Mi Rinawm Nih A Manhla Em?

“I HNATHAWH lai kha thlâk rawh. Tûna i thawhna company-ah hian i hlawh tlêm si. Hmun danga i thawh chuan i hlawh hnem zâwk daih ang,” tiin Mawia chuan a ṭhianpa a hrilh a.a

“Chu chu a dik mai thei. Mahse, tûna ka thawhna company-ah hian kum tam tak chhûng ka lo thawk tawh a. Hun kal tawhahte khân mi an ṭanpui nasa hle si a, an laka rinawm chu ka duh a ni,” tiin Liana chuan a chhâng a.

“Rinawmna chu mize ṭha tak a ni a. Mahse, i rinawmna avângin pawisa i chân phah a nih hi!” tiin Mawia chuan a chhâng a ni.

Mawia chuan a tidik hle. Tuemaw chunga rinawm tûr chuan pawisa sên pawh a ngai mai thei a. Hun te, tha leh zung te, leh rilrua tiam tlatna te a ngai bawk a ni. Rinawm nih chu a manhla em?

Nunpui Ai Maha Fak Hlawh

German rama Allensbach Opinion Research Institute-in ngaih dân a lâkkhâwmnaah chuan, a chhângtute zînga zaa 96 chuan rinawmna chu mize duhawm tak angin an thlîr a ni. A dawta kum 18 aṭanga kum 24 mite zînga ngaih dân lâkkhâwmna chuan chhângtu mi 3 zînga 2 te’n rinawmna chu an ngaisâng hle tih a târ lang a ni.

Rinawmna chuan fak hlawh hle mah se, mi rinawm nih chu thil hrang daih a ni. Entîr nân, Europe ram tam takah chuan, kawppuite emaw, chhûngkuaa mite emaw chuan rinawmna an lantîr mang meuh lo ṭhîn a. Ṭhiante pawh an rinawm ṭhîn lo. Tin, tûn hmaa hna thawktu leh an pute emaw, sumdâwngtu leh a dâwrtute emaw inkâra awm ṭhîn rinawmna chu a reh zo ta. Engvângin nge?

A châng chuan nuna buai philina chuan rinawmna neih ngai chi intiamna atân hun emaw, rilru chakna emaw a awmtîr mang meuh ṭhîn lo. Mihring inlaichînnaa beidawng tawhte chuan tûnah chuan mi dangte chunga rinawm chu an hreh tawh mai thei a. Mi dangte chuan rinawmna neih ngai lo ni khat lek daih nun kawng chu an duh zâwk mai thei bawk.

A chhan chu engpawh lo ni se, rinawmna chu nunpui ai maha fak hlawh zâwk mize ṭha a ni. Chuvângin, hêng zawhnate: Mi rinawm nih a manhla em? A manhla a nih chuan tu chunga rinawm nge kan bat a, eng kawngtein nge? Rinawmna hlâwknate chu engte nge ni?, tihte chu i lo ngaihtuah ang u. (w05 9/1)

[Footnote]

[Phêk 3-naa thu lâk chhuah]

Rinawmna chu nunpui ai maha fak hlawh zâwk mize ṭha a ni