Kan Pathian Jehova Hmingin Kan Lêng Ang
“Keini erawh, kan Pathian Jehova hmingin kumkhaw tlaitluanin kan lêng ang.”—MIKA 4:5, NW.
1. Nungchang chungchângah Nova hun laia dinhmun chu eng nge ni a, engtin nge Nova chu a danglam?
BIBLE-A Pathian nêna lêng dûn anga sawi hmasak ber chu Enoka a ni a. A pahnihna chu Nova a ni. A chanchin chhinchhiah chuan: “Nova chu mi fel tak a ni a, a dam rualpuite zîngah chuan sawisêlbo a ni: Nova chu Pathian nên an lêng dûn ṭhîn,” tih min hrilh a ni. (Genesis 6:9) Nova hun laia mi nâwlpuite chuan biakna thianghlim an pênsan tawh a. Vântirhkoh rinawm lote’n dân pangngai lo taka mihring hmeichhiate an pâwlna aṭanga lo piang, Nephilim tia koh “milianho,” a nih loh leh “mi hmingthangte” chuan, chûng hun lai dinhmun chu an tichhe zual a ni. Lei chu tharum thawhnaa a lo khat pawh chu a mak lo ve! (Genesis 6:2, 4, 11) Chutichung chuan, Nova chu sawisêlbovin a awm a, “felna thu hriltu” a ni bawk. (2 Petera 2:5) Pathianin nun chhanhim nâna lawng tuk tûra a hrilh khân, thuâwih takin “chutiang chuan . . . a ti a; Pathianin a hnêna thu a pêk zawng zawng ang ngei chuan a ti ta a.” (Genesis 6:22) Dik takin, Nova chu Pathian nên an lêng dûn a ni.
2, 3. Tûn lai hunah kan tân Nova’n eng entawn tûr ṭha tak nge a siam?
2 Paula’n Nova chu thuhretu mi rinawmte zîngah telhin, heti hian a ziak a ni: “Rinnain Nova chu thil lo la lang lote kawng thu-ah Pathian hrilha lo awmin, Pathian ṭih dêkin, a chhûngte chhandam nân lawng a tu a; chu chuanin khawvêl chu thiam loh a chantîr ta a, rinna avânga felna awm chu rochungtu a lo ni bawk a,” tiin. (Hebrai 11:7) Entawn tûr ṭha a va ni êm! Nova chuan Jehova thute chu a thleng famkim ngei dâwn tih a rin ngheh êm avângin, Pathian thupêk hlen nân a hun te, a tha leh zung te, leh a neih sum te a sêng a ni. Chutiang bawkin, tûn laia mi tam takte chuan he khawvêl sum leh pai lama hausak theihna hun remchângte chu hnâwlin, an hun te, tha leh zung te, leh an neih sumte chu Jehova thupêkte zawm nân an hmang a ni. An rinna chu a chhinchhiah tlâkin, chu chuan anmahni leh mi dangte chhandamna a thlen dâwn a ni.—Luka 16:9; 1 Timothea 4:16.
3 Thuziak hmasaa kan sawiho tâk, Nova pa Lameka pu, Enoka hun lai ang bawkin Novate chhûngkaw tân chuan rinna neih chu a harsa hle ngei ang. Enoka hun lai ang bawkin Nova hun lai chuan, betu dikte chu tlêm tê chauh an ni a—mi pariat chiahin rinna neiin, Tuilêtah an dam khawchhuak a ni. Nova chuan tharum thawhna leh nungchang bawlhhlawhna khawvêlah felna thu a hril a. Chu bâkah, tumahin tuilêt chu hmu ngai lo mah se, amah leh a chhûngte chuan khawvêl huap tuilêt atân inbuatsaihin, thing hmangin lawng lian tak chu an tuk a ni. An thiltih chu a lo thlîrtute tân chuan a mak ngei ang le.
4. Isua’n Nova dam rualpuite dik lohna eng nge a târ lan?
4 Ngaihventhlâk takin, Isua’n Nova hun lai a sawi khân, sual lian tak mah ni se, tharum thawhna te, sakhuana dik lo te, a nih loh leh nungchang bawlhhlawhna te chu a sawi lo. A sawi zâwk chu mite’n vaukhânna pêk an ngaihthahna chu a ni. Isua chuan, anni chu “Nova lawnga a luh nî thlengin an eiin an bâr a, nupui pasal an innei ṭhin,” a ti. Ei leh bâr, nupui pasal inneihah chuan sualna eng nge awm? “Dân pangngai” angin an nung mai a ni lâwm ni? Mahse, tui chu a lo lêt dâwn a, Nova chuan felna thu a hril a ni. A thusawi leh a nungchang chu an tân vaukhânna a ni tûr a ni na a le. Mahse, “tui a lo lêt a, an zaa a lâk bo vek hma loh chuan engmah an hre [duh] lo” a ni.—Matthaia 24:38, 39.
