Inngaihtlâwmna Dik Tak Nei Rawh
“Hrehawm tuar [“inngaitlâwm,” New World Translation] mite chu i chhandam ang.”—2 SAMUELA 22:28.
1, 2. Khawvêl rorêltu tam takte’n inanna eng nge an neih?
AIGUPTA lal thlânte (pyramid) chuan hmân laia an lalte chungchâng chu a finfiah a. Mi dang lâr tak takte chu Assuria lal Sennakeriba te, Grik lal Alexander Ropuia te, leh Rom lal Julia Kaisara te an ni. Hêng lal zawng zawngte hian inanna pakhat an nei a. Chu chu inngaihtlâwmna dik tak sawi tûr an hnutchhiah lo hi a ni.—Matthaia 20:25, 26.
2 A chunga târ lan tâk lalte’n an rama mi rethei an khua leh tui thlamuanna mamawh tak zette an zawn chhuah chu i ngaihruat thei em? Thei lo ve! Hnehchhiaha awmte chênna in tlâwm taka kalin, anmahni an hnem chu i ngaihruat thei bawk hek lo vang. Thil siam mihring tlâwm takte chunga an rilru put hmang chu Rorêltu Chungnungber, Pathian Jehova rilru put hmang nên chuan a va inthlau tak êm!
Inngaihtlâwmna Kawnga Entawn Tûr Ropuiber
3. Engtin nge Rorêltu Chungnungber chuan a khua leh tui mihringte chu a cheibâwl?
3 Jehova ropuina leh a sânzia chu chhui theih rual ni lo mah se, “a lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni.” (2 Chronicles 16:9) Jehova’n fiahna chi hrang hrang an tawh avânga rilru hrehawm chibai bûktu tlâwm takte a hmuhin eng nge a tih? A nihna takah chuan, “mi thuhnuairawlhte rilru tiharh tûr leh inchhîr ngawih ngawihte thinlung tiharh tûrin,” chûng mite hnênah chuan a thlarau thianghlim hmangin a “awm” a ni. (Isaia 57:15) Chuvângin, tihharha awm chibai bûktute chu hlim taka a rawngbâwl tûrin an inthuam lehzual a ni. Pathian tân inngaihtlâwmna a va ni tak êm!
4, 5. (a) Engtin nge fakna hla phuahtu chuan Pathian rorêl dân chungchâng chu a ngaih? (b) “Inchhîr ngawih ngawihte” ṭanpui tûra Pathian a ‘intihnuai’ tih chu eng tihna nge?
4 Sual nei mihringte ṭanpui tûrin lei leh vâna tumah hi Lal Chungnungber tluka inngaitlâwm an awm lo. Fakna hla phuahtu chuan: “LALPA chu hnam tinrêngte chungah chuan chungnung daih a ni a, a ropuina chuan vânte khi a khûm daih a ni. LALPA kan Pathian, chung lama ṭhutphah neia, vâna thil awmte leh leia thil awmte en tûra intihnuai ṭhîna ang hi, tunge awm? Ani chuan rethei chu vaivut ata a kai tho ṭhîn a, pachhia chu êkdûr ata a chawi kâng ṭhîn,” tiin a ziak thei a ni.—Sâm 113:4-7.
5 Pathian Jehova chu sawisêl bo leh thianghlim a nih avângin, “chapona” lakah a fihlîm a ni. (Marka 7:22, 23) “Intihnuai” tih hian mi nihna sâng emaw, ropui emawin mi hnuaihnung zâwk a dâwr huna a tlukpuia a insiamna emaw, a intihhniamna emaw a kâwk a ni. Chuvângin, Bible ṭhenkhat chuan Sâm 113:6 hi Pathian ngei inngaitlâwm angin a letling a ni. Hei hian amah betu mihring ṭha famkim lote mamawh hmangaih taka ngaihsaktu kan Pathian inngaihtlâwmna chu a va phawk chiang tak êm!—2 Samuela 22:36.
