Inhmêlmâkna Khawvêla Ngilneihna Um
“Mi a duhthusâm chu a ngilneih dân tehna a ni.”—THUFINGTE 19:22.
1. Engvângin nge ngilneihna lantîr chu thil harsa tak a nih theih?
MI NGILNEI tak niin i inhria em? I inhriat chuan, tûn lai khawvêla nun chu a harsa hle ang. Bible chuan ngilneihna chu “thlarau rah” zînga mi angin a sawi ngei mai a; mahse, engvângin nge Kristiante awmna ramahte pawh ngilneihna lantîr chu a harsat êm êm le? (Galatia 5:22) Thuziak hmasaa kan hriat tawh angin, a chhânna ṭhenkhat chu tirhkoh Johana’n khawvêl pum pui hi ngilnei lo tak thlarau pakhat, Diabol-Setana thununin a awm a tihah hian kan hmu thei a ni. (1 Johana 5:19) Isua Krista chuan Setana chu “khawvêl lal” angin a sawi a. (Johana 14:30) Chuvângin, he khawvêl hian inhuatna mize nei, hel hmang a lal mizia chu a la a ni.—Ephesi 2:2.
2. Eng thilte hian nge ngilneihna kan lantîrna chu nghawng thei?
2 Mi dangin ngilnei lo taka min cheibâwl hunah nasa takin kan tuar a ni. Ngilneih lohna chu mi elsên hmang ṭhenawmte, mi nêlawm lo tak mi hrangte, leh a chânga a sawhkhâwk ngaihtuah hlek lova thiltih chîng ṭhiante leh chhûngkaw zînga mite aṭang pawhin a lo lang thei a. Mi hawihhâwm lo, vîn chîng tak, leh âng buan buante nêna indâwrna chuan lungngaihna a thlen ṭhîn. Mi dangin chutiang ngilneihna an thlâkchhamna chuan keini ngei pawh mi dang huat duhna min neihtîr theiin, ngilnei lohna chu ngilneih lohna vêka thungrulh duhna min neihtîr thei bawk a ni. Chutiang rilru put hmang chuan thlarau lam leh tisa lama hrisêl lohna a thlen thei a ni.—Rom 12:17.
3. Ngilneihna lantîr an duhna fiahtu eng harsatna nasa tak nge mite’n an tawn?
3 Lungngaihna khawvêl pawhin ngilneihna lantîr chu a tiharsa thei a. Entîr nân, firfiaka cheho hlauhna leh an thiltih te, ram hrang hrangin nuclear emaw, natna hrik ralthuam (biological weapons) emawte an hman mai hlauhna te avângin mi nâwlpui chu an lungngai a. Chu bâkah, mi maktaduai tam tak chu rethei takin an khawsa a, ei tûr, chênna tûr, silh leh fên tûr, leh damdawi lama inenkawlna tûr nei ṭâwk ṭâwkin an nung a. Beisei a bo hian ngilneihna ûm chu a harsa hle a ni.—Thuhriltu 7:7.
4. Mi dangte chunga ngilneihna lantîr chungchâng an ngaihtuah hunah, miin eng thutâwp dik lo nge a siam mai theih?
4 Miin ngilneihna lantîr chu thil pawimawh lo leh chak lohna hriltu ang hialah a ngai mai thei a. A bîk takin, mi dangin ngaihtuahna nei miah lova an cheibâwl hunah, dik lo taka cheibâwl niin a inhre thei a ni. (Sâm 73:2-9) Amaherawhchu, Bible chuan: “Chhâna nêmin [“thuhnuairawlh taka chhânnain,” NW] thinur a tikiang ṭhîn a, ṭawng huatthlala erawh chuan thinur a chawk tho ṭhîn,” tiin kaihhruaina ṭha tak min pe a. (Thufingte 15:1) Thuhnuairawlhna leh ngilneihnate chu thlarau rah chi hnih, inkûngkaih tlat a ni a, dinhmun harsa leh khirh tak hmachhawn a nih hunah a ṭangkai a ni.
