“I Thilpek Hlu Tak Mai”

CHU chu Belgium rama prime minister hlui pakhatin Isua Krista chanchin ziakna The Greatest Man Who Ever Lived, tih lehkhabu chungchâng a sawina a ni.a A ṭhenawm pakhat chuan ṭhian ṭha tlawhin a va tlawh a, ani chuan lehkhabu chu a lo dawng a ni. A hnuah chuan lâwmthu sawina lehkha a thawn a: “Ṭhian ṭha tlawha min rawn tlawhna khân ka rilru a khawih hle mai a, i thilpêk hlu tak mai, ‘Mi Ropui Ber’ chanchin ziakna lehkhabu chuan ka rilru a khawih lehzual a ni,” tiin a ziak a ni.

Prime minister hlui chuan lehkhabu chu chîk taka a chhiar hnuah, heti hian thu tâwp a siam a: “Mite hian Chanchin Ṭha ziaka thuchahte hi ngaihsak zâwkin, Isua Krista sawi thu bulte hi nunpui se la chuan, tûn lai khawvêl hi a danglam ngei ang. Chutiang a nih chuan Security Council kan mamawh lo ang a; fîrfiaka chêtna a awm hek lo vang; tin, khawvêlah hian tharumthawhna hi khapbeh a ni ang,” tiin. Ani chuan hei hi duhthusâm mangphanna mai a ang tih pawm mah se, a ṭhenawmin a va tlawhna chu a ngaihsân thu a sawi lang a ni.

Lehkha thawn chu heti hian a chhun zawm a: “Rilru ṭha pu mi fakawm takte zînga mi in ni, nangni chuan nakin hun a ṭhat lutuk in beisei lo va, a chhiat viau lah in beisei hek lo, mihring leh thilte a lo ṭhat zâwk tial tial ringtute in ni,” tiin.

Jehova Thuhretute chuan a tâwpah chuan mihring beihna aṭang ni lovin, Pathian inrawlhna aṭangin khawvêl ṭha zâwk a lo thleng dâwn tih an ring a. Mi ropui ber, Isua Krista chu entawn a tum a ni. Jehova Thuhretute’n tûn hnaiah an tlawh che em? Nung dam tawh zînga mi ropui ber chungchâng anmahni titipui chu nuam i ti viau mai thei a nia. Tin, anni chuan prime minister hlui rilru khawih êm êmtu, chu lehkhabu chu lâwm takin an pe thei ang che.

[Footnote]