Isua Inngaihtlâwm Chhan
6. Jehova inngaihtlâwmna thiltih ropui ber chu eng nge ni?
6 Pathian inngaihtlâwmna leh hmangaihna thiltih ropui ber chu, a hmangaih tak a Fapa mal neih chhun mihringte chhandam nâna leia lo pianga, mihring anga lo ṭhang lian tûra a rawn tirh hi a ni. (Johana 3:16) Isua chuan a Pa vâna mi chungchâng thutak min zirtîr a; tichuan, “khawvêl sual” la kiang tûrin a mihring nun ṭha famkim chu a pe a ni. (Johana 1:29; 18:37) Inngaihtlâwmna pawh tiama a Pa Jehova chu famkim taka entawnin, Isua chuan Pathian thil ngen chu tihhlawhtlinsak a inhuam a ni. Chu chu Pathian thil siamte lantîr tawh zawng zawng zînga inngaihtlâwmna leh hmangaihna entawn tûr ropuiber chu a ni. Isua inngaihtlâwmna chu mi zawng zawngin an hlut lo va, a hmêlmate chuan amah chu ‘mi hnuaihnung ber’ angah an dah hial a ni. (Daniela 4:17) Nimahsela, tirhkoh Paula chuan a rinpuite’n Isua inngaihtlâwmna chu entawnin, an indâwr tawnnaah an inngaitlâwm tawn tûr a ni tih a hria a. (1 Korinth 11:1; Philippi 2:3, 4) Isua entîrna langsâr tak chu sawiin, heti hian a ziak a ni:
7, 8. (a) Engtin nge Isua’n inngaihtlâwmna a zir? (b) A zirtîr lo ni tûrte hnênah Isua’n ngenna eng nge a siam?
7 “He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a. Tin, mihring anga lo awmin, a inngaitlâwm a, thi khawp hiala thu zâwmin a lo awm ta a, kraws-a [“nghaisakna bana,” NW] thihna ngei chu.”—Philippi 2:5-8.
8 Ṭhenkhat chuan, ‘Engtin nge Isua’n inngaihtlâwmna a zir?’ tiin an ngaihtuah mai thei a. Inngaihtlâwmna chu thil zawng zawng siamnaa Pathian “mi themthiam” anga a thawh lai, a Pa vâna mi nêna kum chhiar sên loh khawpa tam inṭhianna a neihna aṭanga lo awm a ni. (Thufingte 8:30) Eden huana helna a awm hnu aṭang khân, Pathian Fatîr chuan a Pa-in sual nei mihringte inngaitlâwm taka a dâwr dân chu a hmu a. Chutiang bawkin, Isua chuan leia a awm lai khân a Pa inngaihtlâwmna chu lantîrin, ngenna a siam a ni: “Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang,” tiin.—Matthaia 11:29; Johana 14:9.
9. (a) Isua’n naupangte mizia eng hi nge a duh? (b) Naupang pakhat hmangin, eng thu nge Isua’n a zirtîr?
9 Isua chu a inngaihtlâwm tak zet avângin, naupangte pawhin an hlau lo. Amah chu an ngaina zâwk mah a. Ani chuan naupangte a duhzia a lantîr a, anni chu a ngaihsak a ni. (Marka 10:13-16) Isua’n naupangte mizia eng hi nge a duh? Chiang takin, naupangte chuan a zirtîr puitling ṭhenkhatin an lantîr reng loh mize duhawm takte chu an nei a. Naupangte chuan puitlingte chu chungnung zâwk angin an thlîr tih chu hriatsa a ni a. Chu chu zawhna tam tak an zawhte aṭangin i hre thei a ni. Ni e, puitling tam takte nêna khaikhin chuan, naupangte chu zirtîr theih an nih zâwk bâkah, an inchhuang lo tlângpui zâwk a ni. Ṭum khat phei chu, Isua’n naupang pakhat chu thlang chhuakin, A hnungzuitute hnênah: “In lamlêt a, naupang tê ang in lo nih loh chuan, vân ramah in lût tawp lo vang,” a ti a. “Tupawh he naupang tê anga inngaitlâwm apiang, chu mi chu vân ramah chuan a ropui ber ang,” tiin a sawi zawm a ni. (Matthaia 18:3, 4) Isua chuan: “Inngaihlu apiang an tlâwm ang a; inngaitlâwm chu chawimawiin an awm ang,” tih dân bul chu a sawi a ni.—Luka 14:11; 18:14; Matthaia 23:12.
10. Eng zawhnate nge kan ngaihtuah ang?
10 Chu thu dik chuan zawhna pawimawh takte a chawk chhuak a. Chatuana nunna neih kan inbeiseina chu inngaihtlâwmna dik tak kan neih leh neih lohvah engemaw chen a innghat a; mahse, engvângin nge a châng chuan Kristiante’n inngaihtlâwm chu harsa an tih? Engvângin nge kan tân chapona chu dang bet a, fiahnate inngaitlâwm taka hmachhawn chu a harsat? Inngaihtlâwmna dik tak nei tûrin engin nge min ṭanpui ang?—Jakoba 4:6, 10.