5. Nova leh a chhûngte chuan eng mizia nge an mamawh?
5 Chûng nîte han thlîr lêt chuan, Nova nun kawng zawh a finthlâkzia chu kan hmu a ni. Amaherawhchu, Tuilêt hmaa mi dang zawng zawng laka danglam bîk ni tûr chuan huaisen a ngai a. Nova leh a chhûngte tâna lawng lian tak tuk tûr leh a chhûnga ramsa chi tinrêng khung tûr chuan rin tlatna neih a ngai a ni. A châng chuan mi rinawm tlêm tête zînga ṭhenkhat chuan langsâr lo zâwka awm a, “dân pangngai” anga nun chu an duh ṭhîn em? Chutianga ngaihtuah zauh châng lo nei ta pawh ni se, an rinawmna chu an tichau lo. Nova rinna chuan kum tam tak hnuah Tuilêt ata chhandamna a thlen a, chu a chhel hun chhûng chu kan zînga tu tân pawh he khawvêla kan chhel ngai hun aiin a rei zâwk a ni. Mahse, Jehova chuan “dân pangngai” anga nungte leh chutih laia an hun pawimawhna hre duh lo zawng zawngte chungah ro a rêl a ni.
Tharum Thawhnain Mihringte A Tihrehawm Leh
6. Tuilêt hnu khân, eng dinhmun nge la awm cheu?
6 Tui a kâm hnu chuan, mihringte chuan bul an ṭan thar leh ta a. Mahse, mihringte chu an la ṭha famkim lo va, “mihring rilru ngaihtuahnate chu an naupan têt ata a sual” zawm zêl a ni. (Genesis 8:21) Chu bâkah, ramhuaiho chuan mihring tisa ang pu leh thei tawh lo mah se, an la phusa reng a. Pathian ngaihsak lohna khawvêla mihringte chuan khawvêl hi “mi sual thu thuin a awm” tih an lantîr thuai a, tûn lai ang bawkin, betu dikte chuan “Diabola ngamthlêmnate” chu an do a ngai a ni.—1 Johana 5:19; Ephesi 6:11, 12.
7. Engtin nge Tuilêt hnu khawvêlah tharum thawhna a lo nasat chhoh?
7 A lo berah pawh Nimroda hun aṭangin leilung chu tharum thawhnain a khat leh a. Mihring a pun chhoh avâng leh khâwl lama thiamnain hma a sâwn chhoh avângin, hun a liam rualin tharum thawhna pawh a pung chho zêl a ni. Atîrah chuan, ngûnhnâm te, fei te, thal leh thal ngul te, leh tawlailîr te hman a ni a. Tûn hnai kum zabi 20-na tîr lamah chuan, musket silai leh laipui te a lo lang a; tichuan, rifle leh silai lian dangte a lo lang a ni. Khawvêl Indopui I-na chuan râlthuam tharte a hmêlhriattîr ṭan a, chûngte chu thlawhna te, tank (râl beihna motor) te, tuihnuai lawng te, leh boruak hlauhawm tak te chu a ni. Chu indonaah chuan, hêng râlthuamte hian mi maktaduai têlte nunna a la a ni. Chu chu beisei loh a ni em? Ni lo ve.
8. Engtin nge Thu Puan 6:1-4 chu a thlen famkim?
8 Kum 1914-ah Isua chu Pathian vân lam Lalrama Lala ṭhuttîr a ni a, ‘Lalpa nî’ chu a inṭan a ni. (Thu Puan 1:10) Thu Puan bua hmuh inlârnaah, Isua chu Lal anga sakawr vâr chunga chuang anga hmuh a ni a. Mihringte hrehawm tawrhna entîrtu, sakawr chungchuang dangte’n an zui a ni. Chûng zînga pakhat chu sakawr sen chungah a chuang a, a hnênah chuan “lei ata inremna lâksak theihna leh mi inthahtîr theihna an pe a; tin, a hnênah khandaih lianpui an pe bawk a.” (Thu Puan 6:1-4) Chu sakawr leh a chunga chuang chuan indona a entîr a, khandaih lianpui chuan tûn lai râlthuam changkâng tak takte leh indonain thil a tihchhiat theihzia chu a entîr a ni. Chûng zîngah chuan mi a sîng têl nunna lâksak thei nuclear râlthuamte; chûng râlthuamte hmun hla tak taka tipuak tûra keng thei rocket-te; bâwlhlo changkâng tak tak leh natna hrik nei râlthuam te a tel a ni.