5. Ngilneihna neih a ngaihna nun kawng ṭhenkhatte chu engte nge?
5 Kristiante kan nih angin, Pathian thlarau rah lantîr chu thil pawimawh tak a nih avângin, hêng mize zînga pakhat—ngilneihna—kan lantîr theih dân chu kan ngaihtuah tûr a ni. Inhmêlmâkna khawvêlah hian ngilneihna ûm chu thil theih a ni em? Thil theih a nih chuan, a bîk takin dinhmun hrehawmah hian kan ngilneihna chu Setana kan indantîr lo tih kan lantîr theihna thil ṭhenkhat chu engte nge ni? Chhûngkuaah te, hnathawhnaah te, school-ah te, kan ṭhenawmah te, kan rawngbâwlnaah te, leh kan rinpuite hnênah te ngilneihna kan ûm theih dân kawng lo ngaihtuah ila.
Chhûngkaw Zînga Ngilneihna
6. Engvângin nge chhûngkuaa ngilneihna hi a pawimawh êm êm a, chu chu engtia lantîr theih nge ni?
6 Jehova malsâwmna leh a kaihhruaina dawng tûr chuan, thlarau rah chu a pawimawh a, ṭha taka chhawmnun pawh a ngai bawk a ni. (Ephesi 4:32) Chhûngkaw zînga mite ngilneihna inlantîr tawn a ngaih chhan lo thlûr bing ta ila. Nî tina an indâwrnaah, nupui leh pasal chuan ngilneihna an lantîr tawn tûr a ni a, an inngaihsak tawnin, an fate pawh an ngaihsak bawk tûr a ni. (Ephesi 5:28-33; 6:1, 2) Chutiang ngilneihna chu chhûngkaw inbiak pawhnaah a lang tûr a ni a, naupangte’n an nu leh pate an zahin an chawimawi ang a, nu lah pate chuan an fate ṭha takin an cheibâwl tûr a ni bawk. Fak nghâl vat ṭhîn la, thiam loh chantîr nghâl ṭhîn suh.
7, 8. (a) Chhûngkuaa ngilneihna dik tak lantîr tûr chuan, eng ang nungchang nge kan pumpelh ngai? (b) Engtin nge inbiak pawhna ṭhain chhungkaw inzawmna nghet nei tûra a ṭanpui? (c) Engtin nge i chhûngkuaah ngilneihna chu i lantîr theih?
7 Chhûngkaw zînga mite chunga ngilneihnaah chuan, tirhkoh Paula fuihna: “Nangni pawhin hêng zawng zawng, tauhna te, thinurna te, huatna te, sawichhiatna te, in kaa chhuak ṭawng zahmawh te hi tibo rawh u,” tih thu zawm pawh a tel a. Kristian chhûngkuate chu nî tin inzah tawnna neiin an inbe pawp tûr a ni. Engvângin nge? Inbiak pawhna ṭha chu chhûngkaw nghet leh nuam tak awmtîrtu ber a nih vâng a ni. Chhûngkuaa lungrual lohna a lo awmin, buaina chu tihnêp tum la, inhnialnaa hneh tum ai chuan buaina chinfel chu tum zâwk rawh. Chhûngkaw hlim chuan ngilneihna leh inngaihsak tawnna awm tûrin a thawkrim a ni.—Kolossa 3:8, 12-14.
8 Ngilneihna chu a ṭha a, mi dangte chungah thil ṭha tih duhna min neihtîr a. Chuvângin, inrem takin chhûngkaw zînga mi dangte tâna ṭangkai tak, mi ngaihsak tak, leh ṭanpuitu nih chu kan tum a ni. Chhûngkua tihming ṭha thei ngilneihna lantîr tûr chuan, mi mal leh a huhova thawh tlân a ngai a ni. Chutianga an tih chuan, Pathian malsâwmna an dawn bâkah, kohhranah leh tualchhûngah ngilneihna Pathian Jehova chu an chawimawi dâwn a ni.—1 Petera 2:12.
Hnathawhna Hmuna Ngilneihna
9, 10. Hnathawhna hmuna buaina chhuak thei ṭhenkhat sawi la, ngilneihna nêna chinfel dân sawi bawk rawh.