Inngaihtlâwm A Harsat Chhan
11. Engvângin nge inngaitlâwm tûra theih tâwp kan chhuah a ngai chu a mak loh?
11 Inngaihtlâwmna lantîr harsa i tih chuan, nangmah chauh i ni lo. Kum 1920 khân, he magazine hian inngaihtlâwm a ṭûlna kawnga Bible thurâwn chu sawiin: “Lalpa’n inngaihtlâwmna a ngaihhlut nasatzia kan hriatna hian zirtîr dik zawng zawngte chu nî tina he mizia nei tûrin a fuih tûr a ni,” a ti. Tichuan, he thu tlang tak hian a zui a ni: “Hêng Bible fuihna zawng zawng a awm reng chung pawh hian, mihring ṭhat famkim lohna avângin Lalpa mi lo ni tate leh Lalpa kawng zawh tumte chuan inngaihtlâwmna neih chu thil dang zawng aiin harsa an ti zâwk niin a lang,” tiin. Chu chuan inngaitlâwm tûra Kristian dikte’n theih tâwp an chhuah a ngaih chhan pakhat chu a târ lang—mihring pianpui sualna hian a hlei a hluaka inchawimawi a châk vâng, tih chu. Chu chu mahni hmasialnaa tlu lût sual nei nupa tuak, Adama leh Evi te thlah kan nih vâng a ni.—Rom 5:12.
12, 13. (a) Engtin nge khawvêl hi Kristiante inngaihtlâwmna dâltu a nih? (b) Inngaihtlâwmna neih kan tumna chu tuin nge tiharsa lehzual?
12 Inngaihtlâwmna lantîr harsa kan tih nachhan dang leh chu, mi dangte aia chungnun tumna khawvêl mihringte hual vêla kan awm vâng a ni. He khawvêl thiltum tlânglâwn tak chu “tisa châkna [sual] te, mit châkna te, dam chhûng ropuina lem te” lama an châkna phuhhrûk hi a ni a. (1 Johana 2:16) Chûng khawvêl châknate thununa awm ai chuan, Isua zirtîrte chuan an mit tifîmin, Pathian duhzâwng tih chu an ngaihsak ber tûr an ni.—Matthaia 6:22-24, 31-33; 1 Johana 2:17.
13 Inngaihtlâwmna neih leh lantîr a harsat nachhan a pathumna chu, chapona bul ṭantu, Diabol-Setana’n he khawvêl hi a awp vâng a ni. (2 Korinth 4:4; 1 Timothea 3:6) Setana chuan a mize ṭha lote chu a chawisâng a. Entîr nân, Isua hnênah “khawvêl ram zawng zawng leh a ropuina” pêk tiamin, chibai bûkna neih a tum a. Inngaitlâwm reng Isua chuan Diabola thlêmna chu a hnâwl hmak a ni. (Matthaia 4:8, 10) Chutiang bawkin, Setana chuan Kristiante chu mahni ropuina zâwng tûrin a thlêm a. A thlêmnaa tlâwm aiin, Kristian inngaitlâwmte chuan Isua entîrna chu zuiin, chawimawina leh fakna chu Pathian hnênah an pe zâwk a ni.—Marka 10:17, 18.
Inngaihtlâwmna Dik Tak Neih leh Lantîr
14. Eng nge “inngaihtlâwmna der” chu?
14 Tirhkoh Paula chuan Kolossa mite hnêna a lehkha thawnah, mite hîp nâna inngaihtlâwmna der lantîrna laka invêng tûrin a vaukhân a ni. Chu chu Paula chuan ‘taksa ngaihnêp,’ a nih loh leh atîra ziakin a sawi angin “inngaihtlâwmna der” a ti a. A dera inngaitlâwmte chu thlarau mi an ni lo. Inchhuang takin an ‘intihveizia’ an lantîr zâwk a ni. (Kolossa 2:18, 23) Isua’n chûng ingaihtlâwmna dik lo entîrna chu a sawi a. Pharisai-te’n mi hmuh atâna an ṭawngṭaina leh ngui hmêl leh hmêl tipawra chaw an ngheina chu a dem a ni. Inkalh takin, mi mala kan ṭawngṭaina chu Pathian hmaa hlu tûr chuan inngaitlâwm taka ṭawngṭai a ngai a ni.—Matthaia 6:5, 6, 16.