Jehova Vaukhânnate Kan Hria
9. Engtin nge tûn lai khawvêl leh Tuilêt hmaa khawvêl chu khaikhin a nih?
9 Nova dam laia Jehova’n mihringte a tihboral chhan chu Nephilim-ho awmtîr mi suaksualte tharum thawhna nasa tak vâng a ni a. Tûn laiah eng nge a nih ve? Nova dam lai aiin tharum thawhna a tlêm zâwk em? Tlêm zâwk lo ve! Chu bâkah, Nova dam lai ang bawk khân, tûn laia mite chuan an nî tin nuna buaiin, “dân pangngai” anga nun chu an tum a, vaukhânnate chu an ngaihsak lo a ni. (Luka 17:26, 27) Chutiang a nih chuan, Pathianin mihringte a tiboral leh dâwn tih rinhlelh chhan tûr a awm em? Awm lo ve.
10. (a) Bible hrilh lâwknaah eng vaukhânna nge pêk nawn fo a nih? (b) Tûn laia nun kawng finthlâk ber chu eng nge ni?
10 Tuilêt hma kum za têlah, Enoka chuan kan huna lo thleng tûr tihboralna chu a lo sawi lâwk a. (Juda 14, 15) Isua pawhin lo thleng tûr “hrehawm nasa tak” chungchâng chu a sawi bawk a ni. (Matthaia 24:21) Zâwlnei dangte’n chu hun chu an vaukhân bawk. (Ezekiela 38:18-23; Daniela 12:1; Joela 2:31, 32) Tin, Thu Puan buah, chu tihboralna hnuhnûng ber tûr chiang tak a sawi chu kan chhiar a ni. (Thu Puan 19:11-21) A mi mal angin, Nova chu kan entawn a, felna thu hriltute angin kan thawk bawk a. Jehova vaukhânnate chu kan ngaihsakin, hmangaih takin kan ṭhenawmte pawh chu chutianga ti ve tûr chuan kan ṭanpui a ni. Chuvângin, Nova angin Pathian nên kan lêng dûn a ni. Nung duh apiangte tân Pathian nêna lên dun zêl chu a pawimawh tak zet a. Nî tin nêksâwrna kan tâwk chung pawhin, engtin nge chu chu kan tih theih ang? Pathian thiltum hlen chhuahnaah rinna nghet tak kan neih a ngai a ni.—Hebrai 11:6.
Hun Buaithlâk Takah Pathian Nên Lêng Dûn Zêl Rawh
11. Eng kawngin nge kum zabi khatnaa Kristiante chu kan entawn?
11 Kum zabi khatnaah chuan, hriak thih Kristiante chu “Kawnga” mi anga sawi an ni a. (Tirhkohte 9:2) An nun kawng zawng zawng chu Jehova leh Isua Krista rinnaah a innghat a ni. An Pu nun kawng zawh chu an zui a. Tûn laiah pawh, Kristian rinawmte chuan chutiang bawk chuan an ti a ni.
12. Isua’n mak tak maia mipui a hrai puar hnu chuan eng thil nge thleng?
12 Rinna neih a pawimawhzia chu Isua rawngbâwl laia thilthlengah hian a lang. Ṭum khat chu, Isua’n mipa ṭhah 5,000 vêl chu mak tak maiin a hrai puar a. Mite chuan mak an tiin, an lâwm hle a. Mahse, a hnua thilthleng hi lo chhinchhiah teh. Heti hian kan chhiar a ni: “Mite chuan chhinchhiahna a tih chu an hmuh veleh, ‘He mi hi zâwlnei, khawvêla lo kal tûr kha a lo nih ngei hi,’ an ti a. Chutichuan amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a,” tiin. (Johana 6:10-15) Chu mi zân la la chuan hmun dangah a zin chhuak leh a ni. Isua’n lal nih a hnâwl avângin mi tam takin an lunghnual phah ngei a rinawm. Tihah chuan, lal ni tûrin a fing tâwk a ni tih leh mite mamawh phuhrûksak tûrin thiltihtheihna a nei tih a lantîr tawh si a. Mahse, chu chu Lal anga rorêl tûra Jehova hun ruat a la ni rih lo tlat. Chu bâkah, Isua Lalram chu leia mi tûr ni lovin, vâna mi tûr a ni.