9 Kristiante tân chuan, nî tin hun neia hnathawh chuan hnathawhpuite hnêna ngilneihna lantîr tûrin harsatna a siam mai thei a. Hnathawktute inkâra inîtsîkna chuan hnathawhpui pakhatin bumna emaw, vertherna emaw hmanga pute hmaa a thawhpui hming a tihchhiat avângin, hnathawh lai min chântîr thei a ni. (Thuhriltu 4:4) Chutiang hunah chuan ngilneihna lantîr chu a awlsam lo hle. Nimahsela, ngilneihna chu mize lantîr âwm a ni tih hre chhuakin, Jehova chhiahhlawh chuan thurualpui harsâte pawh a theih chen chen thurualpui a tum tlat tûr a ni. Ngaihsakna lantîrna chuan chutianga ti tûrin min ṭanpui mai thei. I hnathawhpui emaw, a chhûngte emaw an dam loh chuan ngaihsakna i lantîr thei a. An dinhmun zawhna mai pawh chuan a chungah nghawng ṭha a nei thei a ni. Ni e, Kristiante chuan anmahni lamah tal remna leh inlungrualna siam an tum tlat tûr a ni. Engemaw châng chuan, ngaihsakna leh ngaihvenna lantîrtu ṭawngkam ngilnei tak chuan dinhmun chu a tiṭha sauh thei a ni.
10 Hun dangah chuan, hnathawhna pu ber chuan a hnathawktute chu a ngaih dân pawm luihtîrin, mi tinte chu hnam chawimawina hunserh emaw, Pathian thu nêna inmil lo thiltih emawa teltîr chu a duh mai thei. Kristian chhia leh ṭha hriatnain rem a tih loh chuan, chu chuan pu ber hmachhawn pawh a ngaihtîr thei a ni. Chutiang huna pu ber duhzâwng zui a dik lohzia chipchiar taka hrilhfiah chu a finthlâk lo vang. Tihah chuan, Kristian rinna ṭâwmpui lote tân chutiang thiltiha tel chu thil dik a ni thei si a. (1 Petera 2:21-23) A mi mala i tel loh chhan chu ngilnei takin i hrilhfiah a ni thei a. Ṭawngelna chu ṭawngelna vêkin thungrûl suh. Kristian tân Rom 12:18-a thurâwn hi zui a ṭha: “A theih phawt chuan nangmahni lam tal, mi zawng zawng nên inremin awm rawh u,” tih hi.
School-a Ngilneihna
11. School kalpuite hnêna ngilneihna lantîrna kawngah naupangte’n eng harsatna nge an hmachawn?
11 Naupangte tân an school kalpuite chunga ngilneihna lantîr chu harsa tak a ni thei. Anni chuan an pâwl rualpuite zînga len chu an duh a. Mipa ṭhenkhat chuan mi dangte ngaihsân hlawh nân an inti pain, school-a an ngamzâwngte chu an sawisa hial ṭhîn a ni. (Matthaia 20:25) Ṭhalai dangte erawh chuan mi dangte ngaihsân hlawh nân school thiltih infiamna lam, a nih loh leh thil dangahte an thiamna lantîr an duh a. An thiamnate lantîrin, an pâwl rualpuite leh school naupang dangte chu ngilnei lo takin an cheibâwl a, chûng an thiamnate chuan mi dang aiin engemaw ti takin a tichungnung zâwkah an ngai a, an ngai sual hle a ni. Kristian naupang chu chutiang mite entawn lo tûrin a fîmkhur tûr a ni. (Matthaia 20:26, 27) Tirhkoh Paula chuan “hmangaihnain a dawhthei a, ngil a nei bawk” a, hmangaihna chu “a infak lo va, a uang lo,” a ti. Chuvângin, Kristian chuan chûng ngilnei lo taka thiltih hmangte entawn lo tûrin mawhphurhna a nei a, school kal rualpuite a dâwrnaah Pathian Lehkha Thu fuihnate a zâwm tlat zâwk tûr a ni.—1 Korinth 13:4.
12. (a) Engvângin nge naupangte tân zirtîrtute chunga ngilneihna lantîr chu thil harsa tak a nih theih? (b) Ngilneihna lantîr lo tûra nawr an nihin, naupangte’n tu ṭanpuina nge an beisei theih?