15. (a) Thuhnuairawlh reng tûrin eng nge kan tih ang? (b) Inngaihtlâwmna kawnga entawn tûr ṭha ṭhenkhat chu engte nge ni?
15 Kristiante chu Pathian Jehova leh Isua Krista entîr inngaihtlâwmna ṭha ber ngaihtuahna hmanga inngaihtlâwmna dik tak vawng reng tûra ṭanpui an ni a. Chu mi tihnaah chuan Bible leh “bawi rinawm, fing tak” kal tlanga pêk Bible zirna ṭanpuitu thilte zir ziah a tel a ni. (Matthaia 24:45) ‘An rilru an unaute chunga an dah lohna tûrin,’ a nih loh leh an indah chungnun lohna tûrin chutianga zirna chu Kristian enkawltute tân a pawimawh hle. (Deuteronomy 17:19, 20; 1 Petera 5:1-3) An inngaihtlâwmna avânga malsâwmna dawngtu Ruthi te, Hani te, Elizabeti te, leh mi dang tam takte entawn tûr siam chu ngaihtuah rawh. (Ruthi 1:16, 17; 1 Samuela 1:11, 20; Luka 1:41-43) Davida te, Josia te, Baptistu Johana te, leh tirhkoh Paula te ang, Jehova rawngbâwlnaa mi challang tak leh inngaitlâwm takte entawn tûr ṭhate chu ngaihtuah bawk rawh. (2 Chronicles 34:1, 2, 19, 26-28; Sâm 131:1; Johana 1:26, 27; 3:26-30; Tirhkohte 21:20-26; 1 Korinth 15:9) Tûn laia Kristian kohhrana kan hmuh inngaihtlâwmnaa entawn tûr tam takte chu eng nge ni ve? Hêng entîrnate chhût ngunna chuan Kristian dikte chu “thuhnuairawlhnain inthuam” ṭheuh tûrin a ṭanpui ang.—1 Petera 5:5.
16. Engtin nge Kristian rawngbâwlna chuan inngaitlâwm tûra min ṭanpui?
16 Kristian rawngbâwlnaa tel ziahna pawhin inngaitlâwm tûrin min ṭanpui thei a. Thuhnuairawlhna chuan in tinah leh hmun danga kan tawn hmêlhriat lohte kan biak pawh hunah hlawhtling takin min biaktîr thei a ni. Chu chu in neitute’n a tîra Lalram thuchah ngaihsak lo tak emaw, chaltlai tak emawa an chhân lêt hunah a dik zual bîk ṭhîn. Kan thurinte chu mite’n an ringhlel fo va, inngaihtlâwmna chuan Kristiante chu an zawhnate ‘thuhnuairawlh tak leh ṭih dêk chunga’ chhâng tûrin a ṭanpui thei a ni. (1 Petera 3:15) Pathian chhiahhlawh inngaitlâwmte chuan bial tharahte insawnin, hnamzia hrang leh khawsak dân hrang mite chu an ṭanpui a. Chutianga rawngbâwltute chuan chanchin ṭha an hrilh duhnate an ṭanpui lehzual theihna tûrin ṭawng thar zir harsa tak chu inngaitlâwm takin an zir a ni. An va fakawm tak êm!—Matthaia 28:19, 20.
17. Eng Kristian mawhphurhnate’n nge inngaihtlâwmna phût?
17 Inngaihtlâwmna nên, mahni ṭhatna tûr aia mi dangte ṭhatna tûr dah pawimawh zâwkin, mi tam tak chuan an Kristian mawhphurhna chu an hlen a ni. Entîr nân, Kristian pa ber chuan a fate nên Bible zirna hlawhtling tak kaihruai tûra inpuahchah nân leh kaihhruai nâna a thiltihte aṭanga hun insiam tûrin inngaihtlâwmna a neih a ngai a. Inngaihtlâwmna chuan naupangte pawh ṭha famkim lo an nu leh pate chawimawi tûr leh an thuâwih tûrin a ṭanpui thei bawk a ni. (Ephesi 6:1-4) Ring lotu pasala nei nupuite chuan ‘ṭih dêk chunga an chêtze thianghlim’ hmanga an kawppuite hneh an tumna kawngah inngaihtlâwmna lantîr ngai dinhmunte chu an hmachhawn fo a ni. (1 Petera 3:1, 2) Nu leh pa dam lo leh tarte hmangaih taka kan enkawl hunah hian inngaihtlâwmna leh mahni hmasial lo hmangaihna chu a ṭangkai hle bawk.—1 Timothea 5:4.
