Chhiartute Zawhna

Tuilêt hnu khân, Nova’n ṭhuro a thlawh chhuahtîr a, ṭhuro chu “olive hnah” puin a lo kîr leh a ni. Ṭhuro chuan khawia hnah nge a va hmuh?

Bible chuan “lei chungah hian tui chu nasa takin a lo pung a; vân hnuaia tlâng sâng zawng zawngte a pil zo ta vek a,” tih min hrilh a. (Genesis 7:19) Tui a kâm hnu chuan Nova chuan kâr khat zêl danah ṭum thum lai ṭhuro a thlawh chhuahtîr a ni. A vawi hnihnaah chuan, ṭhuro chuan “a hmuiah chuan oliv hnah tihthlawn hlim a rawn pu a: chutichuan Nova chuan leiah tui a tlêm ta tih a hre ta a.”​—Genesis 8:​8-11.

Tûnah hian, Tuilêtin leilung pianhmang a tihchhiat nasat êm avângin, leilung khawi emaw lai bîk tuiin a chîm reizâwng chiah chu hriat theih a ni lo. Mahse, khawvêl hmun tam zâwk chu thing tam tak a thih ṭhak thlenga reiin tuiin a chîm a nih hmêl hle a ni. Mahse, tui a kâm hnu chuan, thing ṭhenkhat chu rawn nung chhuak lehin, a rawn chawr chhuak leh niin a lang.

Olive thing chungchângah, The New Bible Dictionary chuan heti hian a sawi: “Kih thlûk a nih chuan a zung aṭangin a rawn chawr chhuak leh a, chuta ṭang chuan kungpui panga lai pawh a rawn ṭo chhuak thei a ni. Olives thing thi lek lek tawhte pawh hetiang hian a rawn ṭo tlângpui ṭhîn,” tiin a sawi. The New Schaff-Herzog Encyclopedia of Religous Knowledge chuan olive thing “nunna chu tihboral theih loh ang tluk a ni,” a ti. Tûn laia mi tumah hian tuilêt alzâwng leh satzâwng te chu a kimchangin an hre thei lo va. Chuvângin, olive thing leh thlai hring dangte chunga nghawng a neih dân tûr chu kan hre chiang thei lo a ni.

Mahse, ram olive chu hmun vâwt tak tak, tlângsâng hmun angahte a nung thei lo va. Meter 1,000 aia hniam, a lumzâwng degree Celsius 10 chung lamah a ṭo tlângpui a ni. “Chuvângin, Nova chuan hnah tharlâm tak mai a hmuh aṭangin phaizâwlte pawh tuiin a chîm tawh lo a ni tih a hre thei a ni,” tiin The Flood Reconsidered tih lehkhabu chuan a sawi. Chawlhkâr khat hnua Nova’n ṭhuro a thlawh chhuahtîr leh chuan, a lo kîr ta lo va, chu chuan hnim hring tam zâwkte pawh a awm tawh a, ṭhuro tâna riahna tûr hmun pawh a awm tawh a ni tih a târ lang a ni.​—Genesis 8:12. (w04 2/15)