12 Naupangte chuan an zirtîrtute chu ngilnei takin an cheibâwl tûr a ni bawk. School naupang tam tak chuan, an zirtîrtute chhaih thinur chu nuam an ti a. School dân bawhchhiatna hmanga zirtîrtute an zah lohzia an lantîr theih hian fing taluaah an inngai ṭhîn a ni. Chûng mite chuan mi dangte vauna hmangin, thlâwptu an hmu mai thei. Kristian naupangte’n an thlâwp duh loh hian, nuihzat emaw, dêu sawh emaw, sawisak emaw an ni thei a ni. School kal chhûnga chutiang dinhmunte hmachhawnna chuan Kristiante ngilneihna lantîr tumna chu a fiah a. Mahse, Jehova chhiahhlawh rinawm tak nih a pawimawhzia chu theihnghilh suh ang che. Hêng harsatna hun chhûng hian Pathianin a thlarau hmangin a ṭanpui ang che tih chu ring tlat rawh.—Sâm 37:28.
Ṭhenawmte Hnêna Ngilneihna
13-15. Engin nge ṭhenawmte chunga ngilneihna lantîrna chu dang chat thei a, engtin nge he harsatna hi hmachhawn theih a nih?
13 In mal dinah emaw, chhûngkaw tam tak chênna in lianah emaw khawi hmunah pawh khawsa mah la, ṭhenawmte hnêna ngilneihna leh an hmakhua i ngaihtuahzia lantîr theihna kawng chu i ngaihtuah chhuak thei a. Hei pawh hi thil awlsam a ni lo.
14 I hnam, i chi, a nih loh leh i sakhuana avângin i ṭhenawmin haw ta che sela, engtin nge i tih ang? I chungah hawihhâwm loh châng neiin, ngaihthah ṭhak ta che sela, engtin nge i tih ang? Jehova chhiahhlawh anga a theih ang chena ngilneihna lantîr chu a ṭangkai hle ang. Chutianga i tih chuan, mi tihahdam thei tak mi danglam bîk tak anga hriat i lo ni ang a, chu chu ngilneihna kawnga entawn tlâk ber, Jehova fakna a ni dâwn a ni. I ngilneihna avângin i ṭhenawm chuan engtikah nge a rilru a thlâk dâwn tih i hre lo. Ani chu Jehova faktu a lo nih phah hial thei bawk a ni.—1 Petera 2:12.
15 Engtin nge ṭhenawmte hnêna ngilneihna lantîr theih a nih? Kawng khat chu, chhûngkaw zînga mi zawng zawngin thlarau rah lantîrna hmanga entawn tlâk nungchang lantîr hi a ni. Chu chu ṭhenawmte’n an lo hre thei a. A chângin, i ṭhenawm tân thil i tihsak thei mai thei a. Ngilneihna tih chu mi dangte ṭhatna tûr tih tak zeta ngaihsakna lantîr hi a ni tih hre reng rawh.—1 Petera 3:8-12.
Kan Rawngbâwlnaa Ngilneihna
16, 17. (a) Engvângin nge kan rawngbâwlnaah ngilneihna neih a pawimawh êm êm? (b) Thlawhhma rawngbâwlnaah engtin nge ngilneihna chu chi hrang hranga lantîr theih a nih?
16 Mi an inah te, an hnathawhna hmunah te, leh vântlâng hmunah te hmuh kan tuma theihtâwp kan chhuah hunah, ngilneihna chu kan Kristian rawngbâwlna ze pui ber a ni tûr a ni a. Engtik lai pawha ngilnei reng, Jehova ai kan awh a ni tih chu kan hre reng tûr a ni.—Exodus 34:6.
17 I rawngbâwlnaa ngilneihna lantîr tûra ṭan i lâknaah hian engte nge tel? Entîrna atân, kawtthlêra thu i hrilh hian, hawihhâwmna leh tawi fel taka sawina hmangin ngilneihna i lantîr thei a. Kea kalna kawngahte chuan mi an tam theih avângin, mi kalna dâl lo tûrin fîmkhur ang che. Chu bâkah, dâwr nghâktute chuan an mahni dâwrtute an ngaihsak a ngai tih hre rengin, dâwr hmuna thu i hrilh hian, tawifel taka sawina hmangin ngilneihna lantîr ang che.