Inngaihtlâwmna Chuan Buaina A Ching Fel
18. Engtin nge inngaihtlâwmna chuan buainate ching fel tûra min ṭanpui theih?
18 Pathian chhiahhlawh mihringte chu ṭha famkim lo vek an ni. (Jakoba 3:2) A châng chuan, Kristian pahnih inkârah inngeih lohna emaw, inhriat sualna emaw chu a awm thei a. Pakhat chuan mi dang sawisêl chhan tûr a nei pawh a ni mai thei. A tlângpui thuin, chutiang dinhmun chu he thurâwn zawmna hmanga chin fel theih a ni: “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u.” (Kolossa 3:13) He thurâwn zawm chu a awlsam lo va; mahse, inngaihtlâwmnain zâwm tûrin min ṭanpui ang.
19. Kan thin tirimtu kan biak hunah eng nge kan hriat reng ang?
19 A châng chuan Kristianin thupawi chu khuh bo mai theih ni lovah a ngai thei a. Chutiang a nih chuan, inngaihtlâwmnain amah chu pawi sawitu nia a hriat chu remna an neih leh nâna pan tûrin a ṭanpui ang. (Matthaia 18:15) Kristiante inkâra buaina a awm chhun zawm zêl chhan pakhat chu pakhat zâwk emaw, an pahnihin emaw an dik lohna pawm thei lo khawpa an chapo ve ve vâng a ni thei a. A nih loh leh a pantu zâwk chuan mahni intifel tak leh khirh takin a va pan pawh a ni thei. Inkalh takin, inngaihtlâwmna dik tak chu inngeih lohna tam tak ching fel tûrin a ṭangkai hle ang.
20, 21. Inngaihtlâwmna nei tûra ṭanpuitu ropui ber chu eng nge ni?
20 Inngaihtlâwmna nei chho tûra rahbi pawimawh ber chu Pathian ṭanpuina leh a thlarau dîl hi a ni. Mahse, “Pathianin . . . inngaitlâwmte erawh chu a khawngaihna [a thlarau thianghlim nên lam] a pe ṭhîn,” tih hre reng ang che. (Jakoba 4:6) Chuvângin, i rinpui nên inhriatsualna in nei a nih chuan, nangma lama sualna tê tham emaw, lian tham emaw engpawh chu inngaitlâwm taka pawm thei tûrin Jehova ṭanpuina dîl rawh. I rilru a nat a, a tinatuin tih tak zeta, “Ka thiam lo a ni,” a tih chuan inngaitlâwm takin ngaidam rawh. Chutia tih chu a harsa a nih chuan, i thinlunga chapona châm bâng engpawh hnawt bo tûrin Jehova ṭanpuina tih tak zetin dîl rawh.
21 Inngaihtlâwmnain a thlen hlâwkna tam tak hriat thiamna chuan he mize hlu tak hi nei a, vawng reng tûrin min chêttîr tûr a ni. Chu mi ti tûr chuan, Pathian Jehova leh Isua Kristaah chuan entawn tûr ṭha kan va nei tak êm! “Inngaihtlâwmna leh LALPA ṭih man chu sum te, chawimawina te, nunna te a ni,” tih Pathian thutiam hi theihnghilh ngai suh ang che.—Thufingte 22:4. (w05 10/15)
Chhût Ngun Tûr Thu Pawimawhte
• Tute nge inngaihtlâwmna kawnga entawn tûr ṭha berte chu?
• Engvângin nge inngaihtlâwmna chu neih a harsat?
• Engin nge inngaitlâwm tûrin min ṭanpuithei?
• Engvângin nge inngaitlâwm renga awm chu a pawimawh êm êm?
[Phêk 18-naa milem]
Isua chu a inngaitlâwm tak zet
[Phêk 20-naa milemte]
Inngeih lohnate chu hmangaihnaa inngaitlâwm taka khuh bo theih a ni fo
[Phêk 22-naa milemte]
Kawng tam takin Kristiante chuan inngaihtlâwmna an lantîr