13, 14. Eng thlîr dân nge mi tam takin an lantîr a, engtin nge an rinna chu fiah a nih?
13 Mahselangin, mipuite chuan Isua chu an zui tlat a, Johana sawi angin “dîl râlah” an va hmu a. Lala siam an tumna a hnâwl hnuah pawh engvângin nge an la zui reng le? Tam tak chuan tisa lam thlîr dân an neih chu lantîrin, Mosia hun laia thlalêra Jehova chhawmdâwlnate chu an sawi chhuak a. A awmzia chu Isua’n an tisa lam mamawh a phuhru zêl tûr a ni an tihna a ni. Isua’n an ngaihtuahna sual chu hriain, an ngaihtuahna thlâk tûra ṭanpui thei tûr thlarau lam thilte chu a zirtîr ta a. (Johana 6:17, 24, 25, 30, 31, 35-40) Chu chu an hriat chuan, ṭhenkhat chu an phunnawi a, a bîk takin: “Tih tak meuhvin, tih tak meuhvin ka hrilh a che u, Mihring Fapa tisa in ei a, a thisen in in bawk loh chuan, nangmahniin nunna nei hek lo che u. Tupawh ka tisa eia ka thisen in chuan chatuana nunna a nei tawh, tin, ni kin niah chuan ani chu ka kaitho vang,” tih tehkhin thu a sawi aṭangin an phunnawi lehzual a ni.—Johana 6:53, 54.
14 Isua tehkhin thute chuan mite chu Pathian nêna lên dun an duh tak zet leh zet loh lantîr tûrin a chêttîr fo ṭhîn a. He tehkhin thu pawh hi chutiang bawk chu a ni. Chu chu nasa taka chhân lêt a ni a. “Chutichuan a zirtîrte a ṭhen tam takin chu chu an hriatin, ‘Hei hi thu khirh tak a ni, tunge dawngsawng thei ang?’ an ti a,” tiin kan chhiar a ni. Isua chuan a thusawiin thlarau lama awmzia a neih hriat tum tûrin a hrilhfiah belh a. Ani chuan: “Tinungtu chu thlarau a ni, tisa chu engmahah a tlâktlai lo; in hnêna thu ka sawite hi thlarau a ni, nunna pawh a ni,” a ti. Chutichung pawhin, tam takin an ngaithla duh lo va, thuziak chuan: “Chu veleh chuan a zirtîrte a ṭhen tam tak an kal bo va, amah an pâwl leh ta lo,” a ti.—Johana 6:60, 63, 66.
15. Eng thlîr dân dik nge Isua hnungzuitu ṭhenkhatin an neih?
15 Nimahsela, Isua zirtîr zawng zawng chuan chutiang chuan an chhâng lêt lo. A zirtîr rinawmte chuan Isua thusawi chu an hre thiam chiah lo ngei mai a. Mahse, Isua an rinna chu a la ngai reng a ni. Chûng zirtîr rinawmte zînga pakhat Petera chuan: “Lalpa, tu hnênah nge kan kal ang? Nangin chatuana nunna thu i nei alâwm,” tia sawiin, a zirtîr rinawm zawng zawngte rilru chu a sawi chhuak a ni. (Johana 6:68) Rilru put hmang ṭha leh entawn tûr ṭha a va ni tak êm!
16. Engtin nge fiah kan nih mai theih a, eng thlîr dân dik nge kan neih ang?
16 Tûn laiah pawh, Isua zirtîr hmasate angin fiah kan ni ve thei a. Kan chungchângah chuan, Jehova thutiamte chu kan duh anga ranga a lo thlen loh avângin kan lunghnual a ni thei. Bible ṭanchhan kan thu leh hla chhuahtea Bible thu hrilhfiah chu hriatthiam harsa kan ti a ni mai thei. Kan Kristianpui pakhat nungchang chuan min tilunghnual a ni thei bawk. Chutiang thil leh a anpui thil dangte avânga Pathian nêna lên dunna bânsan chu a dik ang em? A dik hauh lo vang! Isua kalsantu zirtîrte chuan tisa lam thlîr dân an neihzia an târ lang a. An tih ang tih chu kan pumpelh tûr a ni.
