“Indo Zawng Zawng Titâwptu Tûr Indona”

‘Hei hi indona hnuhnûng ber​—indo zawng zawng titâwptu tûr indona​—a ni ang tih ka tiam a che u.’ ​—WOODROW WILSON, U.S. PRESIDENT (1913-21).

HENG hi kum 90 vêl kal taa Khawvêl Indopui I-na tâwpa khawvêl hruaitute zînga pakhat neih beiseina sâng tak a ni a. Chu khawvêl indona chu a râpthlâk êm avângin, a hnehtute chuan an inpêkna nasa takin hlâwkna tluantling a thlen chu an duhin​—thlen dâwn nia an hriat pawh a ngai bawk a ni. Mahse, mihringte indona chuan zung kaih thûk tawh tak indona tihven chu sawi loh harsatnate pawh a tiveng ngai meuh lo.

President Wilson-a’n ngaihtuah chiang mang lo va chu thu a tiam hnu kum 20 vêlah chuan indopui pahnihna chu a inṭan leh a. Chu chuan a hmaa mi aiin thihna leh chhiatna a thlen nasa zâwk a ni. Kum sawm hnih chhûnga khawl lama thiamna hmasâwnna chuan mihringte chu a ruala mi tam tak that thiam zâwkah a chhuah a. Indopui pahnihna a han tâwp chuan khawvêl hruaitute chuan tûn hma zawng aiin indona thleng thei dinhmunah kan ding nasa lehzual tih an hria a ni.

Kum 1945 khân, U.S. General Douglas MacArthur-a chuan heti hian a puang chhuak a ni: “Hun remchâng hnuhnûng ber kan neih chu kan hmang zo ta. Kalhmang ṭha zâwk kan duan chhuah loh chuan Armageddon a lo thleng mai ang,” tiin.

General MacArthur-a chuan indopui pahnihna tâwp lama atom bomb pahnihin Nagasaki leh Hiroshima a tihchhiatzia chu a hria a. Chu Japan rama khawpui pahnih tihchhiatna râpthlâk tak chuan “Armageddon” tih thu mal chu leia mihring zawng zawngte tâwpna thlentu tûr nuclear hmanga tihchimihna tih awmze thar neiin a hmantîr ta a ni.

Nuclear hmanga tihchimihna a thlen hlauhnain mihringte chu a la chîmbuai reng a. Kum 1960 chho bâwr vêlah khân khawvêla ram thiltithei ber berte chuan “intih boral tawn ngei ngeina” an tih râlrêl dân chu an duang chhuak a ni. Tupawhin indona chu ṭan se, hmêlma rama tualchhûng mi hmun lia ṭhena hmun khat leh an thil siam chhuahna a chanve zet tihchhiat ngei ngei theih nâna missile leh a kah chhuahna ṭhahnem tâwk tak neih chu an thil tum ber a ni a. Khawvêl remna humhalh nâna hetiang râlrêl dân thlamuanpuitu hi an awm mang meuh lo.

Tûn laiah hian, nuclear râlthuam a pung tial tial a, khawvêl indopui ni lo indona dangte chuan a zât chiah hriat loh mi tam takte nun chu a la reng a ni. Nuclear indona chhuak mai thei tûr dinhmun chuan mihringte chu a la tithlabâr reng a. Mite’n indo tâwpna chu hmu châk hle mah se, indona emaw, râlrêl dân dang emaw hmanga indona tihtâwp a nih ringtu an awm meuh lo.

Amaherawhchu, Bible chuan indo zawng zawng titâwptu tûr indona danglam bîk tak chungchâng a sawi a. Chu indona chu mite’n nuclear râlthuama tihchimihna nêna an thlunzawm fo, “Armageddon” indona hi a ni. Engtin nge Armageddon chuan indona a tihtâwp tak zet theih ang? A dawta thuziak chuan he zawhna hi a chhâng ang. (w08 4/1)

[Phêk 3-naa Thlalâk Hawhtîrtu]

DTRA Photo