Jehova Thu Chu A Nung
Malakia Bu Aṭanga Thu Pawimawh Hrilhfiahna
JERUSALEMA biak in sak ṭhat leh pawh chu kum 70 aia tam a ding tawh a. Amaherawhchu, hun a han ral zêl chuan Judate thlarau lam nun chu a chau ta hle a ni. Puithiamte ngei pawh chuan thil dik lo an ti a. Tuin nge an dinhmun dik tak chu hriattîr ang a, thlarau lama ṭhat chhuahtîr ang le? Jehova’n chu hna thawh tûr chu zâwlnei Malakia hnênah a pe a ni.
Malakia’n mite hneh thei tak tûra a ziah Hebrai Pathian Lehkha Thu hnuhnûng ber hi Pathian thâwk khum hrilh lâwkna a ni. Malakia hrilh lâwkna thu ngaihvenna chuan he khawvêl suaksual a tâwpna tûr ‘LALPA ni ropui leh râpthlâk tak’ lo thleng tûr atâna inbuatsaih tûrin min ṭanpui thei a ni.—Malakia 4:5.
PUITHIAMTE CHUAN “MI TAM TAK AN PETEKTIR”
(Malakia 1:1–2:17)
Jehova chuan Israelte laka a rilru put hmang chu: “Ka hmangaih che u a ni,” tia sawiin a tilang a. Mahse puithiamte chuan Pathian hming an hmusit a ni. Engtin nge? ‘A maichâmah chhang bawlhhlawh hlânin’ leh ‘inthawi nâna ran kebai leh a silawng hlânin’ Pathian hming an hmusit a ni.—Malakia 1:2, 6-8.
Puithiamte chuan ‘dânah chuan mi tam tak an petektîr a.’ Mipuite pawh “unau leh unau an inbum ṭhîn.” Ṭhenkhatte chuan hnam dang mi nupuiah an nei a. Mi dangte chuan “[an] nupui tawntirhte” chu an bum a ni.—Malakia 2:8, 10, 11, 14-16.
Bible Chungchânga Zawhnate Chhânna:
2:2—Eng kawngin nge Jehova’n puithiam luhlul takte ‘malsâwmna chu ânchhia a lawh?’ Pathianin chutiang puithiamte malsâwmna chu ânchhiaah a chantîr a ni.
2:3—Puithiamte hmaia “êk tât pherh” tih chu eng tihna nge ni? Dân ang chuan inthâwina ran êk chu dai pâwna paih a, hâl tûr a ni. (Leviticus 16:27) Puithiam hmaia êk tât tih awmzia chu Jehova’n an inthâwina hlan chu a pawm lo va, chûng inthawina hlântute chu hmuhsitawm tak an ni tihna a ni.
2:13—Jehova maichâm chu tute mittuiin nge chhilh? Hêng mittuite hi biak in hung chhûnga rawn kal a, Jehova hmaa ṭawngṭaitu nuhote mittui a ni. Engin nge chutiang khawpa lungngaihtîr? Juda mi an pasalte chuan thiang lo takin anni chu an ma a, chu chu hnam dang mi la naupang zâwkte an neih theihna tûra ti an nih a rinawm.
Kan Zir Tûrte:
1:10. Jehova chuan puithiam duhâm tak, kawngka khâr emaw, maichâma mei tihalh emaw an hnathawh ho tê tê atâna man chhiartute thil hlanah chuan lâwmna rêng a nei lo. Kristian rawngbâwlnaa kan thiltihte pawh huam telin, kan Pathian biakna thiltih apiang chu sum hmuh nân ni lo va, mahni hmasialna tel hauh lova Pathian leh ṭhenawmte hmangaihna avânga tih a nih chu a va pawimawh tak êm!—Matthaia 22:37-39; 2 Korinth 11:7.
1:14; 2:17. Jehova chuan vervêkna a ngai thei lo.
2:7-9. Kohhrana zirtîrna chanvo hlu pêkte chuan an thil zirtîrte chu Pathian Thu, Pathian Lehkhabu Thianghlim leh “bawi rinawm, fing tak” pêk chhuah Bible ṭanchhan thu leh hlate nên a inmil a ni tih an chian tûr a ni.—Luka 12:42; Jakoba 3:11.
2:10, 11. Jehova chuan amah betute chu “Lalpaa awm mi” chauh nupui pasala nei tûra a zilhna chu la thutak hle tûrin a beisei.—1 Korinth 7:39.