‘Keini Zawng Hnungtawlh Pâwla Mi Kan Ni Lo’
17. Engtin nge Pathian nêna lêng dûn zêl tûra ṭanpui kan nih theih?
17 Tirhkoh Paula chuan: “Pathian Lehkha Thu zawng zawng hi Pathian thâwk khuma pêk a ni,” tih a ziak a. (2 Timothea 3:16) Jehova chuan Bible hmangin: “Hei hi kawng a nih hi, tah hian kal rawh u,” tiin chiang takin min hrilh a ni. (Isaia 30:21) Pathian Thu zawmna chuan ‘kan awm dâna fîmkhur’ tûrin min ṭanpui a. (Ephesi 5:15) Bible zirna leh kan thu zirte rilrua chhût ngunna chuan ‘thutaka awm reng’ tûrin min ṭanpui thei bawk. (3 Johana 3) Isua sawi angin, “tinungtu chu thlarau a ni, tisa chu engmahah a tlâktlai lo.” Kan ke pênte kaihruai tûra kaihhruaina rin tlâk awmchhun chu Jehova Thu, a thlarau, leh a inawpna pâwl te aṭanga lo kal thlarau lam kaihhruaina hi a ni.
18. (a) Mi ṭhenkhatin eng thil finthlâk lo nge an tih? (b) Eng ang rinna nge kan neih?
18 Tûn laiah chuan, tisa lam thlîr dân emaw, beiseina thleng famkim lo emawte avânga lungawi lote chu he khawvêlin a pêk theih thilte lamah an hawi châwk ṭhîn a. A hmanmawhthlâkzia an hriatna hlohvin, ‘ngaihven renga awm’ a ngaih chhan an hre lo va, Lalram hmakhua dah hmasak aiin mahni lâwmna mai an dah hmasa ta ṭhîn a ni. (Matthaia 24:14) Chutiang kawng zawh chu a finthlâk lo. Tirhkoh Paula thu hi chhinchhiah teh: “Keini zawng boral tûra hnungtawlh pâwla mi kan ni lo va; nunna humhim tûra rinna nei pâwla mi kan ni zâwk,” tih hi. (Hebrai 10:39) Enoka leh Nova angin, hun buaithlâk takah kan chêng a; mahse, anmahni ang bawkin Pathian nên kan lêng dûn a ni. Chutianga kan lên dun avângin, Jehova thiltum chu a lo thleng ngei dâwn a, suahsualna chu tihboral a ni dâwn a; tin, felna khawvêl thar a lo thleng dâwn tih beiseina nghet tak kan nei a ni. Chûng chu beisei tûr ropui tak a va ni êm!
19. Engtin nge Mika chuan betu dikte nun kawng chu a sawi?
19 Thâwk khum zâwlnei Mika thu chuan khawvêl hnamte chungchângah, anni chu “mahni pathian nên an lêng dûn ṭheuh vang,” a ti a. Chutah amah leh Pathian betu rinawm dangte chungchâng sawi lehin: “Keini erawh, kan Pathian Jehova hmingin kumkhaw tlaitluanin kan lêng ang,” a ti. (Mika 4:5, NW) I thiltum chu Mika tum nên a thuhmun a nih chuan, eng anga hun buaithlâk kârah pawh awm mah la, Jehova chu hnaih tlat rawh. (Jakoba 4:8) Kan zînga mi tinte duhzâwng chu chatuana, kumkhaw tlaitluana kan Pathian Jehova nêna lên dun ni rawh se! (w05 9/1)
Engtin Nge I Chhân Ang
• Nova hun leh tûn lai hun hian inanna eng nge a neih?
• Eng nun kawng nge Nova leh a chhûngte’n an zawh a, an rinna chu engtin nge kan entawn theih?
• Eng thlîr dân dik lo nge Isua hnungzui ṭhenkhatin an târ lan?
• Kristian dikte chuan eng tih nge an tum tlat?
[Phêk 30-naa milemte]
Nova hun lai ang chiahin, tûn lai mite chu an nî tin nunah an buai
[Phêk 31-naa milem]
Lalram thuhriltute kan nih angin, ‘keini zawng hnungtawlh pâwla mi kan ni lo’