a, Bible zirna neihpui tûrin a ngên a ni.

19. Engvângin nge Pathian kan biakpuite nêna remna ûm chu thil pawimawh tak a nih?

¹⁹ Kan thlarau lam unaute nêna remna tih tak zeta kan ûmna chuan, Jehova nî leh a tiam khawvêl thar kan nghahna chungah nghawng a nei ngei ang. (Sâm 37:11; 2 Petera 3:13) Kan unau tuemaw nên inrem thei chiah lo ni ta ila. Ani nêna Paradis-a inrem taka khawsak tlân chu kan ngaihtuah thei em? Unau tuemawin kan lakah lungnih lohna a neih chuan, ‘ani nên remna kan siam’ nghâl vat tûr a ni. (Matthaia 5:​23, 24) Jehova nêna kan inrem theih nân chutianga tih chu a pawimawh a ni.​—Sâm 35:27; 1 Johana 4:20.

20. “Nghah peihna” chu eng anga târ lan tûr nge ni?

²⁰ A mi malin, “Pathian ni lo thlen hun tûr chu beisei leh ṭhahnemngai taka duhin” kan nghâk em? Suahsualna tâwp hun hmuh kan châkzia chu, he nungchang bawlhhlawhna khawvêla thianghlim taka awmna hian a târ lang a ni. Chu bâkah, Jehova ni lo thlen hun kan nghahhlelhzia leh Lalram awpna hnuaia nun kan châk nasatzia chu tûna kan awm dâna Pathian ngaihsakna hian a hril bawk. Remna khawvêl thara nun kan inbeiseina chu Pathian kan biakpuite nêna tûn ngeia remna kan ûmna hian a târ lang bawk a ni. Chutiang hmang chuan, “nghah peihna” kan neihzia leh ‘Jehova ni lo thlen hun tûr ṭhahnemngai taka kan duhzia’ kan târ lang a ni. (w03 7/15)

[Footnote]

I Hre Chhuak Em?

• ‘Jehova ni lo thlen hun tûr ṭhahnemngai taka duh’ tih chu eng tihna nge?

• Engtin nge “nghah peihna” chu kan awm dân nêna târ lan a nih?

• Engvângin nge ‘awm dâna Pathian ngaihsak’ chu thil pawimawh tak a nih?

• Jehova’n “bawlhhlawh kai lo leh sawisêlbovin, thlamuang taka” min hmuh nân eng nge kan tih ang?

[Phêk 21-naa milem]

“Nghah peihna” chu awm dân thianghlima târ lan a ni

[Phêk 22-naa milem]

Lalram thuhrilhna chu nun chhanhimna a ni

[Phêk 24-naa milem]

Jehova ni kan nghah pahin, mi dangte nên inrem i tum zêl ang u