18. Kan rawngbâwlnaa ngilneihna lantîrna kawngah remhriatna chuan eng hmun nge a chan?
18 In tin kala rawngbâwlnaah hian remhriatna hmang la. Nî khua a ṭhat vak loh phei chuan, leng rei suh ang che. I awm avânga miin nuam a tih loh emaw, a nin emaw hian, chu chu i lo hre thei em? In awmna ramah chuan, Jehova Thuhretute’n mi an tlawh zing hle pawh a ni thei. Chutiang a nih chuan, a bîka ngaihsakna lantîr la, eng lai pawhin ngilneiin nêlawm reng ang che. (Thufingte 17:14) In neituin mi a ngaihthlâk theih loh chhan a sawi chu pawmpui thlap rawh. Nakin lawkah, chu in chu i Kristian unaupa emaw, unaunu emaw chuan a va tlawh leh thuai dâwn tih hre reng ang che. Hawihâwm lo tak tuemaw i tawng a nih chuan, ngilneihna lantîr chu tum hrâm hrâm rawh. I aw ki sânin, hmêl dur hmuh suh la; zai dam takin ṭawng zâwk ang che. Kristian ngilnei tak chuan in neitu nêna inhnialbuai chu a duh lo a ni. (Matthaia 10:11-14) Engtik nîah emaw chuan, chu mi chuan chanchin ṭha chu a ngaithla duh mai thei a ni.
Kohhran Inkhâwmnaa Ngilneihna
19, 20. Engvângin nge kohhranah ngilneihna lantîr a ngaih a, chu chu engtia lantîr theih nge ni?
19 Rinpuite hnêna ngilneihna lantîr chu a pawimawh nêp bîk lo. Khawvêl pum inunaunaa kan tel avângin, kan indâwr tawnnaah ngilneihna lantîr a pawimawh a ni.
20 Kingdom Hall chu kohhran pakhat, pahnih, a nih loh leh a aia tamin an inṭâwm chuan, kohhran danga mite ngilnei taka dâwr chu a pawimawh a, anni chu zahawm takin dâwr ang che. Inkhâwm hun ruat hunah leh tihfai emaw, sak ṭhat emaw a mamawh hunah inelna rilru chuan thawhho a tiharsa a ni. Ngaih dân a inmil loh châng pawhin, ngilneihna leh mi dang ngaihtuahna lantîr rawh. Hetianga kan tih hian ngilneihna chuan a hneh ang a, mi dangte ṭhatna tûr i ngaihtuahna chu Jehova chuan mal a sâwm ngei ngei ang.
Ngilneihna Lantîr Zêl Rawh
21, 22. Kolossa 3:12 nêna inmilin, eng nge kan tum tlat tûr?
21 Ngilneihna chu kan kawng engkim nghawngtu a ni a. Chuvângin, kan Kristian miziaah a pawimawh pâwl kan nihtîr tûr a ni. Mi dangte chunga ngilneihna lantîr chu tihṭhanah kan nei tûr a ni bawk.
22 Nî tinin, mi dangte chungah ngil nei ila, tirhkoh Paula thu hi i nunpui ṭheuh ang u: “Pathian mi thlan, mi thianghlim leh duh takte angin lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u,” tih chu. (w04 4/15)
I Hre Chhuak Em?
• Engin nge Kristian tân ngilneihna lantîr tiharsa?
• Engvângin nge chhûngkuaa ngilneihna lantîr chu a pawimawh?
• Engin nge school-ah te, hnathawhnaah te, leh ṭhenawmah te ngilneihna lantîr chu tiharsa?
• Kristiante’n an rawngbâwlnaa ngilneihna an lantîr theih dân hrilhfiah rawh.
[Phêk 26-naa milem]
Chhûngkaw zînga mi tinte lantîr ngilneihna chuan inpumkhatna leh thawhhona a awmtîr
[Phêk 27-naa milem]
I hnathawhpui emaw, a chhûngte emaw an dam lohvin, ngilneihna i lantîr thei
[Phêk 28-naa milem]
Jehova’n nuihsawh tuar reng chunga ngilneihna lantîrte chu a ṭanpui
[Phêk 29-naa milem]
Ṭhenawm ṭanpui ngaite ṭanpui chu ngilneihna thiltih a ni