2:15, 16. Betu dik takte chuan an nupui tawntirhte nêna an inneihna thuthlung chu an zah hle tûr a ni.
‘LALPA CHU A BIAK INAH A LO KAL ANG’
(Malakia 3:1–4:6)
“Thuthlung tirhkoh,” Isua Krista nên chuan “Lalpa [Pathian Jehova] chu a biak inah a lo kal phut ang.” Pathian chuan a mite chu “rorêl tûrin [a] rawn hnaih dâwn a,” thil sual titute zawng zawng chungah chuan thuhretu ṭuanṭha tak a ni ang. Chu bâkah, “hriat rengna lehkhabu” chu Jehova ṭihtute tân ziak a ni ang.—Malakia 3:1, 3, 5, 16.
‘Rawhtuina mei anga kâng’ nî chu a lo thleng ang a, mi suaksual zawng zawngte chu a kâng ral ang. Chu mi nî a lo thlen hmain, zâwlnei chu ‘pa leh fate inkâra inrem lehna thlentîr’ tûra tirh a ni ang.—Malakia 4:1, 5, 6.
Bible Chungchânga Zawhnate Chhânna:
3:1-3—Engtik khân nge “Lalpa” leh ‘thuthlung tirhkoh’ chu biak inah an rawn kal a, tunge an hmaa tirha chu? Nisan ni 10, C.E. 33 khân Jehova chuan a aiawh tîrin a biak in a rawn tlawh a, a thianfai a ni. Chu chu Isua biak ina a luh a, chuta thil lei leh zuartute a hnawh chhuah lai kha a ni. (Marka 11:15) Chu chu Lal ni tûra Ruat a nih hnu kum thum leh a chanveah a thleng a. Chutiang chiah chuan vâna Lala siam a nih hnu kum thum leh a chanveah Jehova nên thlarau lam biak in chu an tlawh a, Pathian mite chu thenfai an ngai tih a hmu a ni. Kum zabi khatnaah khân baptistu Johana chu Isua Krista kawng sial tûra tirh a ni a. Tûn lai hunah hian, thlarau lam biak ina Jehova lo kalna tûr kawng sial tûrin tirhkoh pakhat tirh chhuah a ni. Kum 1880 chho bâwr vêl ata tawh khân, Bible zirlai rualte chu rilru ṭha pute thinlunga Bible thutak tuh tûrin Bible zirtîrnaah an inhmang ṭan tawh a ni.
3:10—“Sâwma pakhat zawng zawng” pêkna chuan kan neih zawng zawng Jehova hnêna pêkna a entîr em? Mosia Dân chu Isua thihna hmanga thai bo a ni a, chuvângin sum leh pai lama sâwma pakhat pêk chu phût a ni tawh lo. Mahse, sâwma pakhat pêk chuan entîr a nei a. (Ephesi 2:15) Chu chuan kan neih zawng zawng pêkna a entîr lo. Sâwma pakhat chu kum tina pêk a nih laiin, Jehova hnênah kan neih zawng zawng chu vawikhat chauh kan pe thung a—chu chu a hnêna kan inpumpêkin leh kan inpumpêkna entîr nâna tuia baptisma changin kan ti a ni. Chu mi nî aṭang chuan, kan neih zawng zawng chu Jehova ta a ni ta vek a. Chutichung chuan, kan neih zînga a ṭhen a zâr—entir nei sâwma pakhat—chu a rawngbâwl nâna kan hman min phalsak a ni. Chu chu kan dinhmun leh kan thinlungin min tur dân ang zêla pêk a ni a. Jehova hnêna kan thil hlanah chuan hun te, tha leh zung te, leh Lalram thu hrilh leh zirtîr siam nâna sum leh paite a tel a ni. Tin, Kristian inkhâwmnaa tel te, dam lo te leh rinpui tarte kan te, biakna dik atâna sum leh paia ṭanpuina te a tel bawk.
4:3—Eng kawngin nge Jehova betute chuan ‘mi suaksualte an rah beh ang?’ Leia Pathian mite chuan ‘mi suaksualte’ chunga rorêlnaah telin a hring a hrânin anni chu an ‘rap bet’ lo vang. Hei hian leia Jehova chhiahhlawhte chu Setana khawvêl tâwp hnua hnehna lawmnaah chuan telin mi suaksualte an rap bet dâwn tih a entîr zâwk a ni.—Sâm 145:20; Thu Puan 20:1-3.
4:4—Engvângin nge ‘Mosia dân chu kan hriat reng’ ang? Kristiante chu Mosia Dân chuan a phuar tawh lo va; mahse, chu chu ‘thil ṭha, lo awm tûrte anpui,’ a nih loh leh hlimthla a ni. (Hebrai 10:1) Chuvângin, Mosia Dân ngaihsakna chuan chu dâna thu inziakte a thlen famkim dân hmu tûrin min ṭanpui thei a ni. (Luka 24:44, 45) Chu bâkah, Dân chuan ‘vâna thil awm angte’ pawh a sawi tel a. Kristian zirtîrna leh nungchangte hre thiam tûr chuan Dân thu zir chu a pawimawh a ni.—Hebrai 9:23.
4:5, 6—Tunge “zâwlnei Elija” chuan a entîr? “Elija” chuan mite thinlung buatsaihna, dinthar lehna hna chu a rawn thawk dâwn tih sawi lâwk a ni a. C.E. kum zabi khatnaah khân, Isua Krista chuan Baptistu Johana chu sawi lâwk “Elija” a nih thu a sawi. (Matthaia 11:12-14; Marka 9:11-13) Tûn lai huna chu zâwlnei tlukpui chu “LALPA ni ropui leh râpthlâk tak a lo thlen hmâin” tirh chhuah a ni. Tûn lai huna Elija chu tudang ni lovin, “bawi rinawm, fing tak” hi a ni a. (Matthaia 24:45) He hriak thih Kristian pâwl hian thlarau lam dinthar lehna hna chu taima takin an thawk a ni.
Kan Zir Tûrte:
3:10. Jehova hnêna kan thil neih ṭha ber pêk loh chu a malsâwmna inchântîrna a ni.
3:14, 15. Puithiamte’n entawn tûr ṭha lo tak an siam avângin Judate chuan Pathian rawngbâwl chu thil holam takah an ngaih phah ṭan a. Kristian kohhrana chanvo pawimawh chelhtute chu entawn tlâk an ni tûr a ni.—1 Petera 5:1-3.
3:16. Jehova chuan amah ṭihtute leh a laka rinawmte chu a chhinchhiah a. Anni chu a hre reng a, Setana khawvêl suaksual a tihtâwp hunah a zuah ang. Chuvângin, Pathian laka kan rinawmna vawn chu i tum tlat reng ang u.—Joba 27:5.
4:1. Jehova hnêna chanchin sawina nîah chuan “zâr” leh “zung” chuan rorêlna thuhmun an tuar ang—naupangte pawhin an nu leh pate tawrh ang chiah rorêlna chu an tuar dâwn a ni. Nu leh pate’n an fa naupangte chunga an mawhphurhna neih chu a va han lian tak êm! Kristian nu leh pate chuan Pathian pawm ni thei tûr leh a laka dinhmun ṭha tak nei reng tûrin an thawk rim hle tûr a ni.—1 Korinth 7:14.
‘Pathian Ṭih Rawh’
‘LALPA ni ropui leh râpthlâk takah’ chuan tute nge chhandam ni ang? (Malakia 4:5) Jehova chuan: “Nangni ka hming ṭihtute tân erawh chuan felna, a thlaa tihdamna nên a lo chhuak ang a, in kal chhuak ang a, bâwng note hrên lai thaukhawh angin in tualchai ang,” tiin a sawi a ni.—Malakia 4:2.
“Felna nî,” Isua Krista chu Pathian ṭihna dik neitute chungah a êng chhuak a, anni chuan Jehova duhsak an hlawh a ni. (Johana 8:12) An tân chuan “a thlaah tihdamna”—tûna thlarau lama tihdamna leh Pathian khawvêl thara taksa lam, rilru lam, leh ngaihtuahna lama tihdamna famkim chu a awm bawk ang. (Thu Puan 22:1, 2) “Bawng note hrên lai thaukhawh angin” an phûrin an hlim ang. Chutiang malsâwmnate chu thlîrin, Lal Solomona fuihna thu: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tih chu kan thinlungah i vawng tlat ang u.—Thuhriltu 12:13.
[Phêk 28-naa milem]
Zâwlnei Malakia, Pathian chhiahhlawh ṭhahnemngai tak leh inpe tak mai chu
[Phêk 31-naa milem]
Kan thu zirtîr chu Bible nên a inmil tûr a ni
[Phêk 31-naa milem]
Jehova chhiahhlawhte chuan an inneihna thuthlung